ཧན་ཧོང་གི་བརྩེ་སེམས་དགེ་སྦྱོར་ཐེབས་རྩ་ཚོགས་པས་བོད་ལྗོངས་སུ་སྤྱི་ཕན་བྱ་འགུལ་སྤེལ་བ།
སྤེལ་དུས 2019-07-17
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
ཀྲུང་གོའི་བོད་ལྗོངས་དྲ་བའི་འཕྲིན། “སྐུ་ཁམས་བཟང་།”བོད་སྐད་ཀྱི་ཁམས་བདེའི་འཚམས་འདྲིའི་ཁྲོད་ནས། གཞས་མ་ཧན་ཧོང་མོ་རང་གིས་རྩ་འཛུགས་བྱས་པའི་ཧན་ཧོང་གི་བརྩེ་སེམས་དགེ་སྦྱོར་ཐེབས་རྩ་ཚོགས་པས་བོད་ལྗོངས་སུ་སྤྱི་ཕན་བྱ་འགུལ་སྤེལ་བའི་འགོ་བཙུགས།
ཐེངས་འདིའི་སྤྱི་ཕན་བྱ་འགུལ་གྱི་འགོ་འཛུགས་མཛད་སྒོ་ནི་ཟླ་7པའི་ཚེས་15ཉིན་ལ་ལྷ་སར་སྤེལ་བ་སྟེ། བྱ་འགུལ་གྱི་ཁྲོད་དུ་ཧན་ཧོང་གི་བརྩེ་སེམས་དགེ་སྦྱོར་ཐེབས་རྩ་ཚོགས་པས་བོད་ལྗོངས་ལ་མྱུར་སྐྱོབ་རླངས་འཁོར་བཅུ་དང་། “ཧན་ཧོང་གི་བརྩེ་སེམས•ཤང་གྲོང་མྱུར་སྐྱོབ་ཁང”བཅུ། བདེ་ཐང་གི་ཁུག་ཐུམ་ལྔ་སྟོང་བཅས་སྦྱིན་པ་བཏང་ཞིང་། ཆེད་ལས་ཀྱི་སྨན་བཅོས་རུ་ཁག་གི་སྣེ་ཁྲིད་དེ་གཞིས་ཀ་རྩེར་ལོ་ཆུང་གཞོན་ནུ་རྣམས་ལ་མིག་ཤེད་མི་བཟང་བ་བརྟག་པ་དང་མིག་ཤེལ་བཟོ་བ། མིག་བདེ་ཐང་གི་ཤེས་བྱ་ཁྱབ་སྤེལ། རུས་ནད་ཚན་ཁག་གི་འོས་འགན་སྨན་དཔྱད་རྟོག་བཤེར་བྱེད་པ་བཅས་རྒྱ་ཆེར་སྤེལ།
མཛད་སྒོའི་ཡུལ་དངོས།
འགོ་འཛུགས་མཛད་སྒོའི་ཡུལ་དངོས་སུ་ཧན་ཧོང་གིས་ཐེངས་འདིའི་སྤྱི་ཕན་བྱ་འགུལ་སྤེལ་བའི་རྒྱུ་རྐྱེན་ནི་ཁོ་མོས་སྔར་བལྟས་མྱོང་བའི་ལོ་ཆུང་གཞོན་ནུ་དང་བྱིས་པ་རྣམས་ཀྱི་མིག་ཤེད་ཀྱི་གནད་དོན་དང་འབྲེལ་བའི་གསར་འགོད་ཅིག་ལ་རག་ལུས་ཞེས་ཟེར་ཞིང་། “ངའི་སེམས་སུ་ནང་ལོགས་ཀྱི་བྱིས་པ་རྣམས་ཀྱི་མིག་དང་མིག་ཤེད་དེ་གནད་དོན་ཆེན་པོ་ཞིག་ཏུ་ཆགས་འདུག་པས། བོད་ཀྱི་བྱིས་པའི་མིག་ཤེད་གནད་དོན་ལའང་མཐོང་ཆེན་བྱེད་དགོས་པར་འདོད་བྱུང་།” དེའི་རྗེས་སུ་ཧན་ཧོང་གིས་པེ་ཅིང་གི་སྨན་བཅོས་ཆེད་མཁས་པ་ཁ་ཤས་ལ་འབྲེལ་བ་བྱས་ནས་ལམ་སེང་ཆེད་ལས་ཀྱི་སྨན་བཅོས་རུ་ཁག་ཅིག་བཙུགས་པ་རེད།
པེ་ཅིང་ཞི་མཐུན་སྨན་ཁང་དང་ཀྲུང་གོ་མི་དམངས་བཅིངས་འགྲོལ་དམག་གི་སྤྱི་ཁྱབ་སྨན་ཁང་(སྨན་ཁང་301)སོགས་སྨན་བཅོས་ལས་ཁུངས་ཀྱི་མིག་ནད་ཚན་ཁག་དང་རུས་ནད་ཚན་ཁག་གི་ཆེད་མཁས་པ་དག་གིས་གྲུབ་པའི་སྨན་བཅོས་རུ་ཁག་འདིས། གཞིས་ཀ་རྩེར་ལོ་ཆུང་གཞོན་ནུ་རྣམས་ལ་མིག་ཤེད་མི་བཟང་བ་བརྟག་པ་དང་མིག་ཤེལ་བཟོ་བ། མིག་བདེ་ཐང་གི་ཤེས་བྱ་ཁྱབ་སྤེལ། རུས་ནད་ཚན་ཁག་གི་འོས་འགན་སྨན་དཔྱད་རྟོག་བཤེར་བཅས་བྱ་རྒྱུ་ཡིན་པ་དང་། ཧན་ཧོང་གིས་ངོ་སྤྲད་པ་ལྟར་ན། དུས་སྔོན་མའི་བཤེར་སྒྲུག་གཞིར་བཟུང་ནས་སྨན་བཅོས་རུ་ཁག་གིས་ཉིན་རེར་ལོ་ཆུང་གཞོན་ནུ་བརྒྱ་དང་བརྒྱད་ཅུར་ཉེ་བ་ཙམ་ལ་མིག་ཤེད་མི་བཟང་བ་བཤེར་སྒྲུག་དང་མིག་ཤེལ་བཟོ་དགོས་པ་རེད།
པེ་ཅིང་ཞི་མཐུན་སྨན་ཁང་དང་ཀྲུང་གོ་མི་དམངས་བཅིངས་འགྲོལ་དམག་གི་སྤྱི་ཁྱབ་སྨན་ཁང་(སྨན་ཁང་301)སོགས་སྨན་བཅོས་ལས་ཁུངས་ཀྱི་མིག་ནད་ཚན་ཁག་དང་རུས་ནད་ཚན་ཁག་གི་ཆེད་མཁས་པ་དག་གིས་གྲུབ་པའི་སྨན་བཅོས་རུ་ཁག་(ཁག་ཅིག) གི་སྨན་བཅོས་ཆེད་མཁས་པ་འགའ་ཞིག་གིས་གཞིས་ཀ་རྩེར་བྱ་བ་སྒྲུབ་བཞིན་ཡོད།
ཧན་ཧོང་གི་བརྩེ་སེམས་དགེ་སྦྱོར་ཐེབས་རྩ་ཚོགས་པས་བོད་ལྗོངས་ལ་སྦྱིན་པ་བཏང་བའི་མྱུར་སྐྱོབ་རླངས་འཁོར།
2011ལོའི་ཟླ་8པའི་ཚེས་8ཉིན་ལ་ཧན་ཧོང་གི་བརྩེ་སེམས་དགེ་སྦྱོར་ཐེབས་རྩ་ཚོགས་པའི་“མི་བརྒྱའི་སྨན་བཅོས་རོགས་སྐྱོར་ཚན་པ”ཞེས་པའི་སྤྱི་ཕན་བྱ་འགུལ་པེ་ཅིང་ནས་ཐོན་ཏེ་ཆབ་མདོར་འབྱོར་བ་དང་། ཡུལ་དེའི་སྐྱ་འགྲིབ་ཕོག་པའི་ནད་པ་ལ་སླར་ཡང་འོད་སྣང་མཐོང་དུ་བཅུག ལོ་དགུའི་རྗེས་སུ་སླར་ཡང་བོད་དུ་ལོག་ནས་སྤྱི་ཕན་བྱ་འགུལ་སྤེལ་བ་ནི་ཧན་ཧོང་རང་གིས་འོས་པ་ཞིག་ཏུ་འདོད། མོས་ན་རེ། “ང་ནི་ཆབ་མདོ་བ་ཞིག་ཡིན། ང་རང་གི་ཕ་ཡུལ་ལ་ལོག་ནས་དོན་དག་ཁ་ཤས་སྒྲུབ་པ་ལ་བཟང་བསྟོད་བྱེད་དགོས་པ་མི་འདུག དེ་ནི་སྒྲུབ་འོས་པ་ཞིག་རེད། ས་གཞི་འདིས་ང་རང་བསྐྱངས་ནས་ནར་སོན་པ་ཡིན།”ཞེས་ཟེར།