བི་ཤྭ་ཀ་རྨའི་པིར་རྩལ་ལས་ཐོན་པའི་རི་མོའི་བརྩམས་ཆོས་ཀྱིས་ཀུན་ཡིད་ཀྱི་བརྟན་པ་ཅིག་ཅར་དུ་འཕྲོག
མཛེས་རྩལ་ནི་མིའི་སེམས་ཁམས་ལས་མཆེད་ཅིང་པུར་རྩེ་ལས་ལྷོད་ལྷོད་དུ་བབས་པའི་ཕྱི་རོལ་གྱི་གཟིགས་རིས་ཤིག་ཡིན་ལ། མཛེས་རྩལ་ནི་ཁ་གྲགས་མི་ཤེས་པའི་སྙན་ངག་གསོན་པོ་ཞིག་ཡིན། རི་མོ་ནི་གདོད་མའི་སྤྱི་ཚོགས་སུ་མཚོན་ན་པར་ཆས་དང་བརྙན་འཕྲིན་མེད་ན་ཡང༌། ཆབ་དཔལ་རིག་གསུམ་འཕེལ་རྒྱས་སུ་འགྲོ་བའི་བྱུང་རིམ་སོགས་མི་རབས་རྗེས་མ་དང་དུས་རབས་རྗེས་མར་ར་སྤྲོད་བྱེད་པའི་ཐབས་ལམ་ཞིག་ཏུ་གྱུར་ཡོད་ལ་འབྲི་སྟངས་ཀྱང་མང་པོ་ཞིག་བྱུང་ཡོད།
དེ་ཡང་རང་ཅག་བོད་ཁ་བའི་ལྗོངས་འདིར་སྔོན་བྱོན་མེས་པོས་གསར་སྐྲུན་དང་འཕེལ་རྒྱས་སུ་བཏང་བའི་བྲིས་འབུར་གྱིས་གཙོས་པའི་སྒྱུ་རྩལ་ཁྱད་དུ་འཕགས་པ་དེ་ལྟ་བུ་ནི་རང་རྒྱལ་ཙམ་དུ་མ་ཟད་ད་དུང་རྒྱལ་སྤྱིའི་ཐོག་ཏུའང་སྙན་གྲགས་ཀྱི་བ་དན་ལྷབ་ལྷབ་ཏུ་གཡོ་བཞིན་ཡོད།
འབྲི་ཐབས་སྣ་ཚོགས་ཤིང་ནང་དོན་སྣེ་འཛོམས་པའི་རི་མོའི་བརྩམས་ཆོས།
༢༠༡༢ལོའི་ཟླ༥བའི་ཚེས༢༡དང༢༢ཉིན་ཏེ་བསྟུད་མར་ཉིན་གཉིས་ཀྱི་རིང་ལ་ཁྲི་ཀ་རྫོང་མི་རིགས་བཅའ་སྡོད་སློབ་གྲྭའི་སྐབས་གཉིས་པའི་རི་མོ་འགྲེམ་སྟོན་ཆེན་མོ་དེ་སློབ་གྲྭའི་ལྒང་རྩེད་ཁང་བཟང་དུ་བསྡུས། རྒྱ་ཆེའི་དགེ་སློབ་ཀུན་གྱིས་ཉིན་གུང་དང་སློབ་ཕྱིའི་བྱ་འགུལ། སློབ་ཐུན་བར་གསེང་གི་དུས་ཚོད་སོགས་བེད་སྤྱད་དེ། དུས་ངེས་མེད་དུ་རང་སྒེར་དང་ཡང་ན་འཛིན་གྲྭ་ཐུན་མོང་རྩ་འཛུགས་བྱས་ཏེ་རི་མོ་འགྲེམ་སྟོན་ སློབ་གྲྭའི་དགེ་སློབ་ཡོངས་ཀྱི་མིག་གི་དགའ་སྟོན་དུ་སྨིན།
ཐེངས་འདིའི་རི་མོ་འགྲེམ་སྟོན་ཁྲོད་ཁྱོན་བསྡོམས་རི་མོའི་བརྩམས་ཆོས༣༠༠ལྷག་གདམ་གསེས་བྱས་ནས་འགྲེམ་སྟོན་བྱེད་ཐུབ་པ་བྱུང་བ་དང་། ཚེས༢༢ཉིན་ལ་སློབ་གྲྭའི་འགོ་ཁྲིད་དང་རི་མོ་དགེ་རྒན་གྱི་འཐུས་ཚབ་པ་རྣམ་པས་དཔྱད་འཇོག་ཚན་ཆུང་བསྒྲིག་སྟེ་འགྲེམ་སྟོན་ཁང་དུ་ཕེབས་ནས་འདྲ་མཉམ་དང་དྲང་བཞག གཟུར་མེད་སྒོས་བརྩམས་ཆོས༣༥ལ་བྱ་དགའི་རྟགས་མ་གནང་།
དཔྱད་འདེམས་པ་རྣམ་པས་ཞིབ་ཕྲའི་ངང་ཨང་རིམ་འགེར་བཞིན་པ།
དེའི་ཁྲོད་རི་མོ་དགེ་རྒན་རྣམ་པའི་བྱ་དགའ་སྟེར་སྟངས་ལ་ཨང་དང་པོ་བརྒྱད་དང་། ཨང་གཉིས་པ་དགུ ཨང་གསུམ་པ་དགུ རྟིང་སྐུལ་བྱ་དགའ་དགུ་བཅས་བགར་ཡོད། རི་མོའི་འགྲེམ་སྟོན་འདི་སྐབས་སྔོན་མའི་འགྲེམ་ཐེངས་དང་པོ་དང་བསྡུར་ན་བརྩམས་ཆོས་ཀྱི་ཁ་གྲངས་མང་ལ། སྤྱི་བབ་སྤུས་ཚད་ལེགས་ཤིང་། རིགས་སྣ་མང་བའི་ཁྱད་ཆོས་འཛོམས།
རི་མོ་དགེ་རྒན་རྣམ་པས་རང་ནུས་ཅི་ལྕོག་གིས་འབད་འབུངས་བྱས་པའི་དན་རྟགས་སུ་ཏག་ཏག་ལོ་གསུམ་གྱི་རིང་ལ་སློབ་གྲྭའི་སློབ་མ་རྣམས་ཀྱི་སོར་མོའི་རྩལ་ལས་ཐོན་པའི་བྲིས་རྒྱུན་ཡང་ཐེམ་སྐས་རེ་རེ་ལས་མཛེས་ཡག་བཟང་གསུམ་གྱི་ཁྱད་ཆོས་རིམ་གྱིས་མངོན་གསལ་སྒོས་ཡར་འཕགས་ཡོད་པ་ཁ་ཚོན་བཅད་ཆོག འདི་ཉིད་མི་ཉམས་གོང་འཕེལ་དང་ཉམས་པ་སོར་ཆུད་ཀྱི་སླད་དུ་སློབ་གྲྭའི་འགོ་ཁྲིད་དང་ཤེས་ལྡན་མང་པོ་ཞིག་གིས་ལྷག་བསམ་གྱི་རྒྱབ་སྐྱོར་གང་ལེགས་གནང་སྟེ་དེ་རིང་གི་རི་མོའི་ཞིང་བཀོད་འདི་དགེ་རྒན་དང་སློབ་གྲོགས་མང་པོའི་སྤྱན་ལམ་དུ་འབུལ་ཐུབ་པ་རེད།
གྲལ་བསྒྲིགས་ནས་བརྩམས་ཆོས་རེ་རེར་མྱོང་རོལ་བྱེད་པའི་སློབ་གྲོགས་རྣམས།
ཡིན་ནའང་ཁོ་ཚོ་ནི་རི་མོའི་ཆེད་ལས་མིན་ལ། རི་མོ་ལ་ཆ་རྒྱུས་ཅི་ཡང་མེད་ནའང་མི་རིགས་ཀྱི་བྱིས་པ་འདི་དག་གི་འབྱུང་འགྱུར་སེམས་སུ་སྒོམ་ནས་དཀའ་སྤྱད་ཁྲི་ཕྲག་གི་ཁྲོད་ནས་ང་ཚོའི་མིག་ལམ་དུ་བཤམས་རིན་ཡོད་པའི་བརྩམས་ཆོས་ཁ་གྲངས་ལོངས་པ་ཞིག་འབུལ་ཐུབ་པ་བྱུང་། དེའི་ཕྱིར་རི་མོ་སྒྱུ་རྩལ་གྱིས་ཁོ་ཚོར་ཞིང་ཁམས་གཞན་ཞིག་དང་དག་ཞིང་གང་ཞིག་གི་འོད་ཟེར་གྱི་ལམ་སྣེར་འཇུས་ཟིན་པ་ངང་གིས་མཚོན།
མདོར་ན། འོས་འགན་སློབ་གསོའི་ངོས་ནས་བཤད་ན། རི་མོ་ནི་མཛེས་རྩལ་རིག་པའི་ཁོངས་སུ་གཏོགས་ལ། ལྷག་པར་དུ་སློབ་མའི་གཤིས་རྒྱུད་དང་སྤྱོད་ལམ། ཤེས་བྱ་སོགས་ཁྱོན་ཡོངས་ནས་མཐོར་འདེགས་ཡོང་ཐུབ་པའི་སྒྱུ་རྩལ་ཁྱད་དུ་འཕགས་པ་ཅན་ཞིག་ཡིན་པས། འདི་ལ་མཐོང་ཆེན་དང་བརྩི་འཇོག་ཡང་ཡང་བྱས་ཏེ་སློབ་གྲྭའི་སློབ་མ་མི་ཉུང་བ་ཞིག་རི་མོ་ལ་དགའ་བ་དང༌། ཀུན་སྤྱོད་མཛེས་པ། སྒྱུ་སྤུས་ཅན་གྱི་སློབ་མ་མང་པོ་ཞིག་གསོ་སྐྱོང་བྱས་ཏེ་སློབ་རའི་སྒྱུ་རྩལ་ཇེ་ལེགས་སུ་གཏོང་བ་དང༌། སྔོན་བྱོན་མེས་པོས་ང་ཚོར་བཞག་པའི་གཅེས་སུ་འོས་པའི་རིག་གནས་འདི་མ་ཉམས་དར་སྤེལ་བྱེད་པར་འབད་པ་བྱེད་རྒྱུའི་ཆོད་སེམས་མངའ་འོ། །
