ཟླ་དྲུག་པ་ནི་མཐོ་རྒྱུགས་སྤྲོད་པའི་དུས་ཡིན་ལ། སློབ་བུ་དག་གིས་མི་ཚེའི་བགྲོད་ལམ་ལ་གདམ་ག་བྱེད་པའི་དུས་སྐབས་གལ་ཆེན་ཞིག་ཀྱང་རེད། མིག་སྔར། བོད་ལྗོངས་ཀྱི ༢༠༡༥ ལོའི་མཐོ་རྒྱུགས་ཀྱི་རྒྱུགས་ཤོག་ལ་བལྟ་བའི་བའི་ལས་ཀ་དུས་ཚོད་ལྟར་སྤེལ་སྒང་ཡིན་ལ། ཚོད་དཔག་ལྟར་ན་ཟླ་འདིའི་ཟླ་སྨད་ཙམ་དུ་རྒྱུགས་སྐར་ཕྱི་རུ་བསྒྲགས་ཐུབ་ཅིང་། མཐོ་རྒྱུགས་ཀྱི་རེ་ཞུའི་རེའུ་མིག་སྐོང་བའི་ལས་རིམ་ཡང་དེ་དང་མཉམ་དུ་འགོ་བརྩམ་རྒྱུ་རེད།
ཕྱིས་འབྱུང་གཞུང་ཞབས་པའི་རྒྱུགས་ལ་གཞོལ་འཆར་ཡོད་པའི་སློབ་བུ་རྣམས་ལ་མཚོན་ན། བོད་རང་སྐྱོང་ལྗོངས་གཞུང་ཞབས་པ་ཅུས་ཀྱིས། རེ་ཞུའི་རེའུ་མིག་སྐོང་དུས་ངེས་པར་དུ་བོད་རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གིས་བསྒྲགས་པའི་སློབ་བསྡུའི་འཆར་གཞིའི་རིགས་ཀྱི་སློབ་གྲྭ་ལྟར་རེའུ་མིག་སྐོང་ཚེ། ད་གཟོད་བོད་ལྗོངས་ཀྱི་སློབ་ཁུངས་སུ་བརྩི་ཞིང་། རྗེས་ཕྱོགས་བོད་ལྗོངས་ནང་ཁུལ་གྱི་གཞུང་ཞབས་པའི་ཡིག་རྒྱུགས་ལའང་ཞུགས་ཆོག་པ་ཀུན་ལ་གསལ་འདེབས་གནང་ཡོད། དེ་བཞིན་དུ་བོད་རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གི་ལས་སྣེ་བས་ངོ་སྤྲོད་ལྟར་ན། "དྲ་བའི་སློབ་གསོ་དང་། དར་མའི་སློབ་གསོ། རང་སྦྱོང་སློབ་གསོ་བཅས་ནི་མཐོ་རིམ་སློབ་གསོའི་རྣམ་པ་ཞིག་ཡིན་ནའང་། དེ་ནི་སྤྱིར་བཏང་གི་མཐོ་རིམ་སློབ་གསོ་དང་བསྡུར་ན་ཧེ་བག་ཡོད་དེ། སློབ་མ་དང་ཁྱིམ་བདག་དག་ལ་སློབ་བསྡུའི་བརྡ་ཐོ་འབྱོར་རྗེས། ངེས་པར་དུ་བོད་རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གིས་དམིགས་བཙུགས་ཀྱི་བཤེར་འཚོལ་ཐབས་ལམ་བརྒྱུད་སློབ་བསྡུའི་ཆ་འཕྲིན་ལ་གཤིབ་བསྡུར་ར་སྤྲོད་བྱས་ཏེ། སློབ་བསྡུའི་སློབ་ཆེན་དེ་གའི་སློབ་གཉེར་གྱི་རིགས་ལ་རྩད་གཅོད་ལེགས་པོ་བྱེད་པ་ལས་གཡོ་འོག་ཏུ་ཚུད་པར་ཡིད་གཟབ་བྱ་དགོས། འབྲེལ་ཡོད་གནས་ཚུལ་གལ་ཏེ་རྩད་འདྲི་བྱེད་ན་ཐད་ཀར་བོད་རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གི་འབྲེལ་ལམ་ཁ་པར ༩༦༨༣༣༥༡༣ ལ་འབྲེལ་བ་བྱེད་ཆོག་ཅེས་ཟེར།"
༢༠༡༥ལོའི་མཐོ་རྒྱུགས་ཀྱི་ཉིན་དང་པོར་སློབ་མ་དང་ཁྱིམ་བདག་གིས་རྒྱུགས་རའི་མདུན་དུ་རྗེས་དྲན་མཉམ་པར་བསྐྱོན་པ།
ལོ་རེའི་མཐོ་རྒྱུགས་སྤྲོད་པའི་དུས་སུ། དངུལ་སྤྲད་ཚེ་དམག་སྡེའི་སློབ་གྲྭར་ཞུགས་ཐུབ་པ་དང་། ནང་ཁུལ་གྱི་དམིགས་ཚད་ལ་བརྟེན་ནས་སྐར་གྲངས་དམའ་བའི་སློབ་མ་ཡང་མཐོ་རིམ་སློབ་ཆེན་དུ་ཞུགས་ཐུབ་པ་ལྟ་བུའི་སློབ་བསྡུའི་ཆ་འཕྲིན་ཅི་རིགས་ཁྱིམ་བདག་དང་སློབ་མ་རྣམས་ལ་འབྱོར་གྱི་ཡོད་པ་དང་། དེ་མིན་སློབ་གཉེར་གྱི་རིགས་ལ་གོ་འཛོལ་བྱུང་བར་བརྟེན་ནས་སློབ་མ་སློབ་མཐར་ཕྱིན་རྗེས་སུ་བོད་ལྗོངས་ཀྱི་མཐོ་རིམ་མཐར་ཕྱིན་སློབ་མའི་གཞུང་རྒྱུགས་ལ་ཞུགས་པར་འགོག་རྐྱེན་བཟོ་བའི་སྣང་ཚུལ་ལ་སོགས་པར་གཞིགས་ཏེ། བོད་རང་སྐྱོང་ལྗོངས་སློབ་གསོ་རྒྱུགས་སྤྲོད་ཁང་གིས་སློབ་མ་དང་ཁྱིམ་བདག་རྣམས་ལ། སློབ་བསྡུའི་ཆ་འཕྲིན་དེ་རིགས་ཀྱི་གཡོ་འོག་ཏུ་ཚུད་པར་ངེས་པར་དུ་དོགས་ཟོན་ནན་མོ་དགོས་པར་དྲན་སྐུལ་གནང་འདུག །
བོད་རང་སྐྱོང་ལྗོངས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ཡིས་ངོ་སྤྲོད་བྱས་པ་ལྟར་ན། ལོ་ངོ་ལྔའི་རིང་བོད་ལྗོངས་ཀྱིས་ཁྱོན་བསྡོམས་གཞི་རིམ་གྱི་གཞུང་ཞབས་པ་དང་། ལས་ཁུངས་ཀྱི་ལས་སྣེ་བ། ཆེད་ལས་ལག་རྩལ་མི་སྣ་བཅས་ཁྱོན་བསྡོམས་ལས་མི ༤༢༤༡༩ བསྡུས་ཡོད་ཅིང་། དེ་ལས་གཞུང་ཞབས་པས་མི་གྲངས ༢༥༥༤༡ ཟིན་ཡོད་པ་རེད།
མིག་སྔར། ༢༠༡༥ ལོའི་གཞུང་རྒྱུགས་ཀྱི་མིང་ཐོ་འགོད་མཚམས་ཡོངས་སུ་མཇུག་རྫོགས་ཡོད་ཅིང་། ལས་གནས ༢༠༠ ལྷག་གིས་བོད་ལྗོངས་སུ་མིང་ཐོ་འགོད་ཆོག་པ་དང་། ༢༠༡༤ ལོ་དང་བསྡུར་ན་ལྡབ་གཅིག་ལ་ཉེ་བ་འཕར་འདུག ཉེ་བའི་ལོའི་རིང་། བོད་ལྗོངས་ཀྱིས་རྒྱུགས་ལེན་ལས་མི་བསྡུ་བའི་ལམ་ལུགས་སྔར་བས་འཐུས་ཚང་དུ་གཏོང་བ་དང་། གཞུང་ཞབས་པ་བསྡུ་བའི་ལས་དོན་ཚན་རིག་དང་མཐུན་ཞིང་། ཚད་གཞི་དང་ལྡན་པར་མཐོར་འདེགས་སུ་གཏོང་ཆེད་རྒྱུགས་ལེན་ལས་མི་བསྡུ་བའི་ལམ་ལུགས་ཀྱི་ལས་རིམ་ཁག་འཐུས་ཤོར་མེད་པ་ཞིག་བསྒྲུབས་འདུག །
༢༠༡༠ ལོ་ནས་བཟུང་། བོད་ལྗོངས་ཀྱིས་ལྗོངས་ཀྱི་ཐད་གཏོགས་སྡེ་ཚན་དུ་ལས་མི་བསྡུ་བའི་རྒྱུགས་ཐེངས ༣ སྤེལ་ཞིང་། གཞི་རིམ་དུ་ལས་ཀའི་བརྒྱུད་རིམ་ལྡན་པའི་སྒྲིག་ཁོངས་ཀྱི་ལས་རྐང་མི་སྣ་དང་། རྒྱལ་གཉེར་ཁེ་ལས་ཀྱི་ལས་རྐང་མི་སྣའི་ཁྲོད་མི་སྣ་འབུར་དུ་ཐོན་པ ༦༩༨ བོད་ལྗོངས་ཀྱི་ཐད་གཏོགས་སྡེ་ཚན་དུ་བསྡུས་ཡོད། དེའི་ནང་དུ་གཞུང་ཞབས་པ ༣༤༨ དང་། ལས་སྒྲུབ་ལས་ཁུངས་ཀྱི་ལས་སྣེ་བ་དང་ཆེད་ལས་ལག་རྩལ་མི་སྣ ༣༤༨ ཡོད་པ་རེད།
མཐོ་རྒྱུགས་ཀྱི་སློབ་མ་སློབ་ཆེན་དུ་བསྡུ་བར་གཡོ་ཐབས་ཅི་རིགས་ཡོད་པས། སློབ་མ་དང་ཁྱིམ་བདག་དག་གིས་དོགས་ཟོན་ནན་མོ་བྱེད་དགོས།
བོད་རང་སྐྱོང་སློབ་གསོ་རྒྱུགས་ལེན་ཁང་གི་འབྲེལ་ཡོད་འགན་ཁུར་པས། ལོ་རེའི་ད་ལྟའི་ཚོད་དུ། ཁྱིམ་བདག་དང་སློབ་མ་རྣམས་སློབ་བསྡུའི་གཡོ་ཐབས་ཅི་རིགས་དང་འཕྲད་སྲིད་དེ། དེ་ཡང་གོང་སྒྲིག་བྱས་ན། ཁ་ཤས་ཀྱིས་སློབ་བསྡུའི་ལས་སྣེ་བར་བརྫུས་ནས་ནང་ཁུལ་གྱི་དམིགས་ཚད་ཡོད་པས་སྐར་གྲངས་དམའ་བའི་སློབ་མ་ནང་དུ་བསྡུ་ཐུབ་ཅེས་དང་། མགོ་སྐོར་གཏོང་མཁན་གྱིས་ཡིག་ཆ་དང་། ཐམ་ག མིང་ཐོ་འགོད་ས། བློ་འདྲིའི་ཁ་པར་རྫུན་མ་བཟོས་ཏེ་སློབ་ཆེན་གྱི་སློབ་བསྡུ་མི་སྣར་བརྫུས་ནས། ཁྱིམ་བདག་དང་ངོ་འཕྲད་དུས་དཔང་ཡིག་རྫུན་མ་དང་། སློབ་བསྡུའི་བརྡ་ཐོ་སྟོང་བ་རེ་བཟུང་ནས་སློབ་ཆེན་ག་གེ་མོའི་ནང་ཁུལ་གྱི་དམིགས་ཚད་ཡོད་ལ། ཁྱིམ་བདག་གིས་སྔོན་ལ་གཏའ་དངུལ་ཅུང་ཙམ་སྤྲོད་དགོས་ཚུལ་དང་། གལ་ཏེ་ཁྱིམ་བདག་གིས་དངུལ་སྤྲོད་འདོད་ཡོད་ཚེ། སློབ་མ་དེ་ཉིད་སློབ་གྲྭའི་སྐར་གྲངས་ཀྱི་ཚད་ཐིག་ལ་ལོན་མེད་ནའང་། འབྲེལ་ཡོད་སློབ་གྲྭར་འཇུག་པར་ཐབས་བཀོད་འཐེན་ཐུབ་ཅེས་མགོ་སྐོར་གཏོང་གི་འདུག
མགོ་སྐོར་གཏོང་མཁན་ཁ་ཤས་ཀྱིས་དམག་སྡེའི་སློབ་གྲྭར་ས་གནས་ཀྱི་དམིགས་ཚད་ཡོད་པས་དམག་སྡེའི་སློབ་གྲྭར་ཞུགས་ཐུབ་ཅེས་གཡོ་ཐབས་ཀྱིས་ཁྱིམ་བདག་དང་སློབ་མར་མགོ་སྐོར་གཏོང་པ་དང་། ཉེས་ཅན་ཚོགས་པ་ཁ་ཤས་ཀྱིས་ཐ་ན་ཐམ་ག་དང་དམག་སྡེའི་དཔང་ཡིག་རྫུན་མ་བཟོས་ནས་དམག་སྡེའི་སློབ་གྲྭ་རྫུན་མ་གཉེར་བ་བརྒྱུད། དེ་ལས་ཁེ་སྤོགས་ལེན་གྱི་ཡོད་པ་རེད། དོན་དུ་དམག་སྡེའི་སློབ་གྲྭ་ནི་མཐོ་རིམ་སློབ་ཆེན་གཞན་དག་ལས་མ་འདས་ཏེ། རྒྱལ་ཁབ་ཀྱིས་གཏན་འཁེལ་བྱས་པའི་འགྲོ་སོང་ལས་གཞན་དངུལ་ཅི་ཡང་བསྡུ་གི་ཡོད་པ་མ་རེད། ཡང་ཁ་ཤས་ཀྱིས། སློབ་ཆེན་གང་དང་སློབ་བསྡུའི་གཞུང་སྒྲུབ་ཁང་གང་གི་འགན་ཁུར་པའི་ངོ་ཤེས་དང་། ཉེ་འབྲེལ་ཡིན་ཞེས་སྐར་རིམ་དང་པོར་མ་ལོན་པ་དག་སྐར་རིམ་དང་པོའི་སློབ་ཆེན་དུ་འཇུག་ཐུབ་པ་དང་། ཆེད་སྦྱོང་སྐར་ཚད་ཀྱི་སློབ་མ་དག་དངོས་གཞིའི་སློབ་ཆེན་དུ་འཇུག་ཐུབ་ཅེས་གཡོ་ཐབས་ཀྱིས་སློབ་མ་དང་ཁྱིམ་བདག་ལ་མགོ་སྐོར་ཆེན་པོ་གཏོང་གི་ཡོད་པ་རེད།
གཞི་རིམ་གཞུང་ཞབས་པ་བསྡུ་བ།
ཡང་མགོ་སྐོར་གཏོང་མཁན་ཁ་ཤས་ཀྱིས་སློབ་མ་དང་ཁྱིམ་བདག་གིས་རང་སྒེར་སློབ་བསྡུ་དང་། གནས་གཏན་འཁེལ་གྱི་སློབ་བསྡུའི་སྲིད་ཇུས་རྒྱུས་ལོན་མེད་པར་དམིགས་ནས། རང་སྒེར་སློབ་བསྡུའི་ལམ་ལུགས་ལ་སྐར་གྲངས་ཀྱི་ཚད་ཐིག་མེད་པར་སྒོར་ཁྲི་ཚོ་འགའ་བཏང་པ་ཡིན་ན་སློབ་གྲྭར་བསྡུ་ཐུབ་ཟེར་ལ། ཡང་ཁ་ཤས་ཀྱིས་སློབ་ཆེན་ག་གེ་མོའི་གནས་གཏན་འཁེལ་གྱི་སློབ་བསྡུའི་འཆར་གཞིར་འཇུག་ཐུབ་ལ། བསྡུ་ལེན་ལ་ཁག་ཐེག་བྱེད་ཐུབ་མོད་མ་དངུལ་འབོར་ཆེན་གཏོང་དགོས་ཟེར།
གཞན་ཡང་ཁྲིམས་འགལ་པ་ཁ་ཤས་ཀྱིས། སློབ་མ་དང་ཁྱིམ་བདག་གིས་སྒྱུ་རྩལ་རིགས་དང་། གྲ་སྒྲིག་རིམ་པའི་སློབ་མར་ཞིབ་ཆའི་རྒྱུས་ལོན་མེད་པར་དམིགས་ནས། སྒྱུ་རྩལ་རིགས་དང་། གྲ་སྒྲིག་སློབ་མར་སྐར་གྲངས་ཀྱི་ཚད་ཐིག་མེད་པས་དངུལ་སྤྲད་པ་ཡིན་ན་སློབ་གྲྭར་ཞུགས་ཐུབ་ཅེས་གཡོ་རྫུན་འཆད་པ་དང་། ཁ་ཤས་ཀྱིས་སློབ་མ་དང་ཁྱིམ་བདག་གི་སློབ་བསྡུའི་གོ་རིམ་དང་། གཏན་འབེབས་ལ་རྒྱུས་ལོན་མེད་པར་དམིགས་ནས། གསབ་བསྡུའི་མིང་གཡར་ནས་མགོ་སྐོར་གཏོང་པ་རེད། དོན་དུ། ས་གནས་ཁག་གི་སློབ་བསྡུ་གཞུང་སྒྲུབ་ཁང་གིས་སྐར་གྲངས་མ་ལོན་པའི་སློབ་མ་དག་ལ་དྲ་ལམ་ནས་རེ་ཞུའི་རེའུ་མིག་སྐོང་པ་ཁྱབ་བསྒྲགས་བྱས་ཡོད་པ་རེད།
བོད་རང་སྐྱོང་ལྗོངས་སློབ་གསོ་རྒྱུགས་ལེན་ཁང་གི་འབྲེལ་ཡོད་འགན་ཁུར་པས། སྐར་རིམ་གསུམ་པའི་དངོས་གཞིའི་སློབ་ཆེན་དང་ཆེད་ལས་ལག་རྩལ་སློབ་གླིང་ཉུང་ཤས་་སྒྲིག་ཁོངས་ཕྱི་རུ་བཀྱེད་ཡོད་དེ། དཔེར་ན་སློབ་ཆེན་ག་གེ་མོར་ས་གནས་དེ་གར་སློབ་བསྡུའི་འཆར་གཞི་རྩ་བ་ནས་མེད་པའམ་སློབ་བསྡུའི་འཆར་གཞི་མང་པོ་མེད་པས། སློབ་བསྡུ་གཞུང་སྒྲུབ་ཁང་གི་ཚད་ལྡན་སློབ་བསྡུའི་སྡིངས་ཆ་མ་བརྒྱུད་པར་གཡོ་ཐབས་ཀྱིས་ལྐོག་ཏུ་སློབ་མ་བསྡུ་བའམ་འཆར་གཞི་ལས་བརྒལ་ཏེ་སློབ་མ་བསྡུ་ཡི་འདུག འདི་ལྟར་བྱས་ཚེ་སློབ་མཐར་ཕྱིན་རྗེས་རང་ལྗོངས་ཀྱི་སློབ་ཁུངས་སུ་མི་གཏོགས་པས། རང་ལྗོངས་ཀྱི་སློབ་ཆེན་མཐར་ཕྱིན་སློབ་མའི་གཞུང་རྒྱུགས་སུ་ཞུགས་མི་ཆོག་པས། གཡོ་ཐབས་དེ་རིགས་ལ་སློབ་མ་དག་གིས་ངེས་པར་དུ་དོགས་ཟོན་ནན་མོ་བྱེད་དགོས་སོ།
བོད་ལྗོངས་སློབ་གསོ་རྒྱུགས་ལེན་ཁང་གི་ཁ་པར། 96833513
