ཕོ་བྲང་པོ་ཏ་ལའི་རིག་གནས་བསམ་བཀོད་ཐོན་རྫས་ལ་ཀུན་གྱིས་དགའ་པོ་བྱེད་པ།
སྤེལ་དུས 2018-10-08
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། ལྕགས་བྱམས་ཀྱིས་བསྒྱུར།
ཀྲུང་གོའི་བོད་ལྗོངས་དྲ་བའི་འཕྲིན། ཕོ་བྲང་པོ་ཏ་ལ་ནི་རྒྱལ་ཡོངས་ཀྱི་གཙོ་གནད་རིག་དངོས་སྲུང་སྐྱོང་ཚན་པ་དང་འཛམ་གླིང་རིག་གནས་ཀྱི་ཤུལ་གཞག་ཅིག་རེད། ཕོ་བྲང་པོ་ཏ་ལའི་རིག་གནས་བསམ་བཀོད་ཐོན་རྫས་ནི་ཕྱི་ཕྱོགས་དྲིལ་བསྒྲགས་ཀྱི་སྐར་ཁུང་ཞིག་གི་ངོས་ནས་ལྷ་སའི་མིང་བྱང་ཞིག་ཏུ་གྱུར་ཡོད།
ཕོ་བྲང་པོ་ཏ་ལའི་རིག་གནས་ཤུལ་གཞག་གི་སྤྱི་ཚོགས་ནུས་པ་སྔར་བས་ལེགས་པའི་ངང་འདོན་སྤེལ་བྱ་ཆེད། ཉེ་བའི་ལོ་ཤས་རིང་། ཕོ་བྲང་པོ་ཏ་ལ་དོ་དམ་ཁྲུའུ་ཡིས་ཉར་ཚགས་བྱས་པའི་ཐོན་ཁུངས་ཕུན་སུམ་ཚོགས་པོར་བརྟེན་ནས་གསར་བཟོ་ཐེངས་གཉིས་བྱས་ཤིང་དེང་རབས་ཀྱི་དར་བཟོའི་འགྲོས་དང་བསྟུན་ནས་སྣ་ཁ་མང་བའི་རིག་གནས་བསམ་བཀོད་ཐོན་རྫས་བཟོས་ཏེ་བོད་ཀྱི་རིག་གནས་བསམ་བཀོད་ཁྲོམ་རའི་སྙན་གྲགས་སྔར་བས་ཆེ་རུ་བཏང་ཡོད། མིག་སྔར་ཕོ་བྲང་པོ་ཏ་ལའི་རིག་གནས་བསམ་བཀོད་ཐོན་རྫས་སྣ་ཁ་300ལྷག་ཙམ་ཡོད་པ་དང་། གང་འདོད་ཉོ་རུང་བའི་བོད་ཀྱི་རིག་གནས་ཐོན་རྫས་དེ་དག་ལ་རྒྱལ་ཁབ་ཕྱི་ནང་གི་ཡུལ་སྐོར་བས་ཧ་ཅང་དགའ་པོ་བྱེད་ཀྱི་ཡོད།
ཤེས་རྟོགས་བྱུང་བར་གཞིགས་ན། ཕོ་བྲང་པོ་ཏ་ལས་རིག་དངོས་དང་གནའ་དཔེ་ཁྲི་10ལེགས་སྒྲིག་བྱས་པར་གནའ་དཔེ་རྩ་ཆེན་ཁྲི་6དང་། སྐུ་འདྲ་དང་། ཐང་ག མཆོད་ཆས་སོགས་ཁྲི་4ཚུད་ཡོད། རིག་དངོས་ཐོན་ཁུངས་ཕུན་སུམ་ཚོགས་པོ་ཡོད་པས་ཕོ་བྲང་པོ་ཏ་ལའི་རིག་གནས་བསམ་བཀོད་འཕེལ་རྒྱས་ལ་རྨང་གཞི་བརྟན་པོ་བཏིང་ཡོད་པ་རེད།
བོད་ལྗོངས་ཕོ་བྲང་པོ་ཏ་ལ་རིག་གནས་བསམ་བཀོད་ཐོན་རྫས་ཚད་ཡོད་ཀུང་སིའི་འགན་འཁུར་བས་ངོ་སྤྲོད་བྱས་པ་ལྟར་ན། ཕོ་བྲང་པོ་ཏ་ལ་རིག་གནས་བསམ་བཀོད་ཐོན་རྫས་ལ་ཆོས་ལུགས་མི་སྣ་དང་རིག་དངོས་ཞིབ་འཇུག་པའི་བསམ་འཆར་བསྡུ་ལེན་བྱས་པ་དང་སྦྲགས། ཁོང་ཚོར་མཛུབ་ཁྲིད་དང་ཞིབ་བཤེར་བྱེད་དུ་བཅུག་པས། ཕོ་བྲང་པོ་ཏ་ལར་གསར་སྤེལ་བྱེད་ཆོག་པའི་རིག་གནས་ཐོན་ཁུངས་ཧ་ཅང་ཕུན་སུམ་ཚོགས་པོ་ཡོད་པ་མ་ཟད། དམིགས་བསལ་རང་བཞིན་ཡང་ཆེན་པོ་ལྡན་ཡོད། “མིག་སྔར་ཕོ་བྲང་པོ་ཏ་ལ་དོ་དམ་ཁྲུའུ་ཡིས་རིག་གནས་བསམ་བཀོད་ཐོན་རྫས་གསར་སྤེལ་ལ་རང་ཉིད་ཀྱི་བསམ་ཕྱོགས་ཤིག་རིམ་གྱིས་གྲུབ་པ་མ་ཟད། མུ་མཐུད་འཐུས་སྒོ་ཚང་དུ་འགྲོ་བཞིན་ཡོད། ང་ཚོས་ཉར་ཚགས་བྱས་པའི་ཐོན་ཁུངས་ལ་གཞིགས་ནས་1∶1གི་འདྲ་བཟོས་དངོས་རྫས་དང་བསྐྲུན་དངོས་ཆུང་དུ་བཏང་བའི་ཐོན་རྫས་སམ་ཡང་ན་མི་རིགས་ཀྱི་ཁྱད་ལྡན་ཡུལ་སྐོར་དྲན་རྟེན་དངོས་པོ་དང་དེ་བཞིན་ལག་ཤེས་ཐོན་རྫས་སོགས་རིག་གནས་བསམ་བཀོད་ཐོན་རྫས་མི་འདྲ་བ་བཟོ་ཡི་ཡོད། གཞན་ཡང་ཡུལ་དེའི་མི་སེར་གྱིས་སྤོས་དང་། ཐང་ག སྐུ་འདྲ་སོགས་རིག་གནས་བསམ་བཀོད་ཐོན་རྫས་ཉོ་བར་དགའ་པོ་བྱེད་པ་དང་། ཡུལ་སྐོར་བས་བྲིས་སྐུ་དང་། ཨར་སྐྲུན་དཔེ་དབྱིབས། ལག་གདུབ། ལྡེ་མིག་སྒྲོག་ཆས། དཔེ་འཛར་སོགས་ཐོན་རྫས་ལ་དེ་བས་དགའ་པོ་བྱེད་པ། ད་དུང་གྲངས་གཞི་ལས་མངོན་པ་ལྟར་ན། ཕྱི་རྒྱལ་གྱི་ཡུལ་སྐོར་བས་མི་རིགས་ཀྱི་ཁྱད་ཆོས་ཟབ་མོ་ལྡན་པའི་དངོས་རྫས་ལ་དགའ་པོ་བྱེད་པས། ང་ཚོས་ཚོགས་པ་མི་འདྲ་བས་རིག་གནས་བསམ་བཀོད་ཐོན་རྫས་གང་ལ་དགའ་པོ་བྱེད་མིན་དང་། བྲིན་ཚོང་གནས་ཚུལ་ཇི་འདྲ་ཡིན་མིན། རིགས་གང་ཞིག་ལ་དེ་བས་དགའ་པོ་བྱེད་པ་སོགས་ཀྱི་གནས་ཚུལ་ལ་གཞིགས་ནས་གསར་སྤེལ་བསམ་ཕྱོགས་ལེགས་སྒྲིག་བྱས་ཏེ། མི་མང་པོ་ཞིག་གིས་ཕོ་བྲང་པོ་ཏ་ལ་ནས་མཐོང་མི་ཐུབ་པའི་རིག་དངོས་ཁོང་ཚོའི་འདྲེན་བྱེད་ལམ་དུ་དྲངས་ཀྱི་ཡོད”ཅེས་འགན་འཁུར་བས་བཤད།
“ཕོ་བྲང་པོ་ཏ་ལའི་རིག་གནས་བསམ་བཀོད་ཐོན་རྫས་ལ་གསར་སྤེལ་གྱི་དམིགས་བསལ་ཁྱད་ཆོས་ལྡན་པས། མ་བྲིན་པའི་སེམས་ཁྲལ་མི་འདུག གསར་སྤེལ་གྱི་སྤུས་ཚད་ལ་དང་དོད་ཆེན་པོ་དགོས་ཀྱི་འདུག་པས་མིག་སྔར་ཐོན་རྫས་གསར་སྤེལ་ཚང་མ་སྤྱིར་ན་ཆེད་དམིགས་ཚོགས་པས་བཟོ་ཡི་ཡོད། ཕར་ཙམ་ཞིག་གཞན་ལ་བཟོ་རྩལ་གྱི་དབང་ཆ་སྤྲོད་རྒྱུའི་ཐད་བསམ་བློ་བཏང་མེད། མིག་སྔར་ང་ཚོས་བཟའ་བཏུང་ཐད་ཀྱི་ཐོན་རྫས་བཏོན་པ་དང་། སྔོན་དཔག་བྱས་ན་འདི་ལོ་ང་ཚོས་རྒྱལ་ཡོངས་ལ་ཕྱོགས་ནས་ཕོ་བྲང་པོ་ཏ་ལའི་དྲན་རྟེན་དེབ་དང་དྲན་རྟེན་སྒོར་མོ་འདོན་རྩིས་ཡོད”ཅེས་འགན་འཁུར་བ་དེས་བཤད།
