བོད་ལྗོངས་ཀྱི་རྫོང་རིམ་པའི་སྨན་ཁང་ལ་ཁ་གཏད་རོགས་སྐྱོར་གང་ལེགས་ཐོབ་རྒྱུ།
སྤེལ་དུས 2020-07-31
ཡོང་ཁུངས། བོད་ལྗོངས་འཕྲིན་དྲ།
རྩོམ་པ་པོ།
ཉེ་དུས། རྒྱལ་ཡོངས་སྨན་བཅོས་ཤེས་ལྡན་པའི་སྤྱི་ལོ2020ལོའི་ཚོགས་སྒྲིག་རྣམ་པའི་བོད་སྐྱོར་དང་རིམ་གསུམ་སྨན་ཁང་ནས། བོད་ལྗོངས་དབུལ་ཕོངས་རྫོང་གི་རྫོང་རིམ་པའི་སྨན་ཁང་ལ་ཁ་གཏད་རོགས་སྐྱོར་བྱེད་པའི་སྐུལ་སྤེལ་བརྙན་ལམ་ཚོགས་འདུ་འཚོགས་པ་རེད།
རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱི་ཀྲུའུ་རེན་གཞོན་པ་ཝང་ཧེ་ཧྲེང་ནས་པེ་ཅིང་གི་ཚོགས་ར་གཙོ་བོར་གསུང་བཤད་གནང་བ་དང་། ལྗོངས་ཏང་ཨུད་ཀྱི་རྒྱུན་ལས་ཨུ་ཡོན། རྩ་འཛུགས་པུའི་པུའུ་ཀྲང་གྲེན་ཡུང་ཇི་ཡིས་བོད་ལྗོངས་ཡན་ལག་ཚོགས་རར་ཤིས་ཚིག་སྒྲོན་གནང་བ་རེད།
ཝང་ཧེ་ཧྲེང་གིས་ཚོགས་སྒྲིག་རྣམ་པའི་རོགས་སྐྱོར་དང་ཁ་གཏད་རོགས་སྐྱོར་ཐད་ཐོབ་པའི་གྲུབ་འབྲས་ལ་ཁས་ལེན་གང་ལེགས་གནང་བ་དང་སྦྲགས། ནད་ཡམས་འགོག་ཟོན་རྒྱུན་རྣམ་ཅན་དུ་དམ་འཛིན་ཡག་པོ་བྱེད་པ་དང་། སྨན་ཁང་གི་གོང་འཕེལ་སྒུལ་ཤུགས་མི་འདེང་བ་དང་ཤེས་ལྡན་པ་གསོ་སྐྱོང་འཕེལ་རིམ་འགོར་བ། རྟ་སྒ་ཆ་སྒྲིག་གི་བྱ་ཐབས་གནད་ལ་མི་འཁེལ་བ་སོགས་ཀྱི་གནད་དོན་ཐག་གཅོད་བྱས་ཐོག གཙོ་གནད་ས་གནས་དང་གཙོ་གནད་ལས་འགན་ལ་མིང་སྦྱར་ལྟ་སྐུལ་གཉེར་སྒྲུབ་བྱས་ནས། ནད་ཡམས་འགོག་ཟོན་དང་བདེ་ཐང་དབུལ་སྐྱོར་གྱི་འགག་སྒྲོལ་དམག་འཐབ་ལ་ཕྱོགས་ཡོངས་ནས་རྒྱལ་ཁ་མཐའ་གཅིག་ཏུ་ལེན་ཐུབ་པ་བྱེད་དགོས་པའི་ནན་གསུངས་གནང་བ་རེད།
གྲེན་ཡུང་ཇིས་རོགས་སྐྱོར་ཞིང་ཆེན་དང་གྲོང་ཁྱེར། འབྲེལ་ཡོད་ཚན་པ་བཅས་ཀྱིས་ཤེས་ལྡན་པ་གསོ་སྐྱོང་དང་གཙོ་གནད་ཚན་ཁག་འཛུགས་སྐྱོང་། དེང་རབས་སྨན་ཁང་དོ་དམ། ས་མཐོའི་གསོ་རིག་ཞིབ་འཇུག་སོགས་ཐད་མུ་མཐུད་རྒྱབ་སྐྱོར་བྱེད་ཤུགས་ཆེ་རུ་གཏོང་རྒྱུའི་ཐུགས་རེ་གནང་བ་རེད།།