གསར་འགོད་པས་ནང་སོག་རང་སྐྱོང་ལྗོངས་ཨེའར་ཏུའོ་སི་གྲོང་ཁྱེར་ཏ་ལ་ཐེ་ཆི་སྲིད་གཞུང་ནས་རྒྱུས་ལོན་བྱུང་བ་ལྟར་ན། སྤྱི་ཟླ་3ཚེས་23ཉིན་གྱི་ཆུ་ཚོད་9པར། ས་གནས་དེ་གའི་འབྲེལ་ཡོད་སྡེ་ཚན་གྱིས་ཆི་དེའི་ས་ཁོངས་ཀྱི་རྨ་ཆུའི་ཆུ་རགས་སུ་འཕངས་པའི་ཕག་རོ་48འཚོལ་བསྡུ་བྱས་ཤིང་། དོན་རྐྱེན་དེ་དང་འབྲེལ་བའི་དོགས་ཡོད་ཉེས་ཅན་པ་2གཏན་འཁེལ་བྱུང་ཡོད། ས་གནས་དེ་གའི་གྲོང་ཁྱེར་དང་ཆི་རིམ་པ་གཉིས་ཀྱི་སྒྲིག་ཨུད་དང་ལྟ་ཞིབ་ཨུ་ལྷན་གྱིས་མཉམ་འབྲེལ་བརྟག་དཔྱད་ཚོགས་ཆུང་བཙུགས་ནས་འགན་འཁྲི་བདའ་འདེད་བྱེད་འགོ་ཚུགས་པ་དང་། ཕག་རོའི་འབྱུང་ཁུངས་དང་ཤི་རྐྱེན་ལ་སྤྱི་བདེ་སྡེ་ཁག་གིས་བརྟག་དཔྱད་བྱེད་བཞིན་ཡོད།
ཏ་ལ་ཐེ་ཆི་སྲིད་གཞུང་གི་འབྲེལ་ཡོད་འགན་འཁུར་བས་ངོ་སྤྲོད་བྱས་པ་ལྟར་ན། སྤྱི་ཟླ་3ཚེས་21ཉིན་སྨྱན་སྦྱོར་གྱིས《མཐོང་བ་ཙམ་གྱིས་ཧང་སང་དགོས་པ་ཞིག་སྟེ། རྨ་ཆུའི་ཆུ་རགས་ཆེན་པོར་ཕག་རོ་འདི་འདྲ་མང་པོ་ག་ནས་ཡོང་བ་ཡིན་ནམ།》ཞེས་པའི་གནས་ཚུལ་སྤེལ་རྗེས། ཆི་ཨུད་དང་སྲིད་གཞུང་གིས་འཕྲལ་མར་བརྟག་དཔྱད་དང་ཐག་གཅོད་ལས་དོན་གྱི་འགོ་ཚུགས་ཤིང་། ཞིང་འབྲོག་སྡེ་ཚན་གྱིས་ཆུ་རགས་སུ་འཕངས་ཡོད་པའི་ཕག་རོ་ལས་མ་དཔེ་བླངས་ཏེ་རང་སྐྱོང་ལྗོངས་སྲོག་ཆགས་རིམས་ནད་སྔོན་འགོག་ཚོད་འཛིན་ལྟེ་གནས་སུ་ཞིབ་བཤེར་ཚད་ལེན་དུ་བསྐྱལ་བ་མ་ཟད། རིམས་ནད་རིག་པའི་བརྟག་དཔྱད་སོགས་ཀྱི་ཁུངས་འདེད་ལས་དོན་ཡང་སྤེལ་བ་རེད།
དེ་དང་ཆབས་ཅིག་ཕག་རོ་དག་ཆེད་ལས་ཀྱི་བརྒྱུད་རིམ་ལྟར་འཚོལ་བསྡུ་བྱས་ཏེ་ཆི་དེའི་ཕྱུགས་ནད་གནོད་མེད་ཅན་དུ་བསྒྱུར་བའི་ཐག་གཅོད་ལྟེ་གནས་སུ་བསྐྱལ་ནས་ཐག་གཅོད་བྱས་པ་དང་། ཕག་རོ་འཕངས་གནས་ཉེ་འཁོར་གྱི་སྤྱི་ལེ་3གྱི་ཁྱབ་ཁོངས་ནང་དུ་ཡོད་པའི་ཕག་ལྷས་ཚང་མར་གྲལ་བཤེར་བྱས་ནས་ཕག་པ་རེ་འགར་དཔེ་འཐེན་ཞིབ་བཤེར་བྱས་ཡོད།
གཞན་ཡང་རིམས་ནད་སྔོན་འགོག་ཚོད་འཛིན་སྡེ་ཚན་གྱིས་འབྲེལ་ཡོད་ས་ཁོངས་ཀྱི་ཡུལ་མིའི་འཚོ་བའི་འཐུང་ཆུར་དཔེ་འཐེན་ཞིབ་བཤེར་ཚད་ལེན་དང་། ཉེ་འདབས་ཀྱི་གྲོང་མི་དག་ཕག་རོ་དང་འབྲེལ་ཐུག་བྱས་ཡོད་མིན་ལ་བརྟག་དཔྱད་བྱས། ཁྲོམ་རའི་ལྟ་སྐུལ་དོ་དམ་སྡེ་ཚན་གྱིས་ཆི་ཡོངས་ཀྱི་ཕག་ཤའི་རིགས་ཀྱི་བཟའ་བཅའི་གཉེར་སྐྱོང་ཁྲོམ་རར་ཁྱོན་ཡོངས་ནས་གྲལ་བཤེར་དང་ཞིབ་དཔྱད་ཚད་ལེན་བྱས་ཤིང་། མིག་སྔར་ནད་ཀྱིས་ཤི་བའི་ཕག་ཤའི་ཐོན་རྫས་ཁྲོམ་རར་བཏོན་ཡོད་པ་བརྟག་དཔྱད་བྱུང་མེད།
ཨེའར་ཏུའོ་སི་གྲོང་ཁྱེར་དང་ཏ་ལ་ཐེ་ཆི་རིམ་པ་གཉིས་ཀྱི་ཆུ་བེད་དང་ཁོར་ཡུག་སྲུང་སྐྱོང་སྡེ་ཚན་གྱིས་འབྲེལ་ཡོད་ཆུ་ཁོངས་ལ་དཔེ་འཐེན་ཞིབ་བཤེར་ཚད་ལེན་བྱས་པ་དང་། ཏ་ལ་ཐེ་ཆིའི་སྤྱི་བདེ་སྡེ་ཚན་ལས་གྲུབ་པའི་ཆེད་དོན་ཚོགས་ཆུང་གིས་ཕག་རོའི་ཡོང་ཁུངས་ལ་མྱུལ་ཞིབ་བྱེད་འགོ་ཚུགས་ཤིང་། མིག་སྔར་ཕག་རོ་འཕངས་པའི་དོགས་ཡོད་ཉེས་ཅན་པ་2གཏན་འཁེལ་བྱུང་བ་དང་། དེ་མིན་གྱི་དོགས་ཡོད་ཉེས་ཅན་པ་6ལ་ཞིབ་དཔྱད་བྱེད་བཞིན་ཡོད།
མིག་སྔར། ཨེའར་ཏུའོ་སི་གྲོང་ཁྱེར་དང་ཏ་ལ་ཐེ་ཆི་རིམ་པ་གཉིས་ཀྱི་སྒྲིག་ཨུད་དང་ལྟ་ཞིབ་ཨུ་ལྷན་གྱིས་མཉམ་འབྲེལ་བརྟག་དཔྱད་ཚོགས་ཆུང་བཙུགས་ནས་འགན་འཁྲི་བདའ་འདེད་ཀྱི་ལས་རིམ་འགོ་བཙུགས་ཏེ་འབྲེལ་ཡོད་གནད་དོན་ལ་བརྟག་དཔྱད་བྱེད་བཞིན་ཡོད་པ་དང་། ཨེའར་ཏུའོ་སི་གྲོང་ཁྱེར་སྲིད་གཞུང་གིས་འཕྲལ་བསྟུན་སྔོན་ཇུས་ལག་ལེན་བསྟར་ནས་ཏ་ལ་ཐེ་ཆིའི་མཐའ་འཁོར་ལའང་དུས་མཉམ་དུ་འབྲེལ་ཡོད་ཀྱི་གྲལ་བཤེར་ལས་དོན་སྤེལ་བཞིན་ཡོད།
རྩོམ་སྒྲིག་པ། བདེ་སྒྲོལ།
