སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
བོད་ཀྱི་གྲུབ་མཐའ་ཁག་གི་མིང་བྱུང་ཚུལ་སྐོར།
སྤེལ་དུས། 2014-09-28   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  རིན་ཆེན་གྱིས་བསྒྲིགས།

          དེ་ཡང་སྤྱི་ལོ་༨༤༡ཙམ་ལ་རྒྱལ་པོ་གླང་དར་མས་ཆོས་བསྣུབས་ཏེ་ལོ་ངོ་བརྒྱ་དང་སུམ་ཅུ་སོ་དྲུག་འདས་ཤིང་། བཙན་པོའི་གདུང་རབས་ཀྱིས་བོད་སྤྱི་ལ་དབང་བསྒྱུར་བའི་དུས་སྐབས་ཡོལ་ཏེ་བོད་སིལ་བུར་ཐོར། རྗེ་དཔོན་ཚན་པ་བཅུ་གཅིག་གིས་ས་ཁུལ་བཅད་བཟུང་དབང་སྒྱུར་བྱེད་པའི་དུས་སྐབས་ཏེ་སྤྱི་ལོ་༩༧༨ལོར་བླ་ཆེན་དགོངས་པ་རབ་གསལ་གྱི་སློབ་བརྒྱུད་དབུས་གཙང་གི་མཁས་པ་མི་བཅུ་(དབུས་པ་ཀླུ་མེས་ཚུལ་ཁྲིམས་ཤེས་རབ་)གཉལ་པ་འབྲིང་ཡེ་ཤེས་ཡོན་ཏན། སྦ་ཚུལ་ཁྲིམས་བློ་གྲོས། རག་ཤི་ཚུལ་ཁྲིམས་འབྱུང་གནས། སུམ་པ་ཡེ་ཤེས་བློ་གྲོས་དང་ལྔ། གཙང་ནས་ལོ་སྟོན་རྡོ་རྗེ་དབང་ཕྱུག ཤེས་རབ་སེང་གེ། མངའ་རིས་པ་འོ་བརྒྱད་སྤུན་གཉིས། བོ་དོང་བ་ཨུ་པ་དེ་དཀར་བ་དང་ལྔའོ)ཡི་ནང་ཚན་ཀླུ་མེས་ཀྱིས་ཀ་ཆུང་ལྷ་ཁང་བཟུང་། དབུས་སྟོད་ལ་མོར་ཆག་དེའུ་ལྷ་ཁང་བཏབ། དེའི་སློབ་མ་ཞང་སྣ་ནམ་རྡོ་རྗེ་དབང་ཕྱུག་གིས་འཕན་པོ་རྒྱལ་ལྷ་ཁང་བཞེངས། རྔོག་བྱང་ཆུབ་འབྱུང་གནས་ཀྱིས་ཡེར་པར་ལྷ་ཁང་བཞེངས། གླན་ཡེ་ཤེས་ཤེས་རབ་ཀྱིས་རྒྱ་གསར་སྒང་གི་ལྷ་ཁང་བཞེངས། རག་ཤི་ཚུལ་ཁྲིམས་འབྱུང་གནས་ཀྱིས་ཐང་པོ་ཆེར་ལྷ་ཁང་བཞེངས། དེ་བཞི་བོ་ལ་ཀླུ་མེས་ཀྱི་སློབ་མ་ཀ་ཆེན་བཞི་ཟེར་རོ། ཁོང་རྣམ་པས་སྔ་རྗེས་སུ་ལྷ་ཁང་བཞེངས་ཏེ་གནས་གཞི་བཟུང་བས་འདུལ་བ་སྨད་འདུལ་གྱི་ལུགས་རབ་བྱུང་གི་སྡེ་གསར་དུ་ཚུགས་སོ། མདོར་ན། རྒྱལ་པོ་གླང་དར་མས་བསྟན་པ་བསྣུབས་རྗེས་སླར་ཡང་བསྟན་པའི་མེ་རོ་སྟོད་སྨད་གཉིས་ལས་ལངས་ཏེ་རིམ་བཞིན་དབུས་སུ་གསོས་ཏེ་གཞི་ནང་པ་སངས་རྒྱས་པའི་ཆོས་ལུགས་ཡིན་པ་ལ་ཆོས་རྒྱུད་གྱི་ལྟ་གྲུབ་ཐུན་མོང་མ་ཡིན་པའི་གྲུབ་མཐའ་ཁག་སོ་སོར་བྱུང་བ་རྣམས་ཀྱིས་ཀྱང་རང་རང་གི་རྟེན་གཞི་བཙུགས་ཏེ་ཡུལ་དང་གནས་ཀྱི་མིང་དང་སྦྱར་བའི་ཆོས་ལུགས་ཀྱི་ཚོ་པ་མང་དུ་གྱེས་སོ།
         
གྲུབ་མཐའ་ཞེས་པ་ནི་རང་གི་བློ་ངོར་ལུང་རིགས་ཀྱིས་བསྒྲུབས་ནས་གྲུབ་པར་ཐག་བཅད་པའི་ལྟ་ཚུལ་ལམ་རིགས་པའི་གཞུང་ལུགས་ཤིག་ལ་བྱ་ཞིང་། སྤྱིར་ནང་པའི་གྲུབ་མཐའ་སྨྲ་བ་ནི་བཀའ་བསྡུ་བ་གསུམ་ནས་བཟུང་འགྲོལ་བྱེད་རྣམས་ཀྱིས་འཁོར་ལོ་གསུམ་གྱི་དགོངས་པ་སོ་སོར་བཀྲལ་བ་ལ་བརྟེན་ནས་བྱེ་མདོ་གཉིས་དང་། དབུ་སེམས་གཉིས་དང་བཅས་བཞིར་གྲངས་ངེས་པའོ། ཞེས་གྲགས་ལ། ད་ནི་བྱེ་བྲག་བརྗོད་པའི་བྱ་བའི་གཞི་སྟེ་བོད་ཀྱི་གྲུབ་མཐའ་སོ་སོའི་མིང་བྱུང་ཚུལ་མདོ་ཙམ་བརྗོད་པར་བྱའོ།

 
འབྲེལ་ཡོད་ནང་དོན།
 
 
Copyright @ China Tibet Online
འདིར་བཀོད་པའི་ཡིག་རིགས་དང་པར་རིས་རྣམས་ཀྱི་པར་དབང་བོད་ལྗོངས་ཆ་འཕྲིན་ལྟེ་གནས་ལ་དབང་བས་
ཕན་ཚུན་དབང་བཅོལ་དང་གྲོས་མོལ་མ་བྱས་གོང་སུ་ཞིག་གིས་ཀྱང་བཀོལ་སྤྱོད་བྱས་མི་ཆོག་པ་དགོངས་འཇགས་ཞུའོ།།

E-Mail:Tict@tibet.cn
ཁ་པར།:8610-58336060