ལས་གཏོད་ལམ་ལྷོངས་བྱུང་བ་དངུལ་རྩའི་རྒྱབ་སྐྱོར་དང་ཁ་འབྲལ་ཐབས་མེད།
—— ཞིང་ལས་དངུལ་ཁང་ལྷ་རྩེ་རྫོང་ཉིང་ལག་དངུལ་ཁང་གིས་དགྲ་འདུལ་གྱི་ལས་གཏོད་ལ་རམ་འདེགས་བྱས་པའི་སྐོར།
སྤེལ་དུས 2019-12-23
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ།
ལྷ་རྩེ་རྫོང་འདི་ཉིད་གཞིས་རྩེའི་ནུབ་རྒྱུད་དུ་གནས་པ་དང་གཞིས་རྩེ་གྲོང་ཁྱེར་དང་བར་ཐག་སྤྱི་ལེ་150ལྷག་ཙམ་ཡོད་པས་གཞིས་རྩེའི་ནུབ་རྒྱུད་ཀྱི་དཔལ་འབྱོར་དང་། འགྲིམ་འགྲུལ། རིག་གནས་བཅས་ཀྱི་ལྟེ་བ་ཡིན། རྫོང་གྲོང་གི་ཀྲུང་ནེ་གཞུང་ལམ་གྱི་བྱང་རྒྱུད་དང་བར་ཐག་སྤྱི་ལེ་1ཆོད་པའི་སར་ཆུ་ཤར་གྲོང་རྡལ་དུ་གླིང་གྲོང་ཚོ་གནས་་ཡོད་པ་དང་། དེར་དབུལ་སྒྲོལ་འགག་སྒྲོལ་གྱི་ཕྱུག་འགྱུར་འཇོན་ཐང་ཅན་ཞིག་ཡོད། ཁོང་ནི་ལྷ་རྩེ་རྫོང་གི་དབུལ་སྒྲོལ་ཕྱུག་འགྱུར་གྱི་ཞིང་པའི་གསོ་ཚགས་ཆེད་ལས་དུད་ཚང་གི་འཐུས་མི་དང་གཞིས་རྩེ་གྲོང་ཁྱེར་གྱི་དབུལ་སྒྲོལ་འགག་སྒྲོལ་གྱི་འཐུས་མི་དགྲ་འདུལ་ཡིན།
དགྲ་འདུལ་ནི་ལྷ་རྩེ་རྫོང་གི་དབུལ་སྒྲོལ་ཕྱུག་འགྱུར་གྱི་འཇོན་ཐང་ཅན་ཞིག་ཡིན་ཞིང་། ལོ་ན་གཞོན་པའི་སྐབས་ཁྱིམ་ཚང་གི་ཆ་རྐྱེན་ཧ་ཅང་ཞན་པོ་ཡོད། དབུལ་པོ་ལས་སྔ་ཙམ་སྒྲོལ་ཐུབ་ཕྱིར། ཁོང་གིས་འཁང་ར་སྤུ་ཙམ་ཡང་མེད་པར་བཟའ་ཟླ་དང་མཉམ་དུ་དབུལ་སྒྲོལ་ཕྱུག་འགྱུར་གྱི་ལམ་བུ་འཚོལ་ཞིབ་བྱས།
ཞིང་ལས་དངུལ་ཁང་གི་ཤུགས་ཆེའི་རྒྱབ་སྐྱོར་འོག་དགྲ་འདུལ་གྱིས་ཁྲོམ་རའི་གོ་སྐབས་རེ་རེ་བཞིན་དམ་འཛིན་བྱས་ནས་ད་བར་དེའི་ཐད་རྒྱུན་ཆད་མེད་པར་འཚོལ་ཞིབ་དང་མདུན་སྐྱོད་བྱེད་བཞིན་ཡོད།
ད་ཆ་ཁོང་གིས་གཞི་ཁྱོན་ཅུང་ཆེ་བའི་བ་གསོ་ར་བ་དང་བྱ་གསོ་ར་བ་ཞིག་གཉེར་སྐྱོང་བྱས་ཡོད། དགྲ་འདུལ་དབུལ་སྒྲོལ་བྱུང་བ་དེ་ལྷ་རྩེའི་ཞིང་ལས་དངུལ་ཁང་དང་ཁ་འབྲལ་ཐབས་མེད་པ་ཞིག་རེད།
2003ལོའི་ལོ་འགོར་འཚོ་བའི་ཆ་རྐྱེན་ལེགས་སུ་གཏོང་ཆེད། སྐབས་དེ་དུས་ཞིང་ལས་དངུལ་ཁང་གི་ཟངས་བྱང་གི་དངུལ་བུན་གཡར་བའི་ཐོབ་ཐང་ཐོག་ནས་དགྲ་འདུལ་གྱིས་ཞིང་ལས་དངུལ་ཁང་ལྷ་རྩེ་ཆུ་ཤར་ལས་གཉེར་ཁང་ནས་དབུལ་སྐྱོར་དངུལ་བུན་སྒོར་3000གཡར་ཏེ་གྲོང་ཚོའི་ནང་ཚོང་ཁང་དང་པོ་དེ་བཙུགས་པ་རེད། ལོ་གཉིས་ལྷག་ཙམ་དཀའ་ལས་བརྒྱབ་པ་བརྒྱུད། 2005ལོར་ཁོང་གིས་གཡར་བའི་དངུལ་བུན་གྱི་མ་སྐྱེད་འཇལ་བ་མ་ཟད། ད་དུང་ཚོང་གི་ཉམས་མྱོང་ཡང་ངེས་ཅན་ཞིག་བསགས་ལ་མི་ཚེའི་ཡོང་འབབ་དང་པོ་དེའང་བྱུང་བ་རེད།
2006ལོར། ཞིང་ལས་དངུལ་ཁང་ལྷ་རྩེ་ཆུ་ཤར་ལས་གཉེར་ཁང་གིས་དགྲ་འདུལ་གྱི་ལས་བརྩོན་ཕྱུག་འགྱུར་གྱི་རེ་འདུན་དང་། དེ་བཞིན་དེ་གོང་གི་དངུལ་བུན་གཡར་བར་འབྲས་བུ་ཐོབ་པ་མཐོང་རྗེས། དགྲ་འདུལ་ཁྱིམ་གྱི་དངོས་ཡོད་གནས་ཚུལ་ལ་གཞིགས་ནས་ཟངས་བྱང་དེ་གསེར་བྱང་ལ་སྤར་བ་རེད། རིམ་སྤོར་བྱས་རྗེས་དགྲ་འདུལ་གྱིས་སྒོར་ཁྲི་6གི་དངུལ་བུན་གཡར་ནས་སྤུས་ལེགས་ཀྱི་བཞོན་མ་8ཉོས་ཏེ་ཆུ་ཤར་གྲོང་རྡལ་དུ་བ་གསོ་ར་བ་དང་པོ་དེ་བསྐྲུན་པ་རེད།
གསོ་ཚགས་ར་བའི་གཟན་རྩྭའི་དགོས་མཁོ་ཐག་གཅོད་བྱ་ཆེད། དགྲ་འདུལ་གྱིས་གྲོང་ཚོའི་བེད་མེད་ས་ཆ་རྨོ་ཞིང་བཟོས་ནས་རྨོ་ཞིང་གི་རྒྱ་ཁྱོན་མུའུ་37ནས་120བར་མང་དུ་བཏང་བས་འབྲུ་རིགས་ཀྱི་ཐོན་འབབ་མང་དུ་ཕྱིན་ཡོད་ལ་གསོ་ཚགས་ར་བའི་གཟན་རྩྭའི་གནད་དོན་ཡང་ཐག་གཅོད་ཐུབ་ཡོད།
2013ལོར། ཞིང་ལས་དངུལ་ཁང་ལྷ་རྩེ་ཆུ་ཤར་ལས་གཉེར་ཁང་གིས་དགྲ་འདུལ་གྱི་མ་དངུལ་དགོས་མཁོ་དང་དེ་བཞིན་ཁྲོམ་རའི་གནས་ཚུལ་ལ་གཞིགས་ཏེ་ཁོང་ལ་བསྐྱར་དུ་སྒོར་ཁྲི་20ཡི་དངུལ་བུན་བཏང་ནས་བོད་བྱའི་གསོ་ཚགས་ར་བ་ཞིག་གཉེར་རོགས་བྱས་པ་རེད།
ད་ཆ་དགྲ་འདུལ་གྱིས་ཐོག་སོ་གཉིས་ལྡན་གྱི་སྡོད་ཁང་གསར་པ་ཞིག་བརྒྱབ་ཡོད་ལ་ཁོང་གིས་ཏང་གི་དམངས་ཕྱུག་སྲིད་ཇུས་ལ་དྲིན་ལན་འཇལ་ཆེད། རང་ཁྱིམ་གྱི་བེའུ་10གྲོང་ཚོའི་དུད་ཚང་དབུལ་པོར་སྟེར་ནས་ཁོང་ཚོ་དང་མཉམ་དུ་དབུལ་སྒྲོལ་ཕྱུག་འགྱུར་གྱི་ལམ་དུ་སྐྱོད།
རྒྱུན་དུ་དགྲ་འདུལ་གྱིས་དགའ་ཉེ་སྤུན་མཆེད་ལ“ང་དབུལ་སྒྲོལ་ཕྱུག་འགྱུར་བྱུང་བ་དེ་ཞིང་ལས་དངུལ་ཁང་གི་ཤུགས་ཆེའི་རྒྱབ་སྐྱོར་དང་ཁ་འབྲལ་ཐབས་མེད། ཞིང་ལས་དངུལ་ཁང་གི་རྒྱབ་སྐྱོར་མེད་ན་དེ་རིང་གི་ཡོད་ཚད་ཐོབ་མི་སྲིད་པས་ངས་སེམས་གཏིང་ནས་ཏང་དང་ཞིང་ལས་དངུལ་ཁང་ལ་ཐུགས་རྗེ་ཆེ་ཞུ་རྒྱུ་ཡིན”ཞེས་བརྗོད་ཀྱི་ཡོད།
རྩོམ་སྒྲིག་པ། སངས་སྐྱབས།