བོད་ཀྱི“རིག་ནུས་ཁྲིམས་ཁང”གིས་ཞིང་འབྲོག་པ་ཚོར་བཅའ་ཁྲིམས་ཀྱི་ཞབས་ཞུ་སྟབས་བདེ་མཁོ་འདོན་གནང་པ།
སྤེལ་དུས 2018-10-09
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བཀྲ་རྒྱལ་གྱིས་བསྒྱུར།
གློག་རྡུལ་ཡིག་ཚགས་གྱོད་གཞི་དང་ལྷན་དུ་དུས་མཉམ་དུ་གྲུབ་པ་དང་།ཁྲིམས་རའི་འདྲི་གཅོད་ཀྱི་སྐད་ཆ་དབྱེ་འབྱེད།ཁྲིམས་གཅོད་ཡིག་རིགས་བོད་རྒྱ་སྐད་གཉིས་རང་བཞིན་དུ་གྲུབ་པ།གཞི་གྲངས་ཆེན་པོའི་ཉེས་གསོག་གི་ཆེད་དོན་སྙན་ཞུ་གྲུབ་པ།འཁོར་ཐོག་ཏུ་སྐོར་སྐྱོད་ཚན་རྩལ་ཁྲིམས་ར་ཡོད་པ་བཅས་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི“རིག་ནུས་ཁྲིམས་ཁང”བསྐྲུན་པའི་གྲུབ་འབྲས་ཀྱིས་རྒྱ་ཆེའི་ཞིང་འབྲོག་མང་ཚོགས་ལ་སྟབས་བདེའི་ཁྲིམས་ལུགས་ཞབས་ཞུ་མཁོ་འདོན་གནང་ཡོད་པ་རེད།
བོད་ནི་ས་རྒྱ་ཆེ་ཞིང་མི་འབོར་ཉུང་བའི་ཁར་ལམ་ཐག་རིང་པོ་ཡོད་པས་གྱོད་གཞི་སྒྲུབ་གཉེར་གྱི་མ་རྩ་མཐོན་པོ་ཆགས་ཡོད་རེད།“ཆ་འཕྲིན་ཅན་གྱི་འཛུགས་སྐྲུན་གྱིས་མི་དམངས་མང་ཚོགས་ཀྱིས་གཏུག་བཤེར་གོ་རིམ་ཁྲོད་ཀྱི་དུས་ཚོད་དང་དཔལ་འབྱོར་གྱི་མ་རྩ་ཇེ་དམའ་རུ་བཏང་ཡོད་པ་དང་།ལས་དོན་མི་སྣས་གྱོད་སྒྲུབ་ཀྱི་མ་རྩ་ཡང་གྲོན་ཆུང་དུ་བཏང་ཡོད”ཅེས་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གི་ལག་བསྟར་ཁྲིམས་དཔོན་གྱི་ལས་རོགས་ཝང་ཡུང་ཀང་གིས་དེ་སྐད་བཤད།
ངོ་སྤྲོད་བྱས་པར་གཞིགས་ན།བོད་ཀྱི་མཐོ་རིམ་མི་དམངས་ཁྲིམས་ཁང་གིས་ད་དུང་གཞི་རིམ་ཁྲིམས་ཁང་ལ་སྐོར་སྐྱོད་ཚན་རྩལ་ཁྲིམས་རའི་རླངས་འཁོར་བཀོད་སྒྲིག་བྱས་ཡོད་ཅིང་།གཏུག་བཤེར་ཞབས་ཞུ་ནི་ཞིང་ལས་ས་ཁུལ་དང་རྩྭ་ཐང་གི་འབྲོག་སྡེ་བཅས་ལ་འབྱོར་ནས་དུས་ཐོག་ཏུ་གྱོད་དོན་ཐོ་འགོད་བྱས་ཚེ་དུས་ཐོག་ཏུ་ཞིབ་གཅོད་བྱས་ནས་ཞིང་འབྲོག་མང་ཚོགས་ཀྱིས་གཏུག་བཤེར་ལ་སྟབས་བདེ་བསྐྲུན་ཡོད།
བོད་དུ་གཞི་རིམ་ཁྲིམས་ཁང་གིས་དང་ལེན་བྱས་པའི་གྱོད་དོན80%ནི་ཞིང་འབྲོག་མང་ཚོགས་ཀྱི་གྱོད་དོན་ དང་འབྲེལ་ཡོད་པ་རེད།ཞིང་འབྲོག་མང་ཚོགས་རང་མི་རིགས་ཀྱི་སྐད་ཡིག་གི་ལམ་ནས་གཏུག་བཤེར་གྱི་ཁེ་དབང་ལ་འགན་སྲུང་གང་ལེགས་བྱ་ཆེད།བོད་ཀྱི་མཐོ་རིམ་མི་དམངས་ཁྲིམས་ཁང་དང་བོད་ལྗོངས་སློབ་ཆེན་གྱིས་མཉམ་འབྲེལ་ཐོག་བོད་ཡིག་གི་འདྲི་གཅོད་རམ་འདེགས་ལོ་ཙཱའི་མ་ལག་གསར་སྤེལ་གནང་ཐོག ཁྲིམས་གཅོད་ཡིག་རིགས་དང་མི་དམངས་འཐུས་ཚོགས་ཀྱི་སྙན་ཞུ།མི་དོན་བསྐོ་གཞག་བྱེད་པ་སོགས་ཀྱི་གཞུང་ཡིག་ཡིག་སྒྱུར་བྱེད་རྒྱུ་མངོན་འགྱུར་བྱུང་པ་དང་། ཡིག་སྒྱུར་གནད་ལ་འཁེལ་ཚད70%ཡས་མས་ཟིན་ཡོད།“ལས་རིམ་རྗེས་མར་ང་ཚོས་ད་དུང་མ་ལག་རིམ་སྤོར་དང་ཡིག་སྒྱུར་གནད་ལ་འཁེལ་ཚད་ཇེ་མཐོར་གཏོང་རྒྱུ་ཡིན”ཞེས་བོད་རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་གིས་ལག་རྩལ་ཆ་འཕྲིན་ཁྲུའུ་ཡི་ལས་བྱེད་པ་ཞུས་ཡུས་ཡིས་དེ་སྐད་བཤད་བྱུང་།
གསར་འགོད་པས་ཤེས་རྟོགས་བྱུང་པ་ལྟར་ན།ལོ་ངོ་དུ་མའི་རིང་གི་ཆ་འཕྲིན་ཅན་གྱི་འཛུགས་སྐྲུན་བརྒྱུད།2018ལོའི་ཟླ10 པའི་ཟླ་མཇུག་བར་།བོད་ཀྱི་ཁྲིམས་ཁང་ཁོངས་གཏོགས་ཀྱི་ཆ་འཕྲིན་ཅན་གྱི་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ་དང་ལྗོངས་སུ་ཁྱོན་བསྡོམས་ཚན་རྩལ་ཁྲིམས་ར157 འཛུགས་བསྐྲུན་གནང་ཞིང་། རང་སྐྱོང་ལྗོངས་མཐོ་རིམ་མི་དམངས་ཁྲིམས་ཁང་དང་། ས་ཁུལ(གྲོང་ཁྱེར)7 ཀྱི་འབྲིང་རིམ་མི་དམངས་ཁྲིམས་ཁང་། རྫོང(ཆུས) 74 ཁྲིམས་ཁང་དང་དེ་བཞིན་ཤང་གྲོང་ཁག་ཅིག་གི་ཁྲིམས་རར་བརྙན་ལམ་ཚོགས་འདུ་འཚོགས་རྒྱུ་དང་། ཁྲིམས་རའི་འདྲི་གཅོད་ཐད་གཏོང་བྱེད་པ་སོགས་ལྟེ་བའི་ལས་སྒོ་ཁྱབ་ཐུབ་པ་བྱུང་ཡོད།