ཀྲུང་གོའི་བོད་ལུགས་གསོ་རིག་སློབ་གྲྭ་ཆེན་མོ་ཐོག་མ་བཙུགས་ནས་ལོ་འཁོར་30ལོན་པ་དང་། བོད་ལུགས་གསོ་རིག་ཤེས་ལྡན་པ་མི་གྲངས་7000ལྷག་གསོ་སྐྱོང་གནང་འདུག
སྤེལ་དུས 2019-11-20
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། འབྲུག་རྒྱལ་མཁར་གྱིས་བསྒྱུར།
བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་སྒོ་བྱང་འགེལ་བའི་མཛད་སྒོ།
ཀྲུང་གོའི་བོད་ལྗོངས་དྲ་བའི་འཕྲིན། བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོས་ཚེས་16ཉིན་བོད་ལྗོངས་ལྷ་ས་ནས་སློབ་གྲྭ་བཙུགས་ནས་ལོ་འཁོར་30ལོན་པའི་རྟེན་འབྲེལ་གྱི་མཛད་སྒོའི་ཚོགས་འདུ་བསྡུས། ཀྲུང་གོའི་བོད་ལུགས་གསོ་རིག་སློབ་གྲྭ་ཆེན་མོ་ཐོག་མ་ཡིན་པའི་ཆ་ནས། ལོ་ངོ་30ཡི་རིང་དུ། སློབ་གྲྭ་འདིས་བསྡོམས་བོད་ལུགས་གསོ་རིག་གི་ཤེས་ལྡན་པ་7000ལྷག་གསོ་སྐྱོང་གནང་ནས་སྤྱི་ཚོགས་ལ་ལེགས་སྐྱེས་ཕུལ་ཡོད།
བོད་ལུགས་གསོ་རིག་གི་འབྱུང་ཁུངས་ནི་བོད་ལྗོངས་ཡིན་ལ། དེ་ནི་ཀྲུང་གོའི་མཚོ་བོད་མཐོ་སྒང་གི་རང་བྱུང་ཚན་རིག་དང་ཚེ་སྲོག་མཚན་རིག མཚན་ཉིད་རིག་པའི་སྤྱི་ཚོགས་ཚན་རིག་གི་ལག་ལེན་ལས་བྱུང་བའི་ཉིང་བཅུད་ཡིན། དེ་ནི་ཀྲུང་གོའི་གནའ་རབས་གསོ་རིག་ཚན་རིག་གི་གཅེས་ནོར་ཡིན་པ་དང་། ད་བར་ལོ་ངོ་3800ལྷག་གི་ལོ་རྒྱུས་ཡོད།
བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་སློབ་སྤྱི་ཉི་མ་ཚེ་རིང་གིས་བརྗོད་དོན། དུས་ཡུན་རིང་པོའི་འཕེལ་རྒྱས་ཀྱི་བརྒྱུད་རིམ་ནང་བོད་ལུགས་གསོ་རིག་ནི་རྒྱུན་རིང་བའི་ལོ་རྒྱུས་རྒྱུད་འཛིན་དང་། རིགས་པའི་གཞུང་ལུགས་ཀྱི་མ་ལག་ཆ་ཚང་བ། ལག་ལེན་གྱི་ཉམས་མྱོང་ཕུན་སུམ་ཚོགས་པ། རིག་གཞུང་ཚན་ཁག་ཆ་ཚང་བ། སྨན་བཅོས་ཀྱི་ཁྱད་ཆོས་མངོན་གསལ་དོད་པ། རིག་གནས་ཀྱི་གཞི་རྟེན་སྣ་མང་བ་བཅས་ཀྱི་ཁྱད་ཆོས་ལྡན་པ་ཞིག་ཏུ་གྱུར་ཡོད་ལ། དེ་ནི་ཀྲུང་ཧྭ་མི་རིགས་ཀྱི་ཕུལ་བྱུང་སྲོལ་རྒྱུན་རིག་གནས་ཀྱི་གྲུབ་ཆ་གལ་ཆེན་ཞིག་རེད་ཅེས་ཟེར།
བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོ་ནི་སྔོན་ཆད་ཀྱི་བོད་ལྗོངས་སློབ་གྲྭ་ཆེན་མོའི་བོད་ལུགས་གསོ་རིག་སློབ་གླིང་ཡིན། 1989ལོར་གསར་དུ་བཙུགས་པ་དང་། 1993ལོར་ལྕགས་པོ་རིའི་བོད་ལུགས་གསོ་རིག་སློབ་གླིང་ཞེས་པར་བསྒྱུར་ནས་ལོགས་སུ་བཙུགས། 2001ལོར་བོད་ལྗོངས་བོད་ལུགས་གསོ་རིག་སློབ་གླིང་ཞེས་པའི་མིང་དུ་བསྒྱུར་བ་དང་། 2018ལོར་ད་ལྟའི་མིང་འདི་ལ་བསྒྱུར་བ་རེད།
ལོ་ངོ་30ཡི་ཡར་སྔོན་དུ། ཀྲུང་གོའི་བོད་ལུགས་གསོ་རིག་སློབ་གྲྭ་ཆེན་མོ་འདི་དངོས་སུ་ཚུགས་རྗེས། ཀྲུང་གོའི་བོད་ལུགས་གསོ་རིག་སློབ་གསོའི་སྟོང་ཆ་ཞིག་བསྐངས་པ་དང་། དེང་རབས་མཐོ་རིམ་བོད་ལུགས་གསོ་རིག་སློབ་གསོའི་སྒོ་གསར་དུ་ཕྱེ་བ་རེད།
ཀྲུང་གོའི་རྒྱལ་ཁབ་ཀྲུང་ལུགས་གསོ་རིག་སྨན་རྫས་དོ་དམ་ཅུས་ཀྱི་སློབ་གསོ་སིའི་སི་ཀྲང་གཞོན་པ་ཀྲང་ཤིན་ཞ་ཡིས་བརྗོད་དོན། བོད་ལུགས་གསོ་རིག་བོད་ཀྱི་གལ་ཆེ་བའི་གཞི་རྩའི་སྨན་བཅོས་དང་། ཁྱད་ལྡན་གྱི་དཔལ་འབྱོར། གསར་གཏོད་ཀྱི་ཚན་རྩལ། ཕུལ་བྱུང་གི་རིག་གནས། ས་མཐོའི་སྣོད་བཅུད་ཐོན་ཁུངས་བཅས་ཡིན་པ་དང་། ལོ་ངོ་1000ལྷག་ཙམ་གྱི་རིང་བོད་ཀྱི་གཞི་རིམ་སྨན་བཅོས་ཀྱི་སྨན་བཅོས་ཞབས་ཞུའི་རྣམ་པ་གཙོ་བོ་ཞིག་རེད་ཅེས་ཟེར།
ཀྲང་ཤིན་ཞ་ཡིས་བསྟན་དོན། བོད་ལུགས་གསོ་རིག་གིས་བོད་ལྗོངས་ས་གནས་རང་ནས་ནུས་པ་གལ་ཆེན་ཐོན་པ་ལས་གཞན། ད་དུང་ཉེ་བའི་ལོ་ཤས་རིང་ཀྲུང་གོའི་ནང་ས་དང་འཛམ་གླིང་སྟེང་ ཤུགས་རྐྱེན་ཆེན་པོ་ཐེབས་ཡོད་ལ། བོད་ཁུལ་དུ་འཐུས་སྒོ་ཚང་ལ་ཕན་འབྲས་ལྡན་པའི་བོད་ལུགས་གསོ་རིག་གི་ཞབས་ཞུའི་མ་ལག་ཅིག་ཆགས་ཡོད་ཅེས་བསྟན།
དོན་གྲུབ་ནི་བོད་ལྗོངས་བོད་ལུགས་གསོ་རིག་སློབ་གྲྭ་ཆེན་མོའི་ཚན་ཞིབ་ཁྲུའུ་ཡི་ཁྲུའུ་ཀྲང་ཡིན་པ་དང་། སློབ་མ་ནས་དགེ་རྒན་དུ་འགྱུར་བའི་གོ་རིམ་ཁྲོད་ནས་སློབ་གྲྭ་འདིའི་ལོ་ངོ་སུམ་ཅུའི་འགྱུར་ལྡོག་གི་གོ་རིམ་དངོས་སུ་བརྒྱུད། ཁོ་1990ལོར་སློབ་མཐར་ཕྱིན་རྗེས། སློབ་གྲྭ་ནས་དགེ་རྒན་གྱི་འགན་འཁུར་ནས་སྐབས་དེར་བོད་ལུགས་གསོ་རིག་གི་འཕྲོད་སྦྱོར་རིག་པའི་སློབ་ཚན་ཁྲིད། སློབ་གྲྭ་བཙུགས་པའི་དུས་འགོར་འབྲིང་རིམ་ཆེད་ལས་པུའུ་དང་དངོས་གཞིའི་ཚན་ཁག་གི་སློབ་མ་500ཡང་ཟིན་གྱི་མེད། ད་ལྟ་བསྡོམས་སློབ་མ་7000ལྷག་གསོ་སྐྱོང་མཛད་ནས་སྤྱི་ཚོགས་ལ་ལེགས་སྐྱེས་ཕུལ་ཡོད།
ཁོས་བརྗོད་དོན། ད་ལྟ་སློབ་གྲྭའི་ཆེད་ལས་ཇེ་ཞིབ་ཏུ་བཏང་ཡོད་དེ། ཐོག་མའི་སློབ་ཚན་10ལྷག་ནས་ད་ལྟ་སློབ་ཚན་20ལྷག་ལ་འཕར་ཡོད་ཟེར།