མི་རིགས་སྐད་ཡིག་ལ་སྲུང་སྐྱོབ་བྱ་དགོས།
སྤེལ་དུས 2011-08-24
ཡོང་ཁུངས། གངས་རྒྱན་ན་ཆུང་ཚགས་པར།
རྩོམ་པ་པོ། སྒྲོལ་མས་བསྒྲིགས།
མདའ་མོ་གཅིག་གིས་བོད་ཁམས་སིལ་བུར་གཏོར་ཏེ་ལོ་ངོ་ཆིག་སྟོང་ཆིག་བརྒྱ་ལྷག་འདས་ནའང་།ངཚོའི་སྐད་དང་ཡི་གེ་ཡིས་ང་ཚོ་ད་བར་དུ་གོང་བུ་གཅིག་ཏུ་བསྒྲིལ་ནས་བསྡད་པ་རེད། དེང་གི་དུས་འདིར་རྐྱེན་སྣ་ཚོགས་ཀྱི་དབང་གིས་བོད་སྐད་དང་བོད་ཡིག་རང་ཉིད་ཀྱིས་དོར་དང་འདོར་བཞིན་ཡོད། ཀུན་གཟིགས་པཎ་ཆེན་ཆོས་ཀྱི་རྒྱལ་མཚན་མཆོག་གིས“མི་རིགས་ཤིག་ལ་རང་གི་སྐད་དང་ཡི་གེ་ཡོད་པ་དེ་མི་རིགས་གནས་རྒྱུ་དང་མི་རིགས་ཚུགས་རྒྱུའི་རྩ་བའི་མཐུན་རྐྱེན་ཡིན”ཞེས་གསུངས་ཡོད་པ་ལས་ང་ཚོས་སྐད་དང་ཡི་གེ་དང་མི་རིགས་ཤིག་གི་དར་རྒུད་བར་གྱི་འབྲེལ་བ་རྟོགས་ཐུབ།
ངས་ནམ་རྒྱུན་གཞན་ལ་ཁ་བརྡ་བྱེད་སྐབས། སྐད་ཆའི་སུམ་ཆའི་གཅིག་ཙམ་རྒྱ་སྐད་ཀྱིས་མ་བཤད་ན་ཕ་རོལ་པོར་བརྡ་སྤྲོད་དཀའ་ལ། དེ་བཞིན་དུ་གཞན་གྱིས་ཀྱང་ང་ལ་ཁ་བརྡ་བྱེད་སྐབས། སྐད་ཆའི་སུམ་ཆའི་གཅིག་ཙམ་རྒྱ་སྐད་ཀྱིས་མ་བཤད་ན་ངས་ཀྱང་ཕ་རོལ་པོའི་བཤད་པའི་སྐད་ཆའི་དོན་མི་གོ་བས། སློབ་གྲོགས་ཚོས་རྒྱུན་དུ་ང་ལ་འཕྱ་དགོད་བྱེད་པ་དང་། དབང་རྩ་ལ་སྐྱོན་ཤོར་བ་ཞིག་ཏུ་རྩི་བཞིན་ཡོད། དེ་ལ་ཅི་ཁག སྔོན་ཆད་ངས་ཕ་རོལ་པོས་ཕ་སྐད་རྣལ་མས་ང་ལ་ཁ་བརྡ་བྱེད་དུས། དེ་དག་གིས་མཁས་ཚུལ་སྟོན་གྱིན་འདུག་སྙམ་པ་ཡིན། བསྲེས་སྐད་ཉ་ཉོག་བཤད་མཁན་མང་ལ། བོད་སྐད་རྣལ་མ་བཤད་པ་ནི་ཉིན་མོའི་སྐར་མ་ལས་ཀྱང་དཀོན་པའི་ཚུལ་དུ་གདའ་བ་འདི་སུ་ལན་པ་ཡིན། ང་ཚོས་སྔར་བཞིན་འདི་ལྟར་བྱས་ན། ནམ་ཞིག་གི་ཚེ། བརྩིགས་ན་རི་རབ་ཀྱི་དཔངས་ལས་མཐོ་ཞིང་། བཀྲམ་ན་ས་གཞི་ཁེངས་པར་བྱེད་པའི་གསུང་རབ་ལས་བོད་ཟེར་བ་ཞིག་ལོ་རྒྱུས་ཙམ་དུ་འགྱུར་ངེས་རེད། མི་རིགས་གང་ཡིན་ཡང་དེ་ལ་རང་གི་སྐད་ཆ་རེ་ཡོད་པ་དང་། ཐུན་མོང་གི་སྐད་ཆ་དེ་ལས་རང་རང་གི་ཡི་གེ་བྱུང་བ་ཡིན། དེའི་ཕྱིར། ཡི་གེས་མི་རིགས་གང་དེའི་རིག་གནས་དར་སྤེལ་གྱི་ཐད་ལ་སུས་ཀྱང་ཚབ་བྱེད་མི་ཐུབ་པའི་ནུས་པ་གལ་ཆེན་ཞིག་འདོན་གྱིན་ཡོད་པས། ང་ཚོས་རང་གི་སྐད་ཡིག་སྲུང་སྐྱོབ་དང་རང་གི་ཡི་གེ་འདི་འཛིན་སྐྱོང་སྤེལ་གསུམ་བྱས་ན། ཕྱོགས་གཅིག་ནས་རང་གི་ཕ་སྐད་གཙང་མ་མི་ཉམས་ཡུན་བརྟན་དང་། རིག་གནས་དར་སྤེལ་ལ་སྐུལ་འདེད་བྱེད་ཐུབ་ཅིང་། ཕྱོགས་གཞན་ཞིག་ནས་མི་རིགས་འདི་ཚུགས་ཐུབ་པའི་རྩ་བའི་མཐུན་རྐྱེན་ཡང་བསྐྲུན་ཐུབ་པ་ཡིན།
མདོར་ན། རང་གི་ཡི་གེ་མ་ཉམས་ན་ཕ་སྐད་ཀྱང་ཉམས་མི་སྲིད་ལ། དེ་བཞིན་དུ་ཕ་སྐད་མ་ཉམས་ན་མི་རིགས་ཀྱང་ཉམས་མི་སྲིད་པས། སྐད་ཡིག་ནི་རང་རེའི་བླ་སྲོག་ཡིན་པ་དང་། ཇི་སྲིད་སྐད་ཡིག་མ་ཉམས་བར་དུ། བོད་མི་རིགས་འདི་ཡང་ཉམས་མི་སྲིད་དོ།