བོད་ལྗོངས་དང་ཅིན་ཏུང་དེ་བཞིན་མཐོ་རིམ་སློབ་ཆེན་བར་ལ་འཐབ་ཇུས་མཉམ་ལས་ཀྱི་གྲོས་མཐུན་ལ་མིང་རྟགས་བཀོད་པ་དང་། ཐུན་མོང་ཐོག་གློག་རྡུལ་ཚོང་ལས་འཕེལ་རྒྱས་ལ་སྐུལ་འདེད་གཏོང་བ།
སྤེལ་དུས 2019-07-23
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
བོད་རང་སྐྱོང་ལྗོངས་ཚོང་ལས་ཐིང་དང་ཅིན་ཏུང་ཚོགས་ཁག་དེ་བཞིན་མཐོ་རིམ་སློབ་ཆེན་བར་ལ་གྲོས་མཐུན་མིང་རྟགས་འགོད་པ།
“གློག་རྡུལ་ཚོང་ལས་དང་གཞི་གྲངས་ཆེན་མོའི་ཞིབ་བཤེར”ཞེས་པའི་བརྗོད་གཞི་གཙོ་བོར་གཞིགས་ནས། 2019ལོའི་སྐབས་དང་པོའི་ཀྲུང་གོའི་དོ་དམ་དེང་རབས་ཅན་ཞིབ་འཇུག་ཚོགས་པའི་གློག་རྡུལ་ཚོང་ལས་དང་དྲ་རྒྱའི་བར་སྟོང་དོ་དམ་ཆེད་ལས་ཨུ་ཡོན་ཚོགས་པའི་ལོ་ཚོགས་དེ་ཚེས་21ཉིན་ལྷ་སར་བསྡུས། དེ་དང་མཉམ་དུ་བོད་རང་སྐྱོང་ལྗོངས་ཚོང་ལས་ཐིང་དང་ཅིན་ཏུང་ཚོགས་ཁག་དེ་བཞིན་མཐོ་རིམ་སློབ་ཆེན་བར་གྱི་འཐབ་ཇུས་མཉམ་ལས་ཀྱི་གྲོས་མཐུན་ལ་མིང་རྟགས་བཀོད།
གྲོས་མཐུན་འདི་ད་དུང་ཏ་ལེན་རྩིས་བཟོ་སློབ་ཆེན་དང་ནུབ་བྱང་ཞིང་ནགས་ཚན་རྩལ་སློབ་ཆེན་དང་འབྲེལ་བ་ཡོད་ལ། དེའི་སྤྱིའི་དམིགས་ཚད་ནི་བོད་ལྗོངས་སུ་དེང་རབས་ཅན་དང་ཚད་ལྡན་ཅན། རིག་ནུས་ཅན་གྱི་ཁྱད་ལྡན་ཞིང་ལས་ཐོན་རྫས་དཔེ་སྟོན་ཁུལ་འཛུགས་རྒྱུ་དང་། དཔེ་སྟོན་རང་བཞིན་གྱི་ཅིན་ཏུང་ཞིང་ར་བཙུགས་ནས། བོད་ལྗོངས་ཀྱི་ཞིང་ལས་ཁྱད་ཐོན་ཀྱི་རྟགས་མ་འཛུགས་སྐྲུན་དང་ཚོང་འགྲེམས་ཀྱི་བྱ་བ་ཇེ་མགྱོགས་སུ་གཏོང་བ་དང་། བོད་ལྗོངས་ཞིང་ལས་ཁྱད་ཐོན་གྱི་ཚོང་དོན་རྣམ་པ་དང་འཁོར་རྒྱུག་མ་ལག་གི་རིགས་གསར་བ་འཛུགས་སྐྲུན་བྱེད་རྒྱུ་དེ་ཡིན། མཉམ་འབྲེལ་གྱི་ཁྱབ་ཁོངས་སུ་ཅིན་ཏུང་ཞིང་ར་མཉམ་ལས་འཛུགས་སྐྲུན་དང་། བློ་རིག་ཞིང་ལས་ཚོང་དོན་ཚོང་རའི་འཛུགས་སྐྲུན། ཞིང་ལས་ཁྱད་ཐོན་གྱི་རྟགས་མ་འཛུགས་སྐྲུན་དང་ཅིན་ཏུང་དངུལ་རྩ་མཉམ་ལས་ནང་འགུགས་སོགས་ཚུད་ཡོད།
ཚོགས་འདུའི་ཡུལ་དངོས།
ཚོགས་འདུའི་སྐབས་སུ། ཤར་ལྷོ་སློབ་ཆེན་དང་པེ་ཅིང་ཚན་རྩལ་སློབ་ཆེན། ཕྱི་ཕྱོགས་དཔལ་འབྱོར་ཚོང་དོན་སློབ་ཆེན་སོགས་མཐོ་རིམ་སློབ་ཆེན་མང་པོའི་སློབ་དཔོན་ཆེན་མོས་མཐོང་སྣེ་མི་འདྲ་བའི་ངོས་ནས་གློག་རྡུལ་ཚོང་ལས་འཕེལ་རྒྱས་སྐོར་གྱི་སྙན་ཞུ་ཕུལ། བོད་རང་སྐྱོང་ལྗོངས་ཚོང་ལས་ཐིང་གིས་ཀྱང་བོད་ལྗོངས་གློག་རྡུལ་ཚོང་ལས་འཛུགས་སྐྲུན་གྱི་རིག་མཛོད་འཆར་གཞིའི་འགོ་ཚུགས་ཡོད། ཁག་དང་པོར་ཀྲུང་གོའི་མིང་གྲགས་ཆེ་བའི་གློག་རྡུལ་ཚོང་ལས་ཀྱི་ཆེད་མཁས་པ་མི་17གདན་དྲངས་ནས། བོད་ལྗོངས་ཀྱི་གློག་རྡུལ་ཚོང་ལས་ཀྱི་འཕེལ་རྒྱས་ཐད་ལ་ཐབས་ཇུས་ལེགས་པོ་བཏོན། འདི་ནི་བོད་ལྗོངས་སུ་གློག་རྡུལ་ཚོང་ལས་ཀྱི་འཇོན་མི་དཀོན་པའི་དཀའ་ཁག་ཐག་གཅོད་བྱེད་པར་གསར་གཏོད་རང་བཞིན་གྱི་དོན་སྙིང་ཆེན་པོ་ལྡན།
བོད་རང་སྐྱོང་ལྗོངས་ཚོང་ལས་ཐིང་གི་ཏང་ཙུའུ་ཧྲུའུ་ཅི་ལི་ཝུན་ཀུ་ཡིས་ཤིས་ཚིག་བརྗོད་པ།
བོད་རང་སྐྱོང་ལྗོངས་ཚོང་ལས་ཐིང་གི་ཏང་ཙུའུ་ཧྲུའུ་ཅི་ལི་ཝུན་ཀུ་ཡིས་བསྟན་དོན། འཐབ་ཇུས་མཉམ་ལས་གྲོས་མཐུན་འདི་ལ་མིང་རྟགས་བཀོད་པ་དང་རིག་མཛོད་འཆར་གཞིའི་འགོ་ཚུགས་པ་ནི་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་ཞིང་སྡེ་དར་སྤེལ་གཏོང་བའི་སྤྱིའི་བླང་བྱ་ལག་ལེན་དུ་བསྟར་བ་ཡིན་ལ། སྲིད་གཞུང་དང་ཁེ་ལས། ཞིབ་འཇུག་ཚན་ཁག་བཅས་མཉམ་འབྲེལ་རྣམ་པའི་ལེགས་ཆ་འདོན་སྤེལ་གང་ལེགས་བྱས་ཡོད་པས། བོད་ལྗོངས་སུ་གྲངས་འཛིན་ཞིང་སྡེ་སྤེལ་བའི་འཐབ་ཇུས་ཐད་ལ་དོན་སྙིང་གལ་ཆེན་ལྡན། ཕྱོགས་ཡོངས་ནས་ཆ་ཚང་བར་མཐུན་སྦྱོར་བྱས་ཏེ། ལག་རྩལ་མཁོ་འདོན་དང་ཐོན་ལས་འཕེལ་རྒྱས། འཇོན་མི་གསོ་སྐྱོང་། ཚན་ཞིབ་གསར་གཏོད་བཅས་ཀྱི་ཐད་ལ་རོགས་རེས་གཏིང་ཟབ་སྒོས་ཐུན་མོང་ཐོག་འཕེལ་རྒྱས་འགྲོ་རྒྱུའི་རེ་བ་ཡོད་ཅེས་གསུངས།