མི་11འདས་གྲོངས་སུ་ཕྱིན་པ་དང་། སི་ཁྲོན་ཁྲང་ཉིང་དུ་མུ་མཐུད་ས་འགུལ་རོགས་སྐྱོབ་བྱེད་བཞིན་ཡོད།
སྤེལ་དུས 2019-06-18
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
ཟླ་6པའི་ཚེས་17ཉིན་གྱི་ཆུ་ཚོད་22དང་སྐར་མ་55ཡི་སྟེང་། སི་ཁྲོན་ཞིང་ཆེན་དབྱི་པེན་གྲོང་ཁྱེར་ཁྲང་ཉིང་རྫོང་དུ་རིམ་པ་6.0ཡིན་པའི་ས་འགུལ་བྱུང་། ཚེས་18ཉིན་གྱི་ཆུ་ཚོད་5དང་སྐར་མ་20ཡི་བར་དུ། ས་འགུལ་ཁྲོད་ཁྱོན་བསྡོམས་མི་11འདས་གྲོངས་(ཁྲང་ཉིང་ནས་མི་8དང་། གུང་རྫོང་ནས་མི་3།)སུ་ཕྱིན་པ་དང་། མི་122ལ་རྨས་སྐྱོན་ཐེབས་ཡོད། ཁྲང་ཉིང་དུ་མི་14ཕྱིར་འབུད་ཐུབ་མེད་ལ། དེ་ལས་མི་13བསྐྱབས་པ་དང།(མི་6འདས་གྲོངས་སུ་ཕྱིན།) མི་1ད་དུང་སྐྱོབ་བཞིན་ཡོད་ལ། ཚེ་སྲོག་གི་ཉེན་ཁ་མེད།
ས་གནས་ཀྱིས་ཉེན་བརྡ་བཏང་བ།
སི་ཁྲོན་ཁྲང་ཉིང་དུ་རིམ་པ་6.0ཅན་གྱི་ས་འགུལ་བྱུང་རྗེས། སྐབས་བསྟུན་བདག་དམ་པུའུ་ཡིས་མྱུར་དུ་ཉེན་བརྡ་བཏང་བ་དང་། སྐབས་བསྟུན་རས་གུར་5000ལྷག་དང་། ལྟེབ་སྒྲིལ་ཉལ་ཁྲི་ཁྲི་1དང་། སྲིང་བལ་ཉལ་ཆས་ཁྲི་2བཀོད་སྒྲིག་བྱས་ནས། ས་འགུལ་རོགས་སྐྱོབ་གྱི་བྱ་བར་རྒྱབ་སྐྱོར་བྱས།
སི་ཁྲོན་ཞིང་ཆེན་སྲིད་གཞུང་གིས་རིམ་པ་གཉིས་པའི་ཉེན་བརྡ་བཏང་བ་དང་། སྟོབས་ཤུགས་རྩ་འཛུགས་བྱས་ནས་ས་འགུལ་གནོད་སྐྱོན་ས་ཁུལ་དུ་སོང་ནས་གནས་ཚུལ་ལ་རྒྱུས་ལོན་བྱས། སྟོབས་ཤུགས་ཡོད་དགུས་རྨས་ཐེབས་མི་སྣ་རོགས་སྐྱོབ་བྱས། གནོད་ཐེབས་ས་ཁུལ་གྱི་མི་རྣམས་ལུགས་མཐུན་ངང་ས་གཞན་དུ་སྤོས་ནས་གནས་བཅའ་བ་དང་། མིག་སྔར། དྲག་ཆས་ཉེན་རྟོག་པ་དང་། མེ་གསོད་རུ་ཁག་སོགས་ཀྱི་སྟོབས་ཤུགས་གནོད་ཐེབས་ས་ཁུལ་དུ་བཏང་ནས། གནོད་ཐེབས་རོགས་སྐྱོབ་ཀྱི་བྱ་བ་སྤེལ་བཞིན་ཡོད།
ཕྱིར་འབུད་མ་ཐུབ་པའི་མི་མང་པོ་བསྐྱབས་པ།
ཟླ་6པའི་ཚེས་17ཉིན་གྱི་ཆུ་ཚོད་23དང་སྐར་མ་30ཡི་སྟེང་། ཁྲང་ཉིང་དྲག་ཆསཉེན་རྟོག་རུ་ཁག་བར་མའི་བཀོད་འདོམས་པ་ཝང་ལི་ཏུང་གིས་སྐབས་བསྟུན་འཛིན་གྲྭ་ཁྲིད་ནས་ཆས་པ་དང་། རྐང་ཐང་དུ་ས་འགུལ་ལྟེ་གནས་ཧྲེང་ཧའོ་གྲོང་རྡལ་གྱི་ནུབ་ལམ་དུ་སླེབས་ནས་གནོད་ཐེབས་གནས་ཚུལ་ལ་རྒྱུས་ལོན་བྱས་པ་དང་། རོགས་སྐྱོབ་བྱ་བའི་འགོ་ཚུགས། མང་ཚོགས་ཀྱིས་རོགས་སྐྱོབ་རེ་ཞུ་འབྱོར་རྗེས། དཔོན་དམག་རྣམས་ཀྱིས་ཁང་བརྩེགས་རྙིང་པ་ཁ་ཤས་བརྡིབས་ཡོད་པ་མཐོང་། མང་ཚོགས་ཀྱིས་ངོ་སྤྲོད་བྱས་པར་གཞིགས་ན་མི་ཁ་ཤས་ཕྱིར་འབུད་ཐུབ་མི་འདུག རྩད་གཅོད་བྱས་རྗེས་དཔོན་དམག་རྣམས་ཀྱིས་ཁང་པ་བརྡིབས་པའི་འོག་ཏུ་ཚེ་སྲོག་གི་རྟགས་མཚན་ཡོད་པ་ཤེས། ཞིག་རོ་དེ་གཙོ་བོ་གདུང་མ་དང་རྡོ་ཡིས་གྲུབ་ཡོད། དཔོན་དམག་རྣམས་ཀྱིས་ ལམ་སེང་རོགས་སྐྱོབ་རྒྱུ་ལམ་བཟོས་པ་རེད། ཕྱིར་འབུད་ཐུབ་མེད་པའི་མི་གཅིག་མཚན་མོའི་ཆུ་ཚོད་0དང་སྐར་མ་20ཡི་སྟེང་དུ་སྐྱོབ་ཐུབ་པ་བྱུང་། མིག་སྔའི་བར་མི་མང་པོ་ཞིག་བསྐྱབས་ཐུབ་ཡོད་ལ། རོགས་སྐྱོབ་ཀྱི་བྱ་བ་ད་དུང་མུ་མཐུད་སྤེལ་བཞིན་ཡོད།
ཁྲིན་ཡུའུ་མྱུར་བགྲོད་གཞུང་ལམ་དང་། ཁྲིན་ཙི་ལུའུ་མྱུར་བགྲོད་གཞུང་ལམ་དུ་ཤར་གཏོང་བརྒྱུད་ལམ་བཏང་ཡོད་པས། བཟུང་སྤྱོད་མི་བྱེད་རོགས།
སི་ཁྲོན་མྱུར་བགྲོད་སྤྱི་བདེ་ཡན་ལག་ཅུས་དང་པོ་ནས་བཏང་བའི་གནས་ཚུལ་ལྟར་ན། ཁྲིན་ཏུའུ་གྲོང་ཁྱེར་མཐའ་འཁོར་གྱི་ཞ་རོང་མྱུར་བགྲོད་G76རྟགས་ཅན་གྱི་ཁྲིན་ཡུའུ་བར་རྒྱུད་དང་རུང་ཙུང་མྱུར་བགྲོད་G4215རྟགས་ཅན་གྱི་ཁྲིན་ཙི་ལུའུ་་ཡི་བར་རྒྱུད་ཚང་མར་ཆེད་དུ་ཤར་གཏོང་བརྒྱུད་ལམ་བཏང་ནས། མྱུར་སྐྱོབ་ཀྱི་བགྲོད་ལམ་ཤར་གཏོང་ཐུབ་པར་ཁག་ཐེག་བྱས་ཡོད། མྱུར་བགྲོད་འགྲིམ་འགྲིལ་ཉེན་རྟོག་པས་ཡར་མར་གྱི་འགྲུལ་སྐྱོད་རླངས་འཁོར་དག་གིས་མྱུར་སྐྱོབ་རླངས་འཁོར་རུ་ཁག་ལ་ལམ་འབྱེད་པར་དོ་སྣང་དང་། ཆེད་གཏོང་བརྒྱུད་ལམ་བཀག་འགོག་དང་བཟུང་སྤྱོད་མི་རུང་བར་གསལ་འདེབས་བྱས་ཡོད།
མཚན་མོར་ཆར་བ་འབབ་པ་མང་བས། ས་གཤིས་གནོད་སྐྱོན་ལ་དོགས་ཟོན་བྱེད་དགོས།
ཚོད་དཔག་ལྟར་ན་ས་འགུལ་གནོད་ཐེབས་ས་ཁུལ་(ཁྲང་ཉིང་།)དུ་མ་འོངས་པའི་ཉིན་གསུམ་གྱི་རིང་གི་གནམ་གཤིས་གནས་ཚུལ་ནི་གཤམ་གསལ་ལྟར་ཡིན་ཏེ། ཚེས་18ཉིན་ལ་ཆར་ཆུང་ཆུང་ནས་གནམ་འཐིབ་པ་དང་། ཚེས་19ནས་ཚེས་20བར་ཉིན་མོར་གཙོ་བོ་གནམ་འཐིབ་ནས་སྤྲིན་མང་བ། མཚན་མོར་ཆར་ཆུང་ཆུང་འབབ་རྒྱུ་རེད། དེ་རུ་ས་འགུལ་གནོད་ཐེབས་ཁུལ་མཐའ་འཁོར་གྱི་ཁྲང་ཉིང་རྫོང་ཧྲེང་ཧའོ་གྲོང་རྡལ་དང་། ལུང་ཐའོ་གྲོང་རྡལ། མའེ་ཏུང་གྲོང་རྡལ་བཅས་ཚུད། གུང་རྫོང་གི་གུང་ཆོན་གྲོང་རྡལ་དང་ཏའེ་ཏུང་གྲོང་རྡལ་དུ་མ་འོངས་པའི་ཉིན་གསུམ་གྱི་རིང་ལ་གཙོ་བོ་གནམ་འཐིབ་པ་དང་། མཚན་མོར་ཆར་བ་མང་རྒྱུ་རེད། ཆེས་དམའ་བའི་དྲོད་ཚད་ནི་21~24℃བར་ཡིན་ལ། ཆེས་མཐོ་བའི་དྲོད་ཚད་ནི་27~31℃བར་ཡིན། ཉེ་ལམ་ཆར་བ་འབབ་སྐབས་མང་བས། ལམ་དུ་བརླན་གཤེར་ཆེ་ཞིང་། རླངས་འཁོར་སྐྱོད་སྐབས་བདེ་འཇགས་ལ་མཉམ་འཇོག་བྱེད་དགོས། དེ་དང་ཆབས་ཅིག་རུ་ཁུལ་གྱི་ལམ་རྒྱུད་ས་གཤིས་གནོད་སྐྱོན་ལ་དོ་སྣང་བྱེད་དགོས་ལ། ལྷག་པར་དུ་གཞུང་ལམ་འགྲམ་གཉིས་ཀྱི་རི་བོ་ཉིལ་བ་(རྦབ་རྡོ་འགྲིལ་བ)སོགས་ཀྱི་ས་གཤིས་གནོད་སྐྱོན་ལ་དོ་སྣང་ཆེན་པོ་བྱེད་དགོས།