སློབ་གསོ།         སྐད་ཡིག         རྩོམ་རིག        ཆོས་ལུགས།        སྒྱུ་རྩལ།        གསོ་རིག        དམངས་སྲོལ།        དཔེ་དེབ།         སྒྲ་བརྙན།        པར་མཛོད།         གློག་རྡུལ་དུས་དེབ།         དྲི་བ་འདོན་ས།       
 
 
བྲི་ལ་ནོར་སླ་བའི་ཡི་གེ་སྐོར་ཞིག་གི་འབྱུང་རྐྱེན།
སྤེལ་དུས། 2016-06-23   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་པ་པོ།  
  རིན་པོ་ཆེ་དེ་བསྲེགས་བཅད་བརྡར་བ་གནད་དུ་དེ་འདྲ་མ་ཐིངས་པས། མིང་དང་འགྲེལ་ལས། མིང་གཅིག་ལ་ཡིག་གཟུགས་མི་འདྲ་བ་གཉིས་རེ་དང་། མཐའ་ན་གསུམ་རེ་ཡང་བྲིས་སྣང་། རགས་བརྩིས་ལྟར་ན། ཉིས་བརྒྱ་ཉེ་བ་ཞིག་ཡོད་པ་ལས། གདམ་ང་དང་། སྡེབ་སྦྱོར་དུ་ཧ་ལམ་བཞི་ཆ་གཅིག་འགྲིག་པར་སྣང་ཡང་། སྒྲའི་ཞིབ་ཆ་མི་གཅིག་པའི་དབྱེ་བ་མ་ཕྱེད་པར་ཉ་ཉུང་མཉམ་བསྲེས་སུ་གྱུར་པའི་མ་དག་པ་བཞི་ཆ་གསུམ་སྣང་། དེ་རྣམས་ལས་ཉེར་མཁོ་ཆེ་ཞིང་། བྲི་ལ་ནོར་སླ་བའི་ཐ་སྙད་སྐོར་ཞིག་དག་པ་སྔ་མ་དང་། མ་དག་པ་ཕྱི་མར་བཀོད་ཅིང་། ནོར་སོ་གཙོ་བོ་བརྒྱད་དུ་དྲིལ་ནས་དཔེ་དྲངས་ན། དང་བོ། མིང་གཞི་ནོར་བ། མིང་གཞིའི་སྒྲ་དེ་གནས་གང་ལས་འབྱུང་ཞིང་།བྱེད་པ་གང་གིས་བསྐྱེད་པ། རྩོལ་བ་དྲག་ཞན་བར་མ་ཇི་འདྲ་ཡིན་པ་མ་བརྟགས་པར། སྒྲ་སྤྱི་འདྲ་བ་ཙམ་ལ་བརྟེན་ནས། དེ་དག་གི་ཞིབ་ཆ་མི་གཅིག་སའི་དབྱེ་བ་མ་ཕྱེད་པར། དག་མ་དག་གཉིས་གསུམ་རེ་བྲིས་བྱུང་བ་རེད། དཔེར་ན། ཁང་བའི་ལྕམ་ཤིང་ལ་ཕྱམ་དང་། ཁྱམ་གཉིས་བྲིས་པ། སྔ་མ་འགྲིག་ལ་ཕྱི་མ་འཕྱུགས་སྣང་། འདི་གཉིས་ཀའི་སྒྲ་སྤྱི་མཆུ་བཙུམས་པ་འདྲ་སྟེ། རྗེས་འཇུག་མ་ཡིག་ཡིན་པའི་ཕྱིར། ཞིབ་ཆ་མི་གཅིག་སྟེ། སྔ་མ་མཆུ་དང་། ཕྱི་མ་མགྲིན་པ་ལས་བྱུང་བ་ཡིན་ནོ། ། དེ་བཞིན་དུ། མཐའ་ཡས་པ་ལ་འབྱམས་ཀླས་པ་དང་འཇམ་ཀླས་པ། དུས་རེ་ཞིག་བཟའ་བཏུང་མི་སྤྱོད་པའི་ཆོས་ཀྱིས་དཀའ་ཐུབ་ལ་བསྙུང་གནས་དང་སྨྱུང་གནས་དང་བསྙེན་གནས། སྤྱང་བོ་ལ་གྲུང་བོ་དང་དྲུང་བོ། ལམ་རྒྱགས་ལ་བྲོ་དང་དྲོ། བཟོ་བྱེད་མཐུ་ལྡན་ལ་འཕྲུལ་འཁོར་དང་འཁྲུལ་འཁོར། འགལ་བ་འདུམ་པར་བྱེད་པ་ལ་སྡུམ་པ་དང་ཟླུམ་པ། ནོར་བ་ལ་འཕྱུགས་པ་དང་འཆུགས་པ། དབང་འབྱོར་བ་ལ་ཀློང་དུ་གྱུར་པ་དང་རློང་དུ་གྱུར་པ། ཡི་གེ་འབྲི་བྱེད་ལ་སྨྱུ་གུ་དང་སྙུ་གུ་ལྟ་བུ་སོགས་ལས་སྔ་མ་དག་པ་དང་། ཕྱི་མ་མ་དག་པའོ། །གཉིས་པ། མགོ་ཅན་དང་མགོ་ཅན་ཡིན་མིན་ནོར་བ། མགོ་ཅན་གསུམ་ལས། ར་མགོ་ལྕེ་རྩེ་འདར་བ་དང་། ། ལ་མགོ་ལྕེ་སླད་རྒྱ་ཡངས་བསྐྱེད། ། ས་མགོ་སོ་ཡི་བར་ནས་དབྱུང་། །ཞེས་པའི་གནད་མ་ཟིན་པ་དང་། མགོ་ཅན་གྱི་སྒྲ་ལྕི་བ་དང་།མགོ་མེད་ཀྱི་སྒྲ་ཡང་བའི་ཁྱད་པར་མ་ཕྱེད་པར། དག་མ་དག་གཉིས་བྲིས་བྱུང་བ་རེད། དཔེར་ན། སྨྲ་བ་ལ་སྨེད་པ་དང་རྨེད་པ་གཉིས་བྲིས་སྣང་། སྔ་མ་འགྲིག་ལ་ཕྱི་མ་མི་འགྲིག་སྟེ། སྒྲ་སོ་སྲུབས་ལས་རླུང་ཕུད་པ་དང་། ལྕེ་རྩེ་འདར་བ་ལས་བྱུང་བའི་ཁྱད་མ་ཕྱེད་པའི་ལན་ཡིན། ལས་རོགས་ལ་ལག་པོད་དང་ལག་སྤོད་གཉིས་བྲིས་པ་ལས།  སྔ་མ་འགྲིག་ལ་ཕྱི་མ་མི་འགྲིག་སྟེ། པོད་སྒྲ་དྲག་པ་ཙམ་ལས་ལྕི་ཆ་མེད་པ་དང་། སྤོད་སྒྲ་ལྕི་ཞིང་དྲག་པའི་ཁྱད་པར་མ་ཕྱེད་པའི་ལན་ཡིན། དེ་བཞིན། སྟ་གོན་ལ་ལག་སྡོག་དང་ལག་རྡོག དབྱིབས་ཟླུམ་པོ་ལེབ་མོ་ལ་ཀོར་ཀོར་དང་སྐོར་སྐོར། འོད་འཁྱིམས་ལ་འོད་ཀོར་དང་འོད་སྐོར། སྤྲང་པོ་ལ་མུ་ཏོ་བ་དང་མུ་ལྟོ་བ། ཕྲུ་སློག་པ་ལ་རྨོ་རྨོད་པ་དང་རྨོ་མོད་པ་ལྟ་བུ་སོགས་ཀྱི་སྔ་མ་དག་པ་དང་། ཕྱི་མ་མ་དག་པའོ། །
གསུམ། སྔོན་འཇུག་ད་དང་མགོ་འཇོག་ནོར་བ།
     སྔོན་འཇུག་ད་ལྕེ་རྩེའི་བྱེད་པས་བསྐྱེད་ཅིང་། མིང་གཞི་དང་སྦྱར་ནས་མྱུར་དུ་ཀློག་ཚེ།རླུང་གིས་བསྐྱོད་པ་ལས་ལྕེ་རྩེ་ཅུང་ཟད་འདར་བར་གྱུར་པས། ར་མགོའི་སྒྲ་དང་ཆེས་མཚུངས་པའི་དབང་གིས། སྒྲ་འདི་གཉིས་ཕན་ཚུན་ནོར་སླ་ཞིང་། ལ་མགོ་དང་ས་མགོ་ཡང་སྒྲ་ལྕེ་རྩེ་དང་། ལྕེ་རྩེ་དང་ཉེ་བའི་ཆ་དང་ལྡན་པས་ན། སྔོན་འཇུག་ད་དང་ནོར་སླ། དེ་ཕྱིར་འདི་རིགས་ལས་གདམ་ང་ཅན་དུ་འཁྲུལ་བ་མང་ངོ་། ། དགའ་དྲགས་པ་ལ་དགོད་པ་དང་རྒོད་པ་གང་རུང་བྲིས་པ། སྔ་མའི་དས་འཕུལ་དང་།ཕྱི་མའི་ར་མགོའི་གྲགས་ཚུལ་འདྲ་བར་གྱུར་ནས་གདམ་ངའི་ཚུལ་དུ་གྱུར་ཀྱང་། གདམ་ང་མ་ཡིན་ཏེ། དུས་ཀྱི་རྣམ་བཞག་ལས། དགོད་ནི་ད་ལྟ་བ་དང་སྐུལ་ཚིག་ཡིན་པ་དང་།མ་འོངས་པ་ལ་དགད་དང་། འདས་པ་ལ་བགད་ཡིན་པ་ལས། ར་མགོ་མེད་པས་གསལ། དེ་བཞིན། བཟའ་ཟླའི་ལྕམ་སྲིང་ལ་སྙིད་མོ་དང་གཉིད་མོ།བོངས་དང་ལྗིད་ཆེ་བ་ལ་རྡོས་བཅས་དང་གདོས་བཅས། རིག་པ་གསལ་བོ་མ་ཡིན་པ་ལ་དམུན་པ་དང་རྨུན་པ་དང་སྨུན་པ། རིགས་ངན་ལ་དམེ་ཤ་ཅན་དང་རྨེ་ཤ་ཅན་དང་སྨེ་ཤ་ཅན། ནམ་མཁར་འགྲོ་བའི་ཕྱག་ཐག་ལ་རྨུ་ཐག་དང་དམུ་ཐག གལ་བོ་ཆེ་ལ་གཙིགས་ཆེ་བ་དང་རྩིགས་ཆེ་བ། མ་བསྲེགས་ཐལ་བ་ལ་ཕ་བ་ལྒོ་ལྒོ་དང་ཕ་བ་དགོ་དགོ་དང་ཕ་བ་རྒོ་རྒོ། ར་མ་འདྲ་བའི་རི་དྭགས་ཤིག་ལ་རྒོ་བ་དང་དགོ་བ། ཟས་སོགས་བལྡད་པ་ལ་དམུར་བ་དང་རྨུར་བ་ལྟ་བུ་སོགས་ཀྱི་སྔ་མ་དག་ལ་ཕྱི་མ་མ་དག་པའོ། ། བཞི་བ། སྔོན་འཇུག་ཡོད་མེད་ནོར་བ།
བས་འཕུལ་སོ་མཆུ་རེག་པ་ལས། ། གས་འཕུལ་གྲེ་བའི་ཕུགས་ནས་དབྱུང་། ། དས་འཕུལ་ལྕེ་རྩེ་སློད་པ་ལས། ། བ་ཕྱེ་མ་བཙུམས་གཉིས་ཀ་སྣ། ། འཕུལ་ཟུར་ཆག་ན་འཕུལ་མེད་འདྲའོ། ། བྲི་བྱའི་མིང་དེར་འཕུལ་སྒྲ་ཡོད་མེད་དང་། ཡོད་ན་གང་ཡིན་པ་མ་བརྟགས་ན། ནོར་འཁྲུལ་འབྱུང་སླ། དཔེར་ན། ཉམ་ཐག་པ་ལ་ཀོས་ཐག་པ་དང་། དཀོས་ཐག་པ་གཉིས་བྲིས་སྣང་། བརྗོད་ངག་ཏུ་ཀོས་ཞེས་སྒྲ་དྲག་པ་ཙམ་ལས། ཐོག་མར་ལྕེ་རྩེ་སློད་པའི་སྒྲ་ཟུར་འབྱུང་རྒྱུ་མེད་པས་གསལ། དེ་བཞིན། དཔེ་ཆ་མང་བོའི་མཚན་བྱང་ཅིག་ཅར་འཁོད་པའི་མིང་ལ་དཀར་ཆག་དང་ཀར་ཆག ལོག་བཤད་ལྟ་བུ་ལ་ཀྱོག་བཤད་དང་བཀྱོག་བཤད། སླད་མར་ལ་རྗེས་སོར་དང་རྗེས་གསོར། མིའི་གཟུགས་ལྟ་བུར་བཀོད་པའི་སྲུང་བྱེད་ལ་ཐོ་ཡོར་དང་མཐོ་ཡོར།དཔྱིད་ཀྱི་ཕོ་ཉ་ལ་ཁུ་བྱུག་དང་ཁུ་དབྱུག བྲེལ་བ་མེད་པ་ལ་སོས་དལ་དང་སོས་གདལ། ལུགས་རྙིང་གི་ཚེས་པ་སུམ་ཅུ་ལ་ནམ་གང་དང་གནམ་གང་། ཉན་རྣ་ལ་འོན་སངས་དང་འོན་གསེང་། བཟོད་པའམ་བསམ་པ་ལ་བརྣགས་པ་དང་མནགས་པ་ལྟ་བུ་སོགས་ཀྱི་ཕྱི་མ་ནོར་རོ། །ལྔ་བ། སྔོན་འཇུག་ནོར་བ། སྔོན་འཇུག་མ་དང་འ་གཉིས་ལ་སྣ་སྒྲ་ལྡན་པས། མཆུ་དབྱེ་བཙུམ་གྱི་ཁྱད་པར་མ་ཕྱེད་ན་ནོར་སླ། སྔོན་འཇུག་ག་ད་བ་གསུམ་གྱི་སྒྲ་ལྕི་བས། སོ་སོའི་བྱེ་རྩོལ་གྱི་དབྱེ་བ་རྣམ་པར་མ་ཕྱེད་ན་ཡང་ནོར་སླའོ། ། དབུ་མཛད་ལ་མགོ་འདྲེན་དང་འགོ་འདྲེན་འབྲི་ཚུལ་གཉིས་བྱུང་བ་ནི། མཆུ་འབྱེད་འཛུམ་གྱི་དབྱེ་བ་མ་ཕྱེད་པར།སྒྲ་ཡང་ཞིང་སྣ་ནས་རླུང་འགྲོ་བའི་ཆ་ནས་ཉ་ཉུང་མཉམ་བསྲེས་སུ་གྱུར་པ་རེད། དག་ཡིག་ལ་ལར།ལུས་ཀྱི་མགོ་ནི་མ་མགོ་ལ། ། དུས་ཀྱི་འགོ་ནི་འ་འགོ་ཡིན། །ཞེས་པ་བདེན་པར་མ་མཐོང་སྟེ། ཡན་ལག་ལྔ་བོ་ལས་མཆོག་ཏུ་གྱུར་པ་མགོ་ཡིན་པར་དཔེ་བླངས་ནས། ཚོགས་པའི་གཙོ་བོ་ལ་མགོ་བ་དང་། སེམས་ཅན་ཀུན་གྱི་སྐྱབས་མཆོག་ལ་མགོན་པོ་ཞེས་པ། དེ་མ་ཟད་མགོ་ཡི་ཞེས་ས་ལ་དབུ་དང་། མགོ་འདྲེན་ལ་ཞེ་ས་སྦྱར་ན་དབུ་འདྲེན་ཟེར་བ་མ་ཡིན་ནམ། དེས་ན་མགོ་ནི་དངོས་པོའི་མིང་དང་། འགོ་ནི་བྱ་བའི་མིང་སྟེ། འབྱར་བའི་དོན་ཡིན་པས། འགོ་འདྲེན་ལྟར་བྲིས་པ་མ་དག་པའོ། ། ང་རྒྱལ་གཅོག་པར་གཅོམ་སྐྱང་བ་དང་། གཅོམ་སྐྱུང་བ་བྲིས་པ་གཉིས་ལས། གས་འཕུལ་མགྲིན་པ་དང་ལྕེ་རྩ་ལས་བྱུང་བ་དང་།བས་འཕུལ་མཆུ་ལས་བྱུང་བའི་ཁྱད་པར་ཤེས་ན། བརྡ་སྦྱོར་བའི་སྒྲ་ལྟར་སྔ་མ་འགྲིག་པར་འཛིན་ནོ། ། དེ་བཞིན། ལུས་ཁམས་དྭངས་པར་བྱེད་པ་ལ་ཁམས་བསང་དང་ཁམས་གསེང་། སྐེ་འཁྱོག་ལ་འཇིང་ཡོན་དང་འཇིང་ཡོན། ངོ་ཐུག་པར་ཞལ་མཇལ་བ་དང་ཞལ་འཇལ་བ། དྲིན་ལན་འཇལ་བ་ལ་དྲིན་གཟོ་བ་དང་དྲིན་བཟོ་བ། ཁ་འཆམ་པ་ལ་མཐུན་པ་དང་འཐུན་པ། སྨད་འཚོང་མ་ལ་འཇུད་མཐུན་མ་དང་མཇུད་འཐུན་མ། ངལ་བ་ལ་མཉེལ་བ་དང་གཉེལ་བ། ཕྱུགས་འཚོ་བའི་རུ་གནས་ལ་མཚེར་ས་དང་འཚེར་ས་ལྟ་བུ་སོགས་ཀྱི་སྔ་མ་དག་པ་དང་། ཕྱི་མ་ནོར་བའོ། །དྲུག་པ། ཡང་འཇུག་ཡོད་མེད་ནོར་བ། སྤྱིར་ཡང་འཇུག་ཕོ་ཡིག་ཡིན་པས། སྒྲ་དམ་ཞིང་དྲག་པར་འདོན་པ་དང་། རྗེས་འཇུག་ཙམ་ནི་ཡང་འཇུག་ལས་སྒྲ་ཅུང་ཟད་ཞན་པར་འདོན་པ་ཡིན་མོད། དེང་། ཡང་འཇུག་གི་སྒྲ་ཟུར་ཧ་ལམ་ཉམས་ཀྱང་། སྒྲ་གཅིག་མིང་དོན་མི་གཅིག་པའི་འབྱེད་བྱེད་ཡང་འཇུག་ཡོད་མེད་ཡིན་པས། དོན་ལ་མ་བརྟགས་ན་ནོར་སླ། དཔེར་ན། གནའ་བོ་ལ་ཡ་ཐོག་དང་ཡ་ཐོགས་གཉིས་བྲིས་སྣང་། ཐོག་འོག་ཐོག་མཐའི་དང་ཐོག་ལ་ས་མཐའ་མེད་པས། སྔ་མ་འགྲིགསྲིད་འཛིན་ལས་ཁུངས་ཚུགས་ཡོད་ས་ལ་གཞུང་ས་ལས། གཞུང་སར་བྲིས་པ་ནོར་སོང་། དེ་བཞིན། ཆུ་གཙུབ་པའི་མིང་ལ་ཆག་ཆག་དང་ཆགས་ཆགས། ཁང་མིག་ལ་ཤག་ཆུང་དང་ཤགས་ཆུང་། བཙུན་པའི་སྨད་གོས་ལ་ཤམ་ཐབས་དང་ཤམ་ཐབ། གཡོ་སྐོལ་བྱེད་སྤྱད་ལ་སླ་ང་དང་སླང་ང་། ཁོག་དྲང་བ་ལ་གཞུང་བཟང་བ་དང་གཞུངས་བཟང་བ། ཕན་པའི་གྲོགས་ལ་སྟོངས་གྲོགས་དང་སྟོང་གྲོགས་ལྟ་བུ་སོགས་ཀྱི་སྔ་མ་དག་པ་དང་། ཕྱི་མ་ནོར་བའོ། །བདུན་པ། དབྱངས་ཡིག་ནོར་བ། དབྱངས་ཀྱི་ང་རོ་ལྔ་ལས། ཨ་ནི་དྲང་བ་སྟེ། སྒྲ་མཉམ་པར་བྱས་ནས་འདོན་པ་དང་། གུག་གུ་ནི་བཀུག་པ་སྟེ། སྒྲ་སྤྱི་བོའི་ཆ་ནས་གུག་པར་བྱས་ནས་འདོན་པ་དང་། ཞབས་ཀྱུ་ནི་སྨད་པ་སྟེ། སྒྲ་འཕང་མར་ལ་ཕབ་ནས་འདོན་པ་དང་།འགྲེང་བུ་ནི་སྒྲེང་བ་སྟེ། སྒྲ་གྱེན་ལ་བཀྱགས་ནས་འདོན་པ་དང་། ན་རོ་ནི་བསྟོད་པ་སྟེ། སྒྲ་འཕང་མཐོན་པོར་བྱས་ནས་འདོན་པ་བཅས་ཀྱི་ཁྱད་པར་ལེགས་པར་མ་ཕྱེད་པའི་རྐྱེན་གྱིས་ནོར་བ་ཡིན། བཀལ་བའི་ད་ལྟ་བ་ལ་ཁལ་འགེལ་བ་དང་། ཁལ་འགལ་བ་འབྲི་ཚུལ་གཉིས་བྱུང་བ་ལས།འགལ་ནི་འགྲེང་བུའི་སྒྲའི་ཟུར་ཆག་པའི་སྐྱོན་ཡིན། དེ་བཞིན། ཁ་ཟས་ལ་ཞལ་ཚུས་དང་ཞལ་འཚུས་དང་ཞལ་ཚོས། ཁྲལ་གྱི་གཡོག་ཏུ་བཀོལ་བ་ལ་ཁྲལ་འཁོལ་བ་དང་ཁྲལ་འཁུལ་བ། དེ་རིང་ཡན་གྱི་ཉིན་བཞི་བ་ལ་གཞེས་ཉིན་དང་གཞིས་ཉིན། ཤ་རིད་པ་ལ་རྗུད་པ་དང་། རྗིད་པ། ངེས་པར་བརྟན་པ་ལ་རག་ལས་པ་དང་རག་ལུས་པ། རྒྱུན་དུ་སྔོ་བའི་ཤིང་ཚིགས་མ་ཅན་ལ་སྨྱུག་མ་དང་སྨྱིག་མ། གྱོལ་བོ་ལ་འཇོན་ཐེང་མ་དང་འཇོན་ཐིང་མ་ལྟ་བུ་སོགས་ཀྱི་ཕྱི་མ་ནོར་རོ། །བརྒྱད་པ། གདངས་མཐུན་ནོར་བ།བོད་སྐད་དུ་ཐ་སྙད་མང་བོ་ཞིག་གི་ཚེག་ཁྱིམ་ཕན་ཚུན་གྱི་སྒྲ་གདངས་འགང་མི་གཅིག་ཀྱང་། བྱེད་རྩོལ་གྱི་ཤན་ཕན་ཚུན་ཞུགས་ནས། སྒྲ་གདངས་མཐུན་པར་གྱུར་པའི་དཔེ་ཡོད། དེ་ལུགས་མ་ཤེས་པར། སྒྲ་ཟུར་ཆག་པ་ལྟར་བྲིས་ནས་ནོར་བ་ཡིན། འོ་མ་བསྲུབས་ནས་མར་བླངས་ཤུལ་གྱི་གཤེར་ཁུ་ལ་དར་བ་ཟེར་མོད། མྱུར་དུ་ཀློག་ཚེ། སྔ་མའི་ར་སྒྲ་ཕྱི་མར་ཞུགས་ནས། བ་སྒྲ་ཉམས་པ་ལྟར། ད་ར་ཞེས་བྲིས་པ་ནོར་རོ། ། དེ་བཞིན། མིག་ལོང་བ་ལ་ཞར་བ་དང་ཞར་ར་དང་ཞ་ར། ཕྱེའི་གོར་བ་ལ་འཁུར་བ་དང་ཁུ་ར།གཉིད་ལོག་པའི་ཧར་སྒྲ་ལ་སྔུར་བ་དང་ངུར་བ་དང་ངུ་ར། རྩྭ་སར་གནོད་པའི་བྱི་བ་ལ་ཨ་བྲ་དང་ཨབ་ར། ཕྱུགས་ཀྱི་སྤུ་གྲ་ལས་འཇམ་པ་ལ་ཁུལ་དང་ཁུ་ལུ། རྨ་ཆུ་རྫོང་གི་འབྲོག་རུ་ཞིག་ལ་ཆུ་ཁ་མ་དང་ཆི་ཝ་མ། འོ་མའི་ཕྱུར་བ་ལ། ཆུར་བ་དང་ཆུ་ར།རྟའི་ཐོར་བུ(ཐོར་མོ)ལ་ཐོ་རུ་དང(ཐོར་མོ)། སྒྲ་སྣ་ཚོགས་འདྲེས་ནས་གྲགས་པ་ལ་འར་འུར་དང་འ་འུར་ལྟ་བུ་སོགས་ཀྱི་ཕྱི་མ་ནོར་རོ། །
     གོང་གསལ་གྱི་ནོར་སོ་བརྒྱད་ནི། གཙོ་བོ་ཡི་གེའི་སྦྱོར་བ་སྐད་ཀྱི་གདངས་ལྟར་སྒྲ་ཟུར་ལེགས་པར་ཐོན་མ་ཐོན་ལ་རག་ལས་པ་ཡིན་མོད། དོན་གྱི་ངོ་བོ་གཅིག་མི་གཅིག་ལ་ངེས་ཤེས་འདྲེན་པའང་གལ་ཆེ། དཔེར་ན། གྲངས་ཉུང་བ་ཞིག་ལ་འགའ་དང་ཁ་ཤས་གང་སྦྱར་འཐུས་ཀྱང་། འགའ་ཤས་ཟེར་ནས་བརྡ་གཉིས་གཅིག་ཏུ་བསྲེས་ཚུལ་མེད་དོ། །
     མདོག་དང་ཁ་དོག་དོན་གཅིག་པར་སྣང་ཡང་།རིམ་པ་ལྟར་འཇུག་ཡུལ་ལ་ཁྱབ་ཆེ་ཆུང་ཡོད་པར་མ་ཟད། སྦྱར་བྱུང་དང་རང་བྱུང་གི་ཁྱད་པར་ཡང་ཡོད་དེ། བལ་བོའི་སིལ་ཏོག་མ་ཟོས་ཀྱང་། ། ཁ་དོག་ཉིད་ལས་བྲོ་བ་ཤེས། །ཞེས་དང་། རས་མདོག་དམར་བོར་བྱས་བྱུང་།ཞེས་པ་ལྟ་བུ། མདོག་དང་ཁ་དོག་གི་དབྱེ་བ་མ་བལྟས་པར། ཁ་མདོག་ཅེས་པ་མི་འགྲིག་གོ །
     འགྲོན་པོ་དང་མགྲོན་པོ། སྒྲ་སྤྱི་འདྲ་ཡང་དོན་ལ་ཁྱད་ཆེ། བྱ་བའི་མིང་། འགྲོ། ཞེས་པར་རྗེས་འཇུག་ན་སྦྱར་ན། དངོས་པོའི་མིང་དུ་གྱུར་པས། ལམ་འགྲོ་ལ་འགྲོན་པོ་ཟེར། སྟོན་མོར་གདན་དྲངས་པའི་མི་ལ་མགྲོན་པོ་ཟེར། དེས་ན་འགྲུལ་བ་ཕར་འགྲོ་ཚུར་འགྲོའི་འདུག་ས་ལ་འགྲོན་ཁང་ལས། མགྲོན་ཁང་ཞེས་པ་ནོར་རོ། །
     ཐོག་མཐའ་བར་གསུམ་གྱི་མཐའ་མ་དང་། རབ་འབྲིང་ཐ་གསུམ་གྱི་ཐ་མ་གཉིས། ཁྱད་མེད་དུ་བྲིས་པ་མི་འགྲིག་སྟེ། དབུས་མཐའ་དང་། ཐ་ཆད། ཅེས་པས་གསལ།
     སྡོངས་གྲོགས་དང་སྟོངས་གྲོགས་གཉིས་ལའང་ཁྱད་པར་ཡོད་དེ། འགྲོགས་པའི་གྲོགས་ལ་སྡོངས་གྲོགས་དང་། ཕན་པའི་གྲོགས་ལ་སྟོངས་གྲོགས་ཟེར། འཇུག་ཡུལ་ལ་མ་བལྟོས་པར་གང་རུང་དུ་སྦྱར་མི་རུང་ངོ་། །
     མདོངས་དང་ལྡོངས་གཉིས་ལས། མིག་གི་རྣམ་པ་ཅན་ལ་མདོངས་ཟེར་ཏེ། རྨ་བྱའི་རྔ་སྒྲོའི་སྤྱན་ཀོར་ལ་མདོངས་ཟེར་བ་ལྟ་བུ། མིག་ལྟ་བུ་དེས་ཅང་མི་མཐོང་བས་ལྡོངས་ཟེར། དེ་གཉིས་དངོས་པོའི་མིང་དང་། བྱ་བའི་མིང་གི་ཁྱད་པར་ཡོད་པས། མདོངས་མཐའ་ཅན་ལ་སྡོངས་མཐའ་ཅན་དང་། མིག་ལྡོངས་པ་ལ་མིག་མདོངས་པར་བྲིས་པ་མི་འགྲིག་གོ །
     མདུན་ས་དང་འདུན་ས་ལས། སྔུན་སོ་ལ་མདུན་ས་དང་། འདུ་བའི་གནས་ལ་འདུན་ས་ཟེར་ཏེ། འཇུག་ཡུལ་ལ་མ་བལྟོས་པར་གང་རུང་སྦྱར་བ་ནོར་རོ། །
     ད་ཚུར་དང་དར་ཚུར་གཉིས་ལས། ད་ཚུར་ནི་ཚུར་རིགས་བཞིའི་དཀར་ཚུར་གྱི་མིང་དང་། དར་ཚུར་ནི་ཚ་ལའི་མིང་ཡིན་པས་དོན་མི་གཅིག་པས། སྐབས་གང་ཐོབ་ཏུ་འཇུག་པར་བྱ།
     ཕྱུ་བ་དང་ཆུ་བ་གཉིས་ལས། སྣམ་བུའི་ལྭ་ལ་ཕྱུ་བ་ཟེར། དེ་ཆར་གོས་བྱེད་ཉན་པར་བསམས་ནས་ཆུ་བ་ཞེས་བྲིས་པ་མི་འགྲིག  ཆུ་བ་ནི་མེ་ཏོག་ལྟ་བུའི་ཡུ་བའི་མིང་དང་།རྒྱུས་པའི་དོན་ལའང་འཇུག་གོ །
     ཕྱེ་མ་དང་བྱེ་མ་དོན་མི་གཅིགསྦྱར་བྱུང་དང་རང་བྱུང་གི་ཁྱད་པར་ཡོད། སྨན་ཕྱེ་མ་དང་། རྡོ་བྱེ་མ་ལྟ་བུ།གཅིག་གཅིག་གི་དོན་དུ་སྦྱར་མི་རུང་ངོ་། །
     བརྒྱ་ཐམ་པ་ལས་གཅིག་ཙམ་ཡོད་ཚོད་ལ་བརྒྱ་ལམ་དང་།ལམ་ཆེན་ལ་རྒྱ་ལམ་ཟེར། བརྒྱ་ལམ་ན་ཞེས་པར་རྒྱ་ལམ་ན་ལྟར་སྦྱར་བ་འཕྱུགས་སོ། །
     འབུ་དང་སྲིན་བུའི་འཇུག་ཡུལ་ལ་ཁྱབ་ཆེ་ཆུང་གི་ཁྱད་པར་ཡོད་དེ། སྲོག་ཆགས་ཕྲ་མོའི་རིགས་སྤྱི་ལ་འབུ་ཟེར་ཞིང་། དེ་རྣམས་ལས་ཧ་ཅང་ཕྲ་ཞིང་ནད་རྒྱུ་བྱེད་པའི་རིགས་ལ་སྲིན་བུ་ཟེར་ཏེ། སོ་སྲིན། སྣ་སྲིན། ཞེས་པ་ལྟ་བུ། དེས་ན་སྲིན་བུའི་དོད་དུ།འབུ་དང་སྲིན་ངོ་བོ་མི་གཅིག་པའི་མིང་གཉིས་གཅིག་ཏུ་སྦྱར་ནས། སྲིན་འབུ་ཞེས་བྲིས་པ་མ་དག་པའོ། །
     མཐོ་བ་དང་། མཐོན་པོའི་ངོ་བོ་མི་གཅིག་སྟེ། སྔ་མ་ཁྱད་ཆོས་མཚོན་པའི་མིང་ཡིན། དེ་ལ་རྗེས་འཇུག་ན་སྦྱར་བའི་མཐོན་པོ་ནི། དངོས་པོའི་མིང་དུ་གྱུར་པ་ཡིན་པས།མཐོ་བ་དང་མཐོན་པོའི་དབྱེ་བ་མ་ཕྱེད་ལ། མཐོ་པོ་ཞེས་བྲིས་པ་ནོར་རོ། ། དེ་བཞིན། རྣོན་པོ་ལ་རྣོ་པོ་དང་། ཆེན་པོ་ལ་ཆེ་པོ་སོགས་སུ་བྲིས་པ་མ་དག་པ་ཡིན་པ་ལྟ་བུ་སོགས་སོ། །
 
འབྲེལ་ཡོད་ནང་དོན།
 
 
Copyright @ China Tibet Online
འདིར་འཁོད་ཡིག་རིགས་དང་པར་རིས་རྣམས་ཀྱི་པར་དབང་ཀྲུང་གོའི་བོད་ལྗོངས་དྲ་བར་དབང་བས་དབང་བཅོལ་ཆོག་མཆན་མེད་པར་སྤྱོད་མི་ཆོག
E-Mail:jiangbai@126.com
ཁ་པར།:010-58336716