ད་ལོ་དགུང་ལོ་109ལ་ཕེབས་པའི་ཁོང་གིས་ལོ་རྒྱུས་ཀྱི་དཔང་པོ་བྱེད།
སྤེལ་དུས 2020-03-30
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
བསོད་ནམས་སྒྲོལ་མ་དང་གཅུང་མོ་ཚེ་རིང་དབུ་ཐུག་བྱེད་པ།
ལྷོ་ཁ་གྲོང་ཁྱེར་རྒྱ་ཚ་རྫོང་དུ་སླར་ཡང་ཁམ་བུའི་མེ་ཏོག་གི་འདབ་བརྒྱ་ལྷུག་པོར་གྲོལ་བའི་དུས་ཚིགས་འཆར་ཞིང་། ད་ལོ་དགུང་ལོ་109ལ་ཕེབས་པའི་ར་ཀོ་གྲོང་ཚོའི་གྲོང་མི་བསོད་ནམས་སྒྲོལ་མ་རང་ཁྱིམ་གྱི་སྒོ་རའི་ནང་བསྡད་ཡོད། སྔོན་ཆད་གྲོགས་མེད་ཁེར་རྐྱང་ཡིན་པའི་ཁོང་ད་ཆ་བུ་ཕྲུག་དང་ཚ་བོ་ཚ་མོ་དང་མཉམ་དུ་བདེ་སྐྱིད་ཀྱི་དཔལ་ལ་རོལ་བཞིན་མཆིས།
བསོད་ནམས་སྒྲོལ་མ་དང་། གཅུང་མོ་ཚེ་རིང་། བུ་མོ་ཚེ་རིང་འཛོམས་པ་བཅས་སྒོ་རའི་ནང་ངལ་གསོ་བ།
ཞིང་བྲན་གྱི་རྗེས་རབས་པ་ཡིན་པའི་ཁོང་གིས་ལོ་15ནས་བཟུང་གཡོག་རྒྱུག་འགོ་བཙུགས། གཉའ་གནོན་དང་བཤུ་གཞོག་གི་མནར་གཅོད་འོག་བསོད་ནམས་སྒྲོལ་མས་ལོ་47སྡུག་བསྲན་གྱིས་དཀའ་ཚེགས་ཀྱི་ལོ་ཟླ་ཕར་ལ་བསྐྱལ་བ་དང་། ཕ་མ་གཉིས་པོ་དང་གཅེན་པོའང་ཡུན་རིང་སྡུག་ལས་དང་བཤུ་གཞོག་ཚད་མེད་མྱངས་པས་སྔ་པོ་ནས་མི་ཡུལ་དང་ཁ་གྱེས། དམངས་གཙོའི་བཅོས་སྒྱུར་བྱས་རྗེས་ཁོང་ལ་ས་ཞིང་མུའུ་7དང་། ཁང་མིག་གཉིས། ནོར་ལུག་མགོ་གྲངས་ཁ་ཤས་བཅས་ཀྱི་བགོ་སྐལ་རག དུས་རབས་20པའི་ལོ་རབས་80པར་བསོད་ནམས་སྒྲོལ་མའི་ཁྱིམ་གྱིས་སྔོན་ལ་གྲོང་ཚོའི་ས་ཞིང་མུའུ་11དང་སྟར་སྡོང་7འགན་གཙང་བླངས་པ་དང་། དེ་རྗེས་ཁོང་གི་བུ་མོ་ཚེ་རིང་འཛོམས་པས་སྣམ་བུ་འཐག་སྟངས་སྦྱངས།
ནང་མི་ཚོ་དགོང་ཟས་ཟ་བ།
དཀའ་བའི་ལས་ལ་བརྩོན་གྱུར་ན། གཡུར་ཟའི་འབྲས་བུ་ལས་ཀྱིས་སྨིན་ཞེས་པའི་དཔེ་ལྟར་བསོད་ནམས་སྒྲོལ་མའི་ནང་མི་ཚང་མས་དཀའ་སྤྱད་འབད་བརྩོན་བྱས་པ་བརྒྱུད། འདྲུད་འཐེན་འཕྲུལ་འཁོར་དང་འབྲུ་འཕྱར་འཕྲུལ་འཁོར་སོགས་ཉོས་ཤིང་། གྲོང་ཚོའི་ནང་གི་འཕྲུལ་འཁོར་ཉོ་མཁན་གྱི་ཁྱིམ་ཚང་དང་པོར་གྱུར། ད་ཆ་ཁོང་གི་ཁྱིམ་ཚང་ལ་ལོ་རེར་འབྲུ་རིགས་ཐོན་འབོར་སྤྱི་རྒྱ་5000ལྷག་ཙམ་དང་སྟར་ཁ་ལོ་རེར་སྤྱི་རྒྱ་700ལྷག་ཙམ་བསྡུ་རྒྱུ་ཡོད་པའི་ཁར། སྣམ་བུ་འཐག་པ་ལས་ལོ་འཁོར་མོར་ཡོང་འབབ་སྒོར་ཁྲི་10ཙམ་ཡོད། བསོད་ནམས་སྒྲོལ་མས་སྔ་རྗེས་སུ་ཁང་པ་རྒྱ་སྐྱེད་ཐེངས་5བཏང་ཞིང་། 2017ལོར་སྒོར་ཁྲི་54བཏང་ནས་རྒྱ་ཁྱོན་ལ་སྨི་ངོས་གྲུ་520དང་ཁང་མིག་19ཡོད་པའི་ཁང་པ་གསར་པ་ཞིག་བརྒྱབ།
བུ་མོ་ཚེ་རིང་འཛོམས་པས་ཐགས་འཐག་པ།
བསོད་ནམས་སྒྲོལ་མའི་ཡང་ཚ་ཡིས་དྲ་ཐོག་གི་སློབ་ཚན་ཉན་པ།
བསོད་ནམས་སྒྲོལ་མས་རང་གི་ཐོབ་ཐང་ལག་ཁྱེར་ལ་ལྟ་བ།
པར་སྒྲོམ་ནང་གི་སྔོན་མའི་པར།
བོད་ལྗོངས་ལྷོ་ཁ་གྲོང་ཁྱེར་རྒྱ་ཚ་རྫོང་ར་ཀོ་གྲོང་ཚོའི་རྣམ་པ།
རྩོམ་སྒྲིག་པ།སྣང་རྡོར།