དེ་ཡང་ལོ་རེའི་བོད་ཟླ་དྲུག་པའི་ཚེས་བཞི་ཉིན་བོད་པ་ཚོས་རྟག་ཏུ་གཏོང་བའི་དུས་ཆེན་ཆེ་གྲས་ཤིག་ཡིན། ཆོས་འབྱུང་ལོ་རྒྱུས་དག་ལས་གསལ་བ་ལྟར་ན། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་སངས་རྒྱས་ནས་རེ་ཞིག་མི་སྨྲ་ནགས་ཀྱི་དབྱིངས་སུ་བཞུགས་པའི་ཚེ། ལྷའི་རྒྱལ་པོ་ཚངས་པ་དང་། བརྒྱ་བྱིན་གྱིས་གསེར་གྱི་འཁོར་ལོ་རྩིབས་སྟོང་འབར་བ་དང་། ཆོས་དུང་དཀར་པོ་གཡས་སུ་འཁྱིལ་བ་ཕུལ་ཏེ་ཆོས་འཁོར་བསྐོར་བར་བསྐུལ་བའི་གསོལ་བ་བཏབ་པ་ན། ཟླ་དྲུག་པའི་ཚེས་བཞི་ཉིན་དུས་ལ་བབས་པར་གཟིགས་ནས་འཁོར་ལྔ་སྡེ་བཟང་པོ་ལ་བཀའ་དང་པོ་བདེན་པ་བཞིའི་ཆོས་ཀྱི་འཁོར་ལོ་བསྐོར་བ་རེད། དུས་དེ་ནས་བཟུང་གང་གི་རྗེས་འབྲངས་པ་ཚོས་དྲན་རྟེན་གྱི་ཚུལ་དུ་ལོ་རེའི་དུས་ཚོད་དེའི་ནང་འཆར་ཅན་བཞིན་ཆོས་ཀྱི་མཛད་སྒོ་སྤེལ་བའི་གོམས་སྲོལ་ཆགས་པ་མ་ཟད། རྗེས་སུ་རིམ་འགྲོས་ཀྱིས་ཆོས་དང་འབྲེལ་ཆེ་བའི་དུས་ཆེན་དེ་དམངས་ཁྲོད་ཀྱི་དུས་ཆེན་ཞིག་ལ་གྱུར་པ་རེད། དེ་ཉིན་བོད་པ་ཚོས་དགོན་པ་དང་ལྷ་ཁང་སོགས་ལ་ཕེབས་ནས་མཆོད་མཇལ་གང་ལེགས་ཞུ་བ་མ་ཟད། གླིང་ག་སོགས་ལ་ཕེབས་ནས་ཇ་འཐུང་ཆང་འཐུང་དང་གླུ་གར་རྩེད་འཇོའི་རིགས་ལ་རོལ་བའི་གོམས་སྲོལ་ཡོད།
འབྲུག་མོས་ཞུ་དག་བྱས།