བློ་བརྟན་འགྱུར་མེད་ཀྱིས་དཔལ་འབྱོར་དང་སྤྱི་ཚོགས་གོང་འཕེལ་འགྲོ་རྒྱུར་སྐུལ་འདེད་གཏོང་དགོས།_སྲིད་དོན་དང་ཆོས་ལུགས།

བློ་བརྟན་འགྱུར་མེད་ཀྱིས་དཔལ་འབྱོར་དང་སྤྱི་ཚོགས་གོང་འཕེལ་འགྲོ་རྒྱུར་སྐུལ་འདེད་གཏོང་དགོས།

སྤེལ་དུས།　2016-11-16　　 ཡོང་ཁུངས།　ཞིན་ཧྭའི་དྲ་བ།　　 རྩོམ་སྒྲིག་པ། 　ཤ་ཚེས་བསྒྱུར།

བློ་མཐུན་ཝུའུ་དབྱིང་ཅེས་བོད་རང་སྐྱོང་ལྗོངས་ཏང་གི་འཐུས་མི་ཚོགས་ཆེན་ཐེངས་དགུ་པའི་སྙན་སྒྲོན་ནང་ནན་བཤད་གནང་དོན། གོང་འཕེལ་གྱི་བསམ་གཞི་གསར་པའི་ཐོག་ནས་གོང་འཕེལ་གྱི་ཁྱོན་ཡོངས་ལ་གཅིག་འདོམས་བྱེད་རྒྱུ་མཐའ་འཁྱོངས་དང་། བརྟན་ཐོག་ཡར་འཕེལ་དང་བརྟན་པོའི་ངང་གོང་འཕེལ་གཏོང་རྒྱུ་མཐའ་འཁྱོངས་བྱས་ཏེ་མཁོ་འདོན་ཕྱོགས་ཀྱི་གྲུབ་ཆའི་རང་བཞིན་ལ་བསྒྱུར་བཅོས་བྱེད་རྒྱུས་གཙོ་ཐིག་བྱས་ཐོག མཁོ་འདོན་ཕྱོགས་དང་མཁོ་དགོས་ཕྱོགས་གཉིས་ཀ་ནས་གནད་ལ་འཕིགས་པའི་ཤུགས་བརྒྱབ་སྟེ་སྐབས་བསྟུན་སྙོམས་སྒྲིག་བྱེད་རྒྱུ་དང་། དཔལ་འབྱོར་དང་སྤྱི་ཚོགས་གོང་འཕེལ་གྱི་ཞན་ཆ་གསབ་རྒྱུར་ཤུགས་རྒྱག་པ་དང་། སྒྲིག་སྲོལ་ལམ་སྲོལ་གྱི་འགོག་རྐྱེན་སེལ་རྒྱུར་ཤུགས་རྒྱག་པ། ཐོན་ལས་ཀྱི་གྲུབ་ཆའི་ཁྱབ་བཀོད་ལེགས་སུ་གཏོང་རྒྱུར་ཤུགས་རྒྱག་པ། ནང་ངོས་གོང་འཕེལ་གཏོང་ནུས་སྐྱེད་སྲིང་བྱེད་རྒྱུར་ཤུགས་རྒྱག་པ་བཅས་བྱས་ནས་དཔལ་འབྱོར་གོང་འཕེལ་གྱི་སྤུས་ཚད་དང་ཕན་འབྲས་ཆེ་རུ་གཏོང་རྒྱུ་དང་། སྤྱི་ཚོགས་བྱ་གཞག་ཕྱོགས་ཡོངས་ནས་ཡར་རྒྱས་ཡོང་བར་སྐུལ་སྤེལ་བཏང་སྟེ་མི་རིགས་ཁག་གི་མང་ཚོགས་ཚོས་བསྒྱུར་བཅོས་དང་གོང་འཕེལ་གྱི་འབྲས་བུ་མཉམ་དུ་གང་ལེགས་སྤྱོད་ཐུབ་པ་བྱེད་དགོས།

དཔལ་འབྱོར་རྒྱུན་མཐུད་དང་སྐྱོན་བྲལ་ངང་གོང་འཕེལ་འགྲོ་བར་སྐུལ་སྤེལ་གཏོང་དགོས། མཁོ་འདོན་ཕྱོགས་ཀྱི་གྲུབ་ཆའི་རང་བཞིན་གྱི་བསྒྱུར་བཅོས་བྱེད་པར་བརྟེན་ནས་གོང་འཕེལ་ལ་སྣེ་ཁྲིད་བྱེད་དགོས་པ་སྟེ། གཙོ་རྒྱུ་འཁོར་སྐྱོད་དང་བགོ་སྒྲིག་བྱེད་ལམ་ལེགས་སུ་བཏང་ནས་ནུས་ལྡན་གྱིས་མཁོ་དགོས་རྒྱ་ཆེར་གཏོང་རྒྱུ་དང་། ནུས་ལྡན་གྱིས་མཁོ་འདོན་བྱེད་ཤུགས་ཆེ་རུ་བཏང་ཁར། མཁོ་འདོན་གྱི་གྲུབ་ཆར་བརྟེན་ནས་མཁོ་དགོས་ཀྱི་འགྱུར་བའི་འཚམ་མཐུན་རང་བཞིན་དང་། སྟབས་བསྟུན་རང་བཞིན་ཤུགས་ཆེར་གཏོང་རྒྱུ་དང་། ཁྱོན་ཡོངས་རང་བཞིན་དང་། རྨང་གཞིའི་རང་བཞིན། རྩ་བའི་རང་བཞིན་བཅས་ཐད་ཀྱི་མངོན་ཆེའི་གནད་དོན་ཐག་གཅོད་ཏན་ཏིག་བྱེད་དགོས་པ་དང་། རང་ལྗོངས་ཀྱི་དཔལ་འབྱོར་དང་སྤྱི་ཚོགས་གོང་འཕེལ་འགྲོ་ཚད་དང་སྤུས་ཚད་ཕྱོགས་ཡོངས་ནས་གོང་མཐོར་གཏོང་དགོས། དམིགས་བསལ་གཟིགས་སྐྱོང་སྲིད་ཇུས་ལ་བརྟེན་ནས་གོང་འཕེལ་ལ་སྐུལ་འདེད་གཏོང་དགོས་པ་སྟེ། ཀྲུང་དབྱང་ནས་གཏན་འཁེལ་བྱས་པའི་ནོར་སྲིད་དང་། ཁྲལ་འབབ། དངུལ་རྩ། མ་འཇོག་སོགས་ཐད་ཀྱི་གཟིགས་སྐྱོང་སྲིད་ཇུས་ཆད་ལུས་མེད་པར་བེད་སྤྱོད་ཡག་པོ་བྱེད་རྒྱུ་དང་། དཔལ་འབྱོར་བོད་སྐྱོར་དང་། སློབ་གསོའི་བོད་སྐྱོར། སྨན་བཅོས་བོད་སྐྱོར། ལས་ཞུགས་བོད་སྐྱོར། ཚན་རྩལ་བོད་སྐྱོར། ལས་བྱེད་པའི་ཤེས་ལྡན་བོད་སྐྱོར་བཅས་ཀྱི་ལེགས་ཆ་འདོན་སྤེལ་བྱས་ནས་གོང་འཕེལ་ལ་སྐུལ་འདེད་གཏོང་བ་དང་དམངས་ལ་བདེ་སྐྱིད་སྐྲུན་དགོས། ཀྲུང་དབྱང་དང་ས་གནས་དབར་གྱི་འགན་དབང་དབྱེ་འབྱེད་དང་། གཙོ་ནུས་སྙོམས་ཁུལ། འབྱུང་ཁམས་སྲུང་སྐྱོབ། སྤྱི་པའི་ཞབས་ཞུ་དྲང་སྙོམས་ཅན། མཐའ་བརྟན་དམངས་བདེ་སོགས་ཁྱོན་ཡོངས་དང་འབྲེལ་བ་ཡོད་པའི་གལ་ཆེའི་སྲིད་ཇུས་ལ་ཞིབ་འཇུག་གཏིང་ཟབ་བྱེད་རྒྱུ་དང་། རང་འགུལ་ངང་ཀྲུང་དབྱང་པུའུ་ཨུད་ཁག་ལ་སྙན་སེང་ཞུ་རྒྱུ་དང་། མཐུན་སྦྱོར་སྦྲེལ་མཐུད་བྱེད་རྒྱུར་ཤུགས་སྣོན་བརྒྱབ་སྟེ་གོང་འཕེལ་གཏོང་རྒྱུར་སྲིད་ཇུས་ཀྱི་འདེགས་སྐྱོར་ནུས་ལྡན་མཁོ་འདོན་བྱེད་དགོས། ཚན་རྩལ་གསར་གཏོད་ལ་བརྟེན་ནས་གོང་འཕེལ་ལ་སྐུལ་འདེད་གཏོང་དགོས་པ་སྟེ། སྲིད་གཞུང་གི་ཁྲིད་སྟོན་བྱེད་ཤུགས་ཆེ་རུ་བཏང་ནས་ཁེ་ལས་ཀྱིས་གཙོ་རྐང་བྱེད་པ་དང་། ཁྲོམ་རས་ཕྱོགས་སྟོན་བྱེད་པ། སྲིད་ཐོན་སློབ་ཞིབ་བཅས་བཞི་ཟུང་འབྲེལ་བྱེད་པའི་ཚན་རྩལ་གསར་གཏོད་མ་ལག་གང་མགྱོགས་འཛུགས་རྒྱུ་དང་། ཚན་རྩལ་གསར་གཏོད་ཀྱི་ལས་སྟེགས་འཛུགས་རྒྱུར་ཤུགས་སྣོན་བརྒྱབ་ནས་གཙོ་གནད་ཁུལ་ཁོངས་སུ་ཐོག་མའི་གསར་གཏོད་དང་། འདུས་གྲུབ་གསར་གཏོད། མཐུན་སྦྱོར་གསར་གཏོད་བཅས་བྱེད་རྒྱུར་སྐུལ་སྤེལ་གཏོང་དགོས། སྔོན་ཐོན་གོ་ཆོད་ཀྱི་ལག་རྩལ་ནང་འདྲེན་དང་། ཁོང་དུ་ཆུད་པ་བསྡུ་ལེན་བཅས་བྱེད་རྒྱུར་མཐོང་ཆེན་བྱས་ནས་ཚན་རྩལ་གྱི་ཆེད་དོན་རྣམ་གྲངས་ཆེ་རིགས་ཁག་གཅིག་ལག་བསྟར་བྱེད་རྒྱུ་དང་། ཚན་རྩལ་གྱི་འབྲས་བུ་དངོས་སྒྱུར་དང་སྤྱོད་ཤུགས་ཆེ་རུ་བཏང་སྟེ་ཚན་རྩལ་ལ་བརྟེན་ནས་དཔལ་འབྱོར་གོང་འཕེལ་གཏོང་བར་ལེགས་སྐྱེས་འབུལ་ཚད་ཟམ་མི་ཆད་པར་ཆེ་རུ་གཏོང་དགོས། མ་དངུལ་བསྡུ་གཏོང་ལ་བརྟེན་ནས་གོང་འཕེལ་ལ་སྐུལ་ཁྲིད་བྱེད་དགོས་པ་སྟེ། མ་རྩ་འཇོག་རྒྱུ་དེ་དཔལ་འབྱོར་འཕར་སྣོན་ལ་སྐུལ་འདེད་གཏོང་བའི་གལ་ཆེའི་ཐབས་ཇུས་སུ་བརྩི་རྒྱུ་མཐའ་འཁྱོངས་བྱས་ཏེ། མ་དངུལ་བསྡུ་གཏོང་བྱེད་ཤུགས་ཟམ་མི་ཆད་པར་ཆེ་རུ་བཏང་ནས་གལ་ཆེའི་རྣམ་གྲངས་འཛུགས་སྐྲུན་བྱེད་རྒྱུ་དང་། ཐོན་ལས་གོང་འཕེལ་གཏོང་རྒྱུ། དབུལ་གྲོལ་འགག་སྒྲོལ་བྱེད་རྒྱུ་བཅས་ཀྱི་ཐད་མ་དངུལ་འདང་ངེས་བཞིན་གཏོང་རྒྱུར་འགན་སྲུང་བྱེད་དགོས། སྲིད་གཞུང་གི་གོ་ཆོད་མ་འཇོག་མང་དུ་བཏང་སྟེ་རྣམ་གྲངས་འཛུགས་སྐྲུན་བྱེད་རྒྱུ་དེ་མ་འཇོག་བྱེད་རྒྱ་ཆེ་རུ་གཏོང་བའི་དམ་འཛིན་བྱེད་ས་ཨང་དང་པོར་བརྩིས་ནས་རྣམ་གྲངས་ཀྱི་སྔོན་གྲབས་ལས་དོན་ཏན་ཏིག་བསྒྲུབ་རྒྱུ་དང་། ཀྲུང་དབྱང་ནོར་སྲིད་ནས་མ་འཇོག་བྱེད་རྒྱ་ཆེ་རུ་གཏོང་བ་དང་ཆེད་སྤྱོད་མ་འཇོག་གི་གཞི་རྒྱ་ཆེ་རུ་གཏོང་རྒྱུར་བརྩོན་ལེན་ཧུར་ཐག་བྱེད་དགོས། སྤྱི་ཚོགས་ནས་མ་རྩ་འཇོག་རྒྱུ་ཟམ་མི་ཆད་པར་ཆེ་རུ་གཏོང་བ་དང་། སྲིད་གཞུང་ནས་མ་རྩ་འཇོག་པའི་ཁྲིད་སྟོན་སྐུལ་ཁྲིད་ཀྱི་ནུས་པ་འདོན་སྤེལ་གང་ལེགས་བྱེད་པ། ཁྲོམ་རར་འཛུལ་ཞུགས་བྱེད་རྒྱུ་ལྷུག་ཏུ་གཏོང་བ། སྤྱི་ཚོགས་ཀྱི་མ་རྩས་གཙོ་གནད་ཁྱབ་ཁོངས་ཀྱི་འཛུགས་སྐྲུན་ནང་ཞུགས་རྒྱུར་རྒྱབ་སྐྱོར་བྱེད་པ། མ་དངུལ་བསྡུ་ལམ་རྒྱ་སྐྱེད་གཏོང་བ་དང་། ཉེན་ཁར་འགོག་ཟོན་བྱེད་རྒྱུར་ཤུགས་སྣོན་རྒྱག་དགོས། འཛད་སྤྱོད་ལ་བརྟེན་ནས་གོང་འཕེལ་འགྲོ་རྒྱུར་སྐུལ་འདེད་གཏོང་དགོས་པ་སྟེ། འཛད་སྤྱོད་ཀྱི་ཁོར་ཡུག་ལེགས་སུ་གཏོང་བ་དང་། འཛད་སྤྱོད་ཀྱི་དར་ཁྱབ་ཆེ་ས་ཁྱབ་གདལ་གཏོང་བ། ཞིང་འབྲོག་ཁུལ་གྱི་འཛད་སྤྱོད་ཤེད་ཤུགས་སྔོག་འདོན་བྱེད་པ། ཡུལ་མིའི་འཛད་སྤྱོད་བྱེད་རྒྱ་ཆེ་རུ་གང་ཐུབ་གཏོང་བ། ཆ་འཕྲིན་དང་། འབྱུང་འཕྲོད། སྤྲོ་གསེང་སོགས་ཀྱི་འཛད་སྤྱོད་གསར་རིགས་ལ་རྒྱབ་སྐྱོར་བྱེད་པ། སྡོད་ཁང་དང་རླངས་འཁོར། དེ་བཞིན་བདེ་ཐང་གི་རྒན་གསོ་སོགས་འཛད་སྤྱོད་ཆེ་རིགས་བརྟན་པོའི་ངང་སྐུལ་འདེད་གཏོང་བ། དྲ་ཐོག་དང་དྲ་ཐོག་མིན་པ་མཉམ་འདྲེས་བྱེད་པ་སོགས་འཛད་སྤྱོད་བྱེད་སྟངས་གསར་པ་གོང་འཕེལ་ཤུགས་ཆེ་གཏོང་བ་བཅས་ལ་བརྟེན་ནས་འཛད་སྤྱོད་བྱེད་ནུས་དང་ཆུ་ཚད་མཐོ་རུ་གཏོང་དགོས།

ཐོན་ལས་ཀྱི་གྲུབ་ཆ་ལེགས་སྒྱུར་དང་རིམ་སྤོར་གང་མགྱོགས་བྱེད་དགོས། རང་སྟོབས་འཕེལ་ནུས་ཆེ་རུ་གཏོང་རྒྱུ་དང་། མང་ཚོགས་ཀྱི་ཡོང་འབབ་མང་དུ་གཏོང་རྒྱུ། མང་ཚོགས་ལས་ཞུགས་ཐུབ་རྒྱུར་སྐུལ་སྤེལ་གཏོང་རྒྱུ་བཅས་ལ་དམིགས་ནས། ཁྲོམ་རས་གཙོ་ཁྲིད་དང་སྲིད་གཞུང་གིས་སྣེ་ཁྲིད། ཚན་རིག་དང་མཐུན་པའི་སྒོ་ནས་འཆར་འགོད། ལུགས་མཐུན་ཁྱབ་བཀོད་བཅས་བྱེད་རྒྱུ་མཐའ་འཁྱོངས་བྱས་ཐོག རྫོང་རེར་ཁྱད་ལྡན་ཐོན་རྫས་རེ་ཡོད་པ་དང་ཚང་མར་གཙོ་ཕལ་ཡོད་དགོས་ཤིང་། མང་ཚོགས་ཀྱིས་རྒྱུས་མངའ་ཡོད་པ་དང་། ཐག་ཉེ་ལ་སྟབས་བདེ་བ། བསྒྲུབ་ཐུབ་ལ་སྒྲུབ་ཤེས་པ་བཅས་ཀྱི་རྩ་དོན་མཐའ་འཁྱོངས་བྱས་ཏེ། ཐོན་ལས་འཛུགས་སྐྲུན་གང་མགྱོགས་བྱས་ནས་མང་ཚོགས་ཚོས་རང་ཁྱིམ་དང་ཕ་ཡུལ་ནས་ཁ་འབྲལ་མི་དགོས་པར་ཐོན་ལས་གོང་འཕེལ་གཏོང་བའི་ནང་ཞུགས་ཐུབ་པ་བྱས་ཏེ་ཐོན་ལས་ལ་བརྟེན་ནས་ཡུལ་དེའི་གོང་འཕེལ་ལ་སྐུལ་ཁྲིད་དང་ཡུལ་དེའི་མང་ཚོགས་ཕྱུག་པོ་ཆགས་ཐུབ་པ་བྱེད་དགོས། ཐོན་ལས་གྲུབ་ཆ་མགྱོགས་མྱུར་ལེགས་སྒྲིག་དང་ཀ་རྟེན་ཐོན་ལས་གཙོ་གནད་ཐོག་གཏོད་པ་དང་། གཞི་ཁྱོན་ལྡན་པའི་ཁྱད་ལྡན་ཐོན་ལས་འཕེལ་རྒྱས་གཏོང་བ། དེང་རབས་ཀྱི་ཞབས་ཞུའི་ལས་རིགས་མགྱོགས་མྱུར་འཕེལ་རྒྱས་གཏོང་བ། སྲོལ་རྒྱུན་གྱི་ཐོན་ལས་སྒྱུར་བཀོད་དང་གོང་མཐོར་གཏོང་བ། གསར་དར་ཐོན་ལས་སྐྱེད་སྲིད་དང་སྟོབས་ཆེར་གཏོང་བ་བཅས་བྱེད་དགོས།

གྲོང་ཁྱེར་གྲོང་གསེབ་དང་ཁུལ་ཁོངས་མཐུན་སྦྱོར་ངང་གོང་འཕེལ་གཏོང་བར་གཅིག་གྱུར་འཆར་འགོད་བྱེད་དགོས། མཐུན་སྦྱོར་ངང་གོང་འཕེལ་གཏོང་བའི་འདུ་ཤེས་མཐའ་འཁྱོངས་ཀྱིས་གྲོང་ཁྱེར་གྲོང་གསེབ་དང་ཁུལ་ཁོངས་མཐུན་སྦྱོར་འཕེལ་རྒྱས་དང་། ཁུལ་ཁོངས་མཐུན་སྦྱོར་འཕེལ་རྒྱས་ལ་སྐུལ་འདེད་བཏང་ནས་གོང་འཕེལ་གྱི་སྤྱི་ཡོངས་རང་བཞིན་ཟམ་མི་ཆད་པར་ཤུགས་ཆེ་གཏོང་དགོས།

བསྒྱུར་བཅོས་སྒོ་དབྱེའི་གོམ་སྟབས་ཇེ་མགྱོགས་སུ་གཏོང་དགོས། ཕྱོགས་ཡོངས་ནས་བསྒྱུར་བཅོས་གཏིང་ཟབ་བྱེད་དགོས་པ་སྟེ་གལ་ཆེའི་ཁྱབ་ཁོངས་དང་། གལ་ཆེའི་ལས་འགན། གལ་ཆེའི་ཚོད་ལྟ་བཅས་ལ་དམ་འཛིན་བྱེད་དགོས་པ་མ་ཟད། འགག་རྩའི་གཙོ་རྐང་དང་། འགག་རྩའི་ལྷུ་ཚིགས། འགག་རྩའི་སྦྲེལ་ཚིགས་བཅས་ལའང་དམ་འཛིན་བྱེད་དགོས། སྤྱི་ཡོངས་དང་འབྲེལ་བ་ཡོད་པའི་བསྒྱུར་བཅོས་དང་། ལྷག་པར་དུ་གལ་ཆེའི་ལམ་ལུགས་གསར་གཏོད་བྱེད་རྒྱུ་དང་འབྲེལ་བ་ཡོད་པའི་བསྒྱུར་བཅོས་བྱེད་རྒྱུ་དེ་ཀྲུང་དབྱང་གི་བཀོད་སྒྲིག་ལྟར་གཅིག་གྱུར་ཐོག་བྱ་སྤྱོད་སྤེལ་བ་དང་སྐུལ་སྤེལ་བརྟན་པོ་གཏོང་དགོས། ཕྱོགས་ཡོངས་ནས་སྒྱུར་བཅོས་གཏིང་ཟབ་ཏུ་གཏོང་བ་དང་ཕྱི་ཕྱོགས་སུ་སྒོ་མོ་དབྱེ་རྒྱ་ཆེ་རུ་གཏོང་དགོས། སྤྱི་དབང་མིན་པའི་ལམ་ལུགས་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་སྲིད་ཇུས་དང་བྱ་ཐབས་དོན་འཁྱོལ་ཡག་པོ་བྱས་ནས་སྤྱི་དབང་མིན་པའི་ལམ་ལུགས་དཔལ་འབྱོར་འཕེལ་རྒྱས་ཆེན་པོ་དང་འཕེལ་རྒྱས་མགྱོགས་པོ་ཡོང་བར་སྐུལ་འདེད་གཏོང་དགོས།

གོང་འཕེལ་གྱི་ཁོར་ཡུག་བཟང་པོ་ཞིག་གཏོད་དགོས། ནུས་ཤུགས་ཡོད་རྒུས་ལས་ཕྱོད་ཆེ་བའི་ཞབས་ཞུའི་ཁོར་ཡུག་གཏོད་དགོས་པ་སྟེ། ཁྲིམས་ཀྱི་དབང་བསྐུར་མེད་ན་བྱེད་མི་རུང་པ་དང་། ཁྲིམས་བཅད་ཀྱི་འགན་འཁྲི་ཡོད་ཚད་ངེས་པར་དུ་བསྒྲུབ་རྒྱུ་མཐའ་འཁྱོངས་བྱས་ནས་བློ་བརྟན་འགྱུར་མེད་ཀྱིས་གཞུང་ཁོངས་ཁེ་ལས་རྒྱ་སྟོབས་ཆེ་རུ་དང་ལེགས་སུ་བཏང་ཐོག སྲིད་འཛིན་དང་ཁེ་ལས་ལོགས་སུ་དབྱེ་བ་དང་། སྲིད་འཛིན་དང་གཞུང་ཁོངས་དངུལ་རྩའི་སྡེ་ཚན་ལོགས་སུ་དབྱེ་བ། སྲིད་འཛིན་དང་བྱ་གཞག་ཚན་པ་ལོགས་སུ་དབྱེ་བ། སྲིད་འཛིན་དང་སྤྱི་ཚོགས་ཚོགས་པ་ལོགས་སུ་དབྱེ་བ་བཅས་བྱེད་རྒྱུར་སྐུལ་འདེད་ཟབ་གཏོང་དང་། ལས་ཁུངས་ཁུ་བསྡུ་དང་དབང་ཆ་གཤམ་སྤྲོད། ལྷུག་གློད་དང་དམ་ནན་ཟུང་འབྲེལ། ཞབས་ཞུ་ལེགས་གཏོང་བཅས་བྱེད་པའི་རྒྱུན་མཐུད་སྐུལ་སྤེལ་གཏོང་རྒྱུ། འཆར་འགོད་དང་ཞིབ་བཤེར་མཆན་འགོད། སྤྱི་འབོར་དང་གྲུབ་ཆ། དམིགས་ཚད་དང་རྣམ་གྲངས། ལྟ་སྐུལ་དང་ལག་བསྟར་བཅས་ཀྱི་འབྲེལ་བར་ཐག་གཅོད་ཡང་དག་བྱེད་རྒྱུ། “འཁྲོལ་ལྔ་གཅིག་སྒྲིལ”གྱི་ཐོ་འགོད་ལམ་ལུགས་ཁྱབ་གདལ་བཏང་ནས་གཙོ་ཆེའི་རྣམ་གྲངས་རིགས་ལ་སྟབས་བདེ་ཡོང་བ་བྱེད་རྒྱུ། ཞབས་ཞུའི་ཁས་ལེན་ལམ་ལུགས་སོགས་འཛུགས་པ་དང་འཐུས་སྒོ་ཚང་དུ་བཏང་ནས་ཁྲིམས་ཀྱི་བཀག་རྒྱ་མེད་ཕྱིན་ཁྲོམ་ར་གཉེར་མཁན་ལ་གོང་འཕེལ་གཏོང་བའི་ཆ་རྐྱེན་བཟང་པོ་ཞིག་གཏོད་དགོས། ནུས་ཤུགས་ཡོད་རྒུས་འདྲ་མཉམ་ཐོག་འགྲན་རྩོད་བྱེད་པའི་ཁོར་ཡུག་གཏོད་དགོས་པ་སྟེ། དེང་རབས་ཀྱི་ཁྲོམ་རའི་མ་ལག་འཛུགས་པ་དང་། གཞུང་དྲང་དང་། སྒོ་དབྱེ། ཁ་གསལ་བཅས་ཀྱི་ཁྲོམ་རའི་སྒྲིག་སྲོལ་འཐུས་སྒོ་ཚང་དུ་གཏོང་བ། ལེགས་སྤེལ་ཞན་དོར་གྱི་ཁྲོམ་རའི་ཕྱིར་འཐེན་བྱེད་ལམ་ཚགས་ཚུད་དུ་བཏང་ནས་ཁྲོམ་རར་ལྟ་སྡོམ་དང་ཁྲོམ་རའི་སྒྲིག་ལམ་ཚད་ལྡན་བཟོ་རྒྱུར་ཤུགས་སྣོན་བརྒྱབ་ཐོག ཁེ་ལས་ཀྱིས་རང་བརྟེན་གཉེར་སྐྱོང་དང་འདྲ་མཉམ་ཐོག་འགྲན་རྩོད་བྱེད་པར་སྐུལ་སྤེལ་གཏོང་དགོས། ནུས་ཤུགས་ཡོད་རྒུས་དྲང་གཞག་གི་ཁྲིམས་སྐྱོང་ཁོར་ཡུག་གཏོད་དགོས་པ་སྟེ། ཁྲིམས་སྒྱུར་དང་ཁྲིམས་འཛིན་གྱི་བྱ་སྤྱོད་ཚད་ལྡན་ནན་པོ་བཟོ་བ་དང་། ཁེ་ལས་ཀྱི་འགལ་ཟླ་དང་རྩོད་གཞི་ཁྲིམས་ལྟར་འདུམ་འགྲིག་ཐག་གཅོད་བྱེད་དགོས། ནུས་ཤུགས་ཡོད་རྒུས་ཚོང་ལས་ལ་མོས་པའི་ཁོར་ཡུག་བཟང་པོ་ཞིག་གཏོད་པ་དང་རིམ་ཁག་ཏང་སྲིད་འགོ་ཁྲིད་ལས་བྱེད་པས་དམངས་གཉེར་ཁེ་ལས་ལ་འབྲེལ་གཏུག་བྱེད་པའི་ལམ་ལུགས་འཛུགས་དགོས།

དབུལ་གྲོལ་འགག་སྒྲོལ་གྱི་དམག་འཐབ་ལ་རྒྱལ་ཁ་མཐའ་གཅིག་ཏུ་ལེན་ཐུབ་པ་བྱེད་དགོས། དབུལ་གྲོལ་འགག་སྒྲོལ་བྱེད་རྒྱུ་དེ་དཔལ་འབྱོར་དང་སྤྱི་ཚོགས་གོང་འཕེལ་གཏོང་བའི་དོན་ཆེན་དང་དམངས་འཚོའི་ལས་གཞི་ཨང་དང་པོར་བརྩི་རྒྱུ་མཐའ་འཁྱོངས་བྱས་ཏེ། རང་སྟོབས་རང་སྤེལ་དང་དཀའ་སྤྱད་འབད་འཐབ་ཀྱི་སྙིང་སྟོབས་དར་སྤེལ་ཤུགས་ཆེ་བཏང་ཐོག ལྟ་བ་བརྗེ་སྒྱུར་དང་། བསམ་གཞི་གསར་གཏོད། སྲིད་ཇུས་ལེགས་སྤྱོད། མཁྲེགས་སར་གཏུག་ཕོད་པ་བཅས་བྱས་ཏེ། ལྗོངས་ཡོངས་ཀྱི་དབུལ་པོའི་མི་འབོར་རྣམས་དུས་བཀག་ལྟར་དབུལ་གྲོལ་ཐུབ་པ་དང་། དབུལ་ཕོངས་རྫོང་གི་ཞྭ་མོ་དུས་བཀག་ལྟར་ཕུད་ཐུབ་པ། དབུལ་ཕོངས་གྲོང་ཚོ་དུས་བཀག་ལྟར་དབུལ་པོ་ནས་གྲོལ་ཐུབ་པ་བཅས་བྱེད་དགོས། དབུལ་གྲོལ་བྱེད་ཐབས་ཤུགས་ཆེར་གཏོང་དགོས་པ་སྟེ། རོགས་སྐྱོར་བྱ་ཡུལ་གནད་ལ་འཕིགས་པ་དང་། རྣམ་གྲངས་བཀོད་སྒྲིག་གནད་ལ་འཕིགས་པ། མ་དངུལ་བེད་སྤྱོད་གནད་ལ་འཕིགས་པ། བྱ་ཐབས་དུད་ཚང་ལ་སྤེལ་རྒྱུ་གནད་ལ་འཕིགས་པ། གྲོང་ཚོར་མི་སྣ་མངགས་གཏོང་བྱེད་རྒྱུ་གནད་ལ་འཕིགས་པ། དབུལ་གྲོལ་གྲུབ་འབྲས་གནད་ལ་འཕིགས་པ་བཅས་ཡོང་བ་བྱེད་རྒྱུ་མཐའ་འཁྱོངས་བྱེད་དགོས། ཐོན་ཁུངས་ཀྱི་སྟོབས་ཤུགས་སྒྲིལ་བཅོས་བྱེད་དགོས་པ་སྟེ། ལས་དོན་ཁག་དབུལ་གྲོལ་འགག་སྒྲོལ་ཐད་དམིགས་པ་དང་། ཐོན་ཁུངས་ཁག་དབུལ་གྲོལ་འགག་སྒྲོལ་ཐོག་རུབ་བསྡུས་བྱེད་པ། ཕྱོགས་ཁག་གི་སྟོབས་ཤུགས་དབུལ་གྲོལ་འགག་སྒྲོལ་བྱེད་རྒྱུའི་ཐད་གཅིག་སྒྲིལ་བྱེད་པ་བཅས་མཐའ་འཁྱོངས་བྱེད་དགོས། ཕྱིར་འཐེན་བྱེད་ལམ་འཐུས་སྒོ་ཚང་དུ་གཏོང་དགོས་པ་སྟེ། དབུལ་སྐྱོར་བྱ་ཡུལ་གྱི་ཕྱིར་འཐེན་ཚད་གཞི་དང་ཕྱིར་འཐེན་གོ་རིམ་ཁ་གསལ་བཟོ་བ་དང་། དབུལ་གྲོལ་རྩིས་ལེན་བྱ་ཐབས་ནན་སྲུང་བྱས་ནས་དབུལ་གྲོལ་གྱི་གྲུབ་འབྲས་ལ་སྤྱི་ཚོགས་ནས་ལྟ་སྐུལ་བྱེད་པ། ས་ཆ་དེ་གའི་མང་ཚོགས་ལ་གདེང་འཇོག་བྱེད་དུ་འཇུག་པ་བཅས་བྱས་ཏེ་དབུལ་པོ་ངོ་མ་དབུལ་གྲོལ་ཐུབ་པ་དང་དངོས་འབྲེལ་དབུལ་གྲོལ་ཐུབ་པ་བྱེད་དགོས།

སྤྱི་ཚོགས་བྱ་གཞག་གོང་འཕེལ་ཤུགས་ཆེ་གཏོང་དགོས། མི་དམངས་མང་ཚོགས་ཀྱིས་དོ་ཁུར་ཆེ་ཤོས་བྱེད་པ་དང་། མང་ཚོགས་ལ་ཐད་ཀར་འབྲེལ་བ་ཆེ་ཤོས་ཡོད་པ། འཕྲལ་མཁོ་ཆེ་ཤོས་ཡིན་པ་བཅས་ཀྱི་ཁེ་ཕན་གྱི་གནད་དོན་ཐག་གཅོད་བྱེད་རྒྱུ་ནས་འགོ་འཛུགས་རྒྱུ་མཐའ་འཁྱོངས་བྱས་ཏེ། དམིགས་སའི་རང་བཞིན་དེ་བས་ཤུགས་ཆེ་བ་དང་། ཁྱབ་རྒྱ་དེ་བས་ཆེ་བ། ནུས་པ་དེ་བས་ཐད་ཀར་ཐོན་པ། ཕན་འབྲས་དེ་བས་མངོན་གསལ་དོད་པ་བཅས་ཀྱི་བྱ་ཐབས་སྤྱད་དེ་སྟོབས་ཤུགས་གཅིག་སྒྲིལ་ཐོག་རྨང་གཞིའི་རང་བཞིན་དང་ཐ་སྐྱོང་རང་བཞིན་གྱི་དམངས་འཚོ་ལེགས་སུ་གཏོང་རྒྱུར་དམ་འཛིན་ཡག་པོ་བྱེད་དགོས། སྔོན་ལ་སློབ་གསོ་གོང་འཕེལ་གཏོང་དགོས་པ་སྟེ། སློབ་གསོ་སྟོབས་ཆེའི་ཁུལ་གྱི་འདུ་ཤེས་བརྟན་པོར་བཙུགས་ཏེ། སྤུས་ཚད་རྩ་བར་འཛིན་པ་དང་ཀུན་སྤྱོད་སློབ་གསོ་སྔོན་དུ་སྤེལ་རྒྱུ་རྒྱུན་འཁྱོངས་ཀྱིས་སློབ་གསོའི་རྨང་གཞིའི་ནུས་པ་དང་། སྔོན་ཁྲིད་ཀྱི་ནུས་པ། དམངས་འཚོའི་ཕན་འབྲས་བཅས་མངོན་ཆེར་བཟུང་ཐོག མི་དམངས་ཀྱིས་བློ་མོས་བྱེད་པའི་སློབ་གསོ་ཡག་པོ་ཞིག་གཉེར་གང་ཐུབ་བྱེད་དགོས། ཐབས་བརྒྱ་ཇུས་སྟོང་གིས་ལས་ཞུགས་བྱེད་རྒྱ་ཆེ་རུ་གཏོང་དགོས་པ་སྟེ། དེ་བས་དགེ་མཚན་ལྡན་པའི་ལས་ཞུགས་སྲིད་ཇུས་ལག་བསྟར་བྱས་ཏེ་དམངས་ཀྱིས་བྱ་གཞག་སྐྲུན་རྒྱུ་དང་ཀུན་གྱིས་གསར་གཏོད་བྱེད་རྒྱུར་སྐུལ་སྤེལ་བཏང་ནས་སློབ་མ་དང་། ཁྱིམ་བདག སྤྱི་ཚོགས་བཅས་ཀྱི་ལས་ཞུགས་ལྟ་བ་འགྱུར་ལྡོག་གཏོང་རྒྱུར་སློབ་གསོ་ཁྲིད་སྟོན་བྱས་ནས་ལས་ཞུགས་གང་ཐུབ་བྱེད་རྒྱུ། སྲིད་གཞུང་གིས་ལས་ཞུགས་ལ་བརྟེན་ནས་བོད་སྐྱོར་དང་། ཁེ་ལས་ཀྱིས་བསྡུ་འཇུག་བྱེད་པ་སོགས་བྱེད་ཐབས་སྣ་ཚོགས་སྤྱད་དེ་ལས་ཞུགས་བྱེད་གནས་འདང་ངེས་མཁོ་འདོན་བྱེད་རྒྱུ་དང་། སློབ་ཆེན་གྱིས་སློབ་མའི་ལས་ཞུགས་ལྟ་བ་བསྒྱུར་རྒྱུར་ཁྲིད་སྟོན་བྱེད་འགན་འཁུར་དགོས། ཞིང་འབྲོག་ཁུལ་གྱི་ངལ་ནུས་ལྷག་མ་རྣམས་གནས་སྒྱུར་ལས་ཞུགས་བྱེད་པར་སྒྲིག་འཛུགས་བྱེད་ཚད་མཐོ་རུ་གཏོང་དགོས། བདེ་ཐང་ལྡན་པའི་བོད་ལྗོངས་འཛུགས་སྐྱོང་ཇེ་མགྱོགས་སུ་གཏོང་དགོས་པ་སྟེ། སྨན་བཅོས་འཕྲོད་བསྟེན་བྱ་གཞག་བསྒྱུར་བཅོས་དང་གོང་འཕེལ་གཏོང་རྒྱུར་སྐུལ་སྤེལ་བཏང་ནས་སྤྱི་པའི་འཕྲོད་བསྟེན་ཞབས་ཞུའི་མ་ལག་འཛུགས་སྐྱོང་བྱེད་པར་ཤུགས་སྣོན་རྒྱག་རྒྱུ་དང་། གྲོང་གསེབ་ཀྱི་སྨན་བཅོས་འཕྲོད་བསྟེན་དཔུང་ཁག་དང་། ཞབས་ཞུའི་དྲ་རྒྱ། དེ་བཞིན་གྲོང་ཁྱེར་སྡེ་ཁུལ་གྱི་འཕྲོད་བསྟེན་ཞབས་ཞུའི་མ་ལག་བཅས་འཛུགས་སྐྱོང་བྱེད་རྒྱུར་གཙོ་གནད་དུ་ཤུགས་སྣོན་བརྒྱབ་སྟེ་གྲོང་ཁྱེར་གྲོང་གསེབ་ཀྱི་ཡུལ་མིར་ཁྱབ་པའི་གཞི་རྩའི་སྨན་བཅོས་འགན་སྲུང་མ་ལག་སྔར་བས་འཐུས་སྒོ་ཚང་དུ་བཏང་ནས་མང་ཚོགས་ཀྱིས་བློ་མོས་བྱེད་པའི་གཞི་རྩའི་སྨན་བཅོས་ཞབས་ཞུ་མཁོ་འདོན་བྱེད་དགོས། སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐྱོར་ལས་དོན་གཏིང་ཟབ་སྤེལ་ནས་ཚོགས་པས་ཚོགས་པ་འཁྲིད་པ་དང་། རིགས་གཅིག་མཁས་ཅན་གྱིས་རྐང་འཛིན་འཁྲིད་པ། དགེ་རྒན་གྱིས་དགེ་ཕྲུག་འཁྲིད་པ་བཅས་ཀྱི་ལས་ཀའི་ལམ་སྲོལ་བཙུགས་ཏེ་སྨན་བཅོས་འཕྲོད་བསྟེན་གྱི་ཞབས་ཞུའི་ཆུ་ཚད་ཕྱོགས་ཡོངས་ནས་མཐོ་རུ་བཏང་ཐོག ནད་ཆེན་རང་སྐྱོང་ལྗོངས་སུ་བཅོས་ཐུབ་པ་དང་། ནད་འབྲིང་ས་གནས་གྲོང་ཁྱེར་དུ་བཅོས་ཐུབ་པ། ནད་ཆུང་རྫོང（ཆུད）དུ་བཅོས་ཐུབ་པ་བཅས་བྱེད་དགོས། དམངས་ཡོངས་ཀྱིས་ལུས་སྦྱོང་བྱེད་པའི་རྒྱལ་ཁབ་ཀྱི་འཐབ་ཇུས་དོན་འཁྱོལ་བྱས་ནས་དམངས་ཡོངས་ཀྱིས་ལུས་སྦྱོང་བྱེད་པའི་འཆར་གཞི་ལག་བསྟར་བྱས་ཐོག གཞོན་ནུ་ལོ་ཆུང་ནས་དམ་འཛིན་བྱས་ཤིང་དམངས་ཡོངས་ཀྱི་ལུས་སྦྱོང་ལུས་རྩལ་རྒྱ་ཁྱབ་ཏུ་སྤེལ་དགོས། འཆར་ལྡན་བུ་བཙའི་གཞི་རྩའི་རྒྱལ་ཇུས་མཐའ་འཁྱོངས་ཀྱིས་ཕྱོགས་ཡོངས་ནས་ཕྲུ་གུ་གཉིས་སྐྱེས་ཆོག་པའི་སྲིད་ཇུས་ལག་བསྟར་བྱེད་དགོས། སྤྱི་ཚོགས་འགན་སྲུང་མ་ལག་འཐུས་སྒོ་ཚང་དུ་གཏོང་དགོས་པ་སྟེ། གྲོང་ཁྱེར་གྲོང་གསེབ་ཀྱི་ཡུལ་མིར་ཁྱབ་པའི་གཞི་རྩའི་རྒན་གསོ་དང་། གཞི་རྩའི་སྨན་བཅོས། ལས་ཤོར། ལས་རྨས། བུ་བཙའ་སོགས་ཀྱི་འགན་བཅོལ་ལམ་ལུགས་འཐུས་སྒོ་ཚང་དུ་གཏོང་བ་དང་ཁེབས་རྒྱ་ཆེ་རུ་བཏང་ནས་འགན་སྲུང་ཆུ་ཚད་མཐོ་རུ་གཏོང་དགོས། སྤྱི་ཚོགས་ཀྱི་རོགས་སྐྱོབ་ལམ་ལུགས་འཐུས་སྒོ་ཚང་དུ་བཏང་ནས་གྲོང་ཁྱེར་གྲོང་གསེབ་ཀྱི་མ་མཐའི་འཚོ་བ་འགན་སྲུང་དང་། དམིགས་བསལ་དཀའ་ངལ་ཡོད་པའི་མི་སྣའི་འཚོ་སྐྱོང་ཚད་གཞི་རིམ་བཞིན་མཐོ་རུ་གཏོང་དགོས། སྲིད་གཞུང་གིས་གཙོ་བོ་བྱས་ཏེ་གཞི་རྩའི་འགན་སྲུང་མཁོ་འདོན་བྱེད་རྒྱུ་དང་ཁྲོམ་རས་གཙོ་བོ་བྱས་ཏེ་བང་རིམ་མང་བའི་དགོས་མཁོ་སྐོང་ཐུབ་པའི་སྡོད་ཁང་མཁོ་འདོན་མ་ལག་འཛུགས་དགོས། གནོད་འགོག་གེགས་སེལ་གྱི་ལས་དོན་ཡག་པོ་སྒྲུབ་དགོས། རིག་གནས་སྟོབས་ཆེའི་ཁུལ་འཛུགས་སྐྱོང་ཇེ་མགྱོགས་སུ་གཏོང་དགོས་པ་སྟེ། སྔོན་ཐོན་རིག་གནས་ལ་བརྟེན་ནས་དགེ་མཚན་མེད་པའི་རིག་གནས་ཀྱི་ཤུགས་རྐྱེན་བཀག་འགོག་བྱེད་རྒྱུ་མཐའ་འཁྱོངས་བྱས་ཏེ་སྲོལ་རྒྱུན་རིག་གནས་ཀྱི་ཉིང་བཅུད་ལེན་དགོས་པ་དང་། མང་ཚོགས་ཀྱིས་ཉན་སྤྲོ་ལ་ལྟ་འདོད་བྱེད་པའི་གཞི་རིམ་གྱི་བསམ་པའི་རིག་གནས་འཚོ་བ་ཕུན་སུམ་ཚོགས་སུ་བཏང་ཐོག གཞི་རིམ་རིག་གནས་ཀྱི་འཐབ་ས་གཟུང་དགོས། སྤྱི་པའི་རིག་གནས་ཞབས་ཞུའི་མ་ལག་མུ་མཐུད་འཐུས་སྒོ་ཚང་དུ་གཏོང་རྒྱུ་དང་། གཙོ་གནད་རིག་གནས་ཀྱི་དམངས་ཕན་ལས་གཞིར་སྐུལ་སྤེལ་བཏང་སྟེ་ཕྱོགས་ཡོངས་ནས་རིག་རྩལ་བརྩམས་ཆོས་གསར་གཏོད་བྱེད་ནུས་ཆེ་རུ་གཏོང་རྒྱུ་དང་། བོད་ཀྱི་དམིགས་བསལ་ཁྱད་ཆོས་ལྡན་ལ་རྒྱལ་ཡོངས་སུ་སྐད་གྲགས་ཆོད་པའི་བརྩམས་ཆོས་རྩེ་གྲ་ཁག་གཅིག་གཏོད་དགོས། རིག་དངོས་དང་དངོས་མིན་རིག་གནས་ཤུལ་བཞག་སྲུང་སྐྱོབ་བྱེད་ཤུགས་ཆེ་རུ་བཏང་སྟེ་གྲགས་ཅན་ཡུལ་ལྗོངས་དང་། ལོ་རྒྱུས་རིག་གནས་ཀྱི་གྲགས་ཅན་གྲོང་ཁྱེར། གྲགས་ཅན་གྲོང་རྡལ། གྲགས་ཅན་གྲོང་ཚོ། གྲགས་ཅན་དགོན་སྡེ་བཅས་ལ་སྲུང་སྐྱོབ་དང་དོ་དམ་བྱེད་རྒྱུར་ཤུགས་སྣོན་རྒྱག་དགོས།

འབྲེལ་ཡོད་ནང་དོན།

- བཀའ་འགྱུར་གྱི་པར་གཞི་ཁག་བྱུང་ཚུལ།

- བོད་ཀྱི་སྲོལ་རྒྱུན་རོལ་ཆ།

- མི་རིགས་མཐུན་སྒྲིལ་གྱི་མེ་ཏོག་གངས་ལྗོངས་ས་མཐོར་བཞད།

- བོད་ལྗོངས་བུད་མེད་དང་བྱིས་པའི་སྨན་ཁང་ལྷ་ས་སྣེའུ་ཁུལ་གསར་དུ་འཛུགས་རྒྱུ་ཡིན་པ།

- ཁྲོན་བོད་བྱང་ལམ་གྱི་ས་བབ་མཐོ་ཤོས་གཞུང་ལམ་གྱི་ཕུག་ལམ་ཤར་གཏོང་ཐུབ་པ།

- ཀྲུང་ཨུ་ཚང་འཛོམས་གྲོས་ཚོགས་ཐེངས་དྲུག་པའི་དགོངས་དོན་སློབ་སྦྱོང་གཏིང་ཟབ་བྱས་པ།

- ལི་ཁེ་ཆང་གིས་ཨུ་རི་སིའི་ཙུང་ཐུང་ཕུའུ་ཅིན་ལ་མཇལ་འཕྲད་གནང་།

- བོད་ལྗོངས་ནང་བསྟན་སློབ་གླིང་གི་དགོན་སྡེའི་གྲྭ་བཙུན་ལ་གསོ་སྦྱོང་སྤེལ་ཐེངས་བཅུ་གཉིས་པ་མགོ་བརྩམས་པ།

- ཁྲོན་བོད་ལྕགས་ལམ་དར་རྩེ་མདོ་ནས་ཉིང་ཁྲི་བར་གྱི་ལམ་བུ་ཕྱི་ལོ་སྐྲུན་འགོ་འཛུགས་རྒྱུ་ཡིན་པ།

- བོད་ལྗོངས་སུ་གཞི་ཁྱོན་ཆེ་བའི་ཞིང་ཆེན་རིམ་པའི་མ་ལམ་འཛུགས་སྐྲུན་བྱ་འཆར་ཡོད་པ།