ལྷ་སའི་བར་སྐོར་བྱང་ལམ་དུ་ཡོད་པའི་མཆོད་རྟེན་དེའི་ལོ་རྒྱུས་ཤེས་སམ།
སྤེལ་དུས 2019-12-31
ཡོང་ཁུངས། ཁམས་པའི་དྲ་བའི་འཕྲིན་སྟེགས་ལས།
རྩོམ་པ་པོ།
ལྷ་ས་གྲོང་ཁྱེར་གྱི་བར་སྐོར་བྱང་ངོས་ཁྲོམ་ལམ་གྱི་སྣང་རྩེ་ཤག་ལས་ཁུངས་ཀྱི་གཡོན་ངོས་སུ་ཡོད་པའི་མཆོད་རྟེན་ཆེན་པོ་ཕྱོགས་བཞིར་ཀར་སྒོ་བཏོད་པ་དེ་ཡིན། མཆོད་རྟེན་འདི་ཐོག་མར་བྱུང་བའི་དུས་ཚོད་ནམ་ཡིན་སྐོར་དཔྱད་བཞིའི་ཡིག་ཆ་མ་མཐོང་ཡང་དེ་སྔོན་དུས་རབས་བཅུ་བཞི་པའི་འགོར་བྱོན་པའི་ཀུན་མཁྱེན་ཀློང་ཆེན་པ་དགུང་ལོ་ཉི་ཤུ་ལྷག་ཙམ་གྱི་དུས་ལྷ་སར་གཙུག་ལག་ཁང་དུ་གནས་གཟིགས་ཕེབས་སྐབས་ཀཀྞི་སྒོ་བཞིའི་མཆོད་རྟེན་གྱི་ཐད་དུ་མ་གཅིག་ལབ་ཀྱི་སྒྲོན་མའི་ཞལ་གཟིགས་བྱུང་ཚུལ་དང༌། གྲུབ་ཐོབ་ཐང་སྟོང་རྒྱལ་པོ་ལྷ་སར་གནས་གཟིགས་ལ་ཕེབས་ཐེངས་གཉིས་པའི་སྐབས་ལོ་གཅིག་རིང་མཆོད་རྟེན་འདིའི་འགྲམ་དུ་སྤྲང་པོའི་ཚུལ་མཛད་ནས་བཞུགས་ཚུལ་དམ་པ་གཉིས་ཀའི་རྣམ་ཐར་ནང་གསལ་བར་འཁོད་པ་ལྟར་ན་མཆོད་རྟེན་འདི་སྐབས་དེ་དུས་ནས་ཡོད་པར་མཐོང་ཐུབ། དམངས་ཁྲོད་ཀྱི་ངག་རྒྱུན་དུ་མཆོད་རྟེན་འདིའི་གཟུངས་ཀྱི་ནང་ཚོང་དཔོན་ནོར་བུ་བཟང་པོའི་དབུ་ཐོད་དང་རྒྱན་ཆ་སོགས་ཡོད་པར་བརྟེན་ལྷ་ས་གྲོང་ཁྱེར་གྱི་ནང་འཛམ་གླིང་གི་ཚོང་ཟོག་སྣ་འཛོམས་འདུས་ཐུབ་པ་བྱུང་བ་རེད་ཅེས་ཤོད་སྲོལ་འདུག་ཀྱང་རྗེས་སུ་རབ་བྱུང་བཅུ་དྲུག་པའི་ཤིང་བྱ(༡༩༤༥)ལོར་བོད་གཞུང་ནས་ཉམས་གསོ་བྱེད་སྐབས་གཟུངས་འབུལ་དང་རབ་གནས་ལ་ཕེབས་མྱོང་བའི་སྐྱེས་ཆེན་དམ་པ་འགའ་ཞིག་གི་རང་རྣམ་ནང་གསུངས་དོན་དུ། མཆོད་རྟེན་འདིའི་ནང་རྩ་ཆེའི་རྟེན་མང་པོ་ཡོད་ཚུལ་དམངས་ཁྲོད་ཀྱི་ངག་རྒྱུན་དུ་ཤོད་སྲོལ་ཡོད་རུང་དེ་རིགས་གང་ཡང་མེད་པར་བརྟེན་རྣམ་སྲས་དང་ཛམ་བྷ་ལ་སོགས་ནོར་ལྷ་ཁག་གི་བུམ་གཏེར་གཟུངས་སུ་ཕུལ་ཞེས་གསལ་བས་མཆོད་རྟེན་འདིར་ཉམས་ཆག་ཐེངས་འགའ་ཞིག་བྱུང་ཡོད་ངེས་སྙམ་མོ།།
དུང་དཀར་ཚིག་མཛོད་ཆེན་མོ་ལས་དྲངས།
རྩོམ་སྒྲིག་པ།སྣང་རྡོར།