ལྷ་ས་གྲོང་ཁྱེར་སྣེའུ་ཁུལ་གསར་པས་ཞབས་ཞུ་གསར་གཏོད་བྱས་ནས་འཛམ་གླིང་གི་ཚད་མཐོའི་གསར་གཏོད་པའི་གནས་མཆོག་བསྐྲུན་པ།
སྤེལ་དུས 2018-06-22
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བཀྲ་རྒྱལ་གྱིས་བསྒྱུར།
ལྷ་སའི་མཐོ་གསར་ཁུལ་གཉིས་གཏོད་ཞབས་ཞུ་ལྟེ་གནས་ཀྱི་མཚན་བྱང་།
ཀྲུང་གོའི་བོད་ལྗོངས་དྲ་བའི་འཕྲིན། སྐད་གདངས་ལྷོད་དགོས་ལ། བརྩེ་དུང་གི་ལམ་ནས་སྒྲ་སྦྱོར་དགོས། དེ་མིན་ཚེ་སྤྱིར་བཏང་གི་བརྩམས་ཆོས་དང་གཅིག་མཚུངས་ཡིན་སྲིད། ཅེས་ལྷ་ས་གྲོང་ཁྱེར་སྣེའུ་ཁུལ་གསར་པའི་ལས་གཏོད་ཀུང་སི་ག་གེ་མོའི་སྒྲ་སྦྱོར་ཁང་ནས་གྲོས་བསྡུར་བྱེད་པའི་སྐད་ལྷང་ལྷང་དུ་གྲགས་འོང་།
སྒྲ་སྦྱོར་ནི་ལས་གཏོད་ཀུང་སི་དེའི་ལས་སྒོ་མང་པོ་གྲས་ཀྱི་གཅིག་རེད། ལྷ་ས་གྲོང་ཁྱེར་སྣེའུ་ཁུལ་གསར་པ(མཐོ་གསར་ཁུལ)-N•ཚི་ཡུན་དམངས་ཀྱི་གསར་གཏོད་བར་སྟོང་ཞེས་པར་གཞི་ཚུགས་ནས་བཟུང་། ཀུང་སི་དེས་ལོ་དུ་མའི་དུས་ཚོད་བེད་སྤྱད་དེ་ཡར་རྒྱས་གོང་སྤེལ་དུ་བཏང་བའི་ད་ཆ། ལས་སྒོ་སོ་སོ་གློག་བརྙན་འཕྲིན་སྒྲིག་བཟོ་དང་། བརྡ་ཁྱབ་ཇུས་འགོད། ཚོང་གཉེར་ཇུས་འགོད་ལ་སོགས་པར་ཁྱབ་ཡོད་ཅིང་། ཀུང་སིའི་ལས་ཕྱོད་ལ་ཡར་རྒྱས་ཆེན་པོ་བྱུང་།
འདི་ནི་ལས་གཏོད་ཀུང་སིའི་སྒྲ་སྦྱོར་ཁང་གི་ལས་ཀ་བ་ཡིན།
ཀུང་སི་འདིའི་འགན་འཁུར་པ་བཀྲ་ཤིས་དོན་འགྲུབ་ཀྱིས་འདི་སྐད། ང་ཚོའི་ཀུང་སི་དམངས་ཀྱི་ལས་གཏོད་བར་སྟོང་ནང་གཞི་བཅོས་པའི་ཚུན་ལ། དམངས་ཕན་གྱི་སྲིད་ཇུས་མང་པོ་ཞིག་ལོངས་སུ་སྤྱོད་ཐུབ་པ་བྱུང་བས། དུས་ཚོད་དང་གཉེར་སྐྱོང་གི་མ་རྩ་མང་པོ་ཞིག་གྲོན་ཆུང་བྱེད་ཐུབ་བྱུང་པས། རྙོག་དྲ་ཆེ་བའི་ཁྲོམ་རའི་ཁོར་ཡུག་འདི་ནས་གནས་ཐུབ་བྱུང་ལ། གྲུབ་འབྲས་ཀྱང་ཅུང་ཡག་པོ་ཐོབ་ཡོད་ཟེར།
ཤེས་གསལ་ལྟར་ན། ལྷ་སའི་མཐོ་གསར་ཁུལ-N•ཚི་ཡུན་དམངས་ཀྱི་ལས་གཏོད་བར་སྟོང་ནི་ལྷ་ས་གྲོང་ཁྱེར་སྣེའི་ཁུལ་གསར་པར་ཆགས་ཡོད་ཅིང་། བཟོ་བཀོད་ཀྱི་རྒྱ་ཁྱོན་ལ་སྨི་གྲུ་བཞི་མ་ཁྲི2.34ཡོད་པ་དང་། མ་དངུལ་དུང་ཕྱུར2.5བཏང་ཡོད་པ་རེད། མཐོ་གསར་ཁུལ་དུ་མཉེན་ཆས་དང་སྲ་ཆས་སྐོར་གྱི་སྒྲིག་ཆས་གང་དགོས་བསྒྲིགས་ཡོད་པ་དང་། གཙོ་བོ་ལས་གཏོད་གསར་གཏོད་དཔུང་སྡེ་ལ་མ་རྩ་ཉུང་བ་དང་། སྟབས་བདེ་བ། ཆ་རྐྱེན་འཛོམས་པ། སྒོ་འབྱེད་རྣམ་པ་བཅས་འཛོམས་པའི་གསར་དར་ལས་གཏོད་ལ་ཞབས་ཞུ་འདོན་པའི་སྟེགས་བུ་ཞིག་འཛུགས་ཆེད་རེད།
འདི་ནི་དམངས་ཀྱི་ལས་གཏོད་བར་སྟོང་གིས་ཁེ་ལས་ཐོན་རྫས་འགྲེམ་སྟོན་བྱས་ཡོད་པའི་ཚུལ་རེད།
ད་སྔའི་བར་དུ་ལས་གཏོད་བར་སྟོང་དུ་ལས་གཏོད་ཁེ་ལས་དང་རྣམ་གྲངས་དཔུང་སྡེ59། བོད་རང་སྐྱོང་ལྗོངས་རིམ་པའི་བོད་སྨན་སྡེབ་སྦྱོར་གྱི་ལས་གཞི་གཙོ་བོ་ཉམས་ཞིབ་ཁང་གཅིག་བཅས་ཡོད་ཅིང་། དེའི་ནང་ཚན་རྩལ་རིགས་ཀྱི་ཁེ་ལས32དང་། རིག་གནས་རིགས་ཀྱི་ཁེ་ལས10། ཞབས་ཞུ་རིགས་ཀྱི་ཁེ་ལས17བཅས་ཡོད། ལས་གཏོད་ཁེ་ལས་དང་རྣམ་གྲངས་དཔུང་སྡེ59ཡི་ནང་དུ། སློབ་ཆེན་པའི་ལས་གཏོད་ཁེ་ལས་སམ་རྣམ་གྲངས་དཔུང་སྡེ41ཡོད་ཅིང་། དེའི་ནང་སྐྱེས་ཁུངས་བོད་ལྗོངས་ཡིན་པའི་སློབ་ཆེན་མཐར་ཕྱིན་སློབ་མས་གཉེར་བའི་ཁེ་ལས15དང་། ལས་ཞུགས་མི་གྲངས196བཅས་ཡོད། འབྲེལ་ཡོད་ཀྱི་ལས་རིགས་ནང་དུ། ཚན་རྩལ་དང་། བོད་སྨན་ཞིབ་འཇུག་དང་གསར་སྤེལ། རིག་གནས་སྨྱན་བྱད། “ དྲ་སྦྲེལ+” ། བློ་འདྲི་ཞབས་ཞུ་སོགས་འདུས། 2017ལོར་དེར་སྡོད་པའི་ཁེ་ལས་རྣམས་ཀྱི་ཚོང་གཉེར་ཀྱི་ཡོང་འབབ་སྒོར་ཁྲི2400ལ་སླེབས་ཤིང་། ད་སྔ་སློབ་གཉེར་བྱེད་བཞིན་པའི་སློབ་ཆེན་སློབ་མ150ལྷག་ཡོད་པ་དང་། སྔ་ཕྱི་བསྡོམས་རྩིས་བརྒྱབ་ན་མི་ཐེངས414ཡི་ལས་ཞུགས་ཐག་བཅད་ཡོད་པ་དང་། དེའི་ནང་སློབ་ཆེན་པའི་མི་ཐེངས265ཡོད་ལ། མི་འབོར་སྤྱིའི64%ཟིན་ཡོད་པ་རེད།
ལྷ་སའི་མཐོ་གསར་ཁུལ་གཉིས་གཏོད་ཞབས་ཞུ་ལྟེ་གནས།
ལས་གཏོད་དཔུང་སྡེ་ཡི་དངུལ་རྩ་དང་སྲིད་ཇུས་མངའ་ཁོངས་སུ་འཕྲད་ཡོང་བའི་དཀའ་ངལ་སེལ་ཐབས་སུ། དམངས་ཀྱི་ལས་གཏོད་བར་སྟོང་གིས་ཞབས་ཞུ་ལས་ཁུངས་ཆེད་དུ་བཀོད་སྒྲིག་བྱས་ལ། དེ་ནི་ལྷ་སའི་མཐོ་གསར་ཁུལ་གཉིས་གཏོད་ཞབས་ཞུ་ལྟེ་གནས་རང་རེད།
ཤེས་གསལ་ལྟར་ན། ལྷ་སའི་མཐོ་གསར་ཁུལ་གཉིས་གཏོད་ཞབས་ཞུ་ལྟེ་གནས་ནི2017ལོའི་ཟླ10བའི་ཚེས30ཉིན་ལ་ཐོག་མར་གཉེར་འགོ་ཚུགས་ཤིང་། སྔ་ཕྱིར་སློབ་ཆེན་མཐར་ཕྱིན་སློབ་མས་ལས་གཏོད་གཙོ་གཞི(མི་སྒེར་དང་ཚོགས་པ)20ལྷག་ལ་ཞབས་ཞུ་དང་། སློབ་ཆེན་མཐར་ཕྱིན་པའི་ལས་ཞུགས་བློ་འདྲི་མཁན100ལྷག་ལ་སྣེ་ལེན། ལས་ཞུགས་ལ་སྐུལ་འཁྲིད་ཐུབ་པའི་ཚོང་འགུགས་དངུལ་འདྲེན་གྱི་ཁེ་ལས6ལ་འབྲེལ་བ་བཅས་བྱས་ནས་ལས་གཏོད་གསར་གཏོད་ཀྱི་གཙོ་གཞི3དང་། ཚོང་འགུག་དངུལ་འདྲེན་གྱི་ཁེ་ལས2བཅས་བདེ་བླག་ངང་ནང་འདྲེན་ཐུབ་པ་བྱུང་སྟེ། གསར་གཏོད་ལས་གཏོད་ཀྱི་གཙོ་གཞི་ལ་བཟོ་ཚོང་གིས་ཚབ་གཉེར་དང་། ནོར་དོན་གྱིས་ཚབ་སྒྲུབ། རྣམ་གྲངས་ཇུས་འགོད། ཁྲིམས་ལུགས་བློ་འདྲི་ལ་སོགས་པའི་ལས་སྒོ་ཧ་ལམ20མཁོ་འདོན་བྱས་ལ། འབྲེལ་ཡོད་གསར་གཏོད་ལས་གཏོད་ཀྱི་གཙོ་གཞི10ལྷག་བྱུང་།
ལྷ་སའི་མཐོ་གསར་ཁུལ་གཉིས་གཏོད་ཀྱི་གཞི་གྲངས་ཆེན་པོ་ངོམ་ས།
ལྷ་ས་གྲོང་ཁྱེར་སྣེའུ་ཁུལ་གསར་པའི་དོ་དམ་ཨུ་ལྷན་གྱི་ཀྲུའུ་རེན་ཀྲའོ་ཡ་ཡིས་འདི་སྐད། ལྷ་ས་གྲོང་ཁྱེར་མཐོ་གསར་ཁུལ་གཉིས་གཏོད་ཞབས་ཞུ་ལྟེ་གནས་ཀྱིས་ལྷ་སའི་མཐོ་གསར་ཁུལ་གྱི་ཁེ་ལས་ཆུང་འབྲིང་དང་། ཁེ་ལས་ཀྱི་ལས་དང་པོ་བ། རྣམ་གྲངས་གསར་འཛུགས་བཅས་ཞབས་ཞུ་བྱ་ཡུལ་གཙོ་བོར་བཟུང་སྟེ། སྤྱི་ཕན་རང་བཞིན་གྱི་བློ་འདྲི་རྨང་གཞི་བྱས་ཤིང་། ཆེད་ལས་དང་རིམ་པ་མཐོ་ཤོས་ཀྱི་རིག་སྟོབས་ཞབས་ཞུ་ཁྱད་ཆོས་སུ་བཟུང་འཛིན་པ། བོད་ལྗོངས་སུ་ཆེད་ལས་དང་གཞི་ཁྱོན་ཕྱོགས་གང་ཅིའི་ཐད་ནས་རྩེ་གྲ་ཡིན་པའི་ཁེ་ལས་ཞབས་ཞུ་སྟེགས་བུ་འཛུགས་རྒྱུ་དམིགས་འབེན་བཅས་བྱས་ཐོག བོད་ལྗོངས་ཀྱི་ཚད་མཐོའི་གསར་གཏོད་པའི་གནས་མཆོག་བསྐྲུན་པར་ནུས་ཤུགས་ཡོད་རྒུ་འདོན་པ་ཡིན་ཟེར།
