བོད་ལྗོངས་ཀྱི་བརྟག་ཞིབ་ཚོགས་ཆུང་གིས་སྙན་རོང་རྫོང་གི་ཁ་གཏད་རོགས་སྐྱོར་ས་ཚིགས་ཀྱི་དབུལ་སྒྲོལ་འགག་སྒྲོལ་ལས་དོན་ལ་བརྟག་ཞིབ་གནང་བ།
སྤེལ་དུས 2018-06-07
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ། སྐྱིད་ལོད་ཀྱིས་བསྒྱུར།
འདི་ག་ཚགས་པར་ཁང་དུ་ནག་ཆུ་ནས་ཟླ་6ཚེས་5ཉིན་གློག་འཕྲིན་འབྱོར་གསལ། ཟླ་5ཚེས་29ནས་ཟླ་6ཚེས་1ཉིན་བར། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་མོང་ཞའོ་ལིན་དང་བཅས་པ་ཆ་སྙོམས་ས་བབ་མཐོ་ཚད་སྨི་4700ཟིན་པའི་སྙན་རོང་རྫོང་ཁོངས་ཀྱི་སྙན་རོང་གྲོང་རྡལ་དང་། ཤག་ཆུ་ཤང་། འདོམ་རྒྱང་ཤང་། སེ་ཆེན་ཤང་བཅས་ཤང་དང་གྲོང་རྡལ་4དང་དེ་བཞིན་ཏིང་རྔུལ་བོན་དགོན་དུ་ཕེབས་ཏེ། དབུལ་སྒྲོལ་འགག་སྒྲོལ་ལས་དོན་དང་འབྲི་གཡག་སྡོམ་གསོའི་རྣམ་གྲངས་སྐོར་ལ་ཤེས་རྟོགས་ཞིབ་ཕྲ་གནང་བ་དང་། ཁ་གཏད་དབུལ་སྐྱོར་ས་ཚིགས་ཀྱི་དཀའ་ངལ་ཡོད་པའི་མང་ཚོགས་དང་དགོན་སྡེའི་དགེ་འདུན་པར་བྱམས་བརྩེའི་ངང་འཚམས་འདྲི་གནང་བ་མ་ཟད། ད་དུང་རང་ལྗོངས་ཀྱི་འབྲོག་ལས་འཕེལ་རྒྱས་ཁ་ཕྱོགས་ལ་ཆེད་དོན་བརྟག་ཞིབ་ཀྱང་གནང་བ་རེད།
བརྟག་ཞིབ་ཚོགས་ཆུང་དང་བཅས་པ་ས་ཆ་གང་དུ་འབྱོར་རིམ་བཞིན། གཞི་རིམ་གྱི་ལས་བྱེད་པ་དང་། ཏང་ཡོན་རྒན་གྲས། མང་ཚོགས་དབུལ་པོ། ཕྱུག་འགྱུར་སྣེ་ཁྲིད་པ་སོགས་དང་ངོ་ཐུག་གདོང་འཕྲད་ངང་བཀའ་མོལ་དང་། བསམ་བློ་སྤེལ་རེས། བསམ་འཆར་དང་གྲོས་འགོ་ཉན་པ་བཅས་གནང་བ་རེད།
བརྟག་ཞིབ་ཚོགས་ཆུང་གིས་སྙན་རོང་རྫོང་གི་དབུལ་སྒྲོལ་འགག་སྒྲོལ་གྱི་ལས་དོན་ལ་ཁས་ལེན་གང་ལེགས་གནང་རྗེས། ཐོག་མཐའ་བར་གསུམ་དུ་གནད་སྨིན་དབུལ་སྐྱོར་དང་གནད་སྨིན་དབུལ་སྒྲོལ་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་རབ་དང་རིམ་པ་དང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་མཐའ་གཅིག་ཏུ་བྱེད་པ་དང་། འགན་འཁྲི་བློ་ལ་བརྟན་པོར་ངེས་པ། དངོས་འཛིན་དངོས་སྒྲུབ་བྱེད་པ། ཕར་ཆིན་རྒྱག་པའི་སྙིང་རུས་མཐའ་འཁྱོངས་བཅས་ཀྱིས་དབུལ་སྒྲོལ་ལས་དོན་ཡག་པོ་སྒྲུབ་དགོས་པ་དང་། དབུལ་སྐྱོར་དང་བློ་སྐྱོར་རིག་སྐྱོར་ཟུང་འབྲེལ་ལ་སྣང་ཆེན་བྱེད་པ་དང་། ནང་གནས་འཕེལ་རྒྱས་ཀྱི་སྒུལ་ཤུགས་ཆེ་རུ་གཏོང་བ། འབྲོག་ལས་མཉམ་ལས་རྩ་འཛུགས་རྩེར་སོན་སྟོབས་ལྡན་ཞིག་ཏུ་འགྱུར་བར་བྱེད་པ། ཐོན་ལས་ཀྱི་འདེགས་སྐྱོར་ནུས་པ་ཆེ་རུ་གཏོང་བ། འབྲོག་ལས་ཀྱི་ཚན་རྩལ་འདུས་ཚད་ཆེ་རུ་གཏོང་བ། སྡོམ་གསོར་སྐུལ་འདེད་གཏོང་བ། འབྲོག་ལས་ཀྱི་སྤུས་ཚད་མཐོ་རུ་དང་ཕན་འབྲས་ཆེ་རུ་གཏོང་བ་བཅས་བྱས་ནས། དབུལ་སྒྲོལ་འགག་སྒྲོལ་ལ་གསོན་ཤུགས་གསར་པ་སྦྱིན་དགོས། དོན་དངོས་དང་ཟུང་འབྲེལ་བྱེད་པ་དང་། བསམ་ཕྱོགས་ཁ་གསལ་བཟོ་བ། སྟོབས་ཤུགས་གཅིག་ཏུ་སྒྲིལ་བ། དུས་ཚོད་ལྡོག་སྒྲིག་བྱེད་པ་བཅས་ཀྱིས་དབུལ་སྒྲོལ་འགག་སྒྲོལ་གྱི་མཐོ་རླབས་གསར་པ་ཞིག་སློང་དགོས། དེ་དང་ཆབས་ཅིག་མང་ཚོགས་རྣམས་ཐག་གང་ཉེ་ས་དང་སྟབས་གང་བདེ་བདེ་དང་རང་ཡུལ་ནས་བྲལ་མི་དགོས་པར་ཐོན་ལས་ལ་ཞུགས་ཐུབ་པ་དང་ཡུན་རིང་ཕན་པ་ཐོབ་པར་བྱས་ཏེ། དབུལ་ཞྭ་དུས་ཐོག་ཏུ་འབུད་ཐུབ་པ་དང་རྒྱལ་ཡོངས་དང་མཉམ་དུ་འབྱོར་འབྲིང་སྤྱི་ཚོགས་ཀྱི་ཕྱོགས་སུ་སྐྱོད་ཐུབ་པའི་འགན་ལེན་བྱེད་དགོས་ཞེས་ནན་བཤད་གནང་བ་རེད།
