སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
   མདུན་ཤོག    འཕྲིན་གསར།    གསུང་རབ།     བོད་སྐད་ཡིག      རྩོམ་རིག      སློབ་གསོ།    ཆོས་ལུགས།    གསོ་རིག    ལོ་རྒྱུས།     སྒྱུ་རྩལ།     དམངས་སྲོལ།    སྐར་རྩིས།    མཚན་ཉིད་རིག་པ།     དཔལ་འབྱོར།
   སྲིད་ཁྲིམས།     ས་རྒྱུས།     སྐྱེ་ཁམས།     ཞིང་ཕྱུགས།     ཕྱི་སྐད་སློབ་དེབ།    དཔྱད་རྩོམ།     ཚིག་མཛོད།     དུས་དེབ་དང་ཚགས་པར།     རྩོམ་པ་པོ།    དཔེ་མཛོད་ཁང་།     པར་སྐྲུན་ཁང་།     གཞན་དག
 
སངས་རྒྱས་ཆོས་ལུགས་པས་ཤ་ཆང་སྤྱོད་རུང་མི་རུང་གི་དོན་བཤད་པ།
སྤེལ་དུས། 2014-06-10   ཡོང་ཁུངས། ཀྲུང་གོའི་བོད་ཀྱི་སློབ་འབྲིང་དྲ་བ།   རྩོམ་པ་པོ།  དོར་ཞི།

      མི་ལ་རས་པའི་རྣམ་ཐར་ནང་དུ། མི་ལ་སྒོམ་སྒྲུབ་ལ་ཕེབས་ཁར། བླ་མ་མར་བས་དམ་སྦྱར་བྱས་པའི་གདམས་ངག་ཡི་གེ་གསུམ་གནང་ནས་དཀའ་འཁག་ཐུག་དུས་རིམ་པར་ཡིག་ཁ་ཕྱེ་ནས་ལྟོས་གསུང་ཞིང་། མི་ལས་ཟྭ་ཚོད་ཟོས་པས་ལུས་སྟོབས་ཇེ་ངན་དུ་སོང་ནས་ལུས་ཤ་སྐམ་ཞིང་ཤ་མདོག་ཀྱང་སྔོན་པོར་གྱུར་ནས་ཉམས་ལེན་ལ་བོགས་ཐོན་མ་བྱུང་བས། ཡིག་ཐུམ་དང་བོ་དེ་ཁ་ཕྱེ་ནས་བལྟས་ཚེ། ཉམས་ལེན་བོགས་ཐོན་མ་བྱུང་ན། ཤ་ཆང་བསྟེན་ནས་ལུས་སྟོབས་གསོ་དགོས། ཞེས་གསུང་བ་ལྟར་བེ་ཏ་མགོན་སྐྱིད་ཀྱིས་ཤ་ཆང་བསྐྱལ་འོངས་པ་བཞེས་པས་བོགས་བསྐྱེད་ཆེན་པོ་བྱུང་ཞེས་འབྱུང་། དེ་ཡང་རྩ་རླུང་སོགས་སྦྱངས་ན་ལུས་སྟོབས་རྒྱས་པའི་ཟས་བཅུད་ཅན་བསྟེན་དགོས་པས། སྔགས་བླ་མེད་ལ་ཤ་ཆང་མ་བཀག་པའི་སྟེང་ཤ་ལྔ་བདུད་རྩི་ལྔ་དང་ཆང་སོགས་དམ་ཚིག་གི་རྫས་སུ་བཞག རྒྱ་གར་གྲུབ་ཆེན་བརྒྱད་ཅུའི་ནང་གི་ལི་ཨུ་བ་ཉའི་རྒྱུ་མ་ཟ་པ་དང་། དཔལ་ལྡན་ཤ་པ་རི་རྔོན་པ་ཞིག་ཡིན་པ་ལྟ་བུ་རེད། དགེ་སློང་ཞེས་པ་ཡང་སློང་མོའི་ཟས་ལ་བརྟེན་པའི་དགེ་སྦྱོང་གི་དོན་རེད། ལྷུང་བཟེད་བཏེགས་ནས་ཟས་སློང་བ་ཡིན་པས། སྦྱིན་བདག་གིས་ཟས་གང་བྱིན་ན་དེ་ཟ་བ་ལས། ཟས་འདི་ཟ་དང་འདི་དགོས་ཞེས་འདེམས་པའི་དབང་ཆ་ཡོད་པ་མ་རེད། དེའི་གནད་ཀྱིས་ཆོས་འདུལ་བ་ལས་། ཟས་གོས་གནས་མལ་ངན་ངོན་ཙམ་གྱིས་ཆོག་ཤེས་པ་དང་། ཅི་རྙེད་པའི་ཟས་ལ་བསྟེན་པ་དང་། རྣམ་གསུམ་དག་པའི་ཤ་བཟའ་བར་གནང་། ཤ་ཟ་མི་ཆོག་འོ་མ་འཐུང་མི་ཆོག་ཅེས་དེ་སྟོན་པ་བཅོམ་ལྡན་འདས་ལ་ངོ་ཡ་བྱེད་པའི་ལྷས་སྦྱིན་གྱིས་ཁྲིམས་ལོག་བྱས་པ་རེད། རྒྱ་བརྒྱུད་ནང་བསྟན་ནང་དུ་ཤ་བཀག་པའི་ཁྲིམས་དེ་འདུལ་ཁྲིམས་མ་རེད། རྒྱ་རྒྱལ་ལྱིང་བུ་ཏིས་བཟོས་པའི་རྒྱལ་ཁྲིམས་ཤིག་རེད། རྒྱ་ནག་རྒྱལ་ཁབ་འདི་ནི་ཆོས་ཁྲིམས་ལས་རྒྱལ་ཁྲིམས་བཙན་པ་ཞིག་རེད། ལྱིང་བུ་ཏིས་ཞེས་པ་དེ་གཙུག་ལག་ཁང་བཞེངས་ཤིང་། རབ་བྱུང་མང་བོར་བསོད་སྙོམས་དྲངས་པ་དང་། རང་ཡང་རྒྱལ་སྲིད་སྤངས་ཏེ་རབ་བྱུང་ལན་གསུམ་བསྒྲུབ་པར་མཛད་ཅིང་། ཁོ་བོས་དགེ་བ་མང་དུ་བྱས་པ་འདི་དགེ་བར་སོང་ངམ་ཞེས་རྒྱ་གར་གྱི་སློབ་དཔོན་དྷརྨ་ཞེས་པར་དྲིས་པས། འདི་དོན་དམ་པའི་དགེ་བ་མིན་ཞེས་གསུངས། ཁོ་བོས་བལྟས་ན་ཡང་ངྷརྨའི་གསུངས་དེ་དོན་ལ་ཁེལ། རྒྱ་རྒྱལ་དེས་དགེ་བ་བྱས་པ་དེ་བདེན་འཛིན་གྱི་དབང་དུ་སོང་ཞིང་དམིགས་མེད་ཀྱིས་ཤེབ་རབ་གྱིས་མ་ཟིན་པའི་སྐྱོན་འདུག ཁ་ཅིག་ན་རེ། ཤ་ཟ་བ་ནི་སྙིང་རྗེ་མེད་པའི་རྟགས་རེད། ཤ་ཟོས་ན་བྱང་ཆུབ་ཀྱི་སེམས་མི་སྐྱེ་སོགས་ཟེར་རོ། སངས་རྒྱས་ཆོས་ལུགས་འདི། ཟས་སུ་ཤ་ཟ་ཞིང་། གོས་སུ་པགས་རིགས་གྱོན་པའི་བོད་ཁམས་མཐོ་སྒང་དུ་གནས་པའི་བོད་མི་རིགས་འདི་ལ་དར་ནས་མི་ལོ་སྟོང་དང་བཞི་བརྒྱ་ལྷག་སོང་ཞིང་། ལྷོ་རྒྱུད། རྒྱ་རྒྱུད། བོད་བརྒྱུད་ཅེས་འཛམ་གླིང་གི་ནང་བསྟན་རྒྱུད་པ་ཆེནཔོ་གསུམ་གྱི་ཡ་གྱལ་ཞིག་ཏུ་གྱུར། སྔོན་དང་ད་ལྟར་གྱི་མཁས་པ་ཆེན་པོ་དང་། གྲུབ་བརྙེས་ཀྱི་སྐྱེས་བུ། དད་པའི་གང་ཟག་ཀྱིས་མི་ཟིན་པ་ས་སྟེང་ཁྱབ་ནས་ཡོད། ཟས་སུ་ཤ་དང་གོས་སུ་པགས་རིགས་གྱོན་པའི་མཁས་གྲུབ་གྱི་སྐྱེས་ཆེན་དམ་པ་དེ་དག་ཚང་མ་ལ་སྙིང་རྗེ་དང་བྱམས་སེམས་མེད་པར་སྨྲར་ནུས་སམ། རངརེས་ཤ་ཆང་གི་ནང་མཆོད་འབུལ་ཡུལ་གྱི་ཡི་དམ། མཁའ་འགྲོ། ཆོས་སྐྱོང་དེ་དག་ཐམས་ཅད་སྙིང་རྗེ་མེད་པའི་ཕྱི་རོལ་པའི་ལྷ་ཡིན་ཞེས་སྨྲ་རྒྱུ་ཡིན་ནམ། ང་རང་དཀར་ཟས་བསྟེན་པ་ལ་ངོ་རྒོལ་བྱེད་རྒྱུ་མིན། མི་ཐམས་ཅད་ལ་ཟས་གང་བསྟེན་ཐད་ལ་རང་དབང་ཡོད། ངས་བསམ་ན་ཐོན་བསྐྱེད་ཀྱི་ཁྱད་ཆོས་དང་། འཚོ་བའི་འཁོར་ཡུག་གི་ཆ་རྐྱེན། ལུས་ཕུང་གི་ཁྱད་པར་སོགས་ལ་མ་བསྟུན་པར་མཐའ་གཅིག་ཏུ་དམར་ཟས་བཀག་པ་དང་། ལྷག་པར་དུ་འབྲོག་རིགས་མི་དམངས་ཀྱི་ཐོན་བསྐྱེད་དང་། འཚོ་བའི་གནས་བབས། དཔལ་འབྱོར་གྱི་འབྱུང་ཁུངས་སོགས་ལ་གནོད་པ་བྱུང་ན། སངས་རྒྱས་ཆོལ་ལུགས་ཀྱི་ཐབས་མཁས་སྤྱོད་པ་དང་ཤེབ་རབ་ཟབ་མོའི་ལྟ་བ་དང་འགལ་སྙམ་མོ།

 རྡོ་འབུམ་དཔེ་འཕྲིན།  ནང་རིག་གཏེར་མཛོད། མཆོད་མེ་རྩོམ་རིག་དྲ་བ།   གེ་སར་ཞིབ་འཇུག  ན་གཞོན་གསར་བ།

Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060