ཧྥ་རན་སེའི་ཙུང་ཐུང་མཱ་ཁེ་ལུང་གིས་དེ་རིང་ནས་བཟུང་རང་རྒྱལ་ལ་རྒྱལ་དོན་འཚམས་འདྲི་བྱེད་པ། ཚོགས་ཆེན་བཅུ་དགུ་པའི་དགོངས་དོན་བགྲོ་གླེང་འཛིན་གྲྭ་སློབ་འགོ་ཚུགས་པ། བོད་སྐྱོད་འབུམ་རམས་པའི་ཞབས་ཞུ་ཚོགས་པས་མུ་མཐུད་རིག་སྟོབས་རོགས་སྐྱོར་བྱས་པ། བོད་ལྗོངས་ཀྱི་གཞོན་ནུ་ལོ་ཆུང་གི་ཚན་རིག་ལས་དོན་ཁང་ཐོག་མ་ལྷ་སར་བཙུགས་པ། བོད་ཀྱིས་རང་སྐྱོང་ལྗོངས་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་བརྒྱ་ལྷག་ཙམ་གསར་དུ་བསྣན་པ། ཞིང་ལས་དངུལ་ཁང་བོད་ལྗོངས་ཡན་ལག་དངུལ་ཁང་གིས“ངོ་རིས་བཤེར་ནས་དངུལ་ལེན་པའི”བྱེད་ནུས་བཏོན་པ། ཀྲུང་དབྱང་གི་ཁོར་ཡུག་སྲུང་སྐྱོབ་སྐོར་ཞིབ་རུ་ཁག་ཨང་དྲུག་པས་བོད་ལྗོངས་ལ་གྱོད་དོན་༡༧བརྒྱུད་སྤྱོད་བྱས། བོད་ལྗོངས་ཀྱི་གྲོང་གསེབ་ཀྱི་མི་སྡོད་ཁོར་ཡུག་བཅོས་སྒྲིག་ལ་གྲུབ་འབྲས་མངོན་གསལ་དོད་པོ་ཐོབ་པ། བོད་ཡིག་དཔེ་མཛོད་ཀྱི་གཞི་གྲངས་ལྟེ་གནས་དབུ་བརྙེས་པའི་མཛད་སྒོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་སུ་སྤེལ།
ཀྲུང་གོའི་བོད་ལྗོངས་དྲ་བ། > དམངས་སྲོལ། > ཁང་གཞིས།

བོད་མིའི་སྡོད་གུར།

སྤེལ་དུས 2013-01-08 ཡོང་ཁུངས། ཀྲུང་གོའི་བོད་ལྗོངས་དྲ་བ། རྩོམ་པ་པོ། སྒྲོལ་མས་བསྒྲིགས།

         གནའ་དུས་ཡངས་པའི་བོད་ལྗོངས་ས་མཐོར་འཚོ་སྡོད་བྱེད་པའི་བོད་རིགས་རྣམས་ཀྱིས་ས་མཐོའི་རང་བྱུང་གནས་བབ་དང་བསྟུན་ནས་འབྲོག་ལས་བྱེད་ཀྱི་ཡོད་པས་མི་རྣམས་ཀྱི་སྡོད་གནས་ཀྱང་མང་ཆེ་བ་གུར་ཡིན་ཞིང་། དེ་དུས་ཀྱི་གུར་ནི་ཕལ་ཆེར་བོད་རང་གི་ཁྱད་ཆོས་ལྡན་པའི་ཕྱིང་གུར་དང་སྦྲ་གུར་སོགས་ཡིན་པར་མངོན། དེ་ནས་རིམ་བཞིན་བོད་ལྗོངས་ས་མཐོར་བཟོ་རྩལ་ཐུན་མོང་མིན་པའི་ས་རྡོ་ཤིང་གསུམ་གྱི་ཁང་ཁྱིམ་དར་ནས་ད་ཆ་དེང་དུས་ཅན་གྱི་ཁང་ཆེན་གྱིས་ཁྱབ་པར་གྱུར་ཀྱང་གནའ་སྲོལ་གོམས་གཤིས་རྒྱུད་འཛིན་བྱེད་མཁན་བོད་རིགས་རྣམས་གུར་ནང་སྡོད་རྒྱུར་དགའ་ལ་གུར་གྱི་བཟོ་རྩལ་དང་རྒྱུ་སྤུས་ཀྱང་ཇེ་ལེགས་སུ་གྱུར། གུར་ཆེ་ཆུང་དང་། ལེགས་ཉེས་ཀྱི་དབྱེ་བ་ནི་ཧ་ཀྱང་མང་ཞིང་། གུར་ཆེ་བའི་མ་གུར་ཁོ་ནར་ཁང་པ་ཀ་བ་བཅུ་གྲངས་དང་ཆུང་ཤོས་ལའང་ཁང་པ་ཀ་བ་གཅིག་ཙམ་གྱི་རྒྱ་ཁྱོན་ཡོད་པའི་བཟོ་དབྱིབས་གྲུ་བཞི་དང་། གྲུ་བཞི་ཕྲེད་ནར་ཡིན་པ། རྒྱུ་བཟང་གོས་དང་། འགོ་སྣམ། རས་སོགས་ཡིན་པ་ལ་འགོ་སྣམ་དང་། རས་སོགས་ཚོན་ཕྲ་དང་ཚོན་ཕྲ་མིན་པའི་པ་ཊ། གུར་གྱི་སྐེད་པ་ཁོར་མོ་ཡུག་ཏུ་འཇའ་གསུམ་རྩེག་ཀྱི་གཤམ་བུ་སྔོན་པོ། མ་གུར་གྱི་མདུན་ངོས་སུ་མ་གུར་དང་གཞི་མཚུངས་ཀྱི་ཐོག་མེད་ཡོལ་སྒོར་ཆེ་ཆུང་སྣ་ཚོགས་དང་། ལ་ལར་ཡོལ་སྒོར་ཕྱི་ནང་རིམ་པ་གཉིས་ཀྱང་ཡོད། དེ་སྔོན་ས་སྐྱ་ནས་བཟུང་བོད་སོག་གི་འབྲེལ་བ་ཇེ་དམ་དུ་གྱུར་དབང་ལས་བྱུང་བ་ཡིན་ནམ་གང་ལྟར་བོད་ཀྱི་བླ་དཔོན་ཆེ་ཁག་ཕྱོགས་ཐོན་ལ་སོག་གུར་ནང་དུ་རྩིབ་སྒྲོམ་དང་བར་ཚང་ཡོད་པའི་སྒོར་དབྱིབས་ཅན་གྱི་གུར་ཡང་སྤྱོད་ཀྱི་ཡོད།

དཔེར་ན། ཏྰ་ལའི་བླ་མ་ཕྱོགས་ཕེབས་སྐབས་བཞུགས་ཞག་འཁེལ་སར་ཊྰ་ལའི་བླ་མའི་དབུ་གུར་བཟང་གོས་སེར་པོ་སོགས་ལས་བཟོས་པའི་བོད་གུར། སོག་གུར་དབྱིབས་ཅན། དེ་མིན་ཕྱིར་གཟིག་པགས་སོགས་གཡོགས་པའི་སོག་གུར་སོགས་ཡོད་པ་དབུས་སུ་བྱས་ཐོག་སྐུ་འཁོར་རྣམས་ལ་རང་རང་གི་གོ་བབས་ལྟར་ཡོད་པའི་གུར་སྟད་པ་ཕྱི་ནང་རིམ་པ་དབྱེ་བའི་དབུ་གུར་སྒར་སྒྲིག་ཡོད། ལྷག་པར་ཏྰ་ལའི་བླ་མ་སྐུ་ཕྲེང་ན་རིམ་གྱི་ཡང་སྲིད་མཆོག་སྤྲུལ་ཐོག་མ་ལྷ་སར་གདན་འདྲེན་ཞུ་སྐབས་དང་། དེ་མིན་ཕྱོགས་ཕེབས་གནང་བར་ཕེབས་བསུ་ཕེབས་སྐྱེལ་སོགས་གཟབ་རྒྱས་ཀྱི་མཛད་ཆེན་ཁག་ལ་སྤྱོད་པའི་དབུ་གུར་རྨ་བྱ་ཆེན་མོ་ཞེས་དབུ་གུར་ལྡིང་གུར་ཆེན་པོ་གཞི་རས་ལ་འགོ་སྣམ་ཚོན་ཕྲའི་པ་ཊས་ཡོངས་སུ་ཁེངས་ཤིང་། རྩེ་ཐོག་ཏུ་གསེར་ཟངས་ཀྱི་གཉྫིར་སོགས་ཀྱིས་ལེགས་པར་མཛེས་པ། གཉྫི་རའི་གཡས་གཡོན་གཉིས་སུ་གསེར་བཟང་ལས་གྲུབ་པའི་རྨ་བྱའི་གཟུགས་ཡོད་པ། བཟང་གོས་ཀྱི་ཀ་འཕན་སོགས་མཆོད་རྫས་ཀྱི་རྒྱན་འགྲེམས། མདུན་དུ་གཞི་མཚུངས་ཀྱི་ཡོལ་སྒོར། པ་ཊ་ཅན་གྱི་བྱ་བ་གཡབ་བཅས་རང་འགྲིག་རྣམ་པར་བཀྲ་ཞིང་བརྗིད་ཉམས་དང་ལྡན་པ་རྨ་བྱ་དང་འདྲ་བའི་ཆ་ནས་བཏགས་པ་ཡིན། གཞན་ཡང་དགོན་པ་ཆེ་ཁག་ལ་དགེ་འདུན་ཇི་ཡོད་གཤོང་པའི་ཚོགས་གུར་དང་སྒེར་ཁག་འབྱོར་ལྡན་ཚོར་ཡང་ཆེ་ཆུང་དང་། བཟོ་དབྱིབས་འདྲ་མིན། འགོ་སྣམ་དང་། རས་སོགས་ཀྱི་པ་ཊ་ཡོད་མེད་བཅས་སྣ་ཚོགས་ཡོད་མེད་བཅས་སྣ་ཚོགས་ཡོད་པ་དང་། གཉེར་གུར་དང་ཐབ་གུར་ལ་སྤྱོད་བྱེད་གཞི་གདན་རས་དཀར་ཡིན་པ་དང་། མགོ་སྦྲ་ནག་ཡིན་པ། མཐའ་འཇགས་དང་སྦབ་ལེ་རས་དཀར་ཡིན་པ་གུར་དཀར་རུ་མགོ་ནག་ཞེས་པ་ཞིག་ཡོད། གུར་དེ་ཐོག་སྦྲ་ནག་ཡིན་པས་ཆར་ཐོག་འགོག་པ་དང་གཤམ་རས་ཡིན་པས་བསིལ་ལ་ཚ་སུབས་འགོག་བཅས་ཀྱི་ཁྱད་ཆོས་ལྡན་ཡོད། ད་ལྟའང་བོད་བྱང་ཐང་གི་འབྲོག་ཁུལ་དང་།

 དེ་མིན་ཡུལ་འབྲོག་གི་འབྲོག་པ་ཁྱེར་འཁོས་དྲག་ཞན་ཇི་ལྟར་ཡིན་ཀྱང་མང་ཆེ་བའི་སྡོད་གནས་ནི་སྦྲ་གུར་ཡིན། སྦྲ་གུར་གྱི་བཟོ་དབྱིབས་མང་ཆེ་བ་ནི་གྲུ་བཞི་དང་། ཅུང་སྒོར་ཙམ་ཡིན། ཆེ་ཆུང་ནི་དབུལ་ཕྱུག་དང་། ཁྱིམ་བར་ཁང་པ་ཀ་བ་ཁ་ཤས་ཀྱི་རྒྱ་ཁྱོན་ཡོད། སྦྲ་གུར་ནང་ཁྱིམ་མི་ཚང་མ་ཉལ་སྡོད་བྱེད་ཐོན་སྐྱེད་དང་འཚོ་བའི་ཉེར་སྤྱད་དེ་མིན་རྒྱུ་དངོས་འཛིན་ཆས་ཚང་མ་འཇོག་གི་ཡོད། རྩྭ་ར་ལེགས་པར་སྤྱོད་ཕྱིར་འབྲོག་པ་རྣམས་སྡོད་གནས་ཡང་ཡང་སྤོ་དགོས་སྟབས་གུར་ནི་ཁྱེར་བདེ་བ་དང་། རྒྱུ་ནི་འབྲི་གཡག་གི་རྩིད་པ་ཤ་སྟག་ཡིན་པས་གངས་ཆར་རླུང་གསུམ་གྱི་གྲང་ངད་། ཆར་ཆུའི་ཐིག་པ་འགོག་ཐུབ་པ་སོགས་ཀྱི་དམིགས་བསལ་གྱི་ཁྱད་ཆོས་མང་པོ་ལྡན་ཡོད། ད་དུང་དེང་དུས་རས་ཆ་ཉོ་བདེ་བས་བོད་བྱང་ཐང་གི་འབྲོག་ཁུལ་དུའང་དབྱར་དུས་རྣམ་པར་བཀྲ་བའི་རས་གུར་ཚོ་དང་ཚོ་བྱས་ནས་མཐོང་རྒྱུ་ཡོད། དེ་མིན་བྱ་བྲལ་རི་ཁྲོད་པ་དང་སྡོད་གནས་ཆགས་རྟེན་དང་བྲལ་བའི་སྤྲང་པོ་རྣམས་ཀྱིས་ཀྱང་འཁོས་བསྟུན་རས་གུར་ཐབས་ཆགས་ཙམ་བཟོས་ནས་གར་འགྲོའི་སར་ཁྱེར་ཏེ་ཐང་སྡེར་དུ་སྡོད་མ་དགོས་ཙམ་བྱེད་ཀྱི་ཡོད་པ་བཅས་ནི་བོད་རིགས་ཀྱི་གུར་གྱི་གནས་ཚུལ་མདོར་བསྡུས་སོ།