སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
   མདུན་ཤོག    འཕྲིན་གསར།    གསུང་རབ།     བོད་སྐད་ཡིག      རྩོམ་རིག      སློབ་གསོ།    ཆོས་ལུགས།    གསོ་རིག    ལོ་རྒྱུས།     སྒྱུ་རྩལ།     དམངས་སྲོལ།    སྐར་རྩིས།    མཚན་ཉིད་རིག་པ།     དཔལ་འབྱོར།
   སྲིད་ཁྲིམས།     ས་རྒྱུས།     སྐྱེ་ཁམས།     ཞིང་ཕྱུགས།     ཕྱི་སྐད་སློབ་དེབ།    དཔྱད་རྩོམ།     ཚིག་མཛོད།     དུས་དེབ་དང་ཚགས་པར།     རྩོམ་པ་པོ།    དཔེ་མཛོད་ཁང་།     པར་སྐྲུན་ཁང་།     གཞན་དག
 
བོད་ཀྱི་གསོ་རིག་གཞུང་ལས་ཕྱི་ནང་གི་འབྱུང་བ་ལུས་ནད་གཉེན་པོ་གསུམ་ངོ་བོ་བདག་ཉིད་གཅིག་ཏུ་འབྲེལ་བའི་སྐོར་ཅུང་ཟད་བཤད་པ་བཞུགས་སོ།
སྤེལ་དུས། 2013-07-30   ཡོང་ཁུངས།    རྩོམ་པ་པོ།  ཁྲོ་རུ་ཚེ་རྣམ། འབྲུག་མོས་ཞུ་དག་བྱས།

 བོད་ཀྱི་གསོ་བ་རིག་པའི་གཞུང་ལུགས་དཔལ་ལྡན་རྒྱུད་བཞི་ཞེས་པ་འདི་ནི།  ཕྱི་ནང་གི་འབྱུང་བ་ལུས་ནད་གཉེན་པོ་རྣམས་ཀྱེ་ཆོས་ཉིད་ཇི་མ་ཇི་བཞིན་ཁོང་དུ་ཆུད་ནས་བརྩམས་པའོ་གཞུང་ལུགས་ཤིག་ཡིན་པས་དུས་སྐབས་ཇི་འདྲ་ཞིག་གི་ནང་དུའང་སླུམེད་དུ་བེད་སྤྱོད་བྱེད་ཐུབ་པའི་ཁྱད་དུ་འཕགས་པའེ་ཚན་རིག་ཅིག་ཡིན་ལ།འདིའི་བརྗོད་བྱ་ཡན་ལག་བརྒྱད་ཡིན་པས་རྒྱ་ཆེ་བ་དང་རླུང་མཁྲིས་བད་ཀན་གསུམ་གྱིས་སྤྱི་ཁོག་ཕུབ་སྟེ་བརྩམས་པའི་གཞུང་ལུགས་ཤེག་ཡིན་པས་གོ་རིམ་མ་ནོར་བ་དང་ཆ་ཚང་བ་ཞིག་ཀྱང་ཡིན།
     
སྐབས་འདིར། བརྗོད་བྱ་ཡན་ལག་བརྒྱད་ཀྱི་ནང་ནས་ལུས་ཀྱི་འབྱུང་བཞིའི་སྐོར་དང་། ཉེས་པ་རླུང་མཁྲིས་བད་ཀན་གསུམ་ལ་རྒྱུ་རྐྱེན་མཚན་ཉིད་སོགས་མང་དུ་ཡོད་པའི་ནང་ནས་ངོ་བོ་དང་བྱེད་ལས།དེ་དག་ཕན་ཚུན་བར་གྱི་འབྲེལ་བའི་ཚུལ་བཅས་ཅུང་ཟད་བརྗོད་པར་འདོད་དོ།   
                                                                     
  (གཅིག་)གསོ་གཞི་ལུས་ཀྱི་འབྱུང་བ།
      
སྨན་གྱིས་གསོ་བར་བྱ་བའི་གཞིའམ་གང་གི་དོན་དུ་གསོ་བའི་ཡུལ་དེ་ཉིད་ལ་ལུས་ཞེས་བྱ་ཞིང་།  དེ་ནི་ཁུ་ཁྲག་སེམས་གསུམ་ཚོགས་པ་ལས་གྲུབ་པ་ཞིག་ཡིན་ལ།  ནད་དང་།  ལུས་ཟུངས།   དྲི་མ་གསུམ་གྱི་བདག་ཉིད་ཅན་ཞིག་ཀྱང་ཡིན་པས་དོན་དུ་གནོད་བྱ་ཁམས་དང་གནོད་བྱེད་ཉེས་པ་ལྷན་ཅིག་ཏུ་འདུས་པའི་རང་བཞིན་ཅན་ཞིག་ཡིན།  རླུང་མཁྲིས་བད་ཀན་གསུམ་པོ་ནི་མ་གཞི་གནོད་བྱེད་ཉེས་པ་ཡིན་པ་དང་།  དྭངས་མ་ལ་སོགས་པ་བཅུ་ནི་གནོད་བྱའི་ཁམས་ཡིན་ནའང་།  དེ་དག་རྟེན་དང་བརྟེན་པའི་འབྲེལ་བ་ཞིག་ཡིན་པར་བརྟེན་རླུང་མཁྲིས་བད་ཀན་གསུམ་པོ་འཕེལ་ཟད་འཁྲུགས་པའི་རྣམ་པར་མ་གྱུར་ན་ལུས་དེ་ཉིད་འཚོ་བའི་མཐུན་རྐྱེན་གྱི་གྲོགས་བྱེད་པ་དང་།  གལ་ཏེ་འཕེལ་ཟད་འཁྲུགས་པའི་རྣམ་པར་གྱུར་ན་ནད་ཀྱི་ངོ་བོ་ཡིན་པས་ལུས་མི་བདེ་བ་དང་སྲོག་འཚོ་བའི་འགལ་རྐྱེན་བྱེད་ཀྱི་ཡོད་པ་རེད།  དེར་བརྟེན་ནང་གི་འབྱུང་བ་རླུང་མཁྲིས་བད་ཀན་གསུམ་གྱིས་དང་པོ་ལུས་ཆགས་པའི་རྒྱུ་བྱེད་པ་དང་།བར་དུ་ལུས་འཕེལ་ཞིང་རྒྱས་པ་དང་གནས་པའི་གྲོགས་བྱེད་ལ།  ཐ་མ་ལུས་འཇིག་པའི་གནོད་རྐྱེན་ཡང་བྱེད་པ་བཅས་དེ་དག་ཐམས་ཅད་རླུང་མཁྲིས་བད་ཀན་གསུམ་གྱི་བྱེད་པ་འབའ་ཞིག་ལ་རགས་ལས་པ་ཞིག་ཡིན།  དེ་བཞིན་དབང་པོ་ལྔས་ཡུལ་ལྔ་འཛིང་པ་དང་།  ཁོང་ཁྲོ་བ།  འདོད་ཅིང་ཆགས་པ།  སེམས་དགའ་བ།  སྙིང་སྟོབས་སྐྱེད་པ།  དངངས་སྐྲག་འབྱུང་བ།  དྲན་པ་མི་གསལ་བ།  བློ་བརྟན་པ་སོགས་ཐམས་ཅད་ཉེས་པ་གསུམ་གྱི་བྱེད་ལས་འབའ་ཞིག་ལ་བརྟེན་པ་ཞིག་ཡིན་ཏེ།  དཔེར་ན།  མི་སོ་སོར་རླུང་མཁྲིས་བད་ཀན་གསུམ་ཤས་ཆེ་ཆུང་གི་ཁྱད་པར་ལས་རང་བཞིན་མི་འདྲ་བ་རྣམ་པ་བདུན་དུ་གྱུར་ནས་གཤིས་ཀ་དང་།  ཁམས་དབང་།  བསམ་པའིབྱེ་བྲག་བཅས་ཀྱང་མི་འདྲ་བ་རེ་འབྱུང་གི་ཡོད་པ་ལྟ་བུ་དེ་དག་ཚང་མ་རླུང་མཁྲིས་བད་ཀན་གསུམ་གྱི་བྱེད་ལས་ལ་བརྟེན་པ་ཞིག་ཡིན་པ་བཅས་མདོར་ན།  མིའི་ལུས་འདི་དང་པོ་འབྱུང་བ་བཞིས་སྐྱེད་པ་དང་།  བར་དུ་འབྱུང་བ་བཞི་ལས་གྲུབ་ཅིང་གནས་པ།  ཐ་མར་འབྱུང་བ་བཞིའི་རྐྱེན་གྱིས་འཇིག་པར་འགྱུར་བའི་རང་བེཞིན་ཡིན་པའི་རྒྱུ་མཚན་དེ་དག་ལ་བརྟེན་ནས་ཕྱིའི་འབྱུང་བ་ནམ་ཟླ་དུས་བཞིའི་འཕེལ་འགྲིབ་འགྱུར་ལྔོག་འགྲོ་བའིརྐྱེན་ལས་ནང་གི་འབྱུང་བ་རླུང་མཁྲིས་བད་ཀན་གསུམ་འཕེལ་ཟད་འཁྲུགས་པ་ཅི་རིགས་ཡོང་གི་ཡོད་པའི་ཕྱི་ནང་རྒྱུ་རྐྱེན་གྱི་འབྲེལ་བ་རྙོག་འཛིང་ཤིན་ཏུ་ཆེ་བ་དེ་དག་གི་ཆོས་ཉིད་ལ་ཞིབ་ཏུ་བརྟག་ཅིང་རྟོགས་པར་བྱས་ཏེ་ལག་ལེན་དངོས་ཀྱི་ཐོག་གང་ལ་གངའོས་ཀྱི་བཅོས་ཐབས་སྤྱོད་ཀྱི་ཡོད་པ་རེད།
                                                                              
(གཉིས་)གསོ་བྱ་ནད་ཀྱི་འབྱུང་བ།
     
གསོ་བྱའི་ནད་མཐའ་དག་ནི།  དང་པོ་ནང་གི་འབྱུང་བ་རླུང་མཁྲིས་བད་ཀན་གསུམ་པོ་འཕེལ་ཟད་འཁྲུགས་པའི་རྣམ་པར་གྱུར་པ་ལ་བརྟེན་ནས་བྱུང་བ་དང་།  བར་དུ་རླུང་མཁྲིས་བད་ཀན་གསུམ་པོ་གང་རུང་གི་ངོ་བོར་གནས་པ་དང་།  ཐ་མ་གཉེན་པོ་ལ་བརྟེན་ནས་རླུང་མཁྲིས་བད་ཀན་གསུམ་པོ་ཆ་སྙོམས་པོར་གྱུར་ནས་ནད་མེད་བདེ་བར་གནས་པ་བཅས་ཚང་མ་རླུང་མཁྲིས་བད་ཀན་གསུམ་གྱི་བྱེད་ལས་ལ་བརྟེན་ནས་བྱུང་བ་ཞིག་ཡིན།  བོད་ལུགས་གསོ་བ་རིག་པའི་གཞུང་དང་སྨན་བཅོས་ལག་ལེན་གྱི་ཐོག་ནས་བཤད་ན་ལུས་ཀྱི་ཁམསའདི་ལ་བྱུང་བའི་ནད་རིགས་ཁག་ཚང་མར་སྤྱི་ལ་ཁྱབ་པའི་གཞི་རྩའི་ནུས་པ་ཐོན་མཁན་ནི་རྣམཔར་གྱུར་པའི་ཉེས་པ་རླུང་མཁྲིས་བད་ཀན་ཡིན་པར་ངོས་འཛིན་བྱེད་ཀྱི་ཡོད་ལ།  ནད་ཅན་ཞིག་ལ་ལྟ་བ་དང་།  རེག་པ།  དྲི་བ་སོགས་བརྟག་ཐབས་རྙོག་འཛིང་ཆེ་ལ།  ཞིབ་ཕྲ་ཡིན་པ།  རྒྱུན་བསྲིངས་པ་བཅས་ཀྱི་སྒོ་ནས་ལེགས་པར་བརྟགས་ནས་གཞི་རྩའི་ཐོག་ནད་རླུང་མཁྲིས་བད་ཀན་གསུམ་གང་ཡིན་ངོས་ཟིན་པ་བྱས་རྗེས་སྨན་བཅོས་བྱེད་པའི་སྐབས་སུའང་རྣམ་པར་གྱུར་པའི་ཉེས་པ་གསུམ་པོ་སྙོམས་སྒྲིག་བྱེད་པའི་རྩ་འཛིན་གཞིར་བཟུང་སྟེ་སྐབས་དོན་བྱེ་བྲག་གི་ནད་རིགས་གང་ཡིན་པ་དེ་ཉིད་གསོ་བཅོས་བྱེད་ཀྱི་ཡོད་སྟབས་རླུང་མཁྲིས་བད་ཀན་གསུམ་ནི་གསོ་བ་ནད་རིགས་ཀུན་ལ་ཡོངས་ཁྱབ་ཏུ་འབྲེལ་བ་ཡོད་པ་ཞིག་སྟེ།  དཔེར་ན་རླུང་ནད་ཟེར་བ་དེ་ནི།  ཐ་མལ་དུ་གནས་པའི་རླུང་དེ་ཉིད་རྒྱུ་འདོད་ཆགས་དང་།  རྐྱེན་དུས་གདོན་ཟས་སྤྱོད་ལ་བརྟེན་ནས་འཕེལ་ཟད་འཁྲུགས་པ་གང་རུང་དུ་གྱུར་པའི་གཞི་རྩའི་ཉེས་པ་དེ་བཤད་པ་ཞིག་ཡིན་ན་ཡང་།  སྐབས་དོན་བྱེ་བྲག་གི་ཐོག་ནས་བཤད་ན།  སྙིང་སྲོག་ལོང་ལ་རླུང་ཉིད་གཙོ་བོར་བཟུང་།  །ཞེས་པ་ལྟར་སྙིང་ཁམས་ཀྱི་ནད་རིགས་ཕལ་ཆེར་དང་།  ཤེས་པ་རང་བཞིན་དུ་མི་གནས་པ།  ཁྲག་ཤེད་མ་སྙོམས་པ།  མགོ་ཡུ་འཁོར་བ།  དྲན་མེད་བརྒྱལ་བ།  ལུས་ཟུངས་ཟད་པ།  ལུས་སྟོབས་རྒས་པ་སོགས་ཀྱི་ནད་དེ་དག་རླུང་ནད་དང་འབྲེལ་ནས་བསྡད་ཡོད་སྟབས་ནད་དེ་དག་བཅོས་པའི་སྐབས་སུའང་རླུང་བཅོས་བྱེད་རྒྱུ་དང་ཟུང་སྦྲེལ་བྱས་ནས་ནད་རིགས་བྱེ་བྲག་གང་ཡིན་པ་དེ་ཉིད་གསོ་བཅོས་བྱེད་དགོས་ཀྱི་ཡོད་པ་ལྟ་བུ་ཡིན།
     
མཁྲིས་པའམ་ཚ་བའི་ནད་ཟེར་བ་དེ་ནི།  ཐ་མལ་དུ་གནས་པའི་མཁྲིས་པ་དེ་ཉིད་རྒྱུ་ཞེ་སྡང་དང་རྐྱེན་དུས་གདོན་ཟས་སྤྱོད་གང་རུང་ལ་བརྟེན་ནས་འཕེལ་ཟད་འཁྲུགས་པའི་རྣམ་པར་གྱུར་པའི་ཉེས་པ་སྤྱི་ལ་ཁྱབ་པའི་ཚ་བ་དེ་ལ་བཤད་པ་ཞིག་ཡིན་ན་ཡང་སྐབས་དོནབྱེ་བྲག་གི་ཐོ་ག་ནས་བཤད་ན།  གློ་མཆིན་མཁྲིས་པ་ཚད་པ་གཙོ་བོར་བཟུང་།  །ཞེས་པ་ལྟར་གློ་ཚད་དང་།  མཆིན་ཚད།  མཁྲིས་ཚད།རྒྱུ་ཚད།  ཆམ་པ་རིམས་ཚད་སོགས་གཉན་ཚད་ཀྱི་རིགས་ཚང་མ་མཁྲིས་པ་ཚ་བའི་ནད་དང་འབྲེལ་ནས་བསྡད་ཡོད་སྟབས་བཅོས་པའི་སྐབས་སུའང་ཚ་བ་གཅོག་པ་དང་ཟུང་འབྲེལ་བྱས་ནས་ནད་རིགས་བྱེ་བྲག་གང་ཡིན་པ་དེ་ཉིད་གསོ་བཅོས་བྱེད་ཀྱི་ཡོད་པ་རེད། 
   
བད་ཀན་གྲང་བའི་ནད་ཟེར་བ་དེ་ནི།  ཐ་མལ་དུ་གནས་པའི་བད་ཀན་དེ་ཉིད་རྒྱུ་གཏི་མུག་དང་རྐྱེན་དུས་གདོན་ཟས་སྤྱོད་གང་རུང་ལ་བརྟེན་ནས་འཕེལ་ཟད་འཁྲུགས་པའི་རྣམ་པར་གྱུར་པའི་གཞི་རྩའི་ཉེས་པ་གང་ཡིན་པ་དེ་བཤད་པ་ཞིག་ཡིན་ན་ཡང་སྐབས་དོན་བྱེ་བྲག་གི་ཐོག་ནས་བཤད་ན། ཕོ་མཆེར་མཁལ་ནད་བད་ཀན་གཙོ་བོར་བཟུང་།། ཞེས་པ་ལྟར་ཕོ་བ་དང་མཁལ་མ་སོགས་ལུས་ཕྱི་ནང་སྟོད་སྨད་ཀྱི་དྲོད་ཚད་ཉམས་པ་དང་། ཟས་སྐོམ་མི་འཇུ་བ། ལུས་ཀྱི་ས་ཆུའི་རང་བཞིན་འཕེལ་བ། ལུས་ལྕི་བ། ཤེས་པ་བྱིང་འཐིབ་ཏུ་གྱུར་པ།  ལུས་ཀྱི་འགུལ་སྐྱོད་དང་ཤུགས་སྟོབས་ཞན་པར་གྱུར་པ་སོགས་ནི་བད་ཀན་གྲང་བའི་ནད་དང་འབྲེལ་ནས་ཡོད་སྟབས་བཅོས་པའི་སྐབས་སུའང་བད་ཀན་གྱི་ནད་བཅོས་རྒྱུ་དང་ཟུང་འབྲེལ་བྱས་ནས་ནད་རིགས་བྱེ་བྲག་གང་ཡིན་པ་དེ་ཉིད་གསོ་བཅོས་བྱེད་ཀྱི་ཡོད་པ་རེད།  མདོར་ན་བོད་ལུགས་སྨན་བཅོས་ལག་ལེན་དངོས་ཀྱི་ཐོག་ནས་བཤད་ན་དོན་ལྔ།  སྣོད་དྲུག་ལ་སོགས་པ་ལུས་ཀྱི་ཕྱི་ནང་སྟོད་སྨད་ཀྱིས་བསྡུས་པའི་ནད་རིགས་གང་དང་གང་ཡིན་ཡང་ཉེས་པ་རླུང་མཁྲིས་བད་ཀན་གསུམ་དང་འབྲེལ་བ་ཅན་ཤ་སྟག་ཡིན་པས།  ཐོག་མར་སྤྱི་ལ་ཁྱབ་པའི་གཞི་རྩའི་ཉེས་པ་གསུམ་གང་ཡིན་ངོས་འཛིན་པར་བྱས་ནས་གསོ་བྱ་དེ་ཉིད་གཞིར་བཟུང་སྟེ་དེ་དང་འབྲེལ་བའི་ནད་རིགས་བྱེ་བྲག་གང་ཡིན་པ་དེ་ཉིད་གསོ་བཅོས་བྱེད་ཀྱི་ཡོད་པ་རེད།  དེས་ན་གསོ་བྱའི་ནད་རིགས་མཐའ་དག་རླུང་མཁྲིས་བད་ཀན་གསུམ་གྱི་རང་བཞིན་ཡིན་པ་དང་།དེ་གསུམ་གང་རུང་དང་མ་འབྲེལ་བའི་ནད་རིགས་ཤིག་རྩ་བ་ནས་མེད་པའི་ངོས་འཛིན་བྱེད་ཀྱི་ཡོད་ལ།  སྨན་བཅོས་ལག་ལེན་དངོས་ཀྱི་ཐོག་ནས་ཀྱང་རླུང་མཁྲིས་བད་ཀན་གསུམ་གྱིས་སྤྱི་ཁོག་ཕུབ་ཅེས་པའི་རྩ་དོན་དེ་ལག་བསྟར་བྱེད་ཀྱི་ཡོད་པ་རེད།
                                                                                 
 (གསུམ་)གསོ་བྱེད་གཉེན་པོའི་འབྱུང་བ།
     
 ནད་ཀྱི་གཉེན་པོ་ལ།  ཟས་དང་སྤྱོད་ལམ།  སྨན་དང་དཔྱད་བཞིར་ངེས་པ་གཏན་ལ་ཕབ་ཡོད།  དེའི་ནང་ནས་ཟས་དང་སྨན་ལྟ་བུ་ལ་མཚོན་ན།  ཟས་སྨན་གང་ཡང་ཐོག་མར་རྒྱུ་འབྱུང་བ་བཞི་ལས་སྐྱེས་པ་དང་།  བར་དུ་འབྱུང་བ་བཞི་ལ་བརྟེན་ནས་འཕེལ་བཞིན་རྒྱས་པ།  ཐ་མ་ཡང་འབྱུང་བ་བཞིའི་བྱེད་ལས་ལ་བརྟེན་ནས་འཇིག་པར་འགྱུར་བ་ཞིག་ཡིན་པའི་ངོས་འཛིན་བྱེད་ཀྱི་ཡོད།  དེས་ན་ཟས་དང་སྨན་ཐམས་ཅད་འབྱུང་བ་ལྔ་ཚང་བས་སྐྱེད་པ་འདྲ་ན་ཡང་།  རྒྱུ་འབྱུང་བ་གཅིག་ཤས་ཆེ་བ་དང་གཉིས་ཤས་ཆེ་བ་སོགས་ཀྱི་ཁྱད་པར་ལ་བརྟེན།  དེས་སྐྱེད་པའི་འབྲས་བུ་དེ་དག་ལ་ཡང་རོ་དང་ནུས་པ་མི་དྲ་བའི་ཁྱད་པར་མང་དུ་འབྱུང་གི་ཡོད་པ་དཔེར་ན།  རོ་མངར་བའི་སྨན་གྱི་རིགས་རྣམས་ནི།  རྒྱུ་ས་ཆུ་ཤས་ཆེ་བ་ལས་སྐྱེས་པ་ལྟ་བུས་མཚོན་རྒྱུ་འབྱུང་བ་ཤས་ཆེ་ཆུང་གི་ཁྱད་པར་ལས་རོའི་བྱེ་བྲག་མི་འདྲ་བ་ཕྲ་མོ་མང་དུ་འབྱུང་བ་ཡང་རྩ་བའི་རོ་མངར་སྐྱུར་ལན་ཚྭ་ཁ་ཚ་བསྐ་བ་དྲུག་པོ་གང་ཡང་རུང་བ་ཞིག་གི་ཁོངས་སུ་གཏོགས་པ་ལས་རོ་གཞན་མི་འབྱུང་བ་དེས་ན་ཟས་དང་སྨན་གྱི་རོ་མཐའ་དག་རྣམ་པ་དྲུག་ཏུ་ངེས་པ་དང་།  རོ་དེ་དག་ལ་བརྟེན་པའི་སྨན་རྣམས་ལ་ཞུ་རྗེས་གསུམ་དང་།  ནུས་པ་བརྒྱད། ཡོན་ཏན་བཅུ་བདུན།  སྟོབས་གཉིས་དང་ལྡན་པ་ཞིག་ཡིན་པས་དེ་དག་གིས་ནད་ཀྱི་མཚན་ཉིད་༢༠འཇོམས་པར་ནུས་པ་ཞིག་ཡིན།སྨན་གང་ཞིག་སྐབས་དོན་གསོ་བའི་ནད་དེ་ཞི་ཞིང་།  ནད་གཞན་ལ་གནོད་པ་མི་འབྱུང་བའི་ཆེད་དུ་རོ་བསྡེབས་ནུས་བསྡེབས་ཞུ་རྗེས་བསྡེབས་ཏེ་སྦྱར་ཞེས་ལོ་ངོ་སྟོང་ཕྲག་ལྷག་གི་གོང་ནས་ནད་རིགས་སོ་སོའི་གཉེན་པོར་དམིགས་པའི་སྨན་གྱི་སྦྱོར་བ་མང་པོ་ཞིག་གཏན་ལ་ཕབ་པ་དེ་དག་དེང་གི་དུས་སུའང་།  ཐང་ཕྱེ་དང་།  རིལ་བུ། ལྡེ་གུ།  སྨན་མར།  ཐལ་སྨན།  ཎྜ།    སྨན་ཆང་།  རིན་པོ་ཆེའི་སྦྱོར་བ།  སྔོ་སྦྱོར་སོགས་ཞི་སྦྱོང་སྨན་གྱི་སྦྱོར་བ་མང་པོ་ཞིག་ནད་ཐོག་ལག་ལེན་དངོས་ལ་བེད་སྤྱོད་བྱེད་ཐུབ་པ་དང་ནུས་པ་ཐོན་བཞིན་པའི་རྩ་བའི་རྨང་གཞི་དེའི་ཐོག  དེ་སྔའི་ལོ་རྒྱུས་ཐོག་བྱང་ཟུར་མཁས་པ་རྣམས་ནས་གཞུང་ལག་ལེན་དང་བཅས་པར་བྱི་དོར་དང་།  ཁ་སྐོང་།  གོང་འཕེལ་བཅས་བཏང་བར་མ་ཟད།  ནད་ཐོག་ལག་ལེན་ཁོ་ནའི་ཐོག་ནས་བཤད་ནའང་།  དུས་རབས་༡༨པའི་སྨད་དང་དུས་རབས་༡༩པའི་ནང་ཚབས་ཆེ་བའི་གཉན་རིམས་རྣམ་པ་སྣ་ཚོགས་དང་།  ཁྲག་རླུང་དང་འབམ་གྱི་ནད་རིགས་ཤིན་ཏུ་དར་ཁྱབ་ཆེ་བའི་སྐབས་སུ་ནད་དེ་དག་གི་རྒྱུ་རྐྱེན་དང་།  ངོ་བོ།  གཉེན་པོ་དང་བཅས་པ་ལ་ཞིབ་འཇུག་ནན་ཏན་ས་ཐོག་སྨན་གྱི་སྦྱོར་བ་དང་བཅོས་ཐབས་མང་དུ་བགྱིས་ནས་གཉན་རིམས་དང་།འབམ་གྱི་ནད་རིགས་བཅོས་པའི་ལོ་རྒྱུས་ཡོད་པ་ལྟ་བུས་མཚོན།མདོར་ན།  དཔལ་ལྡན་རྒྱུད་ཀྱི་རྩ་འཛིན་གཞིར་བཟུང་སྟེ་ཕྱི་ནང་གི་འབྱུང་བའི་འགྱུར་ལྡོག་ལ་རྒྱུན་ཆད་མེད་པར་ཞིབ་འཇུག་དང་། གསར་པའི་ཁ་སྣོན་དང་བཅས་གོང་འཕེལ་གཏོང་གི་ཡོད་ལ།  དེང་སྐབས་ཀྱང་གསོ་རིག་རྒྱུད་ཀྱི་དགོངས་དོན་ལུས་ཀྱི་གནས་ལུགས་ཀྱི་འབྲེལ་བ་རྩ་ཡི་སྐོར་དང་ལུས་ཀྱི་འདྲ་དཔེ་སོགས་ལ་གོ་བ་ལེན་ཚད་སྔར་བས་གཏིང་ཟབ་ཏུ་ཕྱིན་པ་དང་།  ནད་ཐོག་རིག་པའི་ཐད་ལ་ཕོ་བ་རུབ་པའི་ནད་གཞི་དང་།  མཁྲིས་པའི་རྡོ་སྐྲན།  ཁྲག་རླུང་དང་བརྒྱལ་གཟེར་གྱི་ནད་བཅས་ལ་ཞིབ་འཇུག་བས་ནས་སྨན་སྦྱོར་གསར་པས་བཅོས་ཐབས་ཀྱི་ནུས་པ་ཐོན་གྱི་ཡོད་པ།  སྨན་རྫས་རིག་པའི་ཐོག་ཕྲ་མེན་གྱི་རྡོ་དང་།  ཁྱུང་སྐྱུགས་རིགས་ཀྱི་རྡོ།  རྡོ་ཞོའི་མེ་ཏོག  སྲོ་ལོ་དམར་པོའི་རིགས་ཀྱི་ལྡུམ་བུ་ལ་སོགས་པའི་སྨན་རྫས་གསར་པ་ཁག་གཅིག་ལ་ངོས་འཛིན་དང་ནད་ཐོག་ལ་བེད་སྤྱོད་ཐུབཀྱི་ཡོད་པས་མཚོན་གསོ་བ་རིག་པའི་གཞུད་ལུགས་ཞིབ་འཇུག་དང་ཁ་གསབ་བྱས་ཏེ་ཚན་རིག་དང་མཐུན་པའི་གོང་འཕེལ་གཏོང་བཞིན་ཡོད་ལ་འབྱུང་འགྱུར་ཡང་གསོ་རིག་གི་ནོར་བུའི་བང་མཛོད་ཆེན་པོ་སྤྱད་རྣ་རྫོགས་མཐའ་མེད་པ་འདི་ཉིད་མུ་མཐུད་རྒྱུན་ཆད་མེད་པར་སྔོག།འདོན་དང་།  ཞིབ་འཇུག  གོང་འཕེལ་གཏོང་དགོས་པ་ཞིག་ཡིན།
       
དེ་ལྟར་གང་གི་དོན་དུ་གསོ་བའམ་གསོ་བའི་གཞི་འགྲོ་བ་རྣམས་ཀྱི་ལུས་འདི་ནི་འབྱུང་བ་བཞི་ལས་གྲུབ་པ་ཞིག་ཡིན་པ་དང་།གསོ་བར་བྱ་བའི་ནད་རླུང་མཁྲིས་བད་ཀན་གསུམ་ནི་ནང་གི་འབྱུང་བ་ཡིན་ལ།  གང་གསོ་བར་བྱེད་པའི་གཉེན་པོའེ་སྨན་ཡང་འབྱུང་བ་བཞི་ལས་སྐྱེས་ཤིང་འབྱུང་བ་བཞིའི་རང་བཞིན་ཡིན་པས་ན་ལུསདང་།  ནད།  གཉེན་པོ་དང་བཅས་པ་འབྱུང་བ་བཞིའི་ངོ་བོ་བདག་ཉིད་གཅིག་ཏུ་འབྲེལ་བ་ཞིག་ཡིན།  དེ་བས་ན་འབྱུང་བ་དེ་དག་ཕན་ཚུན་སྐབས་སུ་གནོད་བྱ་གནོད་བྱེད་དུ་གྱུར་ནས་ལུས་ལ་བརྟེན་ནས་ནད་འབྱུང་རྒྱུ་ཡོད་པ་དང་།  ནད་བྱུང་བ་དེ་གཉེན་པོ་སྨན་ལ་བརྟེན་ནས་ཞི་བར་བྱེད་རྒྱུ་ཡོད་པ།  ནད་ཞི་ནས་ནད་མེད་བདེ་བར་གནས་རྒྱུ་ཡོད་པ་བཅས་ཚང་མ་འབྱུང་བཞིའི་ངོ་བོ་བདག་ཉིད་གཅིག་ཏུ་འབྲེལ་བའི་རྒྱུ་མཚན་དང་རྟེན་དང་བརྟིན་པའི་འབྲེལ་བ་ལས་བྱུང་བ་ཤ་སྟག་ཡིན། 

 རྡོ་འབུམ་དཔེ་འཕྲིན།  ནང་རིག་གཏེར་མཛོད། མཆོད་མེ་རྩོམ་རིག་དྲ་བ།   གེ་སར་ཞིབ་འཇུག  ན་གཞོན་གསར་བ།

Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060