སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
གླིང་སྒྲུང་ནང་གི་བུད་མེད་ཀྱི་སྣང་བརྙན་དང་ཐོབ་ཐང་རྒྱན་གོས་སྐོར་རགས་ཙམ་གླེང་བ།
སྤེལ་དུས། 2012-05-14   ཡོང་ཁུངས། མཚོ་སྔོན་པོ་དྲ་བ།   རྩོམ་པ་པོ།  གཅོད་པ་དོན་གྲུབ་དང་སྙིང་བོ་ཚེ་རིང་།

   གླིང་སྒྲུང་ནང་གི་བུད་མེད་ཀྱི་སྣང་བརྙན་དང་ཐོབ་ཐང་རྒྱན་གོས་སྐོར་རགས་ཙམ་གླེང་བ།

     འཛམ་གླིང་བུ་མོའི་རྣ་རྒྱན་དུ་གྱུར་པའི་གླིང་གེ་སར་རྒྱལ་པོའི་སྒྲུང་ནི་རང་རེའི་ཁ་བའི་ལྗོངས་དང་།ལྷག་པར་དུ་ཀྲུང་ཧྭ་མི་རིགས་རིག་གནས་བང་མཛོད་ནང་གི་ཏོག་ལྟ་བུར་གྱུར་འདུག་པ་ཀུན་གྱིས་ཤེས་གསལ་ལྟར། རིན་ཐང་གཞལ་དུ་མེད་པའི་ཡིག་ཚང་ཆེན་མོ་འདི་ནི་གནའ་རབས་བོད་ཀྱི་རིག་གནས་དང་སྒྱུ་རྩལ། ཆབ་སྲིད་དང་དཔལ་འབྱོར།དམག་དོན་དང་ལོ་རྒྱུས།དམངས་སྲོལ་དང་ཆོས་ལུགས་བཅས་ཀྱི་བཙལ་ན་རྙེད་པར་དཀའ་བའི་གླེགས་བམ་གལ་ཆེན་ཞིག་ལགས།གཤམ་དུ་གླིང་སྒྲུང་ནང་གི་བུད་མེད་ཀྱི་སྣང་བརྙན་དང་ཐོབ་ཐང་རྒྱན་གོས་སྐོར་རགས་ཙམ་གླེང་བར་བྱའོ།

   དང་པོ། བུད་མེད་ཀྱི་སྣང་བརྙན་སྐོར་གླེང་བ།

   སྤྱིར་གཏམ་རྒྱུད་གང་ཡིན་རུང་གཙོ་བོ་མི་སྣའི་སྣང་བརྙན་གསར་བཞེངས་བྱེད་པ་ནི་རྩོམ་རིག་སྒྱུ་རྩལ་གྱི་རྡོག་རྩ་ལྟ་བུ་ཡིན།གླིང་སྒྲུང་ནང་དུ་དེ་འདྲའི་མི་སྣ་མང་པོ་ཞིག་ཞིབ་འབྲི་བགྱིས་པ་གསོན་ཉམས་ལྡན་པས་རྩོམ་རིག་སྒྱུ་རྩལ་གྱི་རིན་ཐང་ཡང་དེ་བས་གཞལ་དུ་མེད།དེའི་ནང་ནས་ཀྱང་སྣང་བརྙན་ཞིབ་འབྲི་རྩེར་སོན་འདུག་པ་ནི་བུད་མེད་ཀྱི་སྣང་བརྙན་སྐོར་ཡིན།བུད་མེད་དེ་ཚོའི་ནང་ནས་ཀྱང་སྣང་བརྙན་ཞིབ་འབྲི་རྩེར་སོན་འདུག་པ་ནི།གླིང་གེ་སར་རྒྱལ་པོའི་ཇ་མ་རྣམས་ཀྱི་ནང་ནས་ཆེས་མཛེས་པའི་སྒ་སྐྱ་ལོའི་སེང་ལྕམ་འབྲུག་མོ་ལགས།དཔེར་ན།ཧོར་གླིང་གཡུལ་འགྱེདདུ།དར་དཀར་འདྲ་བའི་ཤ་ལོ་གདའ།།དར་དམར་འདྲ་བའི་ཤ་བཀྲག་གདའ།།ཧོར་བ་ཁྲ་ཡི་སྤྱན་མིག་གདའ།།སྨུག་ཆུང་འཛིན་མའི་གཟི་མདངས་གདའ།།ཞེ་སྡང་སྦྲུལ་གྱི་ཨ་འབྲས་གདའ།།ཕར་འགྲོས་གོམ་པ་རྟ་བརྒྱ་གདའ།།དེ་མིན་རྟ་བརྒྱ་མི་རི་སྟེ།།མཁའ་འགྲོའི་གར་སྟབས་ཤིག་གེར་གདའ།།ཚུར་ཡོང་གོམ་པ་དྲེལ་བརྒྱ་རི།།དེ་མིན་དྲེལ་བརྒྱ་མི་རི་སྟེ།།རིག་འཛིན་རྩེ་བྲོ་ཤིགས་སེ་གདའ།།སྐྲ་ལོ་སྨུག་པོ་མཛོ་བརྒྱ་རི།།དེ་མིན་མཛོ་བརྒྱ་མི་རི་སྟེ།།དབུ་སྐྲ་ཉག་མ་རེ་རེ་ན།།ཤེལ་མུ་ཏིག་ཚོམ་བུ་ཤ་ལེར་གདའ།།མཆིལ་མ་གཡང་དཀར་ལུག་བརྒྱ་རི།།དེ་མིན་ལུག་བརྒྱ་མི་རི་སྟེ།།ལྗགས་ལ་ཨ་ཡིག་རང་བྱོན་གདའ།།ཞེས་པ་ལྟ་བུ་དང་།ཡང་།ཁྱོད་འདྲའི་ན་ཆུང་མཚར་མོ་ཞིག།བོད་མ་བརྒྱའི་རུམ་ནས་སྐྱེ་ཚུལ་མེད།།དེ་སྐྱེས་ཀྱང་ཁྱོད་འདྲ་འོང་ལུགས་མེད།།ཁྱོད་སྒྲོལ་མ་དཀར་མོའི་སྐྱེ་མཐའ་ཡིན།།ཁ་ཕར་འཁོར་སྐྲ་མཛེས་རྒྱན་ཡག་མ།།ཁ་ཚུར་འཁོར་འཇའ་རིས་མདངས་ལྡན་མ།།སྐྲ་གཡས་པ་གཡས་སུ་འཕངས་པ་ན།།རྒོད་ཐང་དཀར་གཤོག་པ་བརྐྱངས་པ་འདྲ།།སྐྲ་གཡོན་པ་གཡོན་དུ་འཕངས་པ་ན།།རྒོད་ཐང་སྨུག་གནམ་འཕང་གཅོད་པ་འདྲ།།མདུན་ཁ་དོག་སྣ་ལྔའི་རྒྱན་ཆ་དེ།།བྱ་རྨ་བྱས་སྒྲོ་གུར་ཕུབ་པ་འདྲ།།ཡར་ལངས་ན་རྒྱ་དར་འཕྱར་བ་འདྲ།།མར་བསྡད་ན་གུར་ཁང་ཕུབ་པ་འདྲ།།མདའ་ཉག་ཕྲན་ཞིག་ལ་ཅི་ཚང་བ།།ཁྱོད་སེང་ལྕམ་འབྲུག་མོར་ཚང་ནས་ཡོད།།བློ་རྣོ་བ་མདེའུ་ངར་མ་འདྲ།།ཁོག་ཡིད་སེམས་དྲང་བ་མདའ་མོ་འདྲ།།ཡིད་དྭངས་པ་མེ་ལོང་གཟུགས་བརྙན་འདྲ།།ཞེས་པ་སོགས་ཧ་ཅང་ཞིབ་ཚགས་ཀྱི་སྒོ་ནས་བོད་རིགས་བུད་མེད་ཞིག་གི་སྣང་བརྙན་རྩོམ་རིག་སྒྱུ་རྩལ་གྱི་ལམ་ནས་བརྗོད་དེ།ཕར་འགྲོས་གོམ་པ་རྟ་བརྒྱ།ཚུར་ཡོང་གོམ་པ་དྲེལ་བརྒྱ།སྐྲ་ལོ་སྨུག་པོ་མཛོ་བརྒྱ།མཆིལ་མ་གཡང་དཀར་ལུག་བརྒྱ།བློ་རྣོ་བ་མདེའུ་ངར་མ།ཁོག་ཡིད་སེམས་དྲང་བ་མདའ་མོ།ཡིད་དྭངས་པ་མེ་ལོང་གཟུགས་བརྙན་ལ་སོགས་པ་སྟེ།ཕྱིའི་རྣམ་པ་དང་ནང་ཀུན་སྤྱོད་ཞིབ་འབྲི་བགྱིས་ཡོད་པ་དེ་བོད་རིགས་རང་གི་བརྩམས་ཆོས་མ་གཏོགས་གཞན་ལས་འདི་འདྲའི་སྣང་བརྙན་ཉིན་མའི་སྐར་མ་བཞིན་དུ་ཧ་ཅང་དཀོན་པོ་འདུག་པས་གླིང་སྒྲུང་གི་མི་སྣ་སྒྲུབ་བཞེངས་ཀུན་ལས་ཏོག་ལྟ་བུའི་གོ་གནས་ངེས་ཅན་ཞིག་ཟིན་ཡོད་དོ།

   གླིང་གེ་སར་མཆོག་གི་ཇ་མ་བྱང་ཨ་སྟག་འཁྱིལ་བའི་ཀླུ་མོའམ་ལྷ་མོ་ནི།ཇ་མ་མིང་ཆེན་བཅུ་གསུམ་ལས་བྱས་རྗེས་ཆེས་ཆེ་བའི་བུད་མེད་ཅིག་ཡིན་ཞིང་།ཁོ་མོའི་མི་ཚེ་གང་བོར་མཐའ་གཅིག་ཏུ་གེ་སར་རྒྱལ་པོར་ཞབས་ཏོག་ལེགས་པར་བསྒྲུབས་ཏེ།རང་ནུས་ཡོད་ཚད་ནས་ཡོད་ཚད་གཞན་ཕན་གྱི་ཆེད་དུ་ཕུལ་བས།ཨ་སྟག་ལྷ་མོ་ནི་བོད་རིགས་དཔའ་མོའི་ཚབ་བྱེད་གཅིག་པུར་གྱུར་པ་དང་།གཡུལ་འགྱེད་དེ་འདྲ་མང་པོ་ཞིག་གི་ཁྲོད་དུ།མོ་རང་གི་ལོ་རྒྱུས་ཀྱི་སྣང་བརྙན་ནི་རྡོ་རིང་ཞིག་དང་མཚུངས་པར་ཀུན་གྱི་མིག་ལམ་དུ་ལྷང་ངེར་གནས་ལ།བསྐལ་བརྒྱ་མ་སྟོང་བར་དུ་བག་ཆགས་ཟབ་མོ་བཞག་ཡོད་པ་ཡིན་ནོ།།དཔེར་ན།ཧོར་གླིང་གཡུལ་འགྱེདདུ།གུར་ནག་པོ་མུན་པ་འཁྲིགས་འདྲ་ཞིག་གི་ནང་ནས།དཔའ་ཨ་སྟག་ལྷ་མོ་དེ།དཔའ་དྲུག་ཡིད་དུ་འོང་ཞིང་།ཆས་དྲུག་མིག་ལ་མཛེས་པ།མགོ་དར་འཕྲུ་གར་སྟབས་ལིང་ལིང་།ཁྲབ་དཀར་མོ་བྱང་ཕུད་ཉུལ་ཉུལ།སྐེད་འཁོར་གསུམ་འཁྲོལ་སྒྲ་སིལ་སིལ།རྟ་རག་པ་སྟག་ལག་གི་གོང་དུ་ཞོན་ཞིང་།ཟངས་གཞུ་དམར་པོ་འགུག་རིང་དེའི་ནང་དུ།ཟངས་མདའ་དམར་པོ་དུག་ལྕེ་དེ་བཞག་ནས།ཞེས་པ་དང་།དམྱལ་གླིང་མུན་པ་རང་གསལདུ།ནངས་སྔ་དྲོ་ཁྲ་ཡག་རྫ་ལ་སོང་།།འདིས་ལྕགས་གཞུ་བཀུག་ནས་ལྕགས་མདའ་འཕངས།།འབྲོང་བྲེ་སེར་མ་བུ་དགུ་བརྒྱ་བསད།།མགོ་རུ་ཐུར་ཤ་ལེ་ཐང་ལ་འཕངས།།དགོང་ཕྱི་དྲོ་འབྲོང་མོ་བསད་བསད་ནས།།རི་ཆེན་པོ་ཁྲག་གིས་དམར་པོ་བྱས།།མ་ཨ་སྟག་ལྷ་མོ་གར་སོང་ན།།བྱ་རྒོད་པོའི་གཤོག་རྩལ་ཉིལ་ལི་ལི།།སྤྱང་དར་མ་གཟན་རྒྱུག་ཐ་ར་ར།།ཉིན་གུང་ན་དམར་གཞུང་ལ་སོང་།།རྐྱང་ཁ་དཀར་མ་བུ་དགུ་བརྒྱ་བསད།།ན་ཆེན་པོའི་ཁ་དོག་ཁྲག་གིས་བསྒྱུར།།ས་བདེ་མོ་ཐམས་ཅན་ཤ་ཡིས་བཀང་།།ཁུག་གཤོང་གཤོང་ཐམས་ཅད་ཁྲག་གིས་བཀང་།།དགོང་ཕྱི་དྲོ་རྒྱ་མཚོའི་ཁ་ལ་སོང་།ལྕགས་ཀྱུ་སྣ་ཚོགས་སྐེད་ལ་བསྐོར།།ཉ་སྲམ་མང་པོའི་སྲོག་གཟན་བྱས།།ཆུ་རྒྱ་མཚོའི་ཁ་དོག་ཁྲག་གིས་བསྒྱུར།།རྒྱབ་འཁོར་གསུམ་ཁྲབ་རྨོག་མནབས་པའི་ཚེ།།གཟའ་ཁྱབ་འཇུག་ནག་པོ་ཁྲོས་པ་འདྲ།།སྡང་དགྲ་བོས་རིག་ན་བློ་སྙིང་འདར།།ཞེས་པ་སོགས་ལས་བུད་མེད་ཞིག་གི་སྙིང་སྟོབས་དང་གཟི་བརྗིད།བློ་སྤོབས།དྲང་བདེན་བཅས་རྟོགས་ནུས་ཏེ།སྐྱེས་ཕོ་རབ་ཀྱིས་བསྒྲུབ་མི་ནུས་པའི་དོན་མཐའ་དག་སྒྲུབ་ནུས་པས།བོད་རིགས་བརྩམས་ཆོསགླིང་སྒྲུངལས་མཐོང་བའི་བུད་མེད་དཔའ་མོའི་རང་གཤིས་འདི་ལྟ་བུ་བརྩམས་ཆོས་གཞན་ལས་ཉིན་མོའི་སྐར་མ་བཞིན་དུ་ཧ་ཅང་མཐོང་དཀོན་པོ་འདུག་ལ།འཇིག་རྟེན་གྲགས་པ་ལས་རིང་དུ་བརྒལ་དོན་ཡང་གཙོ་བོ་འདི་ལྟ་བུའི་གསོན་ཉམས་ལྡན་པའི་སྣང་བརྙན་ཞིབ་འབྲི་མང་བའི་རྐྱེན་གྱིས་ཡིན་པར་སྙམ་མོ།

   གླིང་གེ་སར་མཆོག་གི་ཇ་མ་ཧོར་དམར་ནག་བཅུ་གཉིས་ཀྱི་བདག་མོ་སྟེ་སྟོང་ཉིད་མགར་བཟའ་ཆོས་སྒྲོན་ནི་སྐྱེས་ས་ཧོར་ཡུལ་ཡིན་ཡང་བློ་སེམས་གླིང་དཀར་སྟོད་ལ་དཀར་ཞིང་སེང་ཆེན་རིན་པོ་ཆེ་ཡི་ཇ་མ་མིང་ཆེན་རྣམས་ཀྱི་ཡ་གྱལ་དུ་གྱུར་པ།གཤིས་རྒྱུད་འཇམ་ཞིང་ངང་རྒྱུད་བཟང་བ།ཕྲག་དོག་དང་འགྲན་སེམས་མེད་པ།སྤྱི་སེམས་ཆེ་ཞིང་སྒེར་སེམས་མེད་པ།ཧོར་དམར་ནག་བཅུ་གཉིས་ཀྱི་མཛེས་མ་རྣམས་ཀྱི་གྲས་ནས་གཙུག་རྒྱན་གྱི་ཅོད་པན་ལྟ་བུར་སྣང་བ་དེར་ཡང་།དཔེར་ན།ཧོར་གླིང་གཡུལ་འགྱེདདུ།མགར་ཆོས་དར་རྒྱལ་པོའི་སྲས་མོ་སྟོང་ཉིད་མགར་བཟའ་ཆོས་སྒྲོན།ལྷ་མོ་སྟོང་གི་སྤྲུལ་པ།མ་མཚོ་རྒྱལ་དཀར་མོའི་སྐྱེ་བ།མི་དགེ་སྤངས་པའི་དགེ་མ།དགེ་བཅུ་སྤྱོད་པའི་ཆོས་མ།སྤྲང་ཉམས་ཆུང་བརྒྱ་ཡི་ཕ་མ།ཆུ་མོ་ཕག་གི་ལོ་པ།དུང་ཟླ་དཀར་ལུ་འདྲ་བ།སྨིན་དྲུག་ཁྲ་མོའི་སྐྱོ་རོགས།ལུས་ལྡེམ་ལྡེམ་སྦ་དཀར་ཕུང་བོ།སྐྲ་ཤར་ཤར་རྒྱ་ལྕང་ལོ་མ།ཞལ་དཀར་དཀར་བཅོ་ལྔའི་ཟླ་བ།ཚེམས་འགྲིགས་འགྲིགས་དུང་སོ་རང་འགྲིགས།སྤྱན་ཁྲ་ཆུང་ནམ་མཁའི་སྐར་ཆེན།རྒྱན་བཏགས་ན་ནགས་ཀྱི་རྨ་བྱ།གསུང་བསྒྲགས་ན་དབྱར་ཁའི་ཁུ་བྱུག་ལྟ་བུ་ཞེས་དང་སྒོམ་ཆེན་རི་ཁྲོད་པ་རྣམས་ཀྱིས་མཐོང་ན་ཞལ་འཛུམ་འཆོར་ལེ།རྒྱ་ལམ་ནས་མགྲོན་པོ་རྣམས་ཀྱིས་མཐོང་ན་ཕྱི་མིག་བལྟ་ལེ།ཁྲི་ཁའི་བླ་མ་རྣམས་ཀྱིས་མཐོང་ན་སྤྱན་གཟུར་ལེ།གྲྭ་པ་དགེ་སློང་རྣམས་ཀྱིས་མཐོང་ན་ཡིད་སྨོན་འཆོར་ལེ།ཕོ་གསར་མགོ་ཆུང་གིས་མཐོང་ན་ཡིད་འཕྲོག་ལེ།སྟེང་ལྷ་མོ་བུ་མོ་འབུམ་ཕྲག་ཟིལ་གྱིས་གནོན་ལེ།སྐུ་ལུས་མདའ་ཉག་ཕྲན་སྒྲོ་བཞི་དང་འདྲ་བ་འོག་ཀླུ་མོ་འབུམ་ཕྲག་ཟིལ་གྱིས་གནོན་ལེ།གསུང་སྙན་གྱི་གླུ་བླངས་ན།སྒྲ་སྙན་པའི་པི་ཝང་དང་ནོར་ལེ།བར་དྲི་ཟའི་བུ་མོ་འབུམ་ཕྲག་ཟིལ་གྱིས་གནོན་པ་ཞིག་བྱས་ཤིང་།རྒྱབ་གོས་དམར་ནག་གསེར་འབྲུག་ཅན་གྱི་ན་བཟའ་ལ་ཝ་དམར་བྱུ་རུའི་གོང་བ་བསྐོར།གཡི་དཀར་དུང་གི་མདོག་ཅན་གྱིས་མཐའ་ཤན་བྱས།སྲམ་ནག་མཐིང་མདོག་ཅན་གྱིས་ཁ་ཆོན་བརྒྱབ།མུ་ཏིག་འཇའ་ཚོན་སྣ་ལྔའི་གློ་ཆ་བཏགས།གཡུ་བྱུ་རུ་མུ་མེན་ལ་སོགས་པས་སྐེ་རྒྱན་བྱས།དར་ལིང་ཁ་དོག་སྣ་ལྔའི་སྐ་རགས་བཅིངས།གསེར་ནག་གའུ་སུམ་སྒྲིག་སྐེ་ལ་བཏགས་པའི་ན་ཆུང་ཤིན་ཏུ་མཛེས་མ་དེས་བཟའ་བཏུང་རྣམས་ཁྱེར་ནས་ཡོང་བ་ན་ཞེས་བརྗོད་པ་སོགས་ལས་མི་སྣ་སྒྲུབ་བཞེངས་ཀྱི་ཐད་དུ་སྣང་བརྙན་ཟབ་མོ་ཞིག་བཞག་ཡོད་ཅིང་།བོད་རིགས་བརྩམས་ཆོས་ལས་བུད་མེད་ཀྱི་སྣང་བརྙན་རྩེར་སོན་འདུག་པ་མཚོན་ལ།དེ་ལྟ་བུ་ཡང་དཔེར་ན་ཞང་ཞུང་ཆོས་དབང་གྲགས་པའི་རཱ་མ་ཎའི་རྟོགས་བརྗོད་ལས།སྐྱེ་རྒུའི་རིག་སྔགས་མཁན་དེ་རྣམས།།སི་ཏཱའི་མིང་གི་བཟླས་བརྗོད་ཀྱིས།།འགྲམ་པ་རུས་པའི་འཕྲུལ་འཁོར་ནི།།དྲལ་བ་ནུ་མའི་ངོགས་སུ་འཕྱང་།།ཞེས་པ་སོགས་བོད་རིགས་རང་གིས་བསྐྲུན་པའི་མཛེས་མའི་སྣང་བརྙན་དུ་མའང་ཡོད་དོ།གླིང་གེ་སར་རྒྱལ་པོའི་སྒྲུང་ཕལ་ཆེར་གྱི་ནང་དུ་རྫོང་རེ་ཕབ་ན་ཁོང་ལ་ཇ་མ་རེ་ཐོབ་པ་ནི་ཧ་ཅང་རྒྱུན་འབྱམས་སུ་གྱུར་འདུག་ལ།སྐབས་དེར་ཐོབ་པའི་བུད་མེད་རྣམས་ཇ་མ་ཁོ་ན་ཞིག་གི་ཆེད་དུ་མིན་ལ་མི་རིགས་ཤིག་གམ་རྒྱལ་ཁབ་ཅིག་གི་ཆབ་སྲིད་ལ་རག་ལས་འདུག་པ་ཞིག་གོ།གནའ་བོའི་དུས་སུ་མཛའ་མཐུན་གྱི་ཆེད་དུ་བུ་མོ་སྟེར་བའི་ལུགས་སྲོལ་གང་མང་ཞིག་ཡོད་པ་དཔེར་ན།བོད་ཀྱི་རྒྱལ་པོ་སྲོང་བཙན་སྒམ་པོས་རྒྱའི་སྲས་མོ་ལྷ་གཅིག་ཀོང་ཇོ་ཁབ་ཏུ་བཞེས་པ།ཆོས་རྒྱལ་མེས་ཨོག་ཚོམ་གྱིས་གྱིམ་ཤིང་ཀོང་ཇོ་ཁབ་ཏུ་བཞེས་པ་ལ་སོགས་པའི་དཔེ་མཚོན་མང་པོ་ཞིག་ཡོད་ཀྱང་ཡིག་ཚོགས་མང་བར་དོགས་ནས་མ་བྲིས།འདིའི་སྐོར་ལ་སློབ་དཔོན་མར་ཁེ་སིས།དབང་སྒྱུར་གྲལ་རིམ་བར་གྱི་གཉེན་འབྲེལ་ནི་ཆབ་སྲིད་ཀྱི་དགོས་པ་ཁོ་ན་ཡིན་ཞེས་གསུངས་པ་ལྟར་གླིང་གེ་སར་རྒྱལ་པོ་རྟ་རྒྱུག་ལས་རྣམ་པར་རྒྱལ་ཏེ་མི་འཇིག་གསེར་ཁྲིར་མངའ་གསོལ་རྗེས།གླིང་དཀར་སྟོད་ནས་སེང་ལྕམ་འབྲུག་མོ་དང་མེ་བཟའ་འབུམ་སྐྱིད་གཉིས་ཁབ་ཏུ་བཞེས་ཤིང་།རིམ་བཞིན་ཕྱོགས་བཞི་དགྲ་བཞི་དང་རྫོང་ཆེན་བཅོ་བརྒྱད་ཕབ་པའི་འཕྲིན་ལས་རྒྱ་ཆེར་སྤེལ་ཏེ།ནག་པོ་བདུད་ནས་ཨ་སྟག་ལྷ་མོ།སེར་པོ་ཧོར་ནས་མགར་བཟའ་ཆོས་སྒྲོན།སྨུག་པོ་འཇང་ནས་ཤེལ་དཀར་རྒྱང་མཛེས།ཁ་ཤ་མོན་ནས་མེ་ཏོག་ལྷ་མཛེས་སོགས་མིང་དུ་གྲགས་པའི་ཇ་མ་མིང་ཆེན་བཅོ་བརྒྱད་བླངས་པར་གྲགས་སྐད།བུ་མོ་དེ་དག་ལས་ཀྱང་རེ་འགའ་དགྲ་བོ་འདུལ་བྱེད་ཀྱི་སྐུད་སྣེ་ལྟ་བུར་གྱུར་ཏེ།གེ་སར་གྱི་གཡུལ་འཐབ་གང་མང་ཞིག་གི་ཁྲོད་དུ་སུབ་ཐབས་དབེན་པའི་ལོ་རྒྱུས་ཀྱི་ཞབས་བརྟན་བཀོད་ཡོད།དཔེར་ན།མེ་བཟའ་བདུད་ཀྱིས་ཁྱེར་བ་ན་ཁོང་ཡར་ཁམས་བྱང་ལ་བྱོན་ནས་བདུད་ཀླུ་བཙན་རྒྱལ་པོར་ཐོད་མདའ་སྤྲད་པ་དང་ཨ་སྟག་ལྷ་མོ་གྲོགས་སུ་བཀུག་པ།འབྲུག་མོ་ཧོར་གྱིས་འཕྲོག་པས་ཁོང་ཡང་ཨ་ཆེན་ཧོར་ལ་བྱོན་ཏེ་གུར་དཀར་རྒྱལ་པོར་གཉའ་སྒ་བསྟད་པ་དང་མགར་བཟའ་ཆོས་སྒྲོན་གྲོགས་སུ་བཀུག་པ་སོགས་བུད་མེད་ཀྱི་སྣང་བརྙན་དང་བུད་མེད་ཀྱི་བྱས་རྗེས་གྲངས་ལས་འདས་པ་ཞིག་གླིང་སྒྲུང་གི་ནང་དུ་བཀོད་ཡོད་པ་ཀུན་གྱིས་ཤེས་གསལ་ལྟར་རོ།

 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:jiangbai@126.com
ཁ་པར།:010-58336716