༄༅།།ལོ་རྒྱུས་མེ་ལོང་རང་གསལ།
 
༄༅།།བོད་ཀྱི་བུད་མེད་སྲིད་གཉིར་བ་བ་ཆེན་པོ་འབྲོ་བཟའ་ཁྲི་མ་ལོད།
སྤེལ་དུས། 2009-02-06    ཡོང་ཁུངས་།    རྩོམ་པ་པོ། ཡེ་ཤེས་མགོན་པོས་བཤུས།

       འབྲོ་བཟའ་ཁྲི་མ་ལོད་ནི་སྤྱི་ལོ༦༥༣པའི་ཡས་མས་སུ་འཁྲུངས་ཤིང་།ན་སོན་དུས་བོད་རྒྱལ་མང་སྲོང་མང་བཙན་གྱི་བཙུན་མོ་མཛད།སྤྱི་ལོ༦༧༩ལོར་རྒྱལ་པོ་མང་བཙན་དང་ཁོང་མོ་གཉིས་ཀྱི་སྲས་སུ་འདུས་སྲོང་མང་པོའི་རྗེ་རླུང་ནམ་འཕྲུལ་གྱི་རྒྱལ་པོ་སྒྲགས་ཕུར་བལྟམས།རྒྱལ་སྲས་མ་བལྟམས་པའི་སྔོན་ཞག་བདུན་གྱི་སྔ་རོལ་དུ་ཡབ་མང་སྲོང་མང་བཙན་འདས་ཤིང་རྒྱལ་སྲིད་ཀྱི་ཐས་ལ།འབྲོ་བཟའ་ཁྲི་མ་ལོད་རང་ཉིད་གཙོ་བོ་བྱས་ནས་མགར་གཉན་ལྡེམ་བུ་དང་རས་ཏ་རེ་ཁོང་ལོད་བཅས་ཀྱིས་སྲིད་སྐྱོངས་ཏེ་རྒྱལ་སྲིད་མ་ཉམས་པར་བརྟན་པ་བསྲུངས།རྒྱལ་སྲས་འཁྲུངས་མ་ཐག་ནས་ལོ་གསུམ་ལ་མ་སླེབས་པར་ཡ་གཤེས་པ་གསང་བའི་ཚུལ་མཛད།སྲས་དགུང་ལོ་ཆུང་བའི་དུས་་སུ་ཆབ་སྲིད་ཀྱི་འགན་དབང་ཁོ་མོས་བཟུང་སྟེ་བཀོད་འདོམས་མཛད་པ་དང་།ཞང་ཞུང་དང་འཞའི་ཡུལ་གཉིས་ཀྱི་ཚོ་བ་འགས་ངོ་ལོག་བྱས་པ་བཅོས་སྟེ་མངའ་འོག་ཏུ་བསྡུས།དགའ་པོ་དང་རྩང་ཆེན་དུ་ཟིང་འཁྲུག་བསླངས་པ་ཡང་བཅོམ་ནས་རྒྱལ་སྲིད་གནོད་པ་མ་ཐེབས།ལྷག་པར་ཁོ་མོས་རང་རྒྱལ་སྲས་ཀྱི་སྐུ་སྲུང་དུས་ཀུན་ཏུ་མཛད་དེ་རྒྱལ་སྲས་ན་སོན་རྗེས་སྲིད་དབང་སྤྲད།དེའི་སྐབས་སུ་ཁོང་མོ་གཙོར་བྱས་བློན་པོ་དག་གིས་ཕྱིར་དམག་དྲངས་ཏེ་ཡུལ་མཚམས་བརྟན་སྲུང་གི་ལས་རྒྱ་ཆེར་སྤེལ་བ་སྟེ་དེང་སང་གི་ཡུན་ནན་ཞིང་ཆེན་གྱི་འཇང་ཡུལ་དབང་དུ་བསྡུས་པ་དང་།ནང་ཁུལ་བདེ་འཇགས་ཀྱི་ཆེ་དུ་ཞི་མཐུན་གྱི་གཉེན་འབྲེལ་བཙུགས།སྤྱི་ལོ༦༨༨ལོར་བཙན་པོའི་སྲིང་མོ་ཁྲི་མོ་སྟེངས་ཞེས་པ་དྭགས་ཡུལ་དུ་གནས་ལ་བརྫངས་ཤིང་།དེའི་ཕྱིར་བཙན་པོ་ཁྲི་སྟེངས་ཞེས་པའང་འ་ཞིའི་རྗེས་ལ་བཙུན་མོར་བསྐྱལ།མགར་གྱི་བུ་འབྲིང་བ་མགར་ཁྲི་འབྲིང་བཙན་བྲོད་ཀྱིས་མགར་སྟོང་བཙན་གྱི་བློན་གནས་མཐུད་བཟུང་བྱས་ཏེ་སྲིད་དོན་ལ་མཛད་འབྲས་ཆེན་པོ་ཐོབ་ནས་གཟེངས་བསྟོད་ཆེན་པོ་ཐོབ།དེའི་བུ་རྒྱུད་རྣམས་ལས་འགའ་ཞིག་ང་རྒྱལ་གྱིས་ཁེངས་པས།འབང་རྣམས་འཇིགས་ཤིང་བཙན་པོར་ལྟ་སྣང་དུ་གུས་པ་ལས་དོན་ལྡན་དུ་དེ་ཙམ་མི་བྱེད་པ་དང་།རྗེ་བློན་དག་གིས་མགར་གྱི་བུ་རྒྱུད་ལས་ཁེ་དྲགས་ཆེ་རིགས་ཁ་ཤས་ཚར་བཅད་པ་དང་རྒྱང་ཕུད་བཏང་སྐད།རྒྱལ་སྲས་འདུས་སྲོང་མང་པོ་རྗེར་མཆིམས་བཟང་བཙན་མོ་རྟོག་གེ་ཁབ་ཏུ་བཞེས་བཅུག་ནས་རྒྱལ་སྲིད་ཁྲི་ལྡེ་བརྟན་མེས་ཨག་ཚོམ་ཅན་སྤྱི་ལོ༦༩༨ལོར་འཁྲུངས། སྤྱི་ལོ༧༠༤ལོར་འདུས་སྲོང་མང་པོ་རྗེ་འཇང་ཡུལ་དུ་དམག་ཐོག་ནས་སྐུ་གཤེགས་རྗེས་རྒྱལ་ཡུམ་འབྲོ་བཟའ་ཁྲི་མ་ལོད་ཀྱིས་ཡང་དུ་རྒྱལ་ཚ་ཁྲི་ལྡེ་གཙུག་བརྟན་དགུང་ལོ་གསུམ་པར་རྒྱལ་སྲིད་ལ་མངའ་གསོལ་ནས་རྒྱལ་སྲིད་སྐྱོང་རོགས་མཛད་བཞིན་སྤྱི་ལོ༧༡༢ལོར་སྐུ་གཤེགས།

 རྡེའུ་དཀར་ནག་གིས་ཞུས།

 
 
 
རྩོམ་སྒྲིག་འགན་འཁུར་བ། དཔལ་མོ།
Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060