དྲ་རྒྱའི་གྲགས་ཅན་མི་སྣས་གནད་འཕིགས་དབུལ་སྐྱོར་ལ་བལྟ་བའི་བྱེད་སྒོ་ལྷ་སར་སྤེལ་འགོ་ཚུགས།
སྤེལ་དུས 2018-12-05
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། བྱམས་པས་བསྒྱུར།
འགོ་ཚུགས་མཛད་སྒོའི་ཡུལ་དངོས།
ཀྲུང་གོའི་བོད་ལྗོངས་དྲ་བའི་འཕྲིན། ཟླ12ཚེས3ཉིན་གྱི་སྔ་དྲོར། བོད་རང་སྐྱོང་ལྗོངས་ཏང་ཨུད་དྲ་འཕྲིན་གཞུང་དོན་ཁང་དང་དབུལ་སྒྲོལ་འགག་སྒྲོལ་བཀོད་འདོམས་པུའི་གཞུང་ལས་ཁང་གིས་མཉམ་འབྲེལ་ཐོག་གཙོ་གཉེར་བྱས་པའི“དུས་རབས་གསར་པ། རྣམ་པ་གསར་པ། བྱ་སྤྱོད་གསར་པའི་”དྲ་རྒྱའི་གྲགས་ཅན་མི་སྣས་གནད་འཕིགས་དབུལ་སྐྱོར་ལ་བལྟ་བའི་བྱེད་སྒོ་དེ་བོད་རང་སྐྱོང་ལྗོངས་ལྷ་ས་གྲོང་ཁྱེར་སྟོད་ལུང་བདེ་ཆེན་ཁུལ་དུ་དངོས་སུ་སྤེལ་འགོ་ཚུགས་པ་རེད།
འགོ་ཚུགས་མཛད་སྒོའི་ཐོག་གསར་འགོད་པས་ཤེས་རྟོགས་བྱུང་གསལ། 2016ལོ་ནས་བཟུང་། བོད་ལྗོངས་ཀྱི་མི་འབོར་དབུལ་པོ་ཁྲི་29.7དབུལ་སྒྲོལ་ཐུབ་པ་དང་། གྲོང་ཚོ་དབུལ་པོ་2700ལྷག་ཙམ་ཕྱིར་བུད། གྲོང་ཚོ་དབུལ་པོ་30ཡི་དབུལ་པོའི་ཞྭ་མོ་ཕུད། དབུལ་ཕོངས་ས་ཁུལ་གྱི་རྨང་གཞིའི་སྒྲིག་བཀོད་ཀྱི་ཆ་རྐྱེན་མངོན་གསལ་དོད་པོས་ལེགས་སུ་ཕྱིན་པ་དང་། གཞི་རྩའི་སྤྱི་པའི་ཞབས་ཞུ་མངོན་གསལ་དོད་པོས་མཐོ་རུ་སོང་། དབུལ་པོའི་མང་ཚོགས་ཀྱི་ཡོང་འབབ་མངོན་གསལ་དོད་པོས་མཐོ་རུ་ཕྱིན། བོད་ལྗོངས་ཀྱི་དབུལ་པོའི་རྣམ་པ་མངོན་གསལ་དོད་པོས་ལེགས་བཅོས་བྱུང་བས་བོད་ལྗོངས་ཀྱི་ཁྱད་ཆོས་ལྡན་པའི་དབུལ་སྒྲོལ་འགག་སྒྲོལ་གྱི་ལམ་བུ་ཞིག་གཏོད་ཡོད།
འགོ་ཚུགས་མཛད་སྒོའི་ཡུལ་དངོས།
ཐེངས་འདིའི་བྱེད་སྒོར་རྒྱལ་ཡོངས་ཀྱི་དྲ་རྒྱའི་གྲགས་ཅན་མི་སྣའི་འཐུས་མི་13གདན་དྲངས་ཡོད། ཐེངས་འདིའི་བྱེད་སྒོར་ཞུགས་པའི་དྲ་རྒྱའི་གྲགས་ཅན་མི་སྣ་རྣམས་ཀྱིས་དཔལ་འབྱོར་དབྱེ་ཞིབ་དང་དངོས་ལུགས་ཚན་རིག རིག་གནས་ཁྱབ་སྤེལ། ཁོར་ཡུག་སྲུང་སྐྱོང་དྲིལ་བསྒྲགས་སོགས་ཁྱབ་ཁོངས་མང་པོར་ལས་ཀ་གཉེར་བ་དང་ཡང་ན་ཆེད་ལས་ཀྱི་ཡོན་ཏན་ལྡན་པ་རེད།
ཐེངས་འདིའི་བྱེད་སྒོའི་དམིགས་ཡུལ་ནི་དྲ་རྒྱའི་གྲགས་ཅན་མི་སྣ་13ཡི་མིག་དབང་བརྒྱུད། བོད་ལྗོངས་མི་རིགས་ཁག་གི་མང་ཚོགས་ཀྱིས་དཔའ་ངར་ཆེར་སྐྱེད་ཀྱིས་འབད་བརྩོན་བྱས་ཏེ། ལག་ལེན་འཚོལ་ཞིབ་དང་སྒྱུར་བཅོས་གསར་གཏོད་ཕོད་པ། ཤུགས་ཆེན་པོས་འཕེལ་རྒྱས་ནང་གནས་ཀྱི་སྒུལ་ཤུགས་དཔེ་མཚོན་བཅས་དྲིལ་བསྒྲགས་ཤུགས་ཆེན་བྱས་ཐོག བོད་ལྗོངས་མི་རིགས་ཁག་གི་མང་ཚོགས་ཀྱིས་ཏང་ཀྲུང་དབྱང་གི་སྐུལ་བརྡ་དང་དམ་པོར་དམིགས་ཏེ། བོད་རང་སྐྱོང་ལྗོངས་ཏང་ཨུད་ཀྱི་ཞུམ་མེད་སྟོབས་ལྡན་གྱི་འགོ་ཁྲིད་འོག གསོ་རླུང་མི་འདང་ཡང་སྙིང་སྟོབས་མི་ཉམས་པ། རྡོག་རྩ་གཅིག་སྒྲིལ། སྙིང་སྟོབས་ཡོད་ཚད་ཀྱིས་ཤུགས་རྒྱག་པ། འབད་བརྩོན་གྱིས་འབྱོར་འབྲིང་ཕྱོགས་སུ་བསྐྱོད་པའི་གསོན་ཉམས་ལྡན་པའི་ཉམས་འགྱུར་དྲིལ་བསྒྲགས་ཤུགས་ཆེན་བྱེད་པ་རེད།
རྒྱུས་ལོན་བྱུང་བ་ལྟར་ན། “དུས་རབས་གསར་པ། རྣམ་པ་གསར་པ། བྱ་སྤྱོད་གསར་པའི་” དྲ་རྒྱའི་གྲགས་ཅན་མི་སྣས་གནད་འཕིགས་དབུལ་སྐྱོར་ལ་བལྟ་བའི་བྱེད་སྒོ་ནི་ཟླ12ཚེས3ཉིན་དངོས་སུ་སྤེལ་འགོ་ཚུགས་ཤིང་། ཚེས8ཉིན་མཇུག་བསྡུ་འཆར་ཡོད། དུས་ཡུན་ཉིན་ལྔ་ཡིན། ཐེངས་འདིའི་བྱེད་སྒོར་ཞུགས་པའི་དྲ་རྒྱའི་གྲགས་ཅན་མི་སྣའི་འཐུས་མི་13ལྷ་ས་དང་ལྷོ་ཁ། གཞིས་རྩེ་བཅས་ས་ཁུལ་གསུམ་གྱི་རྟོག་ཞིབ་བྱེད་གནས་20ལ་བསྐྱོད་ནས་རྟོག་ཞིབ་རྒྱུས་ལོན་བྱ་རྒྱུ་རེད།