སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
དམ་པ་ཆོས་ལུགས་ཀྱི་རིན་པོ་ཆེའི་བསྟན་བཅོས་ལེགས་བཤད་དབང་གི་རྒྱལ་པོ་ཞེས་བྱ་བ་བཞུགས་སོ། །
སྤེལ་དུས། 2016-06-21   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  ངག་དབང་བློ་བཟང་བསྟན་འཛིན་རྒྱ་མཚོ།

       གསེར་རིའི་དབུས་ན་ལྷུན་པོ་ནི།  །རང་བརྗིད་མཚུངས་ཟླས་དབེན་པ་ལྟར།  །དགྲ་བཅོམ་འཁོར་དབུས་མངོན་མཛེས་པའི།  །སྟོན་པ་མཆོག་དེའི་ཞབས་སྐྱེས་མཆོད།  །ནོར་བུའི་ཅོད་པན་འོད་འཕྲོ་བ།  །སྐབས་གསུམ་ལྷ་ཡི་གཙུག་ན་མཛེས།  །བླ་མའི་ཞབས་ཀྱི་པདྨོ་ཡང་།  །སློབ་མའི་གཙུག་གི་རྒྱན་དུ་འོས།  །བསམ་འཕེལ་དབང་རྒྱལ་རྒྱལ་མཚན་རྩེར།  །མངོན་མཆོད་དགོས་འདོད་ཆར་དུ་འབེབ།  །བཤེས་མཆོག་ཞབས་བསྟེན་བཀའ་དྲིན་ལས།  །འདི་ཕྱིའི་ལེགས་ཚོགས་ཡིད་བཞིན་འགྲུབ།  །མཚན་མོའི་ལམ་བགྲོད་དཀའ་ཚེགས་ཆེ།  །ནོར་བུའི་སྣང་བར་བརྟེན་པས་བདེ།  །གསུང་རབ་བདེ་བླག་རྟོགས་པའི་ཆེད།  །ལམ་སྟོན་བཤེས་གཉེན་མིག་ལྟར་གཅེས།  །ནོར་བུ་བཀྲུ་བའི་དཔེ་གསུམ་ལྟར།  །གདུལ་བྱའི་བློ་ཁའི་རིམ་པ་ལ།  །ལྟོས་ཏེ་གསུང་རབ་གོང་འོག་སྣང་།  །དོན་དུ་ཆོས་ལ་བཟང་ངན་མེད།  །དབུལ་བོ་སྡུག་བསྔལ་གྱིས་གདུངས་ཡང་།  །ནོར་བུའི་ཚོགས་ལ་ཡིད་སྨོན་བྱེད།  །ཤེས་བརྩོན་ནོར་གྱིས་དབུལ་ན་ཡང་།  །ཆོས་ལ་ནན་ཏན་དད་གུས་བསྐྱེད།  །རིན་ཆེན་མགུལ་རྒྱན་འཕྱང་འཕྲུལ་གྱིས།  །མགྲིན་པ་ཡོད་འོང་བྱེད་པ་བཞིན།  །ལེགས་བཤད་གཏམ་གྱི་སྦྱོར་བ་ནི།  །བློ་གསལ་མགྲིན་པའི་མཛེས་རྒྱན་ཡིན།  །སྣ་ཚོགས་ནོར་བུའི་གཏེར་བརྡོལ་བའི།  །ཁྱིམ་དུ་དབུལ་འཕོངས་སྡུག་བསྔལ་བྲལ།  །གང་ཞིག་ཆོས་ལ་དད་པ་ཐོབ།  །སེམས་ལ་ཡོན་ཏན་རྣམ་མང་འདྲེན།  །བཞིན་གྱི་ནག་ནོག་དྲི་མ་དེ།  །ནོར་བུའི་མེ་ལོང་ངོས་ན་གསལ།  །རང་སེམས་སྐྱོན་དང་ཡོན་ཏན་རྣམས།  །ཆོས་ཀྱི་མེ་ལོང་ནང་དུ་གསལ།  །བྱད་བཞིན་དངོས་དང་དེའི་གཟུགས་བརྙན།  །མེ་ལོང་ཤར་བ་འདྲ་སྣང་འཆར།  །བཅོས་མའི་དད་དང་དད་པ་གཉིས།  །འདྲར་སྣང་འཆར་ཡང་ཁྱད་པར་ཆེ།  །ལོངས་སྤྱོད་དོན་དུ་རིན་པོ་ཆེ།  །གསོགས་སྒྲུབ་བྱེད་ཚེ་རྐུན་མ་ལྡང་།  །ཐོས་སོགས་ཡོན་ཏན་དོན་གཉེར་ཚེ།  །བག་མེད་རྐུན་མས་འཁྱེར་ཉེན་ཡོད།  །སྔར་རྙེད་ནོར་བུ་དོར་ནས་ནི།  །ཕྱི་མ་ལེན་ལ་དགའ་བ་ཡོད།  །སློབ་མ་ངན་པ་བླ་མ་ལ།  །སྐྱོན་དུ་བལྟ་ཞིང་ཕྱི་མ་བཙལ།  །གསེར་གྱི་ཡིན་ཏན་མི་ཤེས་འགའ།  །མིག་ལ་གནོད་ཅེས་དོར་བ་ཡོད།  །དེང་དུས་སྐྱེ་སྤྲུལ་ཕབ་ཆེར་ཞིག  །དགེ་རྒན་ཁུར་དུ་མཐོང་ནས་འདོར།  །ཇི་ལྟར་ས་རྡོ་རྙེད་སླ་ཞིང་།  །རིན་ཆེན་མཆོག་ནི་རྙེད་པར་དཀའ།  །བདེ་འགྲོའི་ངན་འགྲོའི་རྟེན་མང་པོ།  །རྙེད་ཀྱང་དལ་འབྱོར་ཐོབ་པ་དཀོན།  །ཤེལ་བུམ་རེ་ཞིག་ལོངས་སྤྱད་ཀྱང་།  །ནམ་ཞིག་དུས་ན་འཇིག་པར་འགྱུར།  །ཡུན་རིང་ཐབས་ཀྱིས་བསྐྱངས་བསྐྱངས་པའི།  །ལུས་འདི་འཇིག་པར་གདོན་མི་ཟ།  །རིན་པོ་ཆེ་དང་སྣམ་བུ་གཉིས།  །བརྐུས་ལ་ཆད་ལས་ཆེ་ཆུང་ལྟར།  །དགེ་སྡིག་ཆེ་ཆུང་སྟོབས་ཀྱིས་ནི།  །ལས་ཀྱི་འབྲས་བུ་ཆེ་ཆུང་འབྱུང་།  །མི་ཞིག་ལམ་ཁར་གསེར་རྙེད་པས།  །སྡུག་བསྔལ་མང་པོ་ཐོབ་པ་བཞིན།  །འཁོར་བའི་བདེ་འབྱོར་གང་ཐོབ་ཀྱང་།  །སྔལ་བསྔལ་རང་བཞིན་ཡིད་བརྟན་མེད།  །ལས་ངན་དཔུང་ལྡན་རྒྱལ་བཙུན་གཉིས།  །མེ་ཤེལ་ཉི་འོད་ཕྲད་པས་བསྲེགས།  །མི་དགེའི་ལས་ཀྱིས་ངན་སོང་ན།  །སྡུག་བསྔལ་དུ་མས་སེམས་ཅན་གདུངས།  །རིན་ཆེན་མེ་ཏོག་ལྷ་ལྷ་མོ།  །ཕན་ཚུན་རྩེད་འཇོའི་ཕྱིར་དུ་འཕེན།  །ཡང་སོས་དམྱལ་བ་ནང་ཕན་ཚུན།  །ཁྲོས་པས་གསོད་ཕྱིར་རལ་གྲི་འཕེན།  །གོས་དང་རིན་ཆེན་ཤིང་ལ་སོགས།  །བཟོ་སྒྲུབ་བྱེད་ཚེ་ཐིག་འདེབས་ལྟར།  །ལུས་ལ་དམྱལ་སྲུང་ཐིག་བཏབས་ནས།  །མཚོན་ཆས་གཤགས་པའི་ཚུལ་འདི་སྡུགརིན་ཆེན་རྡོ་དང་ཤིང་སྨན་སོགས།  །གཏུན་དུ་བརྡུངས་པས་རབ་ཏུ་བཅོམ།  །བསྡུས་འཇོམས་རི་བོས་ལས་ངན་རྣམས།  །ཕྱེ་མར་འཐག་འིང་ཁྲག་ཀླུང་འབབ།  །རིམ་གཅིག་རིམ་གཉིས་གོང་བུར་བསྲེགས།  །རིན་ཆེན་སྨན་ནུས་ཆེ་ཆུང་ལྡང་།  །ལྕགས་ཁང་རིམ་གཅིག་རིམ་གཉིས་བསྲེགས།  །སེམས་ལ་སྡུག་བསྔལ་ཆེ་ཆུང་འབྱུང་།  །ལྷ་རྣམས་རིན་ཆེན་ཁང་བཟང་།  །བདུད་རྩིའི་ཁྲུས་ཀྱིས་ལུས་ཀུན་གཤེར།  །ཁྲོ་ཆུའི་ནང་ན་དམྱལ་བའི་འགྲོ།  །གསལ་ཤིང་རྩེར་བསྐྱོན་ཁྲག་གིས་གཤེར།  །དགེ་འབྲས་བདེ་རག་ས་གཞི་དང་།  །རི་བོར་ལྷ་རྣམས་བདེ་བ་མྱོང་།  །སྡུག་འབྲས་ལྕགས་བསྲེགས་ས་གཞི་དང་།  །རི་བོ་སེམས་དམྱལ་སྲེག་པའི་རྫས།  །རིན་ཆེན་མར་མེའི་སྡོང་བུ་དེ།  །མེ་དང་ལྷན་ཅིག་སྲེག་པ་ལྟར།  །ལུས་པོ་མེ་དང་དབྱེར་མེད་འདྲེས།  །མི་བཟད་དམྱལ་བ་མནར་མེད་སྦུག  །མུན་པར་ཆུད་པའི་དུང་བཞིན་དུ།  །སྨག་རུམ་གནས་པའི་གངས་རིའི་ཁྲོད།  །ཆུ་བུར་ཅན་སོགས་སྡུག་བསྔལ་དང་།  །ཚེ་ཚད་ཡུན་རིང་འཇིགས་པ་ཆེ།  །སེམས་དཔལ་ཆེ་རྣམས་རིན་ཆེན་དང་།  །ཟས་ཀྱི་ཆར་ཕབས་དུག་ཏུ་འགྱུར།  །དེ་འདྲའི་ལས་ཀྱིས་གདུངས་པ་ཡི།  །ཡི་དྭགས་བཀྲེས་སྐོམ་དུ་མས་ཉེན།  །དབྱར་དུས་ཟླ་དཀྱིལ་ཤར་བས་སྲེག    །དགུན་དུས་ཉི་དཀྱིལ་ཤར་ཡང་འཁྱག  །སྨིག་རྒྱུ་ཆུར་མཐོང་ཆུ་ཀླུང་སྐམ།  །ཡི་དྭགས་སྣང་བ་ཕྱིན་ཅི་ལོག  །རིན་ཆེན་འབྱོར་ཡང་ཀླུ་འགའ་ཞིག  །བྱེ་ཚན་དང་ནི་མཁའ་ལྡིང་འཇོམས།  །དུད་འགྲོ་གཞན་དབང་ཤུགས་ཆེ་བས།  །རང་ལུས་གཞན་གྱིས་ཟས་སུ་ཟ།  །རིན་ཆེན་མདུན་དུ་སྤུངས་ན་ཡང་།  །རྡོ་དང་ཁྱད་མེད་རྐང་བས་བརྫི།  །དེ་འདྲའི་རྨོངས་པས་ཟིལ་མནན་པའི།  །དུད་འགྲོའི་སྐྱེ་གནས་ཡ་རེ་ང་།  །མེ་ཤེལ་ཉི་མའི་དཀྱིལ་འཁོར་ལ།  །གྲང་རེག་འཇོམས་པའི་ནུས་པ་སྣང་།  །བསླུ་བ་མེད་པའི་དཀོན་མཆོག་གསུམ།  །ངན་འགྲོའི་འཇིགས་སྐྱོབ་དཔུང་གཉེན་ཆེ།  །རིན་ཆེན་ས་གཞི་ལྕགས་བསྲེགས་གཞི།  །ལྷ་དང་དམྱལ་བ་སོ་སོར་སྤྱོད།  །དགེ་སྡིག་ལས་ལས་བདེ་སྡུག་རྣམས།  །འབྱུང་ཚུལ་ཞིབ་བསམ་སྐྱོ་བར་མཛོད།  །ཉི་དཀྱིལ་མཁའ་ལ་ཤར་བ་ན།  །དྲོ་གྲང་ཉིན་སྲིབ་ཁྱད་ལས་འབྱུང་།  །རྒྱལ་བའི་ཐུགས་རྗེ་ཀུན་སྙོམས་ཡང་།  །འགྲོ་ལ་བདེ་སྡུག་ལས་ཀྱིས་འབྱུང་།  །གསེར་སོགས་རིན་ཆེན་སྣ་བདུན་གྱི།  །བང་མཛོད་ཐབས་ཀྱིས་བསྒྲུབས་པ་བཞིན།  །ཡོན་ཏན་བདུན་གྱིས་ཉེར་མཛེས་པའི།  །རྟེན་བཟང་འཐོབ་པའི་ཐབས་ལ་འབད།  །རིན་ཆེན་སྨན་གྱི་རྫས་འགའ་ལ།  །ཞེན་པ་ལྡོག་ཀྱང་ནད་པས་འཐུང་།  །སྡུལ་བསྔལ་ལས་ནི་ཐར་བའི་ཕྱིར།  །གནས་སྐབས་མངོན་མཐོ་དོན་དུ་གཉེར།  །རིན་ཆེན་ས་གཞིར་ནོར་བུའི་ལྗོན།  །རྒྱུ་ཚོགས་ཚང་ན་སྐྱེ་བ་ལྟར།  །རྒྱུ་བརྒྱད་དག་པ་གསུམ་ཚང་བས།  །རྣམ་སྨིན་འབྲས་བུ་ཕུལ་བྱུང་འབྱིན།  །མི་ཡི་དབང་བོ་འཁོར་སྒྱུར་ཆེ།  །གསེར་གྱི་འཁོར་ལོར་དབང་བསྒྱུར་ཡང་།  །ནམ་ཞིག་ལས་ཀྱི་གཞན་དབང་གིས།  །ལྟུང་བའི་ཚུལ་འདི་བསམས་ཚེ་སྐྱོ།  །ནོར་བུའི་འོད་དང་གཞལ་མེད་ཁང་།  །ལྷ་མིན་ལོངས་སྤྱོད་ལྷ་ལ་འགྲན།  །ཕྲག་དོག་དང་ནི་གཡོ་སྒྱུ་ཡིས།  །བདེན་མཐོང་སྐལ་མེད་བདུད་ཀྱི་གཉེན།  །རིན་ཆེན་ཐེམ་སྐས་འབབ་འཛག་ལས།  །དམའ་ཞིང་མཐོ་བའི་གོ་ས་ལྟར།  །ཡང་དང་ཡང་དུ་རིགས་དྲུག་འགྲོ།  །མཐོ་དམན་ས་རུ་ངེས་པར་སྐྱེ།  །རིན་ཆེན་རྒྱན་ལྡན་ལྷའི་བུ་མོར།  །རེག་པའི་བདེ་བ་ཡུན་རིང་མྱོང་།  །སླར་ཡང་དམྱལ་བར་འཐག་གཅོད་ཀྱི།  །རེག་པ་མི་བཟད་བསྟེན་དགོས་སྡུག  །རྐང་གདུབ་སྒྲས་ཀྱང་ཡིད་དབང་འགུགས།  །ལྷུན་པོའི་སྤོ་ལ་ཡུན་རིང་གནས།  །སླར་ཡང་མེ་མུར་རོ་མྱགས་བརྒལ།  །སྡུག་བསྔལ་མྱོང་ཚེ་ཅི་ཞིག་བྱ།  །རིན་ཆེན་ཁང་བཟང་མཛེས་པའི་ཚལ།  །ལྷ་བུ་རྣམས་དང་རྩེན་ནས།  །སླར་ཡང་རལ་གྲིའི་ནགས་ཚལ་ལྷུང་།  །རྐང་ལག་གཅོད་འགྱུར་སུ་ཞིག་བཟོད།  །ནོར་བུས་གང་གང་བའི་དལ་འབབ་འགྲམ།  །གདོང་མཛེས་བུ་མོར་ལྷན་ཅིག་འགྲོག  །སླར་ཡང་ཆུ་བོ་རབ་མེད་དུ།  །སྐྱེ་དགོས་བསམ་ཚེ་ཡིད་རེ་སྐྱོ།  །རྣམ་པར་རྒྱལ་བའི་ཁབ་བཟང་ན།  །བརྒྱ་བྱིན་ལྷ་རྣམས་མཆོད་པའི་ཡུལ།  །འདི་ཡང་ལས་ཀྱི་ས་སྟེང་ལྷུང་།  །འཁོར་བར་ཡང་བྲན་འགྱུར་བར་གསུང་།  །གསེར་གྱི་སྒྲོག་གིས་བཅིངས་ན་ཡང་།  །མངོན་པར་དགའ་བློ་མི་འབྱུང་ལྟར།  །ཁམས་གོང་ལྷ་ཡི་ཏིང་འཛིན་སོགས།  །རེ་ཞིག་ངལ་གསོ་ཙམ་དུ་ཟད།  །ཟླ་བའི་དཀྱིལ་འཁོར་ཤས་བ་ན།  །ཚ་བའི་གདུང་བ་འཕྲོག་པར་བྱེད།  །འཕགས་ནོར་ཞི་བའི་ལམ་བཟང་བསྟེན།  །ཉོན་མོངས་ཚ་གདུང་གཞིལ་བར་འགྱུར།  །རིན་ཆེན་ཕལ་བ་མངས་ན་ཡང་།  །དགོས་འདོད་ཀུན་འབྱུང་ནོར་བུ་དཀོན།  །བྱང་ཆུབ་སེམས་ཀྱི་རིན་ཆེན་འདིས།  །དགེ་བ་གཞན་གང་ཟིལ་གྱིས་གནོན།  །སྣ་ཚོགས་ནོར་བུའི་ཕུང་བོ་རྣམས།  །འདྲེན་འདོད་ཤིང་རྟ་ཐབས་སུ་བཙལ།  །སངས་རྒྱས་ཆོས་རྣམས་འདྲེན་འདོད་པས།  །གཏོང་སེམས་སྤེལ་ལ་རྒྱ་ཆེར་བསླབ།  །རིན་ཆེན་ཤིང་རྟ་བསྒྱུར་འདོད་ཚེ།  །ཁ་ལོ་བ་ཞིག་གྲོགས་སུ་དགོས།  །བདོག་པ་འབྲས་བཅས་གཏོང་འདོད་ན།  །ཞེན་མེད་འཁོར་གསུམ་དག་པ་གཅེས།  །ཆུ་གཏེར་ནོར་བུའི་བུམ་པ་ལས།  །དག་བྱེད་རྒྱུན་འབབ་དྲི་མ་འཁྲུད།  །ཚུལ་ཁྲིམས་གངྒཱའི་རྒྱུན་བཟང་བོ།  །བསྟེན་པས་ཉེས་སྤྱོད་དྲི་མ་འཁྲུད།  །ནོར་གྱི་བྱེ་བྲག་ཉུང་ན་ཡང་།  །གསེར་མང་གྱུར་ན་དོན་གྱིས་འབྱོར།  །ཡོན་ཏན་མང་བོ་མ་མཆིས་ཀྱང་།  །ཚུལ་ཁྲིམས་ལྡན་ན་དོན་གྱིས་འབྱོར།  །ཉི་མ་མེ་ཤེལ་ཕྲད་པའི་ཚེ།  །སྲེག་བྱེད་ནུས་པ་ལྷག་པར་ལྡང་།  །སྡུག་བསྔལ་ལ་སོགས་རྐྱེན་ཕྲད་ཚེ།  །བྱང་སེམས་བཟོད་པའི་གོ་ཆ་བགོ།  །རང་བཞིན་དབྱིབས་ལེགས་ལང་ཚོ་ཅན།  །རིན་ཆེན་རྒྱན་གྱིས་ལྷག་པར་མཛེས།  །སྙིང་སྟོབས་མཆོག་གི་ཡོན་ཏན་ཅན།  །བཟོད་པ་ཁྱད་འཕགས་གོ་ཆས་མཛེས།  །ནོར་བུའི་མཆོག་དམན་བྱེ་བྲག་གིས།  །འོད་ཀྱང་ཆེ་ཆུང་འབྱུང་བ་ལྟར།  །ལམ་བཟང་སྒྲུབ་ཚེ་བརྩོན་འགྲུས་ཀྱི།  །ཁྱད་ལས་ས་ཆོད་ཆེ་ཆུང་འབྱུང་།  །བརྩོན་པ་ཤུགས་དྲག་རྒྱུན་རིང་བས།  །རིན་ཆེན་རི་བོ་འབིག་པར་སྣང་།  །མི་ལྡོག་བརྟན་པའི་བརྩོན་འགྲུས་ཀྱིས།  །གང་བརྩམས་ལས་ཀྱི་མཐའ་རྣམས་འགྲུབ།  །དཔུང་བ་བརྟན་པའི་ལག་པ་ཡིས།  །རྩེ་ཕྲན་མུ་ཏིག་འཕྱང་འཕྱང་འཕྲུལ་བསྟར།  །བྱིང་རྒོད་སྐྱོན་བྲལ་ཏིང་འཛིན་གྱིས།  །དམིགས་ཡུལ་མཚན་དཔེའི་མཛེས་སྡུག་བཟོ།  །ནོར་བུ་བཞུ་བླུགས་བྱེད་པ་ན།  །རྫས་ཀྱི་རྟེན་འབྲེལ་ཚང་བ་དགོས།  །རྣམ་དག་ཏིང་འཛིན་འགྲུབ་འདོད་པས།  །ཡན་ལག་རྒྱུ་ཚོགས་ཚང་བར་འབད།  །བརྩོན་པས་རབ་ཏུ་བརྡར་བ་ཡི།  །རིན་ཆེན་རལ་གྲིས་འཁྲི་ཤིང་གཅོད།  །ཡང་ཡང་སྦྱངས་པའི་ཤེས་རབ་ཀྱིས།  །རྨོངས་པའི་དྲ་བ་གཅོད་པར་བྱེད།  །དམིགས་བུ་མེད་ན་དམུས་ལོང་རྣམས།  །རིན་ཆེན་གྲོང་ཁྱེར་ག་ལ་བགྲོད།  །གང་ཚེ་ཤེས་རབ་མིག་མེད་ན།  །སྦྱིན་སོགས་དམུས་ལོང་འདྲ་བར་གསུངས།  །ནོར་བུ་དགྲ་བོའི་དཔུང་འཇོམས་སོགས།  །ཉེར་མཁོ་ཆགས་མེད་སྦྱིན་པ་ལྟར།  །གཞན་བདེ་མཆོག་ལ་སྦྱོར་འདོད་པས།  །རང་གི་བདེ་བ་རྩྭ་ལྟར་འདོར།  །མཐོ་དམན་གང་ཡང་དགའ་སྐྱེད་རྫས།  །རིན་པོ་ཆེ་ལས་གཞན་ན་གང་།  །སྙན་སྨྲ་གཙོ་བོ་ལེགས་བཤད་སྨྲ།  །གང་ཕན་ཚིག་སྦྱོར་ཚུལ་མཁས་ཡིན།  །རིན་ཆེན་སྦྱིན་ན་དགའ་ལགས་ཏེ།  །སྟེར་བའི་ཚིག་ཙམ་དེ་ལྟ་མིན།  །དོན་སྤྱོད་བཟང་པོར་སྙིང་ནས་འཇུག  །ཁ་བཤད་ཙམ་གྱིས་མཐར་མི་ཕྱིན།  །ནོར་བུ་སྦྱིན་པའི་དེད་དཔོན་མཐོང་།  །ཐམས་ཅད་དེ་ལ་ཡིད་སྨོན་བྱེད།  །དོན་མཐུན་རང་གིས་སྤྱད་བྱས་ན།  །གཞན་དག་དེ་ཡི་རྗེས་སུ་འཇུག  །བི་ཤྭ་ཀརྨས་ལྷ་དང་མིའི།  །རིན་ཆེན་ལས་གྲུབ་མཛེས་སྐུ་བཞེངས།  །རྡོ་རྗེ་སློབ་དཔོན་བློ་ཆེན་གྱིས།  །རང་སེམས་སྐུ་བཞིའི་ས་བོན་བསྐྲུན།  །ནོར་བུའི་སྣོད་དུ་བཟུང་འོས་པའི།  །ཆུ་གཙང་ལུས་ཀྱི་དྲི་མ་འཁྲུད།  །རྣམ་དག་དབང་བཞིའི་རྒྱུན་བཟང་གིས།  །སྒོ་གསུམ་སྒྲིབ་པའི་དྲི་མ་འཁྲུད།  །ནོར་བུའི་བྱེ་བྲག་ཁྱད་པར་གྱིས།ཡོན་ཏན་བཟང་ངན་ཤེས་པ་དཀོན།  །གསང་སྔགས་མཆོག་གི་གདུལ་བྱ་ཡང་།  །དཔེ་ཡི་ཁྱད་པར་དུ་མ་བཅས།  །རྒྱལ་པོ་དགའ་བར་བྱ་འདོད་པས།  །རིན་ཆེན་ཕུལ་བ་ཐབས་སུ་བཟང་།  །ཡི་དམ་ལྷ་ཚོགས་མཉེས་བྱེད་ན།  །དམ་ཚིག་བསྲུང་བའི་ཚོགས་བསགས་འབད།  །མུན་སེལ་འཛམ་གླིང་སྣང་བའི་འོད།  །ཉི་མའི་དཀྱིལ་འཁོར་ཤར་བས་འོང་།  །སྐྱེ་ཤི་བར་དོ་སྦྱོང་བའི་ལམ།  །གནད་སྨིན་བསྐྱེད་རིམ་སྟོབས་ལས་འབྱུང་།  །སྣ་ཚོགས་ནོར་བུའི་འོད་ཟེར་གྱི།  །རྩེ་དགའ་དགོད་པའི་ངོ་མཚར་ལྟར།  །ནམ་མཁའ་ཁྱབ་པའི་ཏིང་འཛིན་གྱིས།  །སྤྲོ་དང་བསྡུ་བའི་རྣལ་འབྱོར་བྱ།  །ལྷ་དབང་བརྒྱ་བྱིན་གཟུགས་བརྙན་ནི།  །བེེཌཱུར་དྭངས་མའི་གཞི་ལ་འཆར།  །ཏིང་འཛིན་པིར་གྱིས་བྲིས་པ་ཡི།  །འཇའ་ཚོན་ལྷ་སྐུ་ཡིད་ངོར་བཞེངས།  །ཁ་དོག་སྣ་ལྔའི་ནོར་བུའི་འོད།  །རྣམ་པའི་ཁྱད་པར་ཉམས་སྤྲོ་སྐྱེད།  །རིགས་ལྔ་ཡབ་ཡུམ་རྣམ་འགྱུར་གྱི།  །ཁྱད་ལས་བདེ་དགའ་ལྷག་པར་འདྲེན།  །རྟ་བདུན་དཀྱིལ་འཁོར་འོད་འབར་བ།  །སྐྱ་རེངས་སྣང་བའི་འཛུམ་གྱིས་བསུ།  །རྫོགས་རིམ་ཟབ་མོའི་རྣམ་འབྱོར་བདེ།  །ཕྱག་རྒྱའི་འཕྲུལ་འདེགས་སྟོབས་ཀྱིས་འདྲེན།  །རིན་ཆེན་རྒྱན་གྱི་གདུབ་ཀོར་དེ།  །ཆགས་ལྡན་ཡིད་དབང་འགུགས་པའི་ཐབས།  །རྡོ་རྗེ་སློབ་དཔོན་སྲས་བཅས་མཆོད།  །མཁའ་འགྲོ་མ་རྣམས་འགུགས་པའི་རྒྱུ།  །ཇི་ལྟ་ནོར་བུ་ཀེ་ཏ་ཀས།  །རྙོག་མའི་ཆུ་བོ་དྭངས་པར་བྱེད།  །ངྷུ་ཏིར་འབར་འཛགས་ལས་བྱུང་བའི།  །དགའ་བདེས་སེམས་ཀྱི་སྒྲིབ་རྙོག་གྲུངས།  །ཟླ་བའི་དཀྱིལ་འཁོར་བདུད་རྩི་ཡི།  །ཟེགས་མ་འབུམ་འཛག་ཀུན་ད་བཞད།  །བྱང་སེམས་དབུ་མར་བཞུས་པ་ལས།  །ལྷན་སྐྱེས་བདེ་ཆེན་དགའ་སྟོན་བཞད།  །ཆུ་ཤེལ་དབང་བོའི་དཀྱིལ་འཁོར་ལ།  །བཅུ་དྲུག་ཆ་ཡི་འཕེལ་བ་སྣང་།  །དཔྱིད་ཀྱི་ཐིག་ལེ་རྒྱས་པའི་དཔལ།དགའ་བའི་ལང་ཚོ་བཅུ་དྲུག་ངོམ།  །གང་ཞིག་རྒྱ་མཚོར་གྲུ་གཟིངས་བསྡམས།  །རིན་ཆེན་གླིང་ནས་ནོར་བུ་འདྲེན།  །དེ་བཞིན་དམ་ཚིག་བསྲུང་བ་དང་།  །རྒྱུད་སྡེའི་གདམས་ངག་ལེན་འདོད་བསྐྱེད།  །དེད་དཔོན་ཡིད་བཞིན་ནོར་བུ་ལེན།  །དོན་མཐུན་རྒྱ་མཚོའི་འཇིགས་ལས་སྒྲོལ།  །སློབ་དཔོན་ལེགས་བཤད་ནོར་བུ་འདྲེན།  །གདུལ་བྱ་སྲིད་མཚོ་ཆེ་ལས་སྒྲོལ།  །གསེར་བཟང་མཛེས་པའི་ཀ་ལ་ཤའི།  །རྒྱུན་བཟང་ལུས་ཀྱི་དྲི་མ་འཁྲུད།  །བུམ་དབང་གདྒཱའི་ཀླུང་ཆེན་རྒྱུན།  །ཐ་མལ་སྣང་ཞེན་དྲི་མ་སྦྱོང་།  །རིན་ཆེན་ཕྲ་ལྡེམ་ལྗོན་པ་ཅན།  །པདྨའི་ཟེའུ་འབྲུར་བུང་བས་སྤྱོད།  །ཟབ་གསང་ཨ་མྲྀ་ཏ་ཡི་ཁམས།  །བླ་མའི་མན་ངག་སྟོབས་ལས་མྱང་།  །རིན་ཆེན་ཉི་འོད་དང་འགྲོགས་པས།  །པདྨོར་སྦྲང་རྩིའི་ཕུང་བོ་རྒྱས།  །སྤུ་ལོང་གཡོ་བའི་ཟློས་གར་ཅན།  །ཕྱག་རྒྱའི་པདྨའི་བཅུད་ལེན་བསྔགས།  །བེེཌཱུར་དག་པའི་མེ་ལོང་དུ།  །གཟུགས་བརྙན་བྱེ་བ་འགོག་མེད་འཆར།  །བདེ་ཆེན་རང་བཞིན་དགའ་བའི་དངོས།  །དག་པའི་བརྟན་གཡོ་ཅི་ཡང་འཆར།  །ཉི་མ་མེ་ཤེལ་ཁམས་གཅིག་ལས།  །ཕྱོགས་བཅུར་འོད་ཟེར་ཀུན་ཏུ་འགྱེད།  །རྒྱལ་བ་སྤྲུལ་གཞི་ལོངས་སྤྱོད་རྫོགས།  །ངོ་མཚར་སྤྲུལ་སྐུ་ཐེར་འབུམ་འགྱེད།  །རིན་ཆེན་སྙིང་བོ་དག་པ་ལྟར།  །ནམ་མཁའི་ཁམས་ནི་རྣམ་པར་དག  །རྒྱལ་བའི་གསུང་རབ་མཐའ་ཀླས་པའི།  །བརྗོད་བྱའི་རང་བཞིན་རྣམ་པར་དགནོར་བུ་རང་བཞིན་སྐྱེ་བ་མེད།  །འགག་མེད་གནས་པ་མེད་པ་སྟེ།  །འཁོར་འདས་ཆོས་རྣམས་ཐམས་ཅད་ཀྱང་།  །དེ་ལྟར་རང་བཞིན་ཉིད་ཀྱིས་སྟོབས།  །དེད་དཔོན་མཆོག་གྱུར་སྦྱིན་ལ་དགའ།  །ནོར་བུས་འགྲོ་བའི་རེ་འདོད་སྐོང་།  །སྟོབས་བཅུ་མངའ་བ་རྫོགས་སངས་རྒྱས།  །འགྲོ་ལ་བདུད་རྩིའི་གཏེར་ཆེན་འགྱེད།  །རྒྱ་མཚོ་ཆེན་པོ་ཆུ་ཡི་གཏེར།  །ནོར་བུའི་འབྱུང་གནས་ཆེན་པོར་གྲུབ།  །ཐུབ་པའི་གསུང་རབ་བདུད་རྩིའི་གཏེར།  །ཕན་བདེའི་འབྱུང་གནས་ཆེ་རུ་གྲུབ།  །བུམ་པ་བཟང་པོ་རིན་ཆེན་སྣོད།  །འགྲོ་བའི་རེ་སྐོང་འདོད་འཇོའི་དཔལ།  །གདམས་པ་རིན་ཆེན་དབང་གི་རྒྱལ།  །འཇམ་མགོན་ལེགས་བཤད་ཁྱད་པར་འཕགས།  །འབྱོར་ལྡན་རིན་ཆེན་སྤེལ་འདོད་པས།  །དེད་དཔོན་རྗེས་སུ་འཇུག་པ་ལྟར།  །སངས་རྒྱས་ཆོས་རྣམས་ཐོབ་འདོད་ན།  །སློབ་དཔོན་རྗེས་སུ་འཇུག་པར་བྱ།  །རིན་པོ་ཆེ་ཡི་རྒྱན་བརྒྱད་པོ།  །ཡིད་འཕྲོག་ལྷ་ཡི་རྫས་སུ་འདྲ།  །འདིར་ནི་མཚུངས་གསལ་སོགས་བཀོད་པའི།གདམས་ངག་འགྲོ་ལ་སྨན་པའི་ཐབས།  །དགོས་འདོད་ཀུན་འབྱུང་ནོར་བུ་ཡིས།  །ཚེ་འདིའི་རེ་བ་ཀུན་སྐོང་ལྟར།  །འདི་སྦྱར་དགེ་བས་མཁའ་མཉམ་འགྲོའི།  །ཕན་བདེའི་རེ་བ་ཀུན་སྐོང་ཤོག 

ཅེས་དམ་པ་ཆོས་ལུགས་ཀྱི་རིན་པོ་ཆེའི་བསྟན་བཅོས་ལེགས་བཤད་དབང་གི་རྒྱལ་པོ་ཞེས་བྱ་བ་འདི་ནི།  །མཚོ་སྔོན་ཨ་ཏོན་ཏིས་སྔོན་ནས་སྐྱོ་སངས་ཉིན་བདུན་ལ་བྱས་སྐབས།  །༧ནོམ་ཆི་མཁན་པོ་ངག་དབང་ཕུན་ཚོགས་ཀྱིས་རབ་རྒྱལ་ས་ཡོས་ལོར་སྦྱར་བ་དགེ་ལེགས་འཕེལ། 

 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:jiangbai@126.com
ཁ་པར།:010-58336716