གྲོང་ཚོའི་སྨན་པ་389ལ་སྨན་པའི་ལག་ཁྱེར་རག་འདུག
སྤེལ་དུས 2020-04-07
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
ལྗོངས་ཡོངས་ཀྱི་ཚད་གཞི་ལོན་པའི་གྲོང་གསེབ་སྨན་པའི་ལས་གཉེར་བསྐྱར་དུ་ཐོ་འགོད་ལག་ཁྱེར་ཐོག་མར་སྤྲོད་པའི་ལས་དོན་དངོས་སུ་སྤེལ་འགོ་ཚུགས་པ།
ཟླ་4ཚེས་4ཉིན། ལྗོངས་ཡོངས་ཀྱི་ཚད་གཞི་ལོན་པའི་གྲོང་གསེབ་ཀྱི་སྨན་པའི་ལས་གཉེར་ཐོ་འགོད་ལག་ཁྱེར་ཐོག་མར་སྤྲོད་པའི་མཛད་སྒོ་ལྷ་ས་གྲོང་ཁྱེར་ཁྲེང་ཀོན་ཆུས་འཕྲོད་བསྟེན་བདེ་ཐང་ཨུ་ལྷན་དུ་འཚོགས་པ་དེ་ཐོག་ནས་ལྗོངས་ཡོངས་ཀྱི་ཚད་གཞི་ལོན་པའི་གྲོང་གསེབ་ཀྱི་སྨན་པའི་ལས་གཉེར་ཐོ་འགོད་ལག་ཁྱེར་ཐོག་མར་སྤྲོད་པའི་ལས་དོན་དངོས་སུ་སྤེལ་འགོ་ཚུགས་པ་མཚོན་གྱི་ཡོད། ཉེ་ཆར། རང་སྐྱོང་ལྗོངས་ཀྱིས་ཞིབ་དཔྱད་བྱས་པ་བརྒྱུད། ཚད་གཞི་ལོན་པའི་གཞི་རིམ་གྱི་སྨན་དོན་མི་སྣ་389ལ《གྲོང་གསེབ་ཀྱི་སྨན་པའི་ལས་གཉེར་ལག་ཁྱེར》རག་འདུག
ཁྲེང་ཀོན་ཆུས་ཉང་བྲན་དོན་གཅོད་ཁྲུའུ་འཕྲོད་བསྟེན་ཁང་གི་གྲོང་གསེབ་སྨན་པ་སྐྱིད་འཛོམས་ལ་ལྗོངས་ཡོངས་ཀྱི《གྲོང་གསེབ་ཀྱི་སྨན་པའི་ལས་གཉེར་ལག་ཁྱེར》ཨང་001རག་པ།
ཤེས་རྟོགས་བྱུང་བར་གཞིགས་ན། བོད་ལྗོངས་ཀྱི་ཞིང་འབྲོག་ཁུལ་གྱི་གཞི་རིམ་སྨན་བཅོས་འཕྲོད་བསྟེན་སྒྲིག་གཞིའི་ནུས་པ་འཛུགས་སྐྱོང་མངོན་གསལ་དོད་པོས་ཡག་ཏུ་སོང་བ་དང་གྲོང་གསེབ་ཀྱི་སྨན་པའི་དཔུང་ཁག་འཕེལ་རྒྱས་མྱུར་པོ་ཕྱིན་ཡོད། 2012ལོའི་ཟླ་2པར། རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཐིང་གིས《གྲོང་གསེབ་ཀྱི་སྨན་པའི་དཔུང་ཁག་འཛུགས་སྐྱོང་ལ་སྔར་བས་ཤུགས་སྣོན་རྒྱག་རྒྱུའི་སྐོར་གྱི་ལག་བསྟར་བསམ་འཆར》བཀྲམ་ནས། གྲོང་གསེབ་ཀྱི་སྨན་པའི་འགན་འཁྲི་ཁ་གསལ་བཟོ་བ་དང་། གྲོང་གསེབ་ཏུ་འཕྲོད་བསྟེན་ཁང་འཛུགས་པ་དང་འཐུས་སྒོ་ཚང་དུ་གཏོང་བ། གྲོང་གསེབ་ཀྱི་སྨན་པའི་དཔུང་ཁག་བརྟན་དུ་གཏོང་བ་སོགས་ཀྱི་ཐད་བླང་བྱ་ཞིབ་ཕྲ་བཏོན་ཡོད། 2017ལོར། རང་སྐྱོང་ལྗོངས་འཕྲོད་བསྟེན་བདེ་ཐང་ཨུ་ལྷན་གྱིས《བོད་རང་སྐྱོང་ལྗོངས་ཀྱི་གྲོང་ཚོའི་སྨན་པའི་ལས་གཉེར་གྱི་གནས་སྐབས་ལག་བསྟར་དོ་དམ་བྱ་ཐབས》བཏོན་ཏེ། གྲོང་གསེབ་ཀྱི་སྨན་པའི་ཆོག་འཐུས་དང་། གསོ་སྐྱོང་། དོ་དམ། དཔྱད་ཞིབ། ཐོབ་ཆ། སྨན་པ་ནས་དགོངས་ཞུ་བཅས་ཀྱི་ལམ་སྲོལ་སྔར་བས་ཚད་ལྡན་དུ་བཏང་བ་དང་། 2019ལོར《ལྗོངས་ཡོངས་ཀྱི་2019ལོའི་ལོ་འཁོར་གྱི་གྲོང་གསེབ་ཀྱི་སྨན་པའི་ལས་གཉེར་ཐོ་འགོད་ལས་དོན་ཡག་པོ་བསྒྲུབ་རྒྱུའི་སྐོར་གྱི་བརྡ་ཐོ》བཀྲམ་སྟེ། ས་གནས་ཁག་གིས་གྲོང་ཚོའི་སྨན་པར་དཔྱད་ཞིབ་དང་། ཆོག་འཐུས། སྨན་པ་ནས་དགོངས་ཞུ་བཅས་ལ་ཤུགས་སྣོན་བརྒྱབ་ནས། ཚད་གཞི་ལོན་པའི་གྲོང་ཚོའི་སྨན་པ་ཐོ་འགོད་བྱེད་དགོས་པའི་བླང་བྱ་བཏོན་ཡོད། མིག་སྔར། ལྗོངས་ཡོངས་སུ་ལས་ཐོག་གྲོང་ཚོའི་སྨན་པ་ཁྱོན་ཁྲི1.1ཡོད་པས“གྲོང་ཚོ་1ལ་སྨན་པ2”ཡོད་པའི་དམིགས་ཚད་སྤྱིར་ན་མངོན་འགྱུར་བྱུང་ཡོད།