ལོ་གསར་གྱི་ཉོ་ཆ་རྒྱག་སྐབས་གནད་དོན་འདི་དག་ལ་ཡིད་གཟབ་གནང་དགོས།
སྤེལ་དུས 2021-01-07
ཡོང་ཁུངས། གངས་ལྗོངས་ཉི་གཞོན།
རྩོམ་པ་པོ།
དུས་ཆེན་གཉིས་རིང་ཚོང་ཁང་ཁག་གིས“ལོ་མཇུག་གི་དམིགས་བསལ་གཟིགས་སྐྱོང”དང་། “དུས་ཆེན་སྐབས་ཅ་ལག་གི་གོང་བཅག་པ” “དུས་ཚིགས་བརྗེ་བའི་སྐབས་སུ་མཛོད་ཁང་ནང་གི་ཅ་དངོས་གཙང་མ་ཚོང་བ” “བྱ་དགའ་འཐེན་ནས་དངོས་པོ་སྤྲོད་པ”སོགས་ཀྱི་བྲིན་ཚོང་བྱེད་སྒོ་སྣ་ཚོགས་སྤེལ་གྱི་ཡོད། དེར་བརྟེན་ལྷ་ས་གྲོང་ཁྱེར་12315ཞུ་གཏུག་ཐེར་འདོན་ལྟེ་གནས་ཀྱིས། རྒྱ་ཆེའི་འཛད་སྤྱོད་པས་ཚོང་ཁང་ཁག་གིས་བྲིན་ཚོང་བྱེད་སྒོ་སྤེལ་སྐབས་རིན་གོང་དངོས་གནས་གཅོག་མིན་དང་། གོང་རྫུན་མ་བཅག་ནས་ཚོང་མིན། ལག་རྟགས་ལ་མིང་ཡོད་མིན་དང་ཁ་གྲངས་སོགས་ལ་དོ་སྣང་བྱེད་དགོས་པའི་དྲན་སྐུལ་བྱས་འདུག
འཛད་སྤྱོད་པས་ཟོག་ཉོའི་གཱ་ནས་དངུལ་སྤྲོད་རྒྱུར་ཡིད་གཟབ་བྱེད་དགོས། ད་ཕན་ལོ་ཤས་རིང་ཟོག་ཉོའི་གཱ་ནས་དངུལ་སྤྲོད་པའི་འཛད་སྤྱོད་རྩོད་གཞི་དེ་འཛད་སྤྱོད་རྩོད་གཞིའི་གླེང་མང་བའི་གནད་དོན་དང་དཀའ་གནད་དུ་གྱུར་ཡོད། འཛད་སྤྱོད་པར་ཡང་ཟོག་ཉོའི་གཱ་གཉེར་སླ་བ་དང་དངུལ་ཕྱིར་སློག་དཀའ་བ་སོགས་ཀྱི་གནད་དོན་འཕྲད་བཞིན་ཡོད། ཚོང་ཁང་ཁག་གིས་རིན་གོང་གཅོག་པ་སོགས་ལ་ཁ་གཡར་ནས་ཟོག་ཉོའི་གཱ་གཉེར་སྐབས། འཛད་སྤྱོད་པས་ངེས་པར་དུ་ཡིད་གཟབ་བྱས་ཏེ་མགོ་སྐོར་འོག་མི་ཚུད་པ་བྱེད་དགོས། ཟོག་ཉོའི་གཱ་མ་གཉེར་གོང་ཚོང་ཁང་གི་གཉེར་སྐྱོང་གནས་ཚུལ་དང་ཁྲོམ་རའི་ཐོག་གི་མཚན་སྙན་སོགས་ལ་ཤེས་རྟོགས་གང་ལེགས་བྱས་ཏེ། ལག་ཁྱེར་ཆ་ཚང་ཡོད་པ་དང་། ཁྲོམ་རའི་ཡིད་རྟོན་རུང་བ། གཉེར་སྐྱོང་གི་གནས་ཚུལ་ལེགས་པ་བཅས་ཀྱི་ཚོང་ཁང་འདེམས་དགོས། ཟོག་ཉོའི་གཱ་གཉེར་སྐབས་ཚོང་ཁང་གི་བཤད་པ་ཁོ་ནར་མི་ཉན་པར། ཡིག་ཐོག་གི་གན་རྒྱ་འཇོག་དགོས་པ་མ་ཟད། གན་རྒྱའི་ནང་དོན་གསལ་པོ་བལྟས་ནས་ཕྱོགས་གཉིས་པོའི་དབང་ཆར་སྲུང་སྐྱོང་ཐུབ་པ་བྱེད་དགོས།
འཛད་སྤྱོད་པས་ཚོང་པ་ཉི་ཚེ་བའི་བཟའ་བཅའ་ཉོ་རྒྱུར་ཡིད་གཟབ་བྱེད་དགོས། དང་ཐོག་གཉེར་སྐྱོང་བྱེད་མཁན་ལ་ལས་གཉེར་ལག་ཁྱེར་ཡོད་མེད་དང་དེའི་གཙོ་གཉེར་ཐོབ་ཐང་ཁྲིམས་མཐུན་ཡིན་མིན་ལ་ལྟ་དགོས། བཟའ་བཅའི་ཐུམ་སྒྲིལ་མཚོན་རྟགས་ཆ་ཚང་མིན་དང་། བཟའ་བཅའི་ཐུམ་སྒྲིལ་ལ་ཚོང་རྟགས་ཀྱི་མིང་དང་། རྒྱུ་ཆའི་རེའུ་མིག བཟོ་གྲྭའི་མིང་དང་ས་གནས། ཁ་པར། ཐོན་སྐྱེད་ཀྱི་དུས་ཚོད། ཉར་ཚགས་ཀྱི་དུས་ཚོད། ཐོན་རྫས་ཀྱི་མཚོན་རྟགས་ཀྱི་ཚད་ལྡན་ཨང་རྟགས་སོགས་ཡོད་མེད་ལ་དོ་སྣང་བྱེད་དགོས། ལྷག་པར་དུ་བཟའ་བཅའི་ཐོན་སྐྱེད་དུས་ཚོད་དང་དུས་བཅད་ལ་དོ་སྣང་བྱེད་དགོས་པ་མ་ཟད། སྤུས་ཚད་འགན་ལེན་དུས་བཅད་ལ་དེ་བས་དོ་སྣང་བྱེད་དགོས།
ཡུལ་སྐོར་དུ་སྐྱོད་རྩིས་ཡོད་པའི་གྲོགས་པོ་ལྷན་རྒྱས་ཀྱིས། ཡུལ་སྐོར་ལས་དོན་ཁང་གི་གོང་ཁེ་བའི་ཡུལ་སྐོར་རྣམ་གྲངས་ལ་དེ་བས་དོགས་ཟོན་བྱེད་དགོས་ལ། ལྷག་པར་དུ་ཡུལ་སྐོར་ལས་དོན་ཁང་གིས་རང་དགར་གོང་སྤར་བ་དང་། ཞབས་ཞུའི་རྣམ་གྲངས་ཉུང་དུ་གཏོང་བ། ཞབས་ཞུའི་ཚད་གཞི་དམའ་རུ་གཏོང་བ། བཙན་ཤེད་ངང་ཅ་དངོས་ཉོ་རུ་འཇུག་པ་སོགས་ལ་དོགས་ཟོན་བྱེད་དགོས།
ལྷ་ས་གྲོང་ཁྱེར་12315ཞུ་གཏུགས་ཐེར་འདོན་ལྟེ་གནས་ཀྱིས་རྒྱ་ཆེའི་འཛད་སྤྱོད་པར། ཅ་དངོས་ཉོ་བའི་སྐབས་སུ་འཛིན་ཤོག་དང་བྱུང་འཛིན་སོགས་ཚད་ལྡན་གྱི་སྤ་སེ་དང་འབྲེལ་ཡོད་དཔང་འཛིན་ལེན་དགོས། དེ་ལྟར་བྱས་ན། འཛད་སྤྱོད་ཀྱི་རྩོད་གཞི་ཐོན་སྐབས། ཚོང་ཁང་བཙལ་ནས་ཐག་གཅོད་བྱེད་ཆོག་པ་དང་། ཐག་གཅོད་བྱེད་མ་ཐུབ་ན་12315ལ་ཁ་པར་བརྒྱབ་ནས་ཞུ་གཏུགས་བརྒྱབ་སྟེ་རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱེད་དགོས་པའི་དྲན་སྐུལ་བྱས་འདུག
རྩོམ་སྒྲིག་པ། སྣང་རྡོར།
