མ་དངུལ་སྒོར་ཁྲི2495 བཏང་སྟེ། ཅང་སུའུ་ཞིང་ཆེན་གྱི་བོད་སྐྱོར་རྣམ་གྲངས་ཀྱིས་ལྷ་སའི་ཅང་སུའུ་ཚོད་ལྟའི་བུ་བཅོལ་ཁང་འཛུགས་སྐྲུན་བྱེད་འགོ་ཚུགས་པ།
སྤེལ་དུས 2018-04-20
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། པད་མས་བསྒྱུར།
མིག་སྔར་ནན་ཅིང་གྲོང་ཁྱེར་སློབ་གསོ་ཅུས་དང་ལྷ་ས་གྲོང་ཁྱེར་སློབ་གསོ་ཅུས་ཀྱིས་མཉམ་སྐྲུན་བྱས་པའི་ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་གི་རྣམ་གྲངས་དེ་དུས་ལྟར་ལག་བསྟར་བྱས་ཤིང་། དར་དམར་གྲོང་ཚོ་དང་དེའི་མཐའ་འཁོར་གྱི་སྡོད་དམངས་ཀྱི་བྱིས་པ་བུ་བཅོལ་ཁང་དུ་འགྲོ་བའི་ལམ་ཐག་རིང་བ་དང་། དཀའ་བའི་གནད་དོན་དག་ནུས་ལྡན་སྒོས་ཐག་གཅོད་བྱས་ཏེ། མི་དམངས་མང་ཚོགས་ཀྱི་ཆེད་དུ་སྤུས་ལེགས་ཀྱི་སློབ་ལོ་མ་སོན་པའི་སློབ་གསོའི་ཞབས་འདེགས་མཁོ་སྤྲོད་བྱ་རྒྱུ་རེད།
གསར་འགོད་པས་རྒྱུས་ལོན་བྱུང་བ་ལྟར་ན། 2017ལོའི་ཟླ8པར། ཅང་སུའུ་ཞིང་ཆེན་གྱི་འཐུས་ཚབ་ཚོགས་པ་ལྷ་ས་གྲོང་ཁྱེར་དུ་ཕེབས་ཏེ། རང་སྐྱོང་ལྗོངས་དང་ལྷ་ས་གྲོང་ཁྱེར་གྱི་འགོ་ཁྲིད་དང་མཉམ་དུ་བཞུགས་མོལ་གྲོས་ཚོགས་འཚོགས་རྗེས་ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་རོགས་སྐྲུན་བྱེད་པའི་མཉམ་འབྲེལ་མོས་འཆར་གཅིག་མཐུན་བྱུང་།
ལོ་དེའི་ཟླ9པར། ནན་ཅིང་གྲོང་ཁྱེར་སློབ་གསོ་ཅུས་དང་ལྷ་ས་གྲོང་ཁྱེར་སློབ་གསོ་ཅུས་ཀྱིས་ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་མཉམ་སྐྲུན་བྱེད་རྒྱུའི་གྲོས་མོལ་བཞག་པ་དང་། ནན་ཅིང་གྲོང་ཁྱེར་བུ་བཅོལ་ཁང་དང་པོ་དང་ལྷ་ས་གྲོང་ཁྱེར་ཚོད་ལྟའི་བུ་བཅོལ་ཁང་གཉིས་ཀྱིས་མཉམ་སྐྲུན་བྱེད་རྒྱུའི་གནས་ཚུལ་ཞིབ་ཕྲ་བཟོས། རྣམ་གྲངས་ཡོངས་སུ་གྲུབ་རྗེས་ལྷ་སའི་སློབ་ལོ་མ་སོན་པའི་སློབ་གསོའི་ཁྱབ་ཁོངས་ཀྱི་རྟགས་མཚན་ཞིག་ཏུ་འགྱུར་བར་ཤུགས་ཆེན་པོ་བཏོན་ཏེ། མི་དམངས་མང་ཚོགས་ལ་རྒྱུ་སྤུས་ལེགས་པའི་སློབ་ལོ་མ་སོན་པའི་སློབ་གསོའི་ཞབས་འདེགས་མཁོ་འདོན་བྱ་རྒྱུ་རེད།
ཤེས་རྟོགས་བྱུང་བར་གཞིགས་ན། ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་ལ་ཁྱོན་བསྡོམས་མ་དངུལ་སྒོར་ཁྲི 2495བཏང་བ་དང་། མ་དངུལ་དེ་ཡོངས་ནི་བོད་སྐྱོར་མ་དངུལ་ཡིན་ཞིང་། རྣམ་གྲངས་འཛུགས་སྐྲུན་གྱི་ས་བཀོལ་བའི་རྒྱ་ཁྱོན་ནི་མུའུ་བཅོ་ལྔ་ཡོད་པ་དང་། དེས་ས་བཟུང་རྒྱ་ཁྱོན་སྨི་གྲུ་བཞི་མ་ཁྲི་གཅིག་ཡིན། འཛུགས་སྐྲུན་གྱི་རྒྱ་ཁྱོན་ནི་སློབ་ཁྲིད་འཛིན་གྲྭ་བཅོ་ལྔར་སློབ་མ450ཡོད་ཅིང་། དེ་ནི་ཅང་སུའུ་ཞིང་ཆེན་བོད་སྐྱོར་དམངས་འཚོའི་རྣམ་གྲངས་གལ་ཆེན་གྲས་ཀྱི་གཅིག་ཡིན། རྣམ་གྲངས་དེར་སློབ་ཁྲིད་ཐོག་ཁང་གསར་པ་གཅིག་དང་། སློབ་རྭའི་མཛེས་ལྗོངས་དང་ལྗང་གྱུར་བཟོ་སྐྲུན། ལམ་དང་ཁང་ཕྱིའི་ས་ངོས། ཁང་ཕྱིའི་གློག་དང་། ཁང་ཕྱིའི་ཆུ་གཏོང་འབུད་ཀྱི་བཟོ་སྐྲུན་སོགས་འདུས། དེ་དག་བཟོ་སྐྲུན་བྱས་རྗེས་ཀྱི་སྤྱིའི་རྒྱ་ཁྱོན་ནི་སྨི་གྲུ་བཞི་མ5700 ལྷག་ཡོད། བུ་བཅོལ་ཁང་འདི་བཙུགས་པ་དེས་ཅང་སུའུ་སློབ་གསོའི་བོད་སྐྱོར་དེ་སློབ་ལོ་མ་སོན་པའི་སློབ་གསོ་ནས་མཐོ་འབྲིང་སློབ་གསོ་དང་། དཀྱུས་མའི་སློབ་གསོ་དང་ལས་རིགས་སློབ་གསོ་སོགས་ཁྱོན་ཡོངས་སུ་ཁྱབ་ཡོད་པ་མཚོན་གྱི་ཡོད།
ལྷ་ས་གྲོང་ཁྱེར་སློབ་གསོ་ཅུས་ཀྱི་ཅུས་ཀྲང་གཞོན་པ་དང་། ཅང་སུའུ་ཞིང་ཆེན་བོད་སྐྱོར་ལས་བྱེད་པ་མིའུ་རོང་ནན་གྱིས་མཚམས་སྦྱོར་བྱས་དོན། ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་གིས་ཅང་སུའུ་ཡི་དོ་དམ་ཚོགས་པ་དང་། དོ་དམ་གྱི་འདུ་ཤེས། སློབ་སྒྲུབ་ཉམས་མྱོང་སོགས་ནང་འདྲེན་བྱས་ཏེ་ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་འཛུགས་སྐྲུན་གྱི་རྣམ་གྲངས་དེ་ཅང་སུའུ་ཞིང་ཆེན་གྱི་བོད་སྐྱོར་གྱི་རྟགས་མཚན་རང་བཞིན་གྱི་བཟོ་སྐྲུན་ཞིག་ཏུ་གྱུར་པར་བརྩོན་ལེན་བྱ་རྒྱུ་དང་། བུ་བཅོལ་ཁང་བཙུགས་པ་དེས་ལྷ་སའི་སློབ་ལོ་མ་སོན་པའི་སློབ་གསོའི་འཕེལ་རྒྱས་ལ་དཔེ་སྟོན་དང་སྣེ་འདྲེན་གྱི་ནུས་པ་ངེས་ཅན་ཞིག་འདོན་སྲིད།
ལས་རིམ་རྗེས་མར་ལྷ་ས་གྲོང་ཁྱེར་སློབ་གསོ་ཅུས་ཀྱིས “ཁྲིད་གཉིས་སྲུང་གཅིག”གི་རེ་བ་ལྟར། ལྷ་ས་གྲོང་ཁྱེར་ཅང་སུའུ་ཚོད་ལྟའི་བུ་བཅོལ་ཁང་ལ་ཆུ་ཚད་མཐོ་བའི་དགེ་རྒན་གྱི་རུ་ཁག་མཁོ་འདོན་བྱས་ཏེ་བུ་བཅོལ་ཁང་དུས་ཡུན་རིང་པོར་འཕེལ་རྒྱས་སུ་འགྲོ་བར་རྨང་གཞི་བརྟན་པོ་འཛུགས་རྒྱུ་རེད།
