སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
   མདུན་ཤོག    འཕྲིན་གསར།    གསུང་རབ།     བོད་སྐད་ཡིག      རྩོམ་རིག      སློབ་གསོ།    ཆོས་ལུགས།    གསོ་རིག    ལོ་རྒྱུས།     སྒྱུ་རྩལ།     དམངས་སྲོལ།    སྐར་རྩིས།    མཚན་ཉིད་རིག་པ།     དཔལ་འབྱོར།
   སྲིད་ཁྲིམས།     ས་རྒྱུས།     སྐྱེ་ཁམས།     ཞིང་ཕྱུགས།     ཕྱི་སྐད་སློབ་དེབ།    དཔྱད་རྩོམ།     ཚིག་མཛོད།     དུས་དེབ་དང་ཚགས་པར།     རྩོམ་པ་པོ།    དཔེ་མཛོད་ཁང་།     པར་སྐྲུན་ཁང་།     གཞན་དག
 
བོད་ཀྱི་རྩིག་བཟོ་རིག་པ་ལས་བོད་ཁང་གི་དམིགས་བསལ་ཁྱད་ཆོས་འགའ་ཞིག་གི་སྐོར།
སྤེལ་དུས། 2013-08-02   ཡོང་ཁུངས། 《སྤང་རྒྱན་མེ་ཏོག》   རྩོམ་པ་པོ།  བྱ་རིགས་པ་བློ་བཟང་རྣམ་རྒྱལ། འབྲུག་མོས་ཞུ་དག་བྱས།

བོད་ཁང་གི་སྒོ་དང་སྒེའུ་ཁུང་གི་གཡས་གཡོན་དུ་ནག་རྩི་གཏོང་བ་དེ་ལ་འགའ་ཤས་ཀྱིས་བདུད་ཀྱི་སྨ་ར་མཚོན་བྱེད་རེད་ཟེར་བ་དང་། ལ་ལས་དམ་ཅན་ཆོས་རྒྱལ་གྱི་རྭ་ཅོ་རེད་ཟེར་བ་སོགས་ཤོད་ཚུལ་མི་འདྲ་བ་མང་པོ་ཡོད་པ་ནི་ཁུངས་མེད་ཀྱི་གཏམ་དང་བྱིས་སྒྲུང་ལྟ་བུ་ཞིག་རེད། དོན་དངོས་ནི་བོད་ལྗོངས་ས་བབས་མཐོ་བས་གནམ་གཤིས་གྲང་ངར་ཆེ་རུང་ཉི་འོད་ཕོག་ཚད་ཆེ་བའི་ཐོག་དགུན་དུས་ཉི་མ་ལྷོ་ཕྱོགས་སུ་བགྲོད་སྟབས་ལྷོ་ཕྱོགས་ནས་ཉི་འོད་ཕོག་ཤུགས་ཆེ་བས་ཁང་པ་ཕལ་ཆེར་ཁ་ལྷོ་བལྟ་བཟོ་སྲོལ་ཡོད། ཚོས་གཞི་ནག་པོས་ཉི་འོད་འཐེན་པ་དང་། དཀར་པོས་ཉི་འོད་བཀག་པ་དེང་དུས་ཀུན་གྱིས་ཁས་ལེན་གྱི་ཡོད། བོད་ཁང་ཕལ་ཆེར་གྱི་ཕྱི་རྩིག་དཀར་པོ་བཟོ་སྲོལ་ལ་བརྟེན་དགུན་དུས་ཁང་པའི་ནང་ཉི་འོད་ཕོག་ནས་དྲོད་ཚད་འཐེན་ཤུགས་ཆེ་ཕྱིར་སྒེའུ་ཁུང་གི་མཐར་ནག་རྩི་གཏོང་བ་མ་ཟད། ལྷོ་བལྟ་མིན་པའི་སྒོ་དང་སྒེའུ་ཁུང་ཡང་ནག་རྩི་བཏང་དོན་གི་ཚང་མ་ཞི་མཚུངས་ཀྱི་མཛེས་ཆ་ཡིན་པར་ཤེས། ནག་པོས་ཉི་འོད་འཐེན་པ་དང་། དཀར་པོས་ཉི་འོད་བཀག་པ་དེ་རང་རའི་མེས་པོ་ཚོས་སྔར་ནས་ཤེས་ཀྱི་ཡོད་པ་མཚོན།
   
ཁང་པ་ས་ཕག་གི་རྩིག་པ་ཡིན་ན་ཕྱི་ངོས་སུ་ཞལ་བ་ངེས་པར་གཏོང་གི་ཡོད། གང་ལ་ཞེ་ན་ཞལ་བའི་ངོས་སུ་མཛུབ་རིས་གཞུ་དབྱིབས་ཅན་རྩེག་མར་བྲིས་པའི་ཁར་མཛུབ་རིས་ ཉིས་ཤུར་རེ་ཐད་ཀར་གཞུང་དུ་འཐེན་པ་ན། ཆར་ཆུ་རྩིག་ལྡེབས་སུ་ཕོག་སྐབས་ཞལ་བའི་མཛུབ་རིས་བརྒྱུད་ཆུ་རྣམ་ས་ཐོག་ཏུ་སོང་སྟབས་རྩིག་པར་སྲུང་སྐྱོབ་ཐུབ་ཀྱི་ཡོད།
                                                                                    སྤེན་བད།
    
སྤེན་བད་ནི་མཛེས་ཆ་ཙམ་མ་ཟད། ཁང་སྟེང་དུ་རླུང་བུའི་ཤུགས་ལེན་པའི་ཁྱད་ཆོས་དང་སྒྱོག་མདེལ་ལེན་པ། འབར་གས་མི་བྱེད་པ་སོགས་ཀྱི་དགེ་མཚན་ལྡན་ཡོད།
                                                                    ཀ་བ་བརྗེ་སྟངས། འགྱོགས་རྒྱག་སྟངས།
  
བོད་ཁང་གི་ཁང་པའི་ཀ་བ་ཐང་པོ་མེད་པའི་རིགས་ལ་འདེགས་རོགས་ཀྱི་ཀ་བ་གསར་པ་བརྗེ་སྟངས་ནི་ཀ་བ་སྐྱོན་ཅན་དེའི་གཞུ་ཆུང་ལ་ཤིང་སྦོམ་ཕྲ་ཀ་བ་ལས་ཕྲ་ཙམ་གཉིས་བཙུགས་པའི་འོག་ཏུ་ཤིང་རིང་ཐུང་སྦོམ་ཕྲ་སྙོམས་པ་རེ་རེའི་རྩེ་མོ་ཀ་སྐྱོར་དེའི་འོག་ཏུ་བཅུག་ནས་རྩ་བ་གྱེན་དུ་སྐྱེར་བའི་སྟེང་ལ་བྱེ་མ་དོ་པོའམ་མི་གྲངས་མང་ཉུང་ཆ་སྙོམས་ཀྱིས་མནན་ཤིང་བཟོ་བ་དེའི་བཀོད་འདོམས་བཞིན་དལ་བུས་མནན་ཏེ་གདུང་མ་བཏེགས་རྗེས་ཀ་བ་རྙིང་པ་སྐྱོན་ཅན་དེ་ཚུར་བླངས། དེ་ནས་ཀ་བ་གསར་པ་བཙུགས་ཏེ་འགྱོག་ཤིང་རིམ་བཞིན་གནོན་ཤུགས་ཇེ་ཡང་དུ་བཏང་ནས་ཀ་བ་ཚུགས་མཚམས་ཀ་སྐྱོར་དེ་ལེན་གྱི་ཡོད། ཀ་བ་བརྗེ་བ་དེ་ཁང་ཐོག་གཅིག་ཙམ་མ་ཟད། ཐོག་བརྩེགས་ཁ་ཤས་ཡོད་པའི་འོག་ཁང་གི་ཀ་བ་ཡང་བརྗེ་སྲོལ་ཡོད།
                                                                                                         
ས་ཕག
   
ས་ཕག་ཅེས་པ་སྤྱིར་བཏང་ས་ཁོ་ནའི་ཕག་ཁྱབ་ཆེ་རུང་། ད་དུང་རྫ་ཕག་དང་། ལྕི་བའི་ཕག་ཀྱང་ཡོད། ཕོ་བྲང་པོ་ཏཱ་ལའི་སྟེང་ཁང་འགའ་ཤས་ཀྱི་བར་བཅད་དང་། ཚོམས་ཆེན་ཤར་གྱི་སེང་གཡབ་ཀྱི་རྩིག་པ་ཡང་ལྕི་ཕག་ལས་བཟོས་པ་མཐོང་རྒྱུ་ཡོད། ལྕི་ཕག་གིས་ཁང་པའི་བར་བཅད་བྱས་ན་ཤོད་ཁང་གི་ཤིང་ཆར་ཡང་བཟོད་སྐྱོར་ཆེན་པོ་ཡོང་གི་ཡོད།
                                                                                                     
གྱང་གི་སྐོར།
   
གྱང་ནི་དུས་སྐབས་གཅིག་ལ་དར་ཁྱབ་ཆེ་བའི་རྩིག་བཟོའི་གྲས་ཤིག་ཡིན། ཁམས་ཁུལ་སོགས་ལ་དར་སོ་ཆེ་ཙམ་ཡོད་ཐོག ༡༩༥༩ལོའི་གོང་དུ་ལྷ་ས་སོགས་ས་ཆ་མང་པོར་ལྕགས་རི་ཕལ་ཆེར་གྱང་བརྡུང་གི་ཡོད། གྱང་བརྡུ་སྟངས་ནི་འོག་ཏུ་ཆུ་ལེན་རྡོ་རྩིག་བསྟར་པ་གཉིས་གསུམ་ཙམ་བརྩིགས་པའི་སྟེང་དུ་གྱང་པར་ཞེས་ཆེད་བཟོས་པང་ལེབ་ཞེང་ཆེན་གཉིས་བསླངས་པའི་མགོ་མཇུག་གཉིས་སུ་རྒྱུག་རིལ་གཉིས་རེ་ཕྲེད་ཐག་གིས་བསྡམས་ནས་གྱང་སྒྲོམ་བཟོས་པའི་ནང་ས་གཞའ་ཚན་ཕྲན་བུ་ཡོད་པ་ཞིག་བསླུགས་ཏེ་རྒྱུག་རིལ་སྣེ་གཅིག་ཟླུམ་བུ་དང། སྣེ་གཅིག་རྩེ་མོ་ཟུར་ལེབ་ཡིན་པ་ཞིག་གིས་རྡུང་གི་ཡོད། གྱང་གི་ཁྱད་ཆོས་གཙོ་བོ་ནི་སྒྱོག་མདེལ་ཕོག་ཀྱང་རྩིག་པ་མི་ལོག་པ་སོགས་ཀྱི་ཁྱད་ཆོས་ཡོད། གྱང་རྡུང་པའི་ཁང་པའམ་ལྕགས་རི་ཐོག་བརྩེགས་ངེས་མེད་ཡོད་པ་དཔེར་ན་ལྷ་སའི་ཕོ་བྲང་པོ་ཏཱ་ལའི་ཞོལ་གྱི་ལྕགས་རི་དང་། ས་སྐྱའི་ལྷ་ཁང་ཆེན་མོ་ལྟ་བུ་ཡིན།
                                                                                              
ཤིང་རྩེག་རྩེག་བཅུ་གསུམ།
    
ཤིང་རྩེག་བཅུ་གསུམ་ཞེས་པ་ནི་དགོན་པ་ཆེ་ཁག་གི་འདུ་ཁང་དང་། ཕོ་བྲང་གི་ཚོམས་ཆེན་གྱི་ཀ་རིང་། སྒོ་མཆོར་སོགས་ཀྱི་མཛེས་རྒྱན་ལྟ་བུ་ཡིན། དེ་ཡང་ཀ་བ་ནས་ལྕམ་གྱི་བར་དུ་རྩེག་མ་བཅུ་གསུམ་ཡོད་དེ། ༡.ཀ་བ། ༢.གཞུ་ཆུང་། སྦེ་ལོག༣.གཞུང་རིང་། ༤.པད་མ། ༥.ཆོས་རྩེག ༦.གདུང་མ། ༧.བབས་གདན། ༨.བབས་ཐུང་། ༩.བབས་རིང་། ༡༠.དྲེ་གདན། ༡༡.དྲེ་ཐུང་། ༡༢.དྲེ་རིང་། ༡༣.ལྕམ་བཅས་ལ་ཟེར་སྐད།
                                                                                                        
ཟུར་འཕྱོང་།
  
ཕོ་བྲང་སོགས་སུ་ཡང་སྟེང་གི་རྩིག་ཟུར་ངོས་སུ་ཟུར་འཕྱོང་ཞེས་སྒེའུ་ཁུང་ཕྲ་གླིང་ཅན་ཕྱོགས་གཉིས་དཀར་གསལ་ཡོད་པ་དེ་སྒེར་པ་ཁག་དང་། མི་སར་དཀྱུས་མའི་ཁང་པར་བཟོ་མི་ཆོག་སྐད།
                                                                                                          
ཟམ་རྩིག
  
ཡུལ་གྲུ་མང་པོར་སྔར་གྱི་ཟམ་པ་མང་པོ་མཐོང་རྒྱུ་ཡོད་པ་དེ་ཚོའི་ཟམ་སྣེའི་རྩིག་པ་འགའ་ཞིག་ཆུ་རྡོ་རིལ་རིལ་སྐམ་རྩིགའདམ་པ་མེད་པ་བརྒྱབ་ནས་བཟོས་པ་དང་། དེའི་སྟེང་རྒྱུག་པ་རིམ་བཞིན་ཇེ་རིང་དུ་སྒྲིག་པའི་སྟེང་ཟམ་གདུང་བཀལ་ནས་བཟོས་པ་ཡོད།
                                                                                                          
རྒྱན་རིས།
    
དགོན་པ་དང་ལྷ་ཁང་སོགས་ཀྱི་རྩིག་ལྡེབས་སུ་ལྷ་སྐུ་དང་རྒྱལ་རབས་རྣམ་ཐར་སོགས་རི་མོ་འབྲི་སྲོལ་ཡོད་པ་མ་ཟད། ཁྱིམ་པའི་སྒེར་ཁང་ལ་ཡང་སྒོའི་ནང་དུ་སོག་པོ་སྟག་ཁྲིད་དང་། ཨ་ཙར་གླང་ཁྲིད་ལ་ཁོལ་པོ་ཀུན་ལི་སོགས་འབྲི་སྲོལ་ཡོད། སོག་པོ་སྟག་ཁྲིད་ཀྱི་རྒྱུ་མཚན་ནི་སྤྱི་ལོའི་དུས་རབས་བརྒྱད་པའི་ནང་སློབ་དཔོན་པད་མ་འབྱུང་གནས་ཀྱི་བོད་ཀྱི་རྗེ་འབངས་ཉེར་ལྔ་གྲུབ་པ་ཐོབ་པར་མཛད་ནས་རྗེ་འབངས་ཉེར་ལྔ་སོ་སོས་གྲུབ་རྟགས་རེ་བསྟན་སྐབས་སོག་པོ་ལྷ་དཔལ་གྱིས་གཅན་གཟན་འཛིན་པར་མཛད་ཅིང་། ཕྱིས་སུ་དེ་དོན་སོག་པོ་སྟག་ཁྲིད་སྒོ་འགྲམ་དུ་བྲིས་ན་གནོད་པ་ཟློག་པ་ཡིན་ཟེར་བ་དང་། ལ་ལས་སོག་པོ་ལྕགས་ཐག སྟག་བཅས་པ་རིགས་གསུམ་མགོན་པོའི་མཚོན་དོན་ཡིན་ཡང་ཟེར། འོན་ཀྱང་ཀརྨ་བཀའ་རྒྱུད་ཀྱི་དགོན་པ་རྣམས་སུ་འགྲེལ་བ་གཞན་ཞིག་ཡོད་སྟབས་སོག་པོ་སྟག་ཁྲིད་འབྲི་སྲོལ་མེད་སྐད། རི་མོ་འབྲི་སྟངས་ནི་སྟག་གི་སྐེར་ལྕགས་ཐག་བཀོད་ཏེ་སོག་པོས་ཕྱིན་འདོན་ལྟ་བུ་ཞིག་དང་། ཨ་ཙར་གླང་ཁྲིད་ནི་ནོར་ལྷ་ཡིན་པས་ཨ་ཙར་གྱིས་གླང་ཆེན་ལ་ནོར་བུ་བཀལ་ཏེ་ནང་དུ་ཁྲིད་ཡོང་མཁན་གྱི་རྣམ་པ་ཞིག་འབྲི་དགོས། གཞན་ཡང་བཀྲ་ཤིས་རྟགས་བརྒྱད་དང་། རྫས་བརྒྱད། འདོད་ཡོན་སྣ་ལྔ། རྒྱལ་སྲིད་སྣ་བདུན། མཐུན་པ་སྤུན་བཞི། ཚེ་རིང་དྲུག་འཁོར་སོགས་ཀྱི་རི་མོ་ལ་ཡང་འབྲེལ་བཤད་རེ་ཡོད་ཀྱང་འདིར་མ་བྲིས།
                                                                                             
ཡོལ་བ་དང་། གཤམ་བུ་སོགས།
     
བོད་ཁང་གི་སྒོ་དང་། སྒེའུ་ཁུང་གི་ཐོད་དུ་གཤམ་བུ་གཏོང་གི་ཡོད། གཤམ་བུ་ཕལ་ཆེར་དར་དཀར་པོར་གོང་བ་དམར་སེར་སྔོ་གསུམ་སྒར་སྲོལ་ཡོད། དགོན་པ་དང་ཕོ་བྲང་གི་རབ་གསལ་ལམ་གཟིམ་ཆུང་གི་སྒེའུ་ཁུང་སྟེང་གི་གཤམ་བུའི་འོག་ཏུ་གནམ་ཡོལ་ཞེས་རས་སམ་དར་གོས་ཀྱི་གཞི་དམར་པོར་མཐའ་ལྕགས་དང་། ཚེམ་དྲུབ་སྟེང་སྔོན་པོ་བཏང་བ་ཞིག་དང་རབ་གསལ་མདུན་གྱི་སྟག་ཁྲའི་ངོས་སུ་གོང་མཚུངས་ཀྱི་ཡོལ་བ་ས་ཡོལ་ཞེས་པ། རབ་གསལ་དང་། སྒོ་མཆོར་མདུན་སྦྲ་ཡོལ་ནག་པོར་རས་དཀར་པོའི་མཐའ་ལྕགས་དང་། པ་ཏྲ་སོགས་སྦ་ལེ་བརྒྱབ་པ་ཞིག་གཏོང་གི་ཡོད། སྒེར་པའི་ཁང་པར་གནམ་ཡོལ་ལས་ས་ཡོལ་གཏོང་གི་མེད། གཞན་ཡང་ཁང་པའི་མཛེས་ཆར་ཐུག་དང་། རྒྱལ་མཚན། དར་ལྕོག བཀྲ་ཤིས་ཁྲ་རིང་། དར་ལྡི་སོགས་འཛུགས་སྲོལ་ཡོད་པ་རྣམས་མིང་སྨོས་ཙམ་ལས་རྩིག་བཟོ་དང་འབྲེལ་བ་ཆེར་མེད་སྟབས་འདིར་ཞིབ་ཆ་མ་བཀོད་བཅས་སོ།།

 རྡོ་འབུམ་དཔེ་འཕྲིན།  ནང་རིག་གཏེར་མཛོད། མཆོད་མེ་རྩོམ་རིག་དྲ་བ།   གེ་སར་ཞིབ་འཇུག  ན་གཞོན་གསར་བ།

Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060