སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
   མདུན་ཤོག    འཕྲིན་གསར།    གསུང་རབ།     བོད་སྐད་ཡིག      རྩོམ་རིག      སློབ་གསོ།    ཆོས་ལུགས།    གསོ་རིག    ལོ་རྒྱུས།     སྒྱུ་རྩལ།     དམངས་སྲོལ།    སྐར་རྩིས།    མཚན་ཉིད་རིག་པ།     དཔལ་འབྱོར།
   སྲིད་ཁྲིམས།     ས་རྒྱུས།     སྐྱེ་ཁམས།     ཞིང་ཕྱུགས།     ཕྱི་སྐད་སློབ་དེབ།    དཔྱད་རྩོམ།     ཚིག་མཛོད།     དུས་དེབ་དང་ཚགས་པར།     རྩོམ་པ་པོ།    དཔེ་མཛོད་ཁང་།     པར་སྐྲུན་ཁང་།     གཞན་དག
 
སྨན་རྩིས་གཉིས་ཀྱི་འབྲེལ་བ་ནི་ནམ་ཡང་ཁ་བྲལ་ཐབས་མེད་པ་ཞིག་ཡིན་ཞེས་བཞུགས་སོ།
སྤེལ་དུས། 2013-07-30   ཡོང་ཁུངས།    རྩོམ་པ་པོ།  ཁྲོ་རུ་ཚེ་རྣམ། འབྲུག་མོས་ཞུ་དག་བྱས།

མཚན་གྱི་ཡེ་གེ་བེེ་ཌཱུརྱ་ཡི་མདངས། །  ཡིད་ལ་ཐང་ཅིག་ཙམ་ཞིག་བཀོད་པས་ཀྱང་། ། སྲིད་པའི་རིམས་ནད་མཐའ་དག་གཞིལ་བའི་སྨན།  །ཅི་དགའ་འཇོ་བའི་དྲང་སྲོང་སྨན་པའི་མཆོག  །རྩིས་ཀྱི་ཡོལ་གོ་གྲུ་བཞིའི་ཐང་ཡངས་པོར། །ངོ་མཚར་རི་མོའི་རྣམ་འགྱུར་ངོམ་ཙམ་གྱིས།  །གནམ་ས་གོ་ལའི་ལྐོག་གྱུར་གནད་རྣམས་ཀུན།  །ཇི་བཞིན་སྟོན་མཛད་གངས་ཅན་རྩིས་སྟོན་ཆེ།  །འཇིག་རྟེན་འདི་ན་སྲོག་གིས་བཟུང་བའི་འགྲོ།  ། ཀུན་ལ་མཁོ་བ་རིན་འཚོའི་ཚེ་ཡིན་ཞིང་།  ། དེ་ལ་ཕན་པ་བདུད་རྩི་སྨན་གྱི་ལས།  ། ཡིན་ཕྱིར་འདི་ནི་འགྲོ་མང་དགའ་བས་བཀུར།  །ནམ་མཁའི་གོ་ལ་བཅུ་གཉིས་ཁྱིམ་གྱི་གཞིར།  །རྒྱུ་སྐར་ལྷ་མོའི་འཛུམ་གྱིས་བསུས་པའི་མོད།  །དྲང་སྲོང་གཟའ་དགུས་སྤྱོད་པའི་ལེགས་ཉེས་རྩིས།  ། དུས་བཞིའི་བླང་དོར་སྟོན་པའི་ཚན་རིག་ཡིན།  ། དེ་ཕྱིར་གཟུར་གནས་བློ་གྲོས་ཆེ་ལྡན་ཞིང་།  ། སྐྱེདགུའི་ཕན་བདེ་སྒྲུབ་པའི་ཆེ་རྣམས་ཀྱང་།། དགྱེས་ཞལ་པད་དཀར་བཞད་པའི་མདངས་འདྲ་བ།  །འཛུམ་དཀར་སྟོང་དུ་གྲོལ་བས་དབུགས་དབྱུང་མཛད། །  
                                                                    
  (གཅིག་)རིག་པའི་གནས་ཕན་ཚུན་བར་གྱི་འབྲེལ་བ།
     
སྤྱིར་སྒྲ་དང་ཚད་མ་བཟོ་གསོ་བ་ནང་དོན་རིག་པ་སྟེ་རིག་པའི་གནས་ཆེ་བ་ལྔ་དང་།  སྐར་རྩིས་སྙན་ངག་སྡེབ་སྦྱོར་མངོན་བརྗོད་ཟློས་གར་ཏེ་རིག་པའི་གནས་ཆུང་བ་ལྔ་ཞེས་གྲགས་པ་བཅས་བཅུ་ཕྲག་རིག་པའི་གནས་ཆེ་ཆུང་དེ་རྣམས་ནི་ཕན་ཚུན་གཅིག་ལ་གཅིག་བརྟེན་དང་།  གཅིག་ཕན་གཅིག་གྲོགས་ཀྱི་ཚུལ་དུ་འབྲེལ་བ་ཞིག་ཡིན།  དེར་བརྟེན་རིག་པའི་གནས་ཆེ་བ་ཞིག་ལེགས་པར་ཤེས་པར་བྱེད་པ་ལ་རིག་པའི་གནས་གཞན་རྣམས་ཀྱང་བྱང་ཆུབ་པ་ཞིག་གམ་ཐ་ན་རགས་ཙམ་ཞིག་ནི་ངེས་པར་དུ་ཤེས་དགོས།  གལ་ཏེ་རིག་པའི་གནས་གཞན་དག་གི་འགྲོ་ཚུལ་མ་ཤེས་ན་དེ་དག་དང་འབྲེལ་བ་ཡོད་པའི་རིག་པའི་གནས་གཞན་དེ་ཆ་ཚང་བ་ཞིག་ཤེས་དཀའ།  དཔེར་ན་སྡེབ་སྦྱོར་ལྟ་བུ་ལ་མཚོན་ནའང་།  ངོ་མཚར་རྟོགས་བྱེད་ཀྱི་ཆོ་གའི་ནང་གི་ཡང་བའི་ཡི་གེ་ཇི་སྙེད་བསྡོམས་ཞེས་སོགས་ཀྱང་རྩིས་ཀྱི་རིག་པ་དང་ཁ་བྲལ་ཐབས་མེད་པ་ལྟ་བུ་ཞིག་ཡིན་ལ།དེ་བཞིན་དུ་སྐར་རྩིས་ཀྱི་གཞུང་རྩ་བ་ཡིན་པ་དུས་ཀྱི་འཁོར་ལོའི་རྒྱུད་ལས་སྒྲ་དང་ཚད་མ།  བཟོ་དང་གསོ་བ།  ནང་དོན་རིག་པ།  སྐར་རྩིས་མངོན་བརྗོད་སོགས་ཀྱི་ནང་དོན་དང་།  བརྡ་ཆད་ཅི་རིགས་པ་ཞིག་བསྟན་ཡོད་སྟབས་དུས་ཀྱི་འཁོར་ལོའི་རྒྱུད་ལེགས་པར་ཤེས་པར་བྱེད་པ་ལ་རིག་པའི་གནས་དེ་དག་གི་ནང་དོན་རགས་ཙམ་ཞིག་ནི་ངེས་པར་དུ་ཤེས་དགོས་པ་དང་།  དེ་བཞིན་དུ་རིག་པའི་གནས་དེ་དག་ཇི་བཞིན་ཤེས་པར་བྱེད་པ་ལའང་དུས་ཀྱི་འཁོར་ལོའི་རྒྱུད་དོན་གྱི་འགྲོ་ཚུལ་ཤེས་དགོས་པ་ལྟ་བུ་ཡིན།  ལྷག་པར་དུ་ཕྱི་དུས་ཀྱི་འཁོར་ལོ་སྐར་རྩིས་ཀྱི་རིག་པ་ནི་ནང་དང་གཞན་དུས་ཀྱི་འཁོར་ལོ་སོགས་རིག་པའི་གནས་གཞན་དག་དང་འབྲེལ་བ་ཡོད་པར་མ་ཟད།  གསོ་བ་རིག་པ་ལ་མེད་དུ་མི་རུང་བའི་འབྲེལ་བ་ཞིག་གྲུབ་ཡོད།
                                                                        
 (གཉིས་)བྱེ་བྲག་སྨན་རྩིས་གཉིས་ཀྱི་འབྲེལ་བ།
      
གསོ་བ་རིག་པ་ལེགས་པར་ཤེས་པར་བྱེད་པ་ལ་རིག་པའི་གནས་གཞན་དག་བསླབས་ཤིང་ཤེས་དགོས་པར་མ་ཟད།  རྩིས་ཀྱི་རིག་པ་ནི་དེ་བས་ཀྱང་ངེས་པར་དུ་ཤེས་དགོས་པ་ཞིག་ཡིན།  དེ་ཅིའི་ཕྱིར་ཞེ་ན།  སྨན་པས་རྩ་དང་ཆུ་ལ་བརྟེན་ནས་ནད་བརྟག་པའི་སྐབས་དང་།  ནད་གསོག་ལྡང་ཞི་གསུམ་གྱི་དུས་མཚམས་ངེས་པར་བྱེད་པ།  ནད་སྔོན་འགོག་བྱེད་པ།  དུས་སུ་སྤྱོད་པའི་ལམ་གྱི་སྐབས་རྣམས་སུ་དུས་མི་འགྱུར་བའི་གཟེར་ཤེས་པར་བྱེད་པ་སོགས་སྐབས་མང་པོ་ཞིག་གཙུག་ལག་རྩིས་ཀྱི་རིག་པ་ལ་བརྟེན་ནས་ཤེས་དགོས་ཀྱི་ཡོད་པའི་ཕྱིར་ནའོ།
    
དེ་ཡང་རེག་པ་རྩ་ལ་བརྟེན་ནས་ནད་བརྟག་པའི་སྐབས་རྩ་མདོ་ལས།  དུས་བཞི་ཁམས་ལྔའི་འབྱུང་བ་བརྩི་བ་ནི།  །དང་པོ་དུས་དོན་ཁམས་དང་རྩ་རུ་སྦྱར།  ། མ་བུ་དགྲ་གྲོགས་བཞི་ཡིས་སྐོར་འགོ་བརྩི།  །ཞེས་བསྟན་ཡོད།  དེ་ནི་དཔྱིད་ཀ་ལ་སོགས་པའི་ཕྱིའི་དུས་བཞི་དུས་མཚམས་བཅས་ལྔ་དང་།  མཆིན་པ་ལ་སོགས་པའི་ནང་གི་དོན་ལྔའི་ཁམས་རྣམས་རྩའི་འཕར་སྟངས་དང་ལྷན་ཅིག་ཏུ་སྦྱར་ནས་རྒྱུན་རྩ།  དུས་རྩ།  ནད་རྩ་བཅས་སོ་སོར་ངེས་པར་བྱེད་དགོས་པའི་དོན་ཏེ་དཔྱིད་དབུགས་ཐོབ་པ་ནས་བཟུང་ཕྱིའི་རང་བྱུང་ཁམས་ཀྱི་འབྱུང་བ་ཤིང་རྩི་ཁ་འབུས་པ་སོགས་ཀྱི་ཆོས་ཉིད་དང་མཐུན་པར་ནང་གི་འབྱུང་བ་ཤིང་ཁམས་མཆིན་རྩ་ཕྲ་ལ་གྲིམས་པར་འཕར་བ།  དེ་བཞིན་དུ་དབྱར་ས་ཟླའི་དབུགས་ཐོབ་པ་ནས་བཟུང་ཕྱི་འབྱུང་བ་འདབ་རྒྱས་ཆར་དུས་ཀྱི་ཆོས་ཉིད་དང་མཐུན་པ་ནང་གི་མེ་ཁམས་སྙིང་རྩ་སྦོམ་ལ་རིང་བར་འཕར་བ་དང་།  སྟོན་དུས་ཞག་༧༢རིང་ལ་ལྕགས་ཁམས་གློ་རྩ་ཐུང་ལ་རྩུབ་པར་འཕར་བ།  དགུན་དུས་ཞག་༧༢རིང་ལ་ཆུ་ཁམས་མཁལ་རྩ་འཇམ་ལ་དལ་བར་འཕར་བ།  དུས་མཚམས་བཅོ་བརྒྱད་ཕྲག་བཞི་སྟེ་ཞག་༧༢རིང་ལ་ས་ཁམས་མཆེར་རྩ་ཐུང་ལ་འཇམ་པར་འཕར་བ་བཅས་ཀྱི་ཚུལ་འདི་དག་དུས་བཞི་སོ་སོར་ཕྱིའི་འབྱུང་བའི་ཁམས་མི་འདྲ་བ་རེ་ཡོད་པ་བཞིན་དུ་ནང་གི་དོན་ལྔའི་རླུང་ཁྲག་གི་རྒྱུ་བའང་མི་འདྲ་བ་རེ་འགྱུར་འགྲོ་གི་ཡོད་པའི་རྐྱེན་གྱིས་རྩའི་འཕར་སྟངས་ཀྱང་མི་འདྲ་བ་རེ་ཡོང་གི་ཡོད་པ་རེད།  འདི་ནི་ཕྱི་ནང་གི་འབྱུང་བ་རྣམས་ངོ་བོ་བདག་ཉིད་གཅིག་ཏུ་འབྲེལ་བའི་རྟེན་འབྲེལ་ལས་འབྱུང་བ་ཞིག་ཡིན་ཞིང་།གནད་འདི་ཞིབ་ཕྲ་ཤེས་པར་བྱེད་པ་ནི་སྐར་རྩིས་ཀྱི་གཞུང་ནས་བསྟན་པའི་ཟླ་བ་སོ་སོའི་དབུགས་ཐོབ་སྒང་ཚད་ཁྱིམ་སླེབས་སོགས་དུས་བཞི་མི་འགྱུར་བའི་གཟེར་ལ་བརྟེན་ནས་དཔྱིད་དབྱར་སྟོན་དགུན་གྱི་དུས་མཚམས་རྣམས་ལེགས་པར་ངོས་ཟིན་པ་ལ་རགས་ལས་པ་ཞིག་ཡིན།  གནད་འདི་ལེགས་པར་མ་རྟོགས་ན་རྒྱུན་རྩ་དང་།དུས་རྩ།  ནད་ཅན་དང་། ནད་མེད་ཀྱི་རྩའི་དབྱེ་བ་འབྱེད་མི་ཐུབ་ལ།  འབྱུང་བ་རྣམས་ཀྱི་མ་བུ་དགྲ་གྲོགས་ཀྱི་སྐོར་འགོ་ལེགས་པར་མ་ཤེས་ན་ངོ་མཚར་རྩ་བདུན་སོགས་ཀྱང་བརྟག་མི་ཤེས་ཤིང་ནད་ངོས་ཀྱང་ལེགས་པར་ཟིན་པར་དཀའ།  ནད་ངོས་ལེགས་པར་མ་ཟིན་ན་བཅོས་ཐབས་གནད་ལ་འཁེལ་བ་ཞིག་ག་ལ་ཡོང་ཐུབ།  དེས་ན་དེ་དག་ཤེས་པའི་ཆེད་དུ་གཙོ་ཆེར་འབྱུང་རྩིས་ཀྱི་རིག་པ་ལ་བརྟེན་ནས་དུས་བཞི་ཁམས་ལྔའི་འབྱུང་བ་བརྩི་བ་མ་བུ་དགྲ་གྲོགས་ཀྱི་སྐོར་འགོ་བརྩིས་ནས་ཤེས་དགོས་པས་རེག་པ་རྩ་ལ་བརྟེན་ནས་ནད་བརྟག་པའི་ཐབས་འདི་ནི་གཙུག་ལག་རྩིས་ཀྱི་རིག་པ་དང་འབྲེལ་བ་ཆེས་ཆེ་བ་ཞིག་ཏུ་གྲུབ་པར་མ་ཟད།  ཆུ་དེ་སྲིད་པའི་རུས་སྦལ་གན་རྐྱལ་གནས།  ། ཞེས་པའི་སྐབས་སོགས་ཆུ་ལ་བརྟག་པའི་ཚེའང་རྩིས་ཀྱི་རིག་པ་ལ་བརྟེན་ནས་རྟོགས་དགོས་པ་འགའ་ཞིག་ཡོད་ལ།  ནད་གསོག་ལྡང་ཞི་གསུམ་གྱི་དུས་མཚམས་ངེས་པར་བྱེད་པ་དང་།  དུས་བཞི་མི་འགྱུར་བའི་གཟེར་རྣམས་ཚུལ་བཞིན་ཤེས་པ་ལ་རགས་ལས་པ་ཞིག་ཡིན།  ཡང་བཤད་པའི་རྒྱུད་དུ།  སྐད་ཅིག་ལ་སོགས་ཐང་ཅིག་ཡུད་ཙམ་སྟེ།  །ཉིན་ཞག་ཟླ་བ་དུས་དང་ལོར་འགྱུར་ཏེ།  །ཉི་མ་བརྒྱད་གསུམ་དབྱར་དགུན་དབུས་སུའང་ལྡོག  ། གསུམ་ནི་ལྷོ་དང་བྱང་དུ་འགྲོ་ཞེས་བྱ།  ། ཞེས་པ་སོགས་ནད་སྔོན་འགོག་བྱེད་པ་དུས་སུ་སྤྱོད་པའི་སྤྱོད་ལམ་གྱི་སྐབས་འདིར་ནི་ཕྱི་རྒྱུད་རྩ་མདོའི་སྐབས་འབྱུང་རྩིས་ལྟར་དུས་བཞི་ལ་རབ་འབྲིང་ཐ་མའི་རྣམ་བཞག་མཛད་པ་དང་མི་འདྲ་བར།  དགུན་སྟོད་དགུན་སྨད་དཔྱིད་དང་སོ་ག་དང་།  ། དབྱར་སྟོན་དགུན་ཟླ་ར་སོགས་གཉིས་རིམ་བཞིན།  །ཞེས་འདུལ་མངོན་ལྟར་དུས་དྲུག་གི་རྣམ་བཞག་མཛད་པ་དང་།  ལོ་འགོ་ཡང་མཆུ་ཟླ་བ་ནས་མི་འཛིན་པ་དང་།  དེ་ནས་དགུན་ཟླ་ཐ་ཆུང་ལ་སོགས་པ།  ། ཉི་མ་བྱང་དུ་འགྲོ་བའི་དུས་ཀྱི་ཚེ།  །ཞེས་སོགས་མར་ངོ་སྔོན་འགྲོ་མཛད་པ་སོགས་སྤྱིར་རྒྱུད་གོང་འོག་ཅུང་ཟད་མི་འདྲ་བའི་སྣང་ཚུལ་ཡོད་པ་དེ་དག་གི་རྣམ་བཞག་ཞིབ་ཕྲ་ཤེས་པ་དང་།  བྱེ་བྲག་ལྡོག་གཉིས།  མཉམ་གཉིས།  འབྲུག་སྒྲ་སྒྲོགས་ཆད་སོགས་ཟླ་བ་སོ་སོའི་དུས་གཟེར་གྱི་ཞིབ་ཆ་རྣམས་སྐར་རྩིས་ཀྱི་རིག་པ་ལ་བརྟེན་ནས་ཤེས་དགོས་པ་ཤ་སྟག་ཡིན།  གཞན་ཡང་སྨན་སྦྱོར་དང་།  སྨན་གཏོང་བ།  དཔྱད་བྱེད་པའི་དུས་སོགས་སུ་ཉེ་བར་མཁོ་བ།  སྨན་སྦྱོར་བ་ལ་ཉི་སྐར་ནས།  ། སྨན་པ་སྨན་ཐུར་སྨན་ཕོར་བཅས།  །ནད་པ་རྣམས་ལ་བདུན་བདུན་ཏེ།  །ཟླ་བའི་སྐར་མ་གར་གནས་བརྟག  ། ཅེས་དང་།  མཚོ་དྲག་སྐྱོན་དང་དེ་ཉིད་ཕྱི།  ། ཀླུ་ཚེས་ལག་མིག་བུག་ཟུང་སྔ།  ། ཞེས་པ་སོགས་གསོ་རིག་གཞུང་གི་སྐབས་དོན་མང་པོ་ཞིག་རྩིས་ཀྱི་རིག་པ་ལ་བརྟེན་དགོས་པ་ཡིན་སྟབས་སྨན་པ་རྣམས་ཀྱིས་སྨན་སློབ་པའི་ཚེའང་རྩིས་ཀྱི་རིག་པ་འདི་ལ་མ་བརྟེན་ཐབས་མེད་པ་ལྟ་བུ་ཞིག་ཡིན།  དེ་བཞིན་དུ་རྩིས་པ་ཞིག་ཡིན་ནའང་གསོ་རིག་གི་སྐབས་ནས་བཤད་པའི་མིའི་ལུས་ཀྱི་ཆགས་ཚུལ་དང་།  ཆགས་ཟིན་པའི་མིའི་ལུས་ཀྱི་རྩ་དང་རླུང་ཁྲག་རྒྱུ་བའི་གནས་ལུགས་སོགས་ལེགས་པར་ཤེས་ན།  ཕྱི་ནང་གི་འབྱུང་བ་རྣམས་ངོ་བོ་བདག་ཉིད་གཅིག་ཏུ་འབྲེལ་བའི་རྒྱུ་མཚན་གྱིས།  རྩིས་ཀྱི་སྐབས་ནས་བཤད་པའི་ཟླ་བ་སོ་སོའི་དབུགས་སྒང་ཁྱིམ་སླེབས་སོགས་དུས་གཟེར་གྱི་གནད་དང་།ཕྱི་དུས་བཞིའི་འགྱུར་བ་དང་།  ནང་མིའི་ལུས་ཀྱི་རྩ་རླུང་གི་རྒྱུ་བ་རྣམས་ཕན་ཚུན་ཇི་ལྟར་འབྲེལ་བའི་ཚུལ། ཉི་ཟླ་ལ་སྒྲ་གཅན་འཇུག་པའི་རྒྱུ་མཚན་བཅས་ལ་གོ་དོན་ངེས་ཅན་ཞིག་སྟེར་ནུས་པ་ཡིན།  དེ་ལྟར་བཅུ་ཕྲག་རིག་པའི་གནས་རྣམས་ནི་ཕན་ཚུན་གཅིག་ལ་གཅིག་བརྟེན་དང་།གཅིག་ཕན་གཅིག་གྲོགས་ཀྱི་ཚུལ་དུ་འབྲེལ་བ་ཞིག་ཡིན་ལ།  ལྷག་པར་དུ་སྨན་རྩིས་གཉིས་ནི་ཁ་བྲལ་ཐབས་མེད་པའི་འབྲེལ་བ་ཞིག་གྲུབ་ཡོད་སྟབས་དུས་ནམ་ཡང་མཉམ་སློབ་མཉམ་སྤྱོད་བྱེད་དགོས་ཀྱི་ཡོད་པ་རེད།
                                                               
(གསུམ་)སྨན་རྩིས་གཉིས་མཉམ་དུ་དར་རྒྱས་བྱུང་བའི་བརྒྱུད་རིམ།
       
རང་རེ་བོད་ཀྱི་མེས་པོ་རྣམས་ཀྱི་སྐུ་དུས་ནས་གསོ་དཔྱད་ཀྱི་ལག་ལེན་བྱུང་བ་དང་ཆབས་ཅིག་ཏུ་གནམ་རིག་སྐར་རྩིས་བེད་སྤྱོད་དང་ཞིབ་འཇུག་བྱས་པའི་ལོ་རྒྱུས་ནི་ཧ་ཅང་རིང་པོ་ཞིག་ཡོད་པ་རེད།  བོད་རྗེ་གཉའ་ཁྲི་བཙན་པོའི་དུས་སུ་སྨན་དཔྱད་ཀྱི་ལག་ལེན་ཡོད་པའི་ལོ་རྒྱུས་ཡོད་ལ།  དེ་ནས་རིམ་བཞིན་འཕེལ་རྒྱས་བྱུང་བའི་ལོ་རྒྱུས་ཡོངས་སུ་གྲགས་འདི་བཞིན།  ད་ལྟའི་སྐར་རྩིས་རིག་པ་འདི་མ་དར་བའི་ལོ་ངོ་༢༠༠༠ལྷག་ཙམ་གྱི་སྔོན་ནས་ལས་ལ་བརྩོན་ཞིང་ཤེས་རབ་ལྡན་པའི་བོད་རིགས་མི་དམངས་ཀྱིས་གནམ་གྱི་སྐར་མ་ལ་བརྟག་པའི་རྩིས་དང་།  བར་སྣང་གི་སྤྲིན་དང་རླུང་ལ་བརྟག་པའི་རྩིས།  བྱ་དང་ཤིང་ལ་བརྟག་པའི་རྩིས།  མཚོ་དང་ཆབ་རོམ་ལ་བརྟག་པ་སོགས་དུས་བརྟགས་ཀྱི་རྩིས་རིག་སྣ་ཚོགས་ཉམས་མྱོང་གི་སྒོ་ནས་འཚོལ་སྡུད་བྱས་པ་དང་།  དེ་ནས་རིམ་གྱིས་འཕེལ་ཏེ་ཉི་ཟླ་སྐར་གསུམ་འཁོར་བགྲོད་ཀྱི་ཆོས་ཉིད་འཚོལ་ཞིབ་བྱེད་པའི་ནང་ཉི་མའི་འགྲོ་ཕྱོགས།  ཟླ་བའི་འཕེལ་འགྲིབ།  ལོ་ཟླ་ཞག་གསུམ་བརྩི་སྲོལ་གྱི་སྒྲོམ་གཞི་ཆགས།  ལྷོ་ཁ་གཡའ་བཟང་གི་གམ་འབྲོག་པ་ལྷ་རྒྱལ་གྱི་སྒྲུང་དེབ་ནང་།  ཟླ་བའི་འཕེལ་འགྲིབ་དང་།  དུས་ཚིགས་ཀྱི་འགྱུར་བ།  དངོས་པོ་དང་གནམ་གཤིས་ཀྱི་འབྲེལ་བ་བཅས་བཀོད་ཡོད།  དེ་རྗེས་ཆོས་རྒྱལ་སྲོང་བཙན་སྒམ་པོའི་སྐུ་རིང་ལ་རྒྱ་ནག་ནས་འུན་ཤིང་ཀོང་ཇོ་ཁབ་ཏུ་བསུས།  དེས་སྨན་རྩིས་ཀྱི་གཞུང་ལུགས་ཁག་གཅིག་བསྣམས་ཕེབས་པ་བོད་སྐད་དུ་བསྒྱུར།  རྒྱ་གར། རྒྱ་ནག  ཏ་ཟིག་གསུམ་ནས་སྨན་པ་སྤྱན་དྲངས།  ཐུན་མོང་དུ་མི་འཇིགས་པའི་མཚོན་ཆ་ཞེས་བྱ་བ་ལུགས་ཆེན་གསུམ་གྱི་གཞུང་དུ་གྲགས་པ་བརྩམས།  ཁྲི་ལྡེ་གཙུག་བརྟན་གྱི་སྐུ་དུས་སུ་མེས་རྒྱལ་ནས་གྱིམ་ཤིན་ཀོང་ཇོས་བསྣམས་ཕེབས་པའི་རྒྱ་ནག་ལུགས་ཀྱི་སྨན་རྩིས་ཀྱི་གཞུང་འགའ་ཞིག་བསྒྱུར་ཐོག་མཉམ་དུ་དར་སྤེལ་བཏང་ནས་སྨན་རྩིས་ཀྱི་གཞུང་ལུགས་དར་རྒྱས་འགྲོ་བའི་ཐབས་ལམ་རྒྱ་ཆེར་བཏང་།ཆོས་རྒྱལ་ཁྲི་སྲོང་ལྡེའུ་བཙན་གྱི་དུས་སུ་རྒྱ་གར།  རྒྱ་ནག  ཏ་ཟིག་བཅས་ནས་རིམ་བཞིན་དྷརྨ་རཱ་ཛ།  མཧཱ་ཀྱིན་ད།  ཙན་པ་ཤི་ལ་ཧ་བཅས་བོད་དུ་ཕེབས་ནས་རྒྱལ་ཁམས་སོ་སོའི་ལུགས་དང་བསྟུན་པའི་སྨན་དཔྱད་ཀྱི་བསྟན་བཅོས་རིན་ཆེན་སྤུངས་པ་ཞེས་པ་བརྩམས། རྒྱ་ནག་ནས་རྩིས་ཀྱི་སློབ་དཔོན་དུ་ཧར་ནག་པོ་བོད་དུ་ཐེངས་འགའ་ཕེབས།  སྔ་རབས་བོད་ཀྱི་བརྩི་སྲོལ་གྱི་སྟེང་མཧཱ་ཙི་ནའི་ལུགས་ཀྱི་ཧོང་ལེ་བརྩི་བའི་དར་སྲོལ་ཡང་ཆགས།  ལོ་ཆེན་བེེ་རོ་ཙ་ནས་རྒྱ་གར་ནས་སྨན་རྩིས་ཀྱི་གཞུང་ཁ་ཤས་བསྒྱུར།  སྨན་པའི་རྒྱལ་པོ་གཡུ་ཐོག་ཡོན་ཏན་མགོན་པོས་གསོ་རིག་སྨན་དཔྱད་ཀྱི་ཕྱག་ལེན་རྒྱ་ཆེར་གནང་བ་དང་ཆབས་ཅིག་སྐར་རྩིས་རི་བོ་རྡུལ་འབེབས།  ནག་རྩིས་འཁོར་འདས་གཏན་འབེབས་སོགས་ཀྱི་གཞུང་ལུགས་འགའ་ཞིག་སློབ་སྦྱོང་དང་འཆད་སྤེལ་གནང་ཐོག  ཀོང་པོ་སྨན་ལུང་དུ་སློབ་གྲྭ་བཙུགས་ནས་སྨན་རྩིས་རབ་འབྱམས་པ་མང་པོ་གསོ་སྐྱོང་གནང་སྟེ་སྨན་རྩིས་ཟུང་འབྲེལ་གྱི་རྒྱུན་སྲོལ་དར་སྤེལ་བཏང་བར་གྲགས།  དེ་སྔོན་མདོ་སྡེ་ཕལ་པོ་ཆེའི་བྱེ་མ་རྡུལ་རྩིས་སུ་གྲགས་པ་དང་།  རྒྱ་ཆེར་རོལ་པར་རྩིས་ལ་སྦྱོང་བའི་ཚུལ་བསྟན་པ་སོགས་ལས་བརྩམས་ཏེ་གྲངས་དང་རྩིས་ཀྱི་རིག་པ་རྣམས་བོད་ཀྱི་མཁས་པ་རྣམས་ཀྱིས་ལག་ལེན་ཅི་རིགས་གནང་གི་ཡོད།  དེ་སྐོར་ནས་སྙེ་བོ་ལོ་ཙཱ་བ་དབྱིག་གི་རིན་ཆེན་གྱིས་སྨན་གཞུང་ཡན་ལག་བརྒྱད་པའི་སྙིང་པོ་བསྡུས་པ།རང་འགྲེལ་བཅས་བསྒྱུར་སྤེལ་བྱས།  ལོ་ཆེན་རིན་ཆེན་བཟང་པོས་ཡན་ལག་བརྒྱད་པ།  འགྲེལ་ཆེན་ཟླ་ཟེར་སོགས་བསྒྱུར་བཤད་དར་སྤེལ་བཏང་།  དེ་བཞིན་ད་ལྟ་འདི་ནས་ཡར་བརྩིས་པའི་ལོ་༩༥༨པ་སྟེ་(སྤྱི་ལོ་༡༠༢༧)རབ་བྱུང་དང་པོའི་ཐོག་མ་མེ་ཡོས་ལོར་རྭ་འབྲོ་ཙ་མི་པཎ་ཆེན་སོགས་ཀྱིས་དཔལ་དུས་ཀྱི་འཁོར་ལོའི་རྒྱུད་འགྲེལ་པ་དང་བཅས་པ་བོད་སྐད་དུ་བསྒྱུར་གནང་མཛད།  དེ་ནི་སྐར་རྩིས་རིག་པའི་གཞུང་རྩ་བ་ཡིན་ལ་གསོ་བ་རིག་པའི་གཞུང་ལུགས་ཀྱང་ཡིན།  དེའི་ནང་དུ་ཕྱི་དུས་ཀྱི་འཁོར་ལོ་གནམ་སའི་གོ་ལ་གཏན་ལ་ཕབ་སྟེ།  གནམ་ལ་ཉི་ཟླ་གཟའ་སྐར་གྱི་འགྲོས་དང་།  ས་ལ་དུས་བཞིའི་མངོན་རྟོགས་ཇི་ལྟར་ངོམ་པའི་ཚུལ་གྱི་རྣམ་བཞག་རྒྱ་ཆེར་བསྟན་ཡོད་པས་ལོ་ཐོ་རྩོམ་སྒྲིག་སོགས་ད་ལྟའི་སྐར་རྩིས་ཀྱི་ལག་ལེན་རྣམས་དེ་ལ་བརྟེན་ནས་འཕེལ་རྒྱས་བྱུང་བ་ཞིག་ཡིན་། དེ་བཞིན་དུ།  ནང་མིའི་ལུས་ལ་ཐོག་མར་རྩ་དད་རླུང་སོགས་ཇི་ལྟར་ཆགས་པའི་ཚུལ་དང་།  བར་དུ་ཇི་ལྟར་འཕེལ་ཞིང་རྒྱས་ལ་གནས་པའི་ཚུལ། ཐ་མ་ལུས་ལ་ནད་ཇི་ལྟར་བྱུང་ཞིང་མཐར་འཇིག་པའི་ལྟས་སོགས་ཀྱི་རྣམ་བཞག་མང་དུ་བསྟན་པར་མ་ཟད། ནད་གསོ་བའོ་ཟས་དང་སྨན་གྱི་ཚུལ་བསྟན་ཡོད་ལ།  ལྷག་པར་དུ་རེན་ཆེན་དངུལ་ཆུའི་སྦྱོར་བ་སོགས་ཀྱི་གཞུང་རྩ་བའང་ཡིན་པ་བཅས་དུས་ཀྱི་འཁོར་ལོའི་རྒྱུད་ལས་ཀྱང་སྨན་རྩིས་གཉིས་ཟུང་འབྲེལ་གྱེ་ཚུལ་དུ་བསྟནཡོད་།  དེར་བརྟེན་བོད་ཀྱི་མཁས་པ་རྣམས་ནས་དུས་ཀྱི་འཁོར་ལོའི་འཇིག་རྟེན་ཁམས་ལེར་གནམ་ས་གོ་ལའི་ངེས་པ་རྒྱ་ཆེར་བསྟནཔ་དེ་དག་རྩ་བར་བཟུང་།  སྔ་རབས་ཀྱི་དུས་བརྟག་གནམ་དཔྱད་ཀྱིས་ཟུར་བརྒྱན་ཏེ་ལོ་རེའི་གནམ་སའི་འགྱུར་ལྡོག་དང་།  ལེགས་ཉེས་བླང་དོར་གང་ལ་ཇི་འོས་གསལ་པོར་སྟོན་ཐུབ་པའི་ལོ་ཐོ་རྩོམ་སྒྲིག་བྱེད་པ་སོགས་ལ་བརྟེན་ནས་སྔར་ཡོད་ཀྱི་སྐར་རྩིས་རིག་པ་དེ་ཚན་རིག་གི་རང་བཞིན་དང་།  ཕྱོགས་ཡོངས་ཀྱི་རང་བཞིན་ལྡན་པའི་སྒོ་ནས་ཕུན་སུམ་ཚོགས་པའི་དུས་རིམ་འདི་འདྲ་ཞིག་ལ་འཕེལ་རྒྱས་བྱུང་བ་རེད།དུས་མཚུངས་སུ་སྨན་རྒྱལ་གཡུ་ཐོག་ཡོན་ཏན་མགོན་པོའི་ཐུགས་རྗེའི་འཕྲིན་ལས་ལས་བྱུང་བ་གསོ་དཔྱད་ཀུན་རྒྱལ་དཔལ་ལྡན་རྒྱུད་བཞི་ཡང་སྙན་བརྒྱུད་སློབ་བཤད་ནས་རིམ་པར་ཚགས་བཤད་ཀྱི་སྒོ་ནས་་དར་རྒྱས་བྱུང་བའི་རྒྱན་ལས།  བྱང་ཟུར་མཁས་པའི་བཀའ་སྲོལ་གྱི་ཆུ་བོ་ཆེན་པོ་གཉིས་བརྒྱུད་ནས་ད་ལྟ་འདི་བཞིན་འཕེལ་རྒྱས་ བྱུང་བ་ཞིག་ཡིན། 
    
  (སྤྱི་ལོ༡༢༦༠)ལོར་ས་སྐྱའི་འགྲོ་མགོན་ཆོས་རྒྱལ་འཕགས་པས་སྲིད་དབང་བཟུང་སྟེ་བོད་གཅིག་གྱུར་བྱུང་བའི་སྐབས་དེར།  གཡུང་སྟོན་རྡོ་རྗེ་དཔལ་བཟང་དང་ཀུན་དགའ་དཔལ་བ་སོགས་གནམ་རིག་རྩིས་ལ་མཁས་པ་རྣམས་ཀྱིས་བོད་རང་གི་གནམ་གཤིས་དང་ས་ཆའི་དུས་བབ་ལ་ཞིབ་འཇུག་ནན་ཏན་མཛད་རྗེས།  མཧྭརྩི་ནའི་ཧོང་ལེ་ལ་དཔེར་མཛད་ནས་བོད་ཀྱི་ལོ་ཟླ་ཞག་དུས་ཀྱི་བབ་དང་སྦྱར་ནས་ས་སྐྱའི་ལོ་ཐོ་ཞེས་པ་རྩོམ་སྒྲིག་གནང་སྟེ་བོད་ཀྱོ་ལོ་ཐོའི་སྲོལ་སྔར་ལས་ལྷག་པའི་གོང་འཕེལ་བྱུང་ཞིང་།  ཆབས་ཅིག་ཏུ་རྗེ་བཙུན་གྲགས་པ་རྒྱལ་མཚན་གྱིས་གསོ་དཔྱད་རྒྱལ་པོའི་དཀོར་མཛོད་སོགས་ལྗགས་རྩོམ་གནང་སྟེ་སྨན་དཔྱད་ཀྱི་ཕྱག་ལེན་ཡང་མཉམ་དུ་དར་སྤེལ་མཛད།  དེ་ནས་རབ་བྱུང་ལྔ་པའི་ས་རྟ་སྤྱི་ལོ་༡༣༡༨ལོར། རྗེ་རང་བྱུང་རྡོ་རྗེས་བསྡུས་རྒྱུད་འཇིག་རྟེན་ཁམས་ལེའི་ཚིག་རྣམས་གོ་བདེ་བའི་སླད་དུ་བདུན་ཚིག་ཏུ་བཀྲལ།  རྒྱུད་ལས་མ་བཀག་པའི་རྩིས་ཉེ་བར་མཁོ་བ་འགའ་ཞིག་ཀྱང་བསྣན།དུས་ཀྱི་གཟེར་མང་པོ་གཏན་ལ་ཕབ་ནས་རྩིས་ཀུན་བསྡུས་པ་ཞེས་བྱ་བའི་བསྟན་བཅོས་མཛད་ཅིང་།  སྨན་མིང་རྒྱ་མཚོ་སོགས་སྨན་དཔྱད་ཀྱི་གཞུང་ཡང་བརྩམས་ནས་ལག་ལེན་གནང་ཡོད།  ཀུན་མཁྱེན་བུ་སྟོན་རིན་པོ་ཆེས་རབ་བྱུང་ལྔ་པའི་མེ་སྟག་ལོར་རྩིས་ཀྱི་བསྟན་བཅོས་མཁས་པ་དགའ་བྱེད་ཡན་ལག་དང་བཅས་པ་བརྩམས་པ་དང།  ཞ་ལུར་ཡན་ལག་བརྒྱད་པའི་བཤད་པ་རྒྱ་ཆེར་གནང་ནས་སྨན་རྩིས་མཉམ་འབྲེལ་གྱི་སྒོ་ནས་དར་རྒྱས་བཏང་།  གཞན་ཡང་མཁས་གྲུབ་ཨ་རྒྱན་པ།  ཀུནམཁྱེན་དོལ་པོ་སངས་རྒྱས།  འགོས་ལོ་ཡིད་བཟང་ཙི་པ།  བྱང་པ་རྣམ་རྒྱལ་གྲགས་བཟང་།  ཟུར་མཁར་བློ་གྲོས་རྒྱལ་པོ།  ཇོ་ནང་ཏཱ་ར་ནཱ་ཐ་སོགས་བོད་ཀྱི་སྨན་རྩིས་མཁས་པ་རྣམས་ནས་སྨན་རྩིས་གཉིས་ཀའི་བསྟན་བཅོས་བརྩམས་ཤིང་འཆད་ཉན་ལག་ལེན་གྱི་སྒོ་ནས་མཉམ་དུ་དར་སྤེལ་བཏང་གནང་མཛད་དེ་བོད་ཀྱི་སྨན་རྩིས་རིག་པར་ལེགས་སྐྱེས་མང་དུ་ཕུལ་ཡོད།
        
དེ་ནས་རབ་བྱུང་༨པའི་མེ་ཡོས་ལོར།  མཚུར་ཕུ་འཇམ་དབྱངས་དོན་འགྲུབ་འོད་ཟེར་གྱིས་རྗེ་རང་བྱུང་རྡོ་རྗེའི་རྗེས་སུ་འབྲངས་ཏེ་རྩིས་ཀྱི་གཞུང་ལུགས་ཆེན་པོ་མཛད།  མཚུར་ཕུའོ་ལོ་ཐོཞེས་པ་ཐོག་མར་བཏོན།  སྔ་རབས་ཀྱི་བྱ་ཞག་རྩིས་ལ་སོགས་པའི་དུས་བརྟགགནམ་དཔྱད་རྣམས་ཚེས་ཁོངས་སུ་བཀོད་པ་ཟླ་རེའི་གནམ་གཤིས་འགྱུར་ལྡོག  ཉི་ཟླ་གཟའ་འཛིན།  ཚེས་གྲངས་ཆད་ལྷག  བཙའ་ཐན་སད་སེར་སོགས་རང་བྱུང་གི་གནོད་འཚེ་གང་ཡོད་བཅས་ཀྱི་སྔོན་བརྡ་བསྟན་ཡོད་པས་དུས་ཕྱིས་བར་དབུས་གཙང་ཁུལ་དུ་འདི་དར་ཁྱབ་ཆེ།    རྩིས་ཀུན་བསྡུས་པ་ལ་འཕྲིན་ལས་པ་ཕྱོགས་ལས་རྣམ་རྒྱལ་གྱི་རྩིས་འགྲེལ་རིན་ཆེན་གཏེར་མཛོད་མཛད་པ་སོགས་ཀྱིས་དར་སྤེལ་བཏང་བ་ལ་མཚུར་ལུགས་ཞེས་སུ་གྲགས།  ལོ་འདི་ནས་རྩིས་འགོ་བཟུང་སྟེ་གཙང་ཆུང་ཆོས་གྲགས་རྒྱ་མཚོ།  མཁས་དབང་ནོར་བཟང་རྒྱ་མཚོ་དང་ཕུག་པ་ལྷུན་གྲུབ་རྒྱ་མཚོས་རྩིས་ཀྱི་ལེགས་བཤད་པད་དཀར་ཞལ་ལུང་མ་བུ་དང་།  དྲི་མེད་འོད་རྒྱན་སོགས་རིམ་པར་བརྩམས།  བོད་ཀྱི་ཡུལ་དུས་དང་འཚམས་པའི་དུས་བརྟག་གནམ་དཔྱད་གཏན་ལ་ཕབ་སྟེ་ལོ་ཐོ་སྦྱོར་སྲོལ་གྱི་བྱ་གཞག་རིམ་གྱིས་གོང་འཕེལ་བཏང་།  རྩིས་སྟོན་བསམ་རྒྱལ་བ་སོགས་ཀྱིས་རིམ་བཞིན་སྤེལ་བ་ལ་གྲ་མདའ་ཕུག་པའི་རིང་ལུགས་ཞེས་ཡོངས་སུ་གྲགས་པ་སྟེ་བཀའ་སྲོལ་ཆེན་པོ་རྣམ་པ་གཉིས་བྱུང་།  དེ་དག་གི་རྒྱུན་ལས་ཕྱིས་རབ་བྱུང་༡༢པའི་མེ་ཡོས་ལོར་སྡེ་སྲིད་མི་དབང་པཎྚི་ཏ་སངས་རྒྱས་རྒྱ་མཚོས་རྩིས་ཀྱི་བསྟན་བཅོས་བེེ་ཌཱུརཡ་དཀར་པོ་མ་བུ་བརྩམས་ནས་དཀར་ནག་དབྱངས་གསུམ་ཀའི་དོན་ཤིན་ཏུ་རྒྱས་པར་བཤད།  ཉི་སྐར་དང་བསྒྲིགས་ནས་དུས་ཀྱི་གཟེར་མང་པོ་གཏན་ལ་ཕབ།  ལྡོག་གཉིས་དབུགས་སྒང་སོགས་ཀྱི་ཚད་གཞི་རི་མོའི་སྒོནས་ངེས་གཏན་འཁེལ་བ་གནང་།  ལོ་ཟླ་ཞག་དུས་ཀྱི་ས་བདག་རྒྱུ་བ།  སྤར་སྨེ།  རྟེན་འབྲེལ་སོགས་ཉེ་བར་མཁོ་བ་རྣམས་ཚེས་ཁོངས་སུ་བཀོད་པ་སོགས་ལོ་ཐོ་རྩོམ་སྒྲིག་གི་ཚུལ་ལུགས་སྔར་ལས་ཤིན་ཏུ་རྒྱུས་པར་གཏན་ལ་ཕབ་པ་དང་ཆབས་ཅིག་ཏུ་དཔལ་ལྡན་རྒྱུད་བཞིའི་ཚིག་དོན་ཆ་ལ་དེ་སྔོན་ཡིག་ནོར་ཤོར་ནས་མ་དག་རྒྱུན་འབྱམས་སུ་སོང་རིགས་ལ་ཞིབ་མོར་དཔྱད་པའི་ཞུས་དག་གནང་སྟེ་པར་དུ་བརྐོས།  རྒྱུད་བཞི་ཀའི་འགྲེལ་ཆེན་བེེ་ཌཱུརཡ་སྔོན་པོ་དང་།  མན་ངག་ལྷན་ཐབས་སོགས་རྩོམ་གནང་བ་དང་།  ལྕགས་རི་གྲྭ་ཚང་སོགས་འཆད་ཉན་གྱི་སློབ་གྲྭ་བཙུགས་ནས་བརྒྱུད་འཛིན་པ་མང་པོ་གསོ་སྐྱོང་གནང་སྟེ་སྨན་རྩིས་མཉམ་སློབ་མཉམ་སྤྱོད་ཀྱི་སྲོལ་རྒྱུན་དར་སྤེལ་བཏང་བས་བོད་ཁམས་ཡོངས་སུ་ཁྱབ་པར་གྱུར། དེ་བཞིན་རབ་བྱུང་༡༢པའི་ཤིང་རྟ་ལོར་སྨན་གླིང་ལོ་ཆེན་དྷརྨ་ཤྲཱིས་རྩིས་ཀྱི་བསྟན་བཅོས་ཉིན་བྱེད་སྣང་བ་མ་བུ་ཆ་ལག་བཅས་དང་།   དེའི་རྣམ་འགྲེལ་གསེར་གྱི་ཤིང་རྟ་བརྩམས་ནས་སྨིན་གྲོལ་གླིང་གི་ལོ་ཐོ་ཞེས་བཏོན་ནས་བར་སྐབས་སུ་དབུས་གཙང་ཁུལ་དུ་ལོ་ཐོ་འདི་ཉིད་གཙོ་བོ་གནང་སྲོལ་ཡོད།  སྨིན་གླིང་རང་དུ་སྨན་རྩིས་སོགས་རིག་གནས་སློབ་གྲྭ་བཙུགས་ནས་ངག་དབང་དཔལ་བཟང་སོགས་ནས་སྨན་རྩིས་གཉིས་ཀ་འཆད་ཉན་དང་ལག་ལེན་རྒྱ་ཆེར་བྱས་ནས་གསོ་རིག་དང་།  གནམ་རིག་སྐར་རྩིས་ཀྱི་བྱ་བ་མཉམ་འབྲེལ་ཐོག་ཆ་ཚང་བ་དང་ཡང་དག་པའི་སྒོ་ནས་འཕེལ་རྒྱས་བཏང་།རྩིས་གཞུང་ཆེན་པོ་ཕྱི་མ་འདི་གཉིས་ནི་ད་ལྟ་རང་རེས་རྒྱུན་དུ་སྤྱོད་པའི་རྩིས་ཀྱི་ལག་ལེན་ཕལ་ཆེར་གྱི་ཁུངས་གཏུགས་ས་ཞིག་ཏུ་གྱུར་སྟབས་ཤིན་ཏུ་གྲགས་ཆེ་ཞིང་གྲ་མདའ་ཕུག་པའི་རིང་ལུགས་དར་ཁྱབ་འགྲོ་བའི་འཕྲིན་ལས་ཀྱི་གཙོ་བོར་གྱུར།
     
མདོ་ཁམས་སྟོད་དུ་སི་ཏུ་ཀུན་མཁྱེན་ཆོས་ཀྱི་འབྱུང་གནས་ཞབས་ཀྱིས་སྔར་སྲོལ་བོད་ཀྱི་སྨན་རྩིས་རིག་པའི་གཞུང་ལག་ལེན་དང་བཅས་པ་འཆད་ཉན་དར་སྤེལ་ཤུགས་ཆེན་གནང་བའི་ཁར།  མེས་རྒྱལ་ནས་གསོ་རིག་སྐོར་དང་།  མདོ་སྡེ་སྟག་སྣ།  འབྱུང་རྩིས།  རྒྱ་ནག་གླང་རྩིས་སོགས་རྩིས་སྐོར་དང་།  རྩ་མདོ་སོགས་སྨན་དཔྱད་སྐོར་འགའ་བོད་སྐད་དུ་བསྒྱུར་གནང་བ་དང་།  རྒྱ་གར་དང་བལ་ཡུལ་ནས་འབྲས་རྩིས་མྱུར་བར་རྟོགས་བྱེད་སོགས་རིག་པའི་གནས་ཀྱི་གཞུང་ལུགས་ཁག་གཅིག་བླངས་ཐོག་ཉི་ཟླ་གཟའ་འཛིན་དང་།  ཉི་ལྡོག་སོགས་དུས་བརྟག་གནམ་དཔྱད་སྐོར་ལ་ཞིབ་འཇུག་མང་དུ་གནང་སྟེ་ཡུལ་གྲུ་སོ་སོའིཁྱད་ཆོས་ཀྱི་དུས་གཟེར་རྣམས་གཏན་ལ་ཕབ།  སྡེ་དགེ་དཔལ་སྤུངས་སུ་སྨན་རྩིས་སོགས་རིག་པའི་གནས་ཀྱི་སློབ་གྲྭ་བཙུགས་ནས་སྨན་རྩིས་རྒྱུན་འཛིན་པ་མང་པོ་གསོ་སྐྱོང་གནང་།མཚུར་ལུགས་གཙོ་བོར་བྱེད་པའི་གཞུང་ལུགས་ལག་ལེན་བཅས་དར་སྤེལ་ཤུགས་ཆེན་གནང་སྟབས་མདོ་ཁམས་ཡོངས་སུ་དེའོརྒྱུན་སྲོལ་དར་ཁྱབ་བྱུང་བ་མ་ཟད།  བོད་ཡོངས་ལ་ཤུགས་རྐྱེན་ཆེ།ལྷག་པར་དུ་རྒྱ་ནག་གླང་རྩིས་ཀྱི་ལག་ལེན་གསར་འགྱུར་མཛད་ནས་རྒྱ་ནག་ལུགས་ཀྱི་བཀའི་ས་གླང་བརྟག་པའི་བརྩི་སྲོལ་ཐོག་མར་གསར་གཏོད་གནང་བ་བོད་ཁམས་ཡོངས་ལ་དར་ཁྱབ་གྱུར་ཡོད།  དེ་ནས་བཟུང་སྟེ་བོད་ཀྱི་རྒྱ་ཆེའི་མང་ཚོགས་ཡོངས་ནས་ལོ་རེ་བཞིན་ཐན་ཞོད་ཆེ་ཆུང་།  ལོ་ཕྱུགས་ལེགས་ཉེས།  བཙའ་སད་སེར་བ་སོགས་ཇི་ལྟར་འབྱུང་བའི་སྐོར་ལ་རྩིས་འབྲས་གཞན་དག་ལས་ཀྱང་ས་གླང་གི་འབྲས་བུ་གཙོ་བོར་དཔྱད་དེ་གླེང་མོལ་དང་དོ་སྣང་བྱེད་པའི་གོམས་སྲོལ་ཆགས་ཡོད་སྟབས་སྙན་གྲགས་ཆེ་ལ་ཡིད་ཆེས་གཏིང་ཟབ་བྱེད་ཀྱི་ཡོད།  དེ་རྗེས་རབ་བྱུང་༡༢པའི་ཆུ་བྱི་ལོར་དཔལ་སྤུངས་རྗེ་དབོན་ཀརྨ་ངེས་ལེགས་བསྟན་འཛིན་གྱིས་རྩིས་ཀྱི་ལག་ལེན་ཉེར་མཁོ་བུམ་བཟང་བརྩམས་པ་དང་།  མཚུར་ལུགས་གྲུབ་རྩིས་དཔལ་སྤུངས་ལོ་ཐོ་ཞེས་པ་སྔར་ལས་རྒྱས་པ་ཞིག་བཏོན།  དུས་ཀྱི་གཟེར་རྣམས་མཚུར་ཕུ་འཇམ་དབྱངས་ཆེན་པོ་དང་རྗེ་མི་བསྐྱོད་རྡོ་རྗེའི་ལུགས་བཞིན་བཀོད།  འབྱུང་རྩིས་ཀྱི་ལོ་འགོ་བཟུང་ས་མི་འདྲ་བའི་ཁྱད་པར་ལས་ས་བདག་གི་རྒྱུ་ཁྲ་མི་འདྲ་བ་དང་།  གྱོ་ཁང་རེའུ་མིག་ཚེས་ཁོངས་སུ་བཀོད་པ་སོགས་ཕུག་ལུགས་གྲུབ་རྩིས་ཀྱི་བཞེད་སྲོལ་དང་ཅུང་ཟད་ཐ་དད་དུ་བྱས་པ་འདི་ལ་དུས་ཕྱིས་མཚུར་ལུགས་ལོ་ཐོ་ཞེས་གྲགས་སྟབས་བཀའ་སྲོལ་འདི་བཞིན་ལག་ལེན་བྱེད་མཁན་ཡང་མང་དུ་ཡོད།  སྐབས་དེ་ཙམ་ནས་དཔལ་སྤུངས་ཀྱི་སྨན་གྲྭ་ཞེས་ཤིན་ཏུ་གྲགས་ཆེ་ཞིང་སློབ་མ་མཁས་པ་མང་དུ་ཐོན།  མཁས་པའི་དབང་ཕྱུག་འཇུ་མི་ཕམ་རྣམ་རྒྱལ་རྒྱ་མཚོས་སྨན་རྩིས་ཀྱི་སློབ་སྦྱོང་གནང་ས་ཡང་གཙོ་ཆེ་བ་དཔལ་སྤུངས་ཀྱི་སྨན་གྲྭ་དེ་ནས་ཡིན་ལ་དེས་ཀྱང་སྨན་རྩིས་རིག་པའི་གཞུང་ལུགས་མང་དུ་བརྩམས་ཡོད།  མདོ་ཁམས་སྡེ་དགེའི་ཀཿཐོག་ཏུའང་རིག་གནས་སློབ་གྲྭ་བཙུགས་ནས་སྒྲ་ཚད་སོགས་རིག་པའི་གནས་ཕལ་ཆེར་འཆད་ཉན་བྱེད་ཀྱི་ཡོད་ལ།  ལྷག་པར་དུ་དགེ་རྩེ་འགྱུར་མེད་བསྟན་པ་རྣམ་རྒྱལ་གྱིས་རྩིས་ཀྱི་བསྟན་བཅོས་ཨུཧྥལ་སྔོན་པོའི་དོ་ཤལ་ཞེས་པ་རྩིས་དཀར་ནག་གཉིས་ཀའི་གཞུང་ཆ་ཚང་བ་དང་།  གསོ་རིག་སྤྱི་དོན་པད་མ་རཱ་གའི་ལྡེ་མིག་སོགས་བརྩམས་གནང་བ་བཅས་ལ་བརྟེན་གཙོ་ཆེར་སྨན་རྩིས་ཟུང་འབྲེལ་གྱི་སྦྱངས་བརྩོན་དང་ལག་ལེན་གནང་བའི་སྲོལ་རྒྱུན་ཆགས་ཡོད་ལ་ལོ་རེ་བཞིན་དུ་ཕུག་ལུགས་གཙོར་བཏོན་གྱི་ལོ་ཐོ་རྩོམ་སྒྲིག་བྱས་ནས་མདོ་ཁམས་ཀྱི་ས་གནས་མང་པོ་ཞིག་ལ་ཁྱབ་གདལ་འགྲོ་གི་ཡོད།  ཀུན་མཁྱེན་འཇམ་དབྱངས་བཞད་པའི་རྡོ་རྗེས་མདོ་སྨད་བླ་བྲང་བཀྲ་ཤིས་འཁྱིལ་དུ་སྨན་པ་གྲྭ་ཚང་དང་།  དུས་འཁོར་གྲྭ་ཚང་སོ་སོར་བཙུགས་ནས་སྨན་རྩིས་རབ་འབྱམས་པ་མང་པོ་གསོ་སྐྱོང་གནང་བའི་རྒྱུན་ལས་མདོ་སྨད་ཁུལ་དུ་དར་ཁྱབ་ཤིན་ཏུ་ཆེ།  ལྷག་པར་དུ་དཀོན་མཆོག་བསྟན་པ་རབ་རྒྱས་ཀྱིས་རབ་ཚེས་མེ་ཡོས་ལོར་ཕུག་ལུགས་རྩིས་ཀྱི་བསྟན་བཅོས་རིགས་ལྡན་མཆོད་པའི་འོད་སྣང་ཞེས་པ་བརྩམས་ནས་ཕུག་ལུགས་རྩ་བར་བཟུང་།  ལོ་ཐོ་སྦྱོར་འགྲེལ་གྱི་ཚུལ་བེེ་དཀར་དང་ཉིན་སྣང་ལྟར་བཀོད།  རྒྱ་རྩིས་ཀྱི་རི་མོ་རྣམ་དག་གིས་ཟུར་བརྒྱན་པ་སོགས་ལ་བརྟེན་ནས་སྐར་རྩིས་ཀྱི་ལག་ལེན་རྒྱུན་མ་ཆད་པར་གོང་འཕེལ་ཕྱིན་པའི་འཕྲིན་ལས་ཀྱི་འོད་སྣང་ད་ལྟའང་གསལ་བཞིན་ཡོད།  ལྷག་པར་དུ་རྨད་དུ་བྱུང་བའི་ཐུགས་བསྐྱེད་དང་སྨོན་ལམ་རྒྱ་མཚོའི་བདག་ཉིད་མཁས་དབང་སྐུ་ཞབས་མཁྱེན་རབ་ནོར་བུ་མཆོག་ནས་བོད་ལྗོངས་སྨན་རྩིས་ཁང་གི་དབུ་འཛིན་གནང་སྟེ་ཕྱོགས་ཀྱི་སློབ་མ་བརྒྱ་ཕྲག་མང་པོར་རིག་པའི་གནས་སྤྱི་དང་།  བྱེ་བྲག་སྨན་རྩིས་གཉིས་ཀྱི་གཞུང་ལུགས་སློབ་ཁྲིད་དང་།ཕྱག་ལེན་རྒྱ་ཆེར་གནང་སྟེ་མཁས་ཤིང་ཉམས་མྱོང་ལྡན་པའི་སྨན་རྩིས་བརྒྱུད་འཛིན་པ་མང་པོ་གསོ་སྐྱོང་མཛད་པའི་འཕྲིན་ལས་ཀྱིས་བོད་ཁམས་ཡོངས་སུ་ཁྱབ།  སྨན་སྦྱིན་རྒྱ་ཆེར་གནང་ནས་འགྲོ་བ་ནད་པ་ཁྲི་ཕྲག་མང་པོར་མི་འཇིགས་སྲོག་གི་སྐྱབས་སྦྱིན་བྱུང། རབ་བྱུང་༡༦པའི་མེ་ཡོས་ལོར་རྩིས་ཀྱི་ལག་ལེན་རིགས་ལྡན་སྙིང་ཐིག་རྩིས་འགོ་སྤོས་གནང་ནས་ཕུག་ལུགས་གཙོ་བོར་བྱས་པའི་ལོ་ཐོ་རྩོམ་སྒྲིག་གནང་སྟེ་རྒྱ་གར་གྱི་དུས་དབྱངས།  རྒྱ་རྩིས་ཧོང་ལེ།འབྱུང་རྩིས།  སྔ་རབས་བོད་ཀྱི་ཉམས་མྱོང་ལས་བྱུང་བའི་དུསབརྟག་གནམ་དཔྱད་ཀྱི་སྟེང་སྐུ་ཞབས་རང་ཉིད་ཀྱིས་ཉམས་མྱོང་བསགས་པའི་གནམ་དཔྱད་དུས་གཟེར་འགའ་ཞིག་གཏན་ལ་ཕབ་ནས་ལོ་བཤད།  ཟླ་བཤད།  ཉིན་བཤད།  རགས་ཞིབ་སོགས་ཤིན་ཏུ་རྒྱས་པར་བཀོད་ནས་ལོ་རེ་བཞིན་ཤིང་པར་བརྐོས་ཏེ་འགྲེམསསྤེལ་བྱས་པར་བརྟེན་བོད་ཀྱི་ལོ་ཐོ་ཞེས་གྲགས་པ་བོད་ཡོངས་སུ་ཁྱབ་ནས་ཀུན་གྱིས་ཚད་མར་འཛིན་པར་བྱེད།  དེ་ལྟར་སྨན་རྩིས་ཟུང་འབྲེལ་གྱེ་སློབ་ཚུལ་ལག་ལེན་དང་བཅས་པ་ལ་ཡང་དག་པའི་སྲོལ་རྒྱུན་བཟང་པོ་བཙུགས་པ་བཅས་སྔར་ལས་ལྷག་པའི་སྒོ་ནས་གོའཕེལ་བཏང་།  ད་ལྟའང་སྨན་རྩིས་ཁང་གི་སྨན་རྩིས་སློབ་གཉེར་བ་རྣམས་ནས་དེང་དུས་དང་མཐུན་པའི་རིག་པའི་གནས་ཕལ་ཆེར་ལ་སློབ་གཉེར་གནང་གི་ཡོད་ཀྱང་།  གཙོ་བོར་སྨན་རྩིས་གཉིས་ལ་སློབ་སྦྱོང་དང་།  ལག་ལེན་བྱས་ཏེ་སློབ་སྲོལ་ཕྱག་ལེན་དང་བཅས་ལ་སྔར་གྱི་ཕྱག་རྒྱུན་མ་ཉམས་པའི་ཐོག་གོང་འཕེལ་འགྲོ་གི་ཡོད་པ་འདི་བཞིན་དང་།  གཞན་ཡང་དེང་དུས་སུ་གཞིས་རྩེ་སྨན་རྩིས་ཁང་།ལྷོ་ཁ་སྨན་རྩིས་ཁང་།  ནག་ཆུ་སྨན་རྩིས་ཁང་།  མངའ་རིས་སྨན་རྩིས་ཁང་།  སྡེ་དགེ་སྨན་རྩིས་ཁང་ཞེས་སོགས་བོད་ལུགས་སྨན་ཁང་ཅུང་ཆེ་གྲས་ཕལ་ཆེར་ལ་སྨན་རྩིས་ཁང་ཞེས་པའི་མིང་ཆགས་ཡོད་ལ།དེ་ལྟར་མཉམ་འབྲེལ་ལག་ལེན་བྱེད་ཀྱི་ཡོད་པ་ལྟ་བུས་མཚོན་སྨན་རྩིསགཉིས་ཀྱི་འབྲེལ་བ་ནི་དུས་ནམ་ཡང་ཁ་བྲལ་ཐབས་མེད་པ་ཞིག་ཡིན།
                                                                         
(བཞི་)སྨན་རྩིས་གཉིས་ཀྱི་དགོས་དོན།
     
 སྨན་གྱི་བྱ་བ་ནི་འགྲོ་བ་མིའི་རིགས་རྣམས་མི་ན་བ་བདེ་བར་གནས་པར་བྱེད་པ་དང་།  ན་བ་རྣམས་གསོས་ནས་ཚེ་ཡུན་རིང་དུ་བསྲིང་བའི་ཐབས་བླ་ན་མེད་པ་ཞིག་ཡིན་སྟབས་དུས་ནམ་ཡང་མེད་དུ་མི་རུང་བ་ཞིག་ཡིན་ལ།  དེ་བཞིན་དུ་གནམ་རིག་སྐར་རྩིས་ཀྱི་བྱ་བ་ནི་ལོ་ཐོ་རྩོམ་སྒྲིག་བྱེད་པ་སོགས་ལ་བརྟེན་ནས་གནམ་ལ་ཉི་ཟླ་གཟའ་སྐར་གྱི་འགྲོས་བཞི་ཇི་ལྟར་རྩོམ་པའི་ཚུལ་གཏན་ལ་ཕབ་སྟེ་གནམ་སའི་འགྱུར་ལྡོག་གི་ཁྱད་པར་ལས་ལོ་རེ་བཞིན་དུ་ཆར་ཆར་ཆུ་བཟང་ངན།  ཐན་པ་ཆེ་ཆུང་།  བཙའ་སད་སེར་བ།  ས་གཡོ་ཤྭ་འོད།  གྲང་ལྷགས་རླུང་འཚུབ།  ལོ་ཏོག་ལེགས་ཉེས།  ཕྱུགས་རིགས་བདེ་གཟར།  ཉི་ཟླ་གཟའ་འཛིན་སོགས་རང་བྱུང་ཁམས་ལས་ཕན་སྟེར་གནོད་སྦྱིན་ཇི་ལྟར་འབྱུང་བའི་དོན་རྣམས་ངེས་རྟོགས་བྱས་ནས་རྒྱ་ཆེའི་ཞིང་འབྲོག་མང་ཚོགས་གནས་ཡུལ་གྱི་ས་བབ་གནམ་གཤིས་ཀྱི་གནས་ཚུལ་ལ་གཞིགས་ནས་སྔོན་འགོག་དང་གྲ་སྒྲིག་གི་ལས་ཀ་ཇི་ལྟར་དགོས་པའི་ཚུལ་དང་།  ས་བོན་འདེབས་འཛུགས་དང་།ཞིང་ཆུ་འདྲེན་གཏོང་།  རུ་བ་སྐྱས་སྤོ་ལ་སོགས་དངོས་གཞིའི་ལས་ཀའི་དུས་ཚོད་སྔ་ཕྱི་(སྔ་འདེབས་བར་འདེབས་ཕྱི་འདེབས་ལྟ་བུ་)དང་།  ལས་ཀའི་བྱེད་ཐབས་བཅས་ཀྱི་སྔོན་བརྡ་བཏང་ནས་ཞིང་འབྲོག་མང་ཚོགས་ཀྱི་ཐོན་སྐྱེད་ལག་ལེན་དངོས་ཀྱི་ནང་དུ་འགལ་རྐྱེན་བསལ་ཞིང་མཐུན་རྐྱེན་སྒྲུབ་པའི་སྒོ་ནས་བོད་གསར་པ་འཛུགས་སྐྲུན་བྱེད་པའི་ནང་ཕན་ཡོད་ཀྱི་ནུས་པ་འདོན་ཐུབ་ཀྱི་ཡོད་པར་བརྟེན་རྒྱ་ཆེའི་ཞིང་འབྲོག་མང་ཚོགས་ཀྱི་བརྩི་བཀུར་ཐོབ་ཀྱི་ཡོད།  དཔེར་ན། སྨན་རྩིས་ཁང་གི་ལོ་ཐོ་ཁྲི་༢༠ཡས་མས་པར་བརྒྱབ་ནའང་མང་ཚོགས་ཀྱིས་འཚང་ག་བརྒྱབ་ནས་ཉོས་ཏེ་ད་དུང་འདང་གི་མེད་པ་རེད། སྤྱིར་རིག་པའི་གནས་རྣམས་ནི་དུས་སྐབས་གང་འདྲ་ཞིག་ལའང་དགོས་གལ་ཆེ་ཞིང་བེད་སྤྱོད་བྱེད་དགོས་པ་ཞིག་ཡིན་ལ་སྨན་རྩིས་གཉིས་ནི་དེ་བས་ཀྱང་མཁོ་གལ་ཆེ་ཞིང་མཉམ་འབྲེལ་གྱི་སྒོ་ནས་བེད་སྤྱོད་བྱེད་དགོས་ཀྱི་ཡོད།
      
དེའི་ཕྱིར།  མིའི་རིགས་ཡོངས་ལ་ཕན་སྦྱིན་གནོད་སྲུང་གི་ནུས་པ་ལྡན་པའི་རིག་པའི་གནས་འདི་རྣམས་ནི་འཇིག་རྟེན་ཁམས་མི་ཉམས་དར་ཞིང་རྒྱས་ལ་ཡུན་རིང་དུ་གནས་པའི་ཐབས་ལ་འབད་བརྩོན་གནང་འོས་པ་ཞིག་ཡིན།  ལྷག་པར་དུ་བོད་རིགས་མི་དམངས་ཚོས་བོད་ཀྱི་གསོ་བ་རིག་པ་དང་།  རྩིས་ཀྱི་རིག་པ་གཉིས་ཀྱིས་གཙོས་པའི་རིག་པའི་གནས་རིན་ཐང་བྲལ་བའི་ནོར་བུ་རིན་པོ་ཆེ་འདི་ཉིད་ལ་ཕྱོགས་ཡོངས་ནས་སྦྱངས་བརྩོན་མཐར་ཕྱིན་པ་དང་།ལག་བསྟར་གནད་ལ་འཁེལ་བའི་སྒོ་ནས་བྱི་དོར་ལེགས་པར་བྱས་ནས་མེས་རྒྱལ་གྱི་རིག་གནས་བང་མཛོད་ཆེན་པོའི་ནང་དུ་གཟི་འོད་ལྷམ་མེར་འཕྲོ་བ་ཞིག་ཡོང་རྒྱུའི་འབད་བརྩོན་གནང་སྟེ་རང་རྒྱལ་དེང་རབས་ཅན་བཞི་མངོན་དུ་འགྱུར་བའི་ཆེད་དུ་ལེགས་སྐྱེས་འབུལ་དུ་འཇུག་དགོས། 
     
སླར་སྨྲས་པ།  འདུ་བ་མ་སྙོམས་སྙོམས་པར་བྱེདཔའི་སྨན། །ཤེས་བའི་རྣམ་གྲངས་གྲངས་ཀྱིས་གཞལ་བའི་རྩིས།  །ཀུན་ཏུ་མཉམ་འབྲེལ་འབྲེལ་བའི་ལོ་རྒྱུས་བཅས།  །སྨྲས་པ་འདི་འདྲ་འདྲ་བ་བསྡུར་ཆེད་མིན།  ། འགྲོ་བ་ཀུན་སྨན་སྨན་གྱི་རིག་པ་དང་།  ། བླང་དོར་ཀུན་རྩིས་རྩིས་ཀྱི་རིག་པ་གཉིས།  ། གཅིག་ལ་གཅིག་བརྟེན་བརྟེན་ཅིང་འབྲེལ་བའི་ཚུལ།  ། འབྲི་བ་ནན་བསྐུལ་བསྐུལ་ངོ་མ་ལྡོག་ཙམ། །འདི་ལ་འགལ་དང་མ་འབྲེལ་ཟློས་པ་སོགས།  །ཉེས་པ་སྨྲས་གང་སྨྲ་བོ་བླུན་པོའི་སྐྱོན།  ། མཁས་རྣམས་གཟུ་བོའི་བློ་ཡིས་བསྐྱོན་མཛད་ན། །གུས་བཅས་ནོངས་པ་འཐོལ་ཞིང་འཆགས་ལ་རིངས། ཞེས་ཞུའོ། 

 རྡོ་འབུམ་དཔེ་འཕྲིན།  ནང་རིག་གཏེར་མཛོད། མཆོད་མེ་རྩོམ་རིག་དྲ་བ།   གེ་སར་ཞིབ་འཇུག  ན་གཞོན་གསར་བ།

Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060