མཁལ་ནད་བཅོས་ཐབས།
སྤེལ་དུས 2019-01-23
ཡོང་ཁུངས། བོད་ལྗོངས་འཕྲིན་དྲ།
རྩོམ་པ་པོ། སྣང་རྡོས་བསྒྲིགས།
མཁལ་མའི་ནད་ཀྱི་རྒྱུ་རྐྱེན་དང་དབྱེ་བ། རྟགས་དང་བཅོས་ཐབས་སོགས་རྒྱུད་དང་མན་ངག་ལྷན་ཐབས་སོགས་སུ་གསལ་པོར་གསུངས་ཡོད་པས་འདིར་བསྐྱར་བཤད་བྱེད་དོན་ཆེར་མེད་མོད། འོན་ཀྱང་རྒྱུད་དོན་དང་མན་ངག་གི་བསྟན་བྱ་ལ་དངོས་ཤུགས་ཅི་རིགས་གང་ཡོད་པ་དང་དབྱེ་བའམ་ཧ་ཅང་མང་བའི་རྐྱེན་གྱིས་རྒྱུད་དོན་ལ་སྦྱངས་པ་དམན་པ་དང་རིགས་གནས་ཀྱི་ཆུ་ཚད་དམའ་བའི་སྨན་པ་ལས་དང་པོ་བ་རྣམས་ཀྱིས་རྟོགས་དཀའ་བས་དེ་དག་ལ་གཞིགས་ཏེ་གོ་སླ་ཞིང་མདོར་བསྡུས་པ་ཞིག་འབྲི་བ་ལ་བཞི་སྟེ། རྒྱུད་ལས། རྒྱུ་རྐྱེན་བརྡབས་དང་མི་ཐེག་ཁུར་བ་བཏེག རླན་སྟེང་བསྡད་དང་ཆུ་ཡི་ལས་བྱས་དང་། བང་མཆོངས་འཆུས་དང་དཀར་མངར་ཟས་བསྟེན་དྲགས། ཞེས་གསུངས་པ་ལྟར་རྟ་ཡིས་བརྡབས་པ་དང་ཁུར་ལྕི་མོ་མི་ཐེག་བཞིན་ནན་གྱིས་འཁུར་བ་དང་། རྡོ་སོགས་ལྗི་མོའི་རིགས་བཏེག་པ། ས་རླན་ཆེ་བའམ་ཡང་ན་འཁྱགས་སར་ཉལ་བ། ཆུའི་ནང་དུ་ལས་ཀ་བྱེད་པ་མང་བ། བང་རྒྱུག་དྲགས་པ། དྲག་ཤུལ་གྱི་ལས་བྱས་ཏེ་རྩ་ཁ་འཆུས་པ། མངར་ཟས་ཡུན་རིང་ཟོས་པ་སོགས་ཀྱིས་སློང་གིན་ཡོད།
སྤྱིར་ནད་འདིའི་དབྱེ་བ་བརྒྱད་རྒྱུད་ལས་གསུངས་ཀྱང་། དབྱེ་བསྡུས་དང་རྟོགས་སླ་བའི་དབང་དུ་བྱས་ཏེ་འདིར་ཚ་གྲང་གི་དབྱེ་བ་གཉིས་ལྟར་བཤད་པར་བྱ། མཁལ་ནད་ཚ་བའི་རྟགས་ནི། འཁལ་ནད་ཚ་བ་ཆང་འཐུང་བ་དང་ཧ་ཅང་དྲོས་ཆེ་བ། འགྲོ་མང་བའི་རྐྱེན་གྱིས་ནད་ཇེ་སྡུག་ཏུ་འགྲོ ཆུ་ཁ་ཚ་བ་དང་ཤ་རུས་ཀྱི་བར་ན་བ། རྩ་རྒྱུས་ཅུང་གྲིམས་ཤིང་། ཁྱད་པར་དུ་འཁལ་རྩ་འབར་ཉམས་ཡོད་པ་དང་། ཆུ་མདོག་ཅུང་དམར་ལ་ཀུ་ཡ་བཏིང་དུ་ཡོད་ཅིང་། ལྦུ་བ་ཞིབ་པ་བཅས་ཀྱི་རྟགས་ཡོད། ད་དུང་ནད་པ་ལ་ལར་མཁལ་ནད་དང་འབྲེལ་བར་ས་བོན་འཛག་པ་དང་། ཡང་ན་འཁྲིག་སྤྱོད་སྐབས་ན་ཟུག་གཏོང་བ་དང་ཆུ་ཁ་ཚ་བ། ཡང་ན་རྣག་ཁྲག་འཛག་པ། ཁྱད་པར་དུ་སྐྱེས་པ་ཡིན་ན་མཚན་མ་གྱེན་དུ་ལངས་ན་ན་ཟུག་ལྷག་ཏུ་ཆེ་བ་སོགས་ཀྱི་མངོན་ཚུལ་ཡོད།
མཁལ་ནད་གྲང་བའི་རྟགས་ནི། མཁལ་རྐེད་ན་བ་དང་དགྱེ་སྒུར་དཀའ་བ། དཔྱི་མིག་དང་བརླའི་ཕྱི་རྒྱུད་གཟེར་ཞིང་རྣ་བ་འུར་བ། ཆུ་སྲི་བ། ནད་འདི་བྱུང་ནས་ཅུང་འགོར་བ་ཡིན་ན་རྐང་བོལ་དང་གདོང་ཅུང་ཟད་སྐྲངས་ཀྱི་ཡོད། འཕར་རྩའི་རྒྱུ་བ་ཞན་ཞིང་གྲངས་དལ་ལ་མི་གསལ་བ་ཡིན། ཆུ་ནི་དཀར་ལ་ལྦུ་བ་ཞིབ་པ་དང་ཀུ་ཡ་སྲབ་མོ་གཏིང་དུ་ཡོད་པ་དང་། ལ་ལར་ཁམས་དཀར་རམ་རྩིག་མ་ལྟ་བུ་དྲི་ཆུའི་ནང་དུ་ཡོད་ལ། སྒལ་འདབས་ཀྱི་བཤུལ་ཤ་ན་བ་དང་ཚིགས་བཅུ་བཞི་པ་གཟེར་བ་བཅས་ཀྱི་མངོན་ཚུལ་ཡང་ཡོད།
བཅོས་ཐབས་ནི་མཁལ་ནད་ཚ་བ་ཡིན་ཚེ། བསིལ་བ་ཁོ་ནས་བཅོས་ན་མི་འཕྲོད་དེ། རྒྱུ་མཚན་ནི་མཁལ་མ་ཆུ་ཁམས་གྲང་བའི་རྟེན་ཡིན་པས་སྨན་གསོ་ཅུང་དྲོན་མོས་བཅོས་ན་བཟང་ཡང་དྲོད་ཕྱོགས་ཧ་ཅང་ཐལ་དྲགས་ན་ནད་ཚ་བ་ཡིན་སྟབས་དྲག་སྐྱེད་འབྱུང་དཀའ་བའང་ཤེས་དགོས་སོ། སྨན་ནི་མཁལ་ཞོ་བཞི་བ་དང་ཕྱི་རྒྱུད་གུར་གུམ་བདུན་པ། གུར་གུམ་བཅུ་གསུམ། ཨ་རུ་བཅུ་བར་ཁྱུང་བསྣན། སར་ཁྱུང་། སྐྱེར་ཤུན་བརྒྱད་པ་དང་ཡང་ན་དེ་ལ་ཁྱུང་ལྔ་བསྣན། པད་རག་མདོག་ལྡན། ཨ་རུ་བཅོ་བརྒྱད། ཨ་རུ་ཉི་ཤུ་རྣམས་གཏོང་བ་དང་། མཁལ་གྲང་ལ། ཟས་སྤྱོད་དྲོན་མོ་བསྟེན་ཏེ། སྨན་བསམ་འཕེལ་ནོར་བུ་དང་ཨ་གར་སོ་ལྔ། ཨ་གར་ཉེར་བཞི། གོ་ཡུ་ཉེར་བརྒྱད། སུག་སྨེལ་ཉེར་ལྔ་བཅས་བསྟེན། ཁམས་འཛག་པ་ལ་སྨན་པ་ད་རག་མདོག་ལྡན་དང་སར་ཁྱུང་བསྟེན། ཟླ་བ་གྱེན་ལྡོག་ལ་ཁྲག་གཅོད་སྨན་གྱི་ཁ་ཚར་བཅས་བཏང་ན་བཟང་། བུད་མེད་ཡིན་ན་འོལ་སེ་ཉེར་ལྔ་བཏང་ན་ལེགས། སྤྱིར་ན་ནད་བཅོས་ཐབས་ལ། ཟས་སྤྱོད་སྨན་དཔྱད་བཞི་གས་བཅོས་པར་གསུངས་ཡོད་ནའང་། སྨན་པ་ལས་དང་པོ་བ་རྣམས་ཀྱིས་གཏར་སྲེག་སོགས་ཀྱིས་གསོ་བཅོས་བྱེད་པ་ནི་ཉེན་ཆེ་ཕྱིར་འདིར་མ་བྲིས་སོ། འོན་ཀྱང་། གཞུང་དོན་ལ་སྦྱངས་པ་དང་མན་ངག་དང་ལྡན་པ་ཡིན་ན་བཅོས་ཐབས་ཐམས་ཅད་ལ་འབད་ན་བཟང་བ་སྨོས་ཅི་དགོས། སྤྱིར་དམ་པ་གོང་མ་རྣམས་ཀྱིས་ནད་ལ་སྤྱི་བཅོས་དང་སྒོས་བཅོས་སོགས་སྡེབས་ཀ་བརྗོད་ཀྱིས་མི་ལང་བ་གསུངས་ཡོད་པའི་ནང་ནས་རང་ལ་ཚང་བ་དང་ཁྱད་ཐོན་སྙམ་པ་གང་ཡིན་ཡང་གཙང་ཞིང་ཚད་དང་མཐུན་པར་བསྡེབས་ཏེ་སླ་བཅོས་མི་བྱེད་པ་ནི་གནད་ཀྱི་དམ་པའོ།།
