གངས་ཅན་སྰ་ལའི་སྨན་ལྗོངས་ཕྱུག་མོའི་ར་བ་ཡངས་པོ་འདི་རུ་མིའི་འགྲོ་བ་བྱུང་བའི་དུས་མཚུངས་སུ་སྲོག་འཚོ་འབྲེལ་འདྲིས་ཀྱི་དགོས་དབང་གིས་སྒྲའི་ལད་ཟློས་དང་ཡིད་ཀྱི་འགྱུར་བ་ཐོལ་བྱུང་དུ་བཏོན་པ་སོགས་ལས་ལུས་ཉམས་དང་ཟུང་དུ་སྦྲེལ་བའི་སྟབས་བདེ་བརྗོད་ཉུང་གི་སྐད་ཆ་ཐོག་མར་བྱུང་སྟེ། རྟོགས་བཏགས་ཀྱིས་མིང་དོན་གྱི་འབྲེལ་བ་མངོན་ཞེན་ལྟར་ཐུན་མོང་དུ་གྲགས་ཤིང་ཕན་ཚུན་བསམ་བློ་བརྗེ་རེས་དང་མྱོང་ཐོབ་སྣ་ཚོགས་བུ་རབས་ཚ་རྒྱུད་ལ་སྤེལ་བྱེད་ཀྱི་ཡོ་བྱད་གལ་ཆེན་ཞིག་ཏུ་གྱུར། ཡིན་ན་ཡང་ངག་ནི་ཐོས་འཛིན་སྣ་ཤེས་ཀྱི་མཉན་བྱ་ཁོ་ནའི་གེགས་ཞན་གྱིས་ཡུལ་དང་དུས་ཀྱི་བསྐལ་བའི་ཆ་ལ་མཐུ་རྡུགས་པས་ཡུལ་ཉེ་བ་དང་ད་ལྟའི་མངོན་མཐོང་གི་དོན་འབའ་ཞིག་གོ་བྱེད་ཙམ་དུ་ཟད་པས། ལོ་རེ་བཞིན་གྱི་དམག་རྒྱག་གཉེན་སྐྱོང་དང་སྲིད་ཇུས་ལུགས་དྲིས་ཀྱི་འདས་དོན་ཟིན་འགོད་དང་ལས་སྒོ་སྣ་ཚོགས་པའི་བརྗོད་དོན་ཁད་རིང་བའི་ཡུལ་དུ་སྐྱེལ་བའི་འགོས་འཁོ་ཇི་བཞིན་སྐོང་མ་ཐུབ་པར་ངག་གི་མཚོན་བྱེད་ནུས་པའི་བརྡ་ཐབས་སྣ་ཚོགས་ཤིག་ཁ་ཚ་དགོས་གཏུག་གིས་བྱུང་ནས་ལོ་རྒྱུས་ཀྱི་དུས་སྐབས་སོ་སོར་ཕན་ནུས་གལ་ཆེན་ཞིག་བཏོན་ཀྱང་། རིམ་གྱིས་བརྡ་ཐབས་སྔ་མ་ལས་ལྷག་པའི་ཕྱི་མ་དག་སྤེལ་བས་ད་ལྟ་བརྡ་ཐབས་སྣ་ཚོགས་ལ་སྐད་ཆ་དང་འདྲ་བར་བརྩི་མཐོང་བྱེད་ཀྱིན་མེད་མོད། ཅི་སྟེ་བརྡ་ཐབས་སྣ་ཚོགས་ཀྱི་རམ་འདེགས་མེད་ན་སྐྱེས་བུའི་ངག་སྦྱོར་ཁོ་ནས་མངོན་ལྐོག་ཅི་རིགས་ཀྱི་བརྗོད་དོན་ཐམས་ཅད་གསལ་རྗེན་དུ་སྟོན་མི་ཐུབ་པས། ད་ལྟའི་དམངས་ཀྱི་འཚོ་བ་དང་། ཆོས་ཀྱི་ལས་ཆོག སྔོན་གྱི་ཡིག་ཚང་རྣམས་སུ་ཅི་སྣང་རང་བློས་ནུས་ཚོད་ཀྱིས་ཕྱོགས་གཅིག་ཏུ་བསྡུས་ཏེ་ཅུང་ཟད་དཔྱད་པར་བྱའོ།