མི་སྒེར་གྱིས་ནད་གཞི་སྦ་གསང་བྱས་ན་ཁྲིམས་ཆད་འདི་ལྟར་གཏོང་གི་འདུག
སྤེལ་དུས 2020-02-12
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
དེ་རིང་ངས་མུ་མཐུད་རིམས་ནད་འགོག་བཅོས་དང་འབྲེལ་ཡོད་ཉེས་ཁྲིམས་ཀྱི་གཏན་འབེབས་ཞིག་ངོ་སྤྲོད་ཞུ་ཡི་ཡིན།
2003ལོར་ཁྱབ་བསྒྲགས་བྱས་པའི་ཆེས་མཐོའི་མི་དམངས་ཁྲིམས་ཁང་དང་ཆེས་མཐོའི་མི་དམངས་ཞིབ་དཔྱོད་ཁང་གི་ཁྲིམས་ལུགས་གསལ་འགྲེལ་གྱི་དོན་ཚན་དང་པོའི་ནང་། གློ་བུར་དུ་ཐོན་པའི་ནད་དུག་རྐང་བཙུགས་ཏེ་གང་སར་ཁྱབ་ཏུ་བཅུག་ནས་སྤྱི་པའི་བདེ་འཇགས་ལ་གནོད་འཚེ་བཏང་བའི་རིགས་ལ་ཉེས་ཁྲིམས་ཀྱི་དོན་ཚན་114པ་དང་115པའི་ནང་གསེས་དང་པོའི་གཏན་འབེབས་ལྟར་ཉེན་ཁ་ཆེ་བའི་བྱེད་ཐབས་ཀྱིས་སྤྱི་པའི་བདེ་འཇགས་ལ་གནོད་འཚེ་བཏང་བའི་ཉེས་པར་བརྩིས་ནས་ཆད་པ་གཅོད་རྒྱུ།
གོང་གསལ་གཏན་འབེབས་ལྟར་ན། གལ་སྲིད་དོན་ཚན་114པ་ལས་འགལ་ཚེ་ལོ་གསུམ་ནས་བཅུའི་བར་དུས་བཀག་བཙོན་འཇུག་དང་། དོན་ཚན་115པ་ལས་འགལ་ཚེ་ལོ་བཅུ་ཡན་དུས་བཀག་བཙོན་འཇུག་གམ་ཚེ་བཙོན་དང་སྲོག་ཁྲིམས་ཀྱི་ཆད་པ་གཅོད་རྒྱུ།
གློ་བུར་དུ་ཐོན་པའི་རིམས་ནད་འགོས་པའི་ནད་པའམ་རིམས་ནད་འགོས་པའི་དོགས་ཡོད་ནད་པས་རིམས་ནད་བརྟག་དཔྱད་དང་བཙན་དབང་ལོགས་བཀར་གྱི་བྱ་ཐབས་དང་སྨན་བཅོས་བྱེད་པ་དང་ལེན་མ་བྱས་པར་རིམས་ནད་གང་སར་མཆེད་དེ་མཇུག་འབྲས་ཚབས་ཆེན་ཐོན་ཚེ། ཉེས་ཁྲིམས་ཀྱི་དོན་ཚན་115པའི་ནང་གསེས་གཉིས་པའི་གཏན་འབེབས་ལྟར། ཉེན་ཁའི་བྱེད་ཐབས་ལ་བརྟེན་ནས་སྤྱི་པའི་བདེ་འཇགས་ལ་གནོད་འཚེ་གཏོང་བའི་ཉེས་པར་བརྩིས་ནས་ཆད་པ་གཅོད་རྒྱུ། ཉེས་པ་དེར་སྤྱིར་བཏང་ལོ་གསུམ་ནས་ལོ་བདུན་བར་དུས་བཀག་བཙོན་འཇུག་དང་། མཇུག་འབྲས་ཅུང་ཆུང་བར་ལོ་གསུམ་མན་དུས་བཀག་བཙོན་འཇུག་གི་ཆད་པ་གཅོད་རྒྱུ།
གོང་གསལ་གཏན་འབེབས་དང་འབྲེལ་བའི་དཔེ་མཚོན་གྱི་གྱོད་གཞི་ཞིག་ཞུ་ཡི་ཡིན།
ཟླ་1པོའི་ཚེས31ཉིན་གྱི་ཆུ་ཚོད24བར། ཟི་ལིང་གྲོང་ཁྱེར་དུ་གློ་ཚད་ཀྱི་རིམས་ནད་འགོས་པའི་ནད་པ་9བྱུང་ཡོད་པ་དང་། དེའི་ཁྲོད་དུ་ཕྱིར་ཁྱབ་བསྒྲགས་བྱས་ཟིན་པའི་རུས་མིང་ཀོའུ་ཟེར་བའི་ནད་པ་ཞིག་གི་གནས་ཚུལ་ལ་ཚང་མས་དོ་ཁུར་བྱེད་བཞིན་མཆིས། རྒྱུ་མཚན་ནི་སྤྱི་བདེ་ལས་ཁུངས་ཀྱིས་རུས་མིང་ཀོའུ་ཟེར་བའི་ནད་པ་དེས་ཉེན་ཁའི་བྱེད་ཐབས་ལ་བརྟེན་ནས་སྤྱི་པའི་བདེ་འཇགས་ལ་གནོད་འཚེ་བཏང་བའི་ཉེས་མིང་གིས་ཉེས་དོན་གྱོད་ཐོ་བཀོད་ནས་བརྟག་དཔྱད་བྱས་འདུག
སྤྱི་བདེ་ལས་ཁུངས་ནས་བརྟག་དཔྱད་བྱས་པ་བརྒྱུད་ཤེས་རྟོགས་བྱུང་བར། ཟི་ལིང་གྲོང་ཁྱེར་སྐུ་འབུམ་རྫོང་(湟中县)ལི་ཅ་ཧྲན་གྲོང་རྡལ་ཧན་ཧྲུའེ་ཀོའུ་གྲོང་ཚོའི་གྲོང་མི་ཀོའུ་ཆེ་གེ་མོ་ནི་དུས་ཡུན་རིང་པོར་ཝུའུ་ཧན་དུ་ལས་ཀ་བྱེད་བཞིན་ཡོད། ཉེ་ཆར་ཟི་ལིང་དུ་ལོག་རྗེས། ཟི་ལིང་གྲོང་ཁྱེར་གྱི་རིམས་ནད་སྔོན་འགོག་ཚོད་འཛིན་ཐག་གཅོད་ལས་དོན་བཀོད་འདོམས་པུས་བཏོན་པའི་རིམས་ནད་ཐོན་ཁུལ་ནས་སླེབས་པའི་མི་སྣས་སྡེ་ཁུལ་དང་གྲོང་ཚོར་ཐོ་འགོད་སྙན་སེང་ཞུས་ཏེ། རང་འགུལ་ངང་ཁྱིམ་དུ་བསྡད་དེ་ཕྱི་རུ་འགྲོ་མི་ཆོག་པའི་འབྲེལ་ཡོད་བླང་བྱ་ལག་ལེན་བསྟར་མེད་པ་མ་ཟད། རང་ཉིད་ཀྱི་འགྲུལ་བཞུད་དོན་དངོས་རྐང་བཙུགས་ནས་སྦ་གསང་བྱས་པ་དང་། ཟི་ལིང་དུ་ལོག་པའི་དུས་ཚོད་ཀྱང་རྫུན་བཤད། རང་ཉིད་ལ་ཚ་བ་རྒྱས་པ་དང་གློ་གོག་པ་སོགས་ཀྱི་ནད་རྟགས་རྐང་བཙུགས་ནས་གསང་སྟེ། བརྟག་དཔྱད་བྱེད་པར་ཡོང་མཁན་ལ་མགོ་སྐོར་བཏང་བ་མ་ཟད། ཉེ་འཁོར་གྱི་མི་ཚོགས་དང་འབྲེལ་འདྲིས་ཐེངས་མང་བྱས་ཡོད། དེ་ལས་ཀྱང་ཚབས་ཆེ་བ་ཞིག་ནི་ཀོའུ་ཟེར་བ་དེས་རང་གི་བུ་རང་ཉིད་དང་མཉམ་དུ་ཝུའུ་ཧན་ནས་ཟི་ལིང་དུ་ལོག་པའི་དོན་དངོས་སྦ་གསང་བྱས་པ་དང་། ཁོ་པའི་བུས་ཀྱང་ཕྱིར་ཐེངས་མང་བསྐྱོད་པ་མ་ཟད། མི་ཚོགས་དང་འབྲེལ་འདྲིས་དམ་ཟབ་བྱས་པ་རེད།
ཀོའུ་དང་ཁོ་པའི་བུ་གཉིས་ལ་གློ་ཚད་ཀྱི་རིམས་ནད་འགོས་ཡོད་པ་གཏན་འཁེལ་བྱས། མུ་གེའི་སྟེང་དུ་ཟླ་ལྷག་ཟེར་བའི་དཔེ་བཞིན་རུས་མིང་ཀོའུ་ཟེར་བའི་མི་དེའི་བྱེད་སྤྱོད་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཉེས་ཁྲིམས་དང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགོ་ནད་འགོག་བཅོས་བཅའ་ཁྲིམས་སོགས་རྒྱལ་ཁབ་ཀྱི་འབྲེལ་ཡོད་བཅའ་ཁྲིམས་ཁྲིམས་སྲོལ་དང་། མཚོ་སྔོན་ཞིང་ཆེན་ཟི་ལིང་གྲོང་ཁྱེར་གྱི་གློ་ཚད་ཀྱི་རིམས་ནད་སྔོན་འགོག་ཚོད་འཛིན་ཐག་གཅོད་ལས་དོན་བཀོད་འདོམས་པུས་བཏང་བའི་བརྡ་ཁྱབ་ལས་འགལ་བས། རིམས་ནད་སྔོན་འགོག་ཚོད་འཛིན་གྱི་ལས་དོན་ལ་འགོག་རྐྱེན་བཟོས་པ་དང་གཏོར་བཤིག་ཚབས་ཆེན་བཏང་བས། ད་ཆ་ཀོའུ་ཟེར་བ་དེས་ཉེན་ཁའི་བྱེད་ཐབས་སྤྱད་དེ་སྤྱི་པའི་བདེ་འཇགས་ལ་གནོད་འཚེ་བཏང་བའི་བྱས་ཉེས་བསགས་པར་སྤྱི་བདེ་ལས་ཁུངས་ཀྱིས་གྱོད་དོན་ཐོ་འགོད་བྱས་ཐོག་བརྟག་དཔྱད་བྱེད་ཞོར་དུ་འབྲེལ་ཡོད་ཀྱི་བྱེད་ཐབས་སྤྱད་ནས་ལོགས་བཀར་སྨན་བཅོས་བྱེད་བཞིན་ཡོད་པ་རེད།
དེར་བརྟེན། རྒྱ་ཆེའི་མི་དམངས་མང་ཚོགས་ནས་རིམས་ནད་སྔོན་འགོག་ཚོད་འཛིན་གྱི་འབྲེལ་ཡོད་བླང་བྱར་བརྩི་སྲུང་ནན་པོ་ཞུས་ཏེ། རང་ཉིད་དང་ཁྱིམ་མི། དགའ་ཉེ་སྤུན་མཆེད་དང་གྲོང་པ་ཁྱིམ་མཚེས་བཅས་ཀྱི་ཚེ་སྲོག་དང་བདེ་ཐང་ལ་འགན་འཁྲི་ཏན་ཏིག་འཁུར་དགོས་པའི་འབོད་སྐུལ་སྙིང་ནས་ཞུའོ།།
རྩོམ་སྒྲིག་པ།སྣང་རྡོར།