དགུན་དུས་བོད་ལྗོངས་སུ་གནས་སྐོར་དུ་ཡོང་མཁན་རིམ་བཞིན་ཇེ་མང་དུ་གྱུར། གྲོང་ཚོར་དགུན་ཁའི་གུང་གསེང་གི་གསབ་སྦྱོང་འཛིན་གྲྭ་གཉེར་བ། མཚོ་སྔོན་གྱིས་ཆུ་བོ་དང་མཚོའི“གང་བྱུང་བཞིའི” གནད་དོན་756དག་ཐེར་བྱས་པ། བདེན་འཚོལ་དུས་དེབ་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་ལོ་རྒྱུས་དངོས་གཙོ་རིང་ལུགས་རྒྱུན་འཁྱོངས་ཀྱིས་དེང་རབས་ཀྲུང་གོའི་མར་ཁེ་སི་རིང་ལུགས་འཕེལ་རྒྱས་ཀྱི་མཐོ་ཚད་གསར་པ་རྒྱུན་ཆད་མེད་པར་གཏོད་དགོས་ཞེས་པ་སྤེལ་བ། བོད་རང་སྐྱོང་ལྗོངས་སྲིད་གྲོས་སྐབས་བཅུ་གཅིག་པའི་ཚོགས་འདུ་ཐེངས་གསུམ་པ་གཟབ་རྒྱས་ངང་འགོ་ཚུགས་པ། མང་ཚོགས་ཀྱི“མགྲིན་ཚབ་པ”ཡག་པོ་ཞིག་བྱེད་ཀྱི་ཡིན། “པེ་ཅིང་དུ་འཛོམས་པ”ཞེས་པའི་སྐབས་དང་པོའི་རྒྱལ་སྤྱིའི་ཐང་གའི་སྒྱུ་རྩལ་འགྲེམས་སྟོན་དང་འཛམ་གླིང་ཐང་གའི་སྒྱུ་རྩལ་ཚོགས་ཆེན་པེ་ཅིང་དུ་གཟབ་རྒྱས་ངང་སྤེལ་བ། 2019ལོའི་རྒྱལ་ཡོངས་ཕུལ་བྱུང་དགེ་རྒན་གྱི་གཟེངས་རྟགས་ཐོབ་མཁན་དགེ་རྒན་ལྷ་རྩེ་རྒྱལ། “ཕྱིར་སྐྱོད་དཀའ་བའི”དཀའ་གནད་བསལ་བས་མང་ཚོགས་ལ་སྟབས་བདེ་བྱུང་བ། མང་ཚོགས་ཚོའི་བདེ་ཐང་གི་སྲུང་སྐྱོང་པ།
ཀྲུང་གོའི་བོད་ལྗོངས་དྲ་བ། > དམངས་སྲོལ། > ཚ་ཤོས།

འུར་རྡོར་རིགས་ག་ཚོད་ཡོད་མེད་ཁྱེད་ཀྱིས་ཤེས་སམ།

སྤེལ་དུས 2021-05-31 ཡོང་ཁུངས། བོད་ལྗོངས་ཉིན་ཚགས རྩོམ་པ་པོ།

         འུར་རྡོ་ནི་ཐག་པ་རིང་ཚད་སྤྱི་ཁྲེ་གང་དང་ཕྱེད་ཀ་ཙམ་ཡོད་པ་ལ་ཐག་པའི་དཀྱིལ་དུ་རྡོ་བླུགས་ས་འུར་མཐིལ་ཞེས་པ་ཅུང་ཞེང་ཆེ་བ་ཞིག་ཡོད་པ་ལ་ཟེར་ཞིང་། ཐག་སྣེ་གཅིག་ལ་འུར་ལྕེ་ཞེས་པ་ཐག་པ་ཕྲ་མོ་ཞིག་བསྒར་ཡོད་པས་འུར་རྡོ་འཕེན་སྐབས་འུར་ལྕེས་སྐད་སྒྲ་ཐོན་པ་དང་། ད་དུང་རྔ་དམར་གྱི་རྒྱན་ཡང་སྤྲས་སྲོལ་ཡོད། འུར་རྡོ་ལེགས་པ་ནི་སྐུད་པ་དཀར་ནག་གིས་བསླས་པའི་མིག་རིས་དགུ་ཡོད་པར་འུར་རྡོ་ཆུ་མིག་དགུ་སྒྲིལ་ཟེར། འུར་རྡོ་ནི་བོད་རིགས་ཞིང་འབྲོག་མང་ཚོགས་དང་། ལྷག་པར་འབྲོག་ཁུལ་གྱི་ཕྱུགས་རྫི་བར་མེད་དུ་མི་རུང་བའི་སྟབས་བདེ་ལ་གོ་ཆོད་པའི་ལག་ཆ་བཟང་པོ་ཞིག་ཡིན། ཞིང་པས་ཞིང་སྲུང་དང་ནགས་སྲུང། ཕྱུགས་རྫི་བ་རྣམས་ཀྱིས་ཕྱུགས་ཁྱུ་འདེད་འགུག ཕྱུགས་རིགས་ལ་གནོད་པའི་གཅན་གཟན་འགོག་པ་སོགས་བྱེད་ཐུབ་པ་མ་ཟད། ད་དུང་དགྲ་འཐབ་ཀྱི་ཐོག་མཚོན་ཆའི་གོ་ཡང་ཆོད་ཐུབ། 
         འུར་རྡོར་རྒྱུ་ཆ་མི་འདྲ་བའི་ཆ་ནས་རིགས་ཀྱང་མི་འདྲ་བ་མང་བ་སྟེ། རྩིད་པའི་འུར་རྡོ་དང་། བལ་གྱི་འུར་རྡོ། ར་སྤུའི་འུར་རྡོ། རྒྱུན་བུའི་འུར་རྡོ། དེ་བཞིན་གཙོད་དང་འབྲོང་སོགས་ཀྱི་རྩིད་པའི་འུར་རྡོ་སོགས་མང་བ་ཡོད་ཅིང་། འུར་རྡོར་དབྱེ་ན། ཁྲ་རིང་དང་། ཁྲ་ཐུང་། གཟི་རིལ་མིག་མང་། བཞི་ཐིག་རིལ། དྲུག་ལྡན་འཁྱོག བརྒྱད་ཐིག་རིལ། མདུད་པ་དགུ་སྒྲིལ། བཅུ་གཉིས་ཐིག་རིལ། བཅུ་དྲུག་དགུ་སྒྲིལ། ཤྭ་ཕོག་སྟག་བསླས། གའུ་ཁ་སྦྱོར། དཀར་ནག་མཉམ་སྒྲིལ། བྱིས་མིག་ཁ་སྦྱོར། ཆུ་མིག་དགུ་སྒྲིལ་སོགས་བཟོ་དབྱིབས་མི་འདྲ་བའི་རིགས་སྣ་ཚོགས་ཡོད། ཆུ་མིག་དགུ་སྒྲིལ་ནི་ཅུང་སླ་དཀའ་ལ། མིག་ལ་མཛེས་ཤིང་སྤུས་དག་པའི་ཐོག་དེར་མིག་དགུ་ཡོད། རིགས་མི་འདྲ་བའི་འུར་རྡོར་དེ་མཚུངས་ཀྱི་ཁྱད་ཆོས་ཀྱང་མི་འདྲ་སྟེ། སྦོམ་ལ་ཧྲག་པ་འཕེན་ཤུགས་ཆེ། ཐུང་ལ་མཉེན་པ་སྤྱོད་སྒོ་ཆེ། ལྗགས་ལྕེ་རིང་བ་སྐད་སྒྲ་ཆེ། དཀར་ནག་འདྲེས་མ་མིག་ལ་མཛེས། གྲུ་བཞི་ཤོ་འདྲ་ཕོ་གཞོན་རྒྱན། མིག་མང་ཁྲ་ཆུང་མཛེས་མའི་རྒྱན་ཞེས་ཟེར་སྲོལ་ཡོད་ཅིང་དོན་དངོས་ཀྱང་དེ་ལྟར་རེད་དོ།

         དེ་སྔ་བོད་རབ་བྱུང་བཅོ་ལྔ་པའི་ཤིང་འབྲུག(1904)ལོར་དབྱིན་ཇི་བཙན་རྒྱལ་རིང་ལུགས་པས་བོད་ལ་བཙན་འཛུལ་བྱེད་སྐབས་བོད་རིགས་མི་དམངས་ཀྱིས་དཔའ་ངར་ཆེན་པོས་བཙན་འཛུལ་པར་འགོག་རྒོལ་བྱེད་པར་འུར་རྡོ་བེད་སྤྱོད་བཏང་ཡོད་ལ། ནུས་པ་ཡང་ཆེན་པོ་ཐོན་པར་གྲགས། བོད་ཀྱི་དམངས་གཞས་ཀྱི་ནང་དུ་ཡང་། འཇམ་པོའི་བལ་གྱིས་བསླས་པའི། །འུར་རྡོ་ཆུ་མིག་དགུ་སྒྲིལ། །ཆུ་མིག་གཞུང་ནས་བརྒྱབ་པས། །དབྱིན་ཇིའི་སྣ་ལ་ཐེབས་སོང་། །ཞེས་གཞས་གཏོང་སྲོལ་ཀྱང་འདུག
རྩོམ་སྒྲིག་པ། སྣང་རྡོར།