གཤིན་པོའི་འདས་མཆོད་བྱེད་སྟངས་དང་འདས་མཆོད་བྱེད་དགོས་པའི་རྒྱུ་མཚན། བར་དོའི་ངོ་སྤྲོད་འཇུག་གི་བསླབ་བྱ་བཅས་བཞུགས་སོ། །ཞེས་པའི་དཔེ་ཆའི་དོན་ཚན་གཉིས་པ་ཆ་ཚང་གཤམ་གསལ།གཤིན་པོའི་འདས་མཆོད་བྱེད་སྟངས་ལས།
དང་པོ། གཤིན་པོའི་ལུས་བཅོས་ཐབས་ནི། གཤིན་པོ་དེ་ཉིད་ཚེ་ལས་འདས་ཁར་རང་ཉིད་ཀྱིས་སམ་གཞན་ཞིག་གིས་ཚེ་ལས་འདས་ཁར་མགོ་བྱང་དུ་བསྟན། གཞོགས་གཡས་ས་ལ་ཕབ་སྟེ་སེང་གེའི་ཉལ་ཐབས་ཀྱིས་མཅོས་ཏེ། དབུགས་སྣ་སྦུག་གཡོན་ནས་གཏོང་ཐུབ་པ་ཞིག་བྱ་དགོས། དེ་གང་ལགས་ཟེར་ན། སྣ་གཡས་ནས་འགྲོ་འོང་བྱེད་པའི་རླུང་ནི་ཉོན་མོངས་པའི་རླུང་དང། སྣ་གཡོན་ནས་འགྲོ་འོང་བྱེད་པའི་རླུང་ནི་ཡེ་ཤེས་ཀྱི་རླུང་རེད། དེར་བརྟེན།རླུང་སྣ་གཡོན་ནས་དབུགས་གཏོང་ཐུབ་པ་བྱས་ཏེ། མདུན་དུ་རང་གང་ལ་མོས་པའི་ཞིང་ཁམས་དང། ཞིང་ཁམས་དེའི་སྟོན་པའི་སྐུ་འདྲ་གཤམས་པའམ། ཡང་ན་ཡིད་ལ་བསྒོམས་ཏེ་རྣམ་ཤེས་དེ་ཡི་རླུང་དང་མཉམ་དུ་སྣ་སྦུག་གཡོན་ནས་སངས་རྒྱས་ཀྱི་སྐུ་དེར་འཕོས་ཏེ། སེམས་ཅན་གྱི་དོན་དུ་སྤྲུལ་སྐུ་འབྱུང་བའི་སེམས་བསྐྱེད་དང། སྨོན་ལམ་བྱས་ན། དག་པའི་ཞིང་དེར་རམ།མིན་ཀྱང་མཐོ་རིས་ཀྱི་གནས་སུ་ཆོས་ལྡན་གྱི་ལུས་རྟེན་ཐོབ་ཐུབ་ཀྱི་ཡོད་པ་རེད།
གཉིས་པ།འཕོ་བ་ཞུ་སྟངས་ནི། གཤིན་པོའི་ཕུང་པོ་དེར་བླ་མའམ་དགེ་བའི་གཤེས་གཉེན་ནམ། རྣལ་འབྱོར་པ་གང་རུང་གིས་འཕོ་བ་གནང་མ་གྲུབ་པའི་སྔོན་དུ་སུས་ཀྱང་ལག་པས་རེག་མི་རུང་ཞིང། མ་འགུལ་བར་རང་སོར་བཞག་དགོ། དེ་མིན་ཐོག་མར་སུས་ལག་པ་འཆང་ས་དེ་ནས་འདས་པོའི་རྣམ་ཤེས་ཕྲ་མོ་ཕྱིར་ཐོན་གྱི་ཡོད་པ་རེད། དེ་ཡང་སྐེད་པ་མན་ཆད་ངན་སོང་གི་གནས་དང། སྐེད་པ་ཡན་ཆད་ནས་འཆང་ན་བདེ་འགྲོར་སྐྱེས་ཟེར་སྲོལ་ཡོད། རྣམ་ཤེས་ཐོན་སའི་སྒོ་ནི་དགུ་ཡོད། རྣམ་ཤེས་འཚོག་ནས་ཐོན་ན་གཟུགས་མེད་སྐྱེ་མཆེད་མུ་བཞིའི་ལྷ་གནས་སུ་སྐྱེས། དེ་བཞིན་སྨིན་མཚམས་ནས་ཐོན་ན་གཟུགས་ཁམས་གནས་རིགས་བཅུ་བདུན་གྱི་ལྷ་གནས་སུ་སྐྱེས། ལྟེ་བ་ནས་ཐོན་ན་འདོད་ལྷ་རིགས་དྲུག་གི་ལྷ་གནས་སུ་སྐྱེས། རྣ་བ་གཉིས་ནས་ཐོན་ན་མི་འམ་ཅིར་སྐྱེས། སྣ་སྒོ་གཉིས་ནས་ཐོན་ན་གནོད་སྦྱིན་ལ་སྐྱེ། མིག་གཉིས་ནས་ཐོན་ན་མིར་སྐྱེ། ཁ་དང་གསང་གནས་ནས་ཐོན་ན་ཡི་དྭགས་སུ་སྐྱེས། ཆུ་ལམ་ནས་ཐོན་ན་དུད་འགྲོར་སྐྱེས། འོག་སྒོ་བཤང་ལམ་ཐོན་ན་དམྱལ་བར་སྐྱེ་བ་ཡིན། སྤྱི་གཙུག་འཚང་པའི་བུ་སྒོ་ཐར་པའི་སྒོ་ཡིན་པས།རྣམ་ཤེས་དེ་ནས་ཐོན་ཐུབ་ན་དག་པ་མཁའ་སྤྱོད་ཀྱི་གནས་སུ་སྐྱེས་པར་གསུངས་པས།འཕོ་བ་ཞུ་བ་དེ།བླ་མ་རྩ་ཆེན་ནམ། དགེ་བའི་གཤེས་གཉེན་ནམ། རྣལ་འབྱོར་པས་འཁོར་བར་སྐྱེས་བྱེད་ཀྱི་སྒོ་དགུ་པོ་དེ་དམིགས་པས་བཀག་ནས། སྒོ་གཅིག་འཚང་བའི་སྦུ་སྒོ་དེ་ཕྱེ་ནས་འདས་པོའི་རྣམ་ཤེས་དེ་ཐར་པའི་ལམ་དུ་བསྐྱོད་ཐབས་བྱེད་པའི་གསང་སྔགས་ཀྱི་ཐབས་ལམ་ཁྱད་པར་དུ་འཕགས་པ་ཞིག་རེད། དེར་བརྟེན། འཕོ་བའི་སྦྱངས་རྟགས་ཐོན་པའི་བླ་མའམ། དགེ་བའི་གཤེས་གཉེན་ནམ། རྣལ་འབྱོར་གང་རུང་ཞིག་འཆི་ཁར་གདན་ཞུ་བྱས་ཏེ་ཕྱི་དབུགས་ཆད། ནང་དབུགས་མ་ཆད་པའི་བར་དེར་འཕོ་བ་ཞུ་དགོས། གལ་ཏེ་གདན་ཞུ་མ་ཐུབ་ཚེ་རྒྱང་འཕོ་གནང་རོགས་ཞུ་དགོས་པ་མ་ཟད། ཕུང་པོའི་མགོ་བལྟ་ཡུལ་ཇི་འཁེལ་གསལ་པོ་ཞུ་དགོས། ཡང་བླ་མ་འགའ་ཞིག་ནས་འཕོ་རྫས་རིལ་བུ་གནང་སྲོལ་ཡོད་པས། རིལ་བུ་དེ་གནང་ན་འདས་པོའི་ཕུང་པོར་གཞན་གྱིས་ལག་པས་མ་རེག་གོང་ཁྱོ་ག་རིགས་བཟང་གཅིག་གིས་ལག་པ་བཀྲུས་ཏེ་འབྲི་མར་རམ། བ་མར་གང་རུང་འདས་པོའི་སྤྱི་གཙུག་ལ་སྦྱར། དེའི་སྟེང་འཕོ་རྫས་རིལ་བུ་བཞག་དགོས།འཕོ་བ་གྲུབ་ནས་ཆུ་ཚོད་ཁ་ཤས་སོང་རྗེས་ཕུང་པོར་ལག་པ་ཐོག་མར་འཆང་བ་པོས། ཐོག་མར་ཕུང་པོའི་སྤྱི་གཙུག་གི་སྐྲ་ནས་འཐེན་ཙམ་བྱས་ཏེ། དེ་ནས་ལག་པ་འཆང་རུང་། འདས་པོའི་རྣམ་ཤེས་སྒོ་དགུ་གང་རུང་ནས་ཐོན་ཐུབ་ཀྱང་། སྤྱི་གཙུག་འཚང་པའི་བུ་སྒོ་ནས་ཐོན་དཀའ་ཞིང་། དེ་ནས་ཐོན་ཐུབ་ན། སྡིག་པོ་ཆེ་ཡིན་ནའང་། བདེ་འགྲོ་ལྷ་མིའི་རྟེན་བཟང་ཐོབ་པ་སོགས་ཕན་ཡོན་རྒྱ་ཆེར་གསུངས། དེར་བརྟེན། ས། དགེ། བཀའ། རྙིང་ཚང་མའི་གསང་སྔགས་ཀྱི་ཐབས་ལམ་ཟབ་མོ་འཕོ་བ་གནས་སྨིན་ཞུ་རྒྱུ་དེ་འདས་པོའི་དགེ་རྩ་གལ་ཆེ་ཤོས་ཞིག་ཡིན།