སྐད་ཡིག་འཕེལ་རྒྱས་སུ་འགྲོ་བར་བཏོན་པའི་བསམ་འཆར།
སྤེལ་དུས 2011-08-24
ཡོང་ཁུངས། གངས་རྒྱན་ན་ཆུང་ཚགས་པར།
རྩོམ་པ་པོ། སྒྲོལ་མས་བསྒྲིགས།
སྤྱིར་སྐད་དང་ཡི་གེ་ནི་མི་རིགས་གྲུབ་བྱེད་ཀྱི་རྒྱུ་གཙོ་བོ་ཡིན།
བོད་མི་རིགས་ལ་གནའ་ནས་ཐུན་མོང་གི་སྐད་དང་བརྡ་སྤྲོད་ཀྱི་གཞུང་ལུགས་འཐུས་ཚང་ཞིག་ཡོད་པ་འདི་ནི་ང་ཚོའི་གཟི་བརྗིད་རེད། ཡིན་ཡང་། དུས་ཀྱི་འཕེལ་འགྱུར་དང་ཤེས་རིག་གསར་བ་དར་དྲགས་པའི་དབང་གིས་བོད་ཀྱི་སྐད་ཡིག་ལ་ངང་ངམ་ཤུགས་ཀྱིས་ཤན་ཤུགས་སྣ་ཚོགས་ཐེབས་བཞིན་ཡོད་ལ། ལྷག་པར་དུ་སྐད་ཡིག་གི་གྲུབ་ཆར་གྱུར་པའི་མིང་དང་ཐ་སྙད་གསར་བའི་རིགས་གཅིག་གྱུར་བྱས་མེད་པ་འདིས་བོད་སྤྱིའི་སྐད་བརྡར་ལྷད་ཞུགས་དང་ཞུགས་བཞིན་ཡོད་པ་དེས། སྲོལ་རྒྱུན་རིག་གནས་རྒྱུན་འཛིན་དང་གསར་དར་ཤེས་རིག་གོང་འཕེལ་དུ་གཏོང་བ་སོགས་ཕྱོགས་གང་ཅིའི་ཐད་ལ་གནོད་སྐྱོན་ཆེན་པོ་བཟོ་བཞིན་ཡོད། མིག་སྔར་དགོས་གལ་ཆེས་ཆེ་ཤོས་ནི་བོད་ཀྱི་སྤྱི་སྐད་འཕེལ་རྒྱས་སུ་གཏོང་དགོས་པ་དེ་ཡིན། སྤྱི་སྐད་འཕེལ་རྒྱས་སུ་གཏོང་བའི་འགག་རྩ་ནི་ཐ་སྙད་གསར་བའི་རིགས་གཅིག་གྱུར་བྱ་རྒྱུ་དེ་ཡིན།
རང་ཉིད་ནི་སློབ་འབྲིང་སློབ་མ་ཞིག་ཡིན་པའི་ཆ་ནས། ཕྱོགས་དེར་ནུས་ཤུགས་འདོན་བསམ་ཡང་ཆུ་ཚད་ལ་བཀག་རྒྱ་ཡོད་པས་ཅི་ཡང་བྱ་མི་ནུས་མོད། སེམས་ལ་ནམ་ཡིན་ཡང་བསམ་ཚུལ་དེ་ལྟ་བུ་ཞིག་འཆར་བཞིན་འདུག ངའི་བསམ་ཚུལ་དེ་མངོན་འགྱུར་བྱ་དགོས་ན། མི་རིགས་ཡོངས་ཀྱིས་ཐོག་མར་སྐད་ཆ་དང་སྐད་ཡིག་ཐད་ལ་རང་ནུས་ཅི་ཡོད་ཀྱིས་ཧུར་བརྩོན་བྱ་དགོས་ལ། མི་རེ་རེས་དྲི་མེད་ཀྱི་བསམ་སྦྱོར་ལ་བརྟེན་ཏེ་མི་རིགས་ལ་མདུན་ལམ་བསྐྲུན་པར་འབད་དགོས། དེ་ལྟར་བྱས་ན་མི་རིགས་ཡོངས་ལ་ཐུན་མོང་གི་བསམ་བློ་རེ་འབྱུང་ངེས་པས་རྡོག་རྩ་གཅིག་སྒྲིལ་དང་སྟོབས་ཤུགས་མཉམ་འདོན་བྱ་ཐུབ་པར་མ་ཟད། མི་རིགས་འདི་ཡང་བསྐལ་བ་མ་སྟོང་བར་དུ་གནས་ཐུབ་པ་ཡིན་ནོ།།