དྲ་ཐོག་གི་ཁྲིམས་འགལ་ཉེས་གསོག་ལ་རྡུང་རྡེག་ཚ་ནན་གཏོང་བ།

　　    ཉེ་ཆར། བོད་རང་སྐྱོང་ལྗོངས་ཏང་ཨུད་དྲ་རྒྱའི་བདེ་འཇགས་དང་ཆ་འཕྲིན་ཅན་ཨུ་ལྷན་གྱིས་2022ལོའི་ཚོགས་འདུ་ཐེངས་དང་པོ་འཚོགས་པ་དང་། བོད་རང་སྐྱོང་ལྗོངས་ཏང་ཨུད་ཀྱི་ཧྲུའུ་ཅི་དང་རང་སྐྱོང་ལྗོངས་ཏང་ཨུད་དྲ་རྒྱའི་བདེ་འཇགས་དང་ཆ་འཕྲིན་ཅན་ཨུ་ལྷན་གྱི་ཀྲུའུ་རེན་ཝང་ཅུན་ཀྲེང་གིས་ཚོགས་འདུ་གཙོ་སྐྱོང་གནང་ནས་གསུང་བཤད་གནང་བ་རེད།

ཚོགས་ར།

　　ཝང་ཅུན་ཀྲེང་གིས་ནན་བཤད་བྱས་དོན། དྲ་ཐོག་གླེང་ཕྱོགས་ཀྱི་ཁྲིད་སྟོན་ལ་ཤུགས་སྣོན་བརྒྱབ་ནས་རྣམ་པ་བཟང་པོ་ཞིག་གཏོད་དགོས་ཤིང་། བྱེད་སྟངས་དང་བྱེད་ཐབས་གསར་གཏོད་དང་། གཞི་རྟེན་གྱི་ནང་དོན་ཕུན་སུམ་ཚོགས་སུ་གཏོང་བ། བློ་གཅིག་སེམས་གཅིག་དང་བརྩེ་སེམས་ཆེན་པོ་བཅས་ལ་བརྟེན་ནས་བརྗོད་དོན་གཙོ་བོ་དྲིལ་བསྒྲགས་དང་། གྲུབ་འབྲས་དྲིལ་བསྒྲགས། དཔེ་མཚོན་དྲིལ་བསྒྲགས་བཅས་ཡག་པོ་བྱས་ཏེ། དུས་རབས་གསར་པའི“བོད་ཀྱི་གཏམ་རྒྱུད”ཡག་པོ་བཤད་ནས་དུས་རབས་གསར་པའི“བོད་ཀྱི་གཟུགས་བརྙན”མངོན་པར་བྱེད་དགོས། དེའང་དྲ་རྒྱའི་ཤེས་དཔལ་འཛུགས་སྐྱོང་ལ་ཤུགས་སྣོན་བརྒྱབ་ནས་དྲ་རྒྱའི་མཛེས་སྡུག་ལྡན་པའི་བསམ་པའི་ཁྱིམ་གཞིས་ཐུན་མོང་ཐོག་བསྐྲུན་དགོས་ཤིང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་འཛུགས་པའི་གཙོ་རྐང་དེར་དམིགས་ཏེ་མི་རིགས་མཐུན་སྒྲིལ་ཡར་ཐོན་གྱི་དྲིལ་བསྒྲགས་སློབ་གསོའི་དྲ་རྒྱའི་བར་མཐོངས་རྒྱ་ཆེར་བཏང་ནས་དྲ་སྦྲེལ་དེ་ཉིད་མི་རིགས་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བ་དང་ཀྲུང་ཧྭ་མི་རིགས་གཅིག་མཐུན་འདུས་གྲུབ་འདུ་ཤེས་ཀྱི་མཐོ་ས་གསར་པ་ཞིག་ཏུ་གཏོད་དགོས།

　　ཝང་ཅུན་ཀྲེང་གིས་བསྟན་དོན། འཕེལ་རྒྱས་དང་བདེ་འཇགས་ལ་སྤྱི་འདོམས་བྱ་རྒྱུ་མཐའ་འཁྱོངས་ཀྱིས་ཁྲིམས་ལྟར་དྲ་རྒྱའི་ཕྱོགས་བསྡུས་བཅོས་སྐྱོང་མ་ལག་འཛུགས་རྒྱུར་ཤུགས་སྣོན་རྒྱག་དགོས་ཤིང་། ཁྲིམས་ལྟར་དྲ་བར་དོ་དམ་དང་དྲ་བར་བཅོས་སྐྱོང་བྱེད་པ་མཐའ་འཁྱོངས་བྱས་ཏེ། དྲ་བའི་ཐོག་སིམ་འཛུལ་གཏོར་བཤིག་གཏོང་བར་འགོག་ཟོན་དང་རྡུང་རྡེག་མཐའ་གཅིག་ཏུ་གཏོང་བ་དང་། གནས་ལུགས་ཡོད་པ་དང་། ནུས་པ་ལྡན་པ། ཕན་འབྲས་ཐོན་པ་བཅས་ཀྱི་སྒོ་ནས་དྲ་ཐོག་གླེང་ཕྱོགས་ཀྱི་འཐབ་རྩོད་སྤེལ་བ། དྲ་རྒྱའི་ཐོག་གི་ཁྲིམས་འགལ་ཉེས་གསོག་ལ་ཁྲིམས་ལྟར་རྡུང་རྡེག་ནན་པོ་གཏོང་བ། དྲ་རྒྱའི་ཁོར་ཡུག་བཅོས་སྐྱོང་ཆུ་ཚད་མཐོ་རུ་གཏོང་བ་བཅས་བྱས་ཏེ་དྲ་རྒྱའི་བར་མཐོངས་དྭངས་ཤིང་གཙང་བ་ཞིག་ཡོང་བའི་འགན་ལེན་བྱེད་དགོས། དྲ་རྒྱའི་བདེ་འཇགས་འགོག་སྲུང་ནུས་པ་ཆེ་རུ་བཏང་ནས་དྲ་རྒྱའི་བདེ་འཇགས་སྲུང་ཡོལ་བརྟན་དུ་གཏོང་དགོས་ཤིང་། དྲ་རྒྱའི་བདེ་འཇགས་བཅའ་ཁྲིམས་དང་། གྲངས་གཞིའི་བདེ་འཇགས་བཅའ་ཁྲིམས། མི་སྒེར་གྱི་ཆ་འཕྲིན་སྲུང་སྐྱོང་བཅའ་ཁྲིམས། འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་སྲུང་སྐྱོང་སྲོལ་ཡིག་བཅས་ལག་བསྟར་དོན་འཁྱོལ་ནན་ཏན་བྱས་ཏེ། གྲངས་གཞིའི་བདེ་འཇགས་བཅོས་སྐྱོང་མ་ལག་འཛུགས་པ་དང་། ལས་རིགས་ཁྱབ་ཁོངས་གལ་ཆེན་གྱི་འགག་རྩའི་ཆ་འཕྲིན་གྱི་རྨང་གཞིའི་སྒྲིག་བཀོད་ཀྱི་དྲ་རྒྱའི་བདེ་འཇགས་འགོག་སྲུང་ནུས་པ་ཆེ་རུ་གཏོང་བ། རྒྱུན་རྣམ་ཅན་གྱི་དྲ་རྒྱའི་བདེ་འཇགས་དྲིལ་བསྒྲགས་སློབ་གསོ་སྤེལ་བ། དྲ་རྒྱའི་བདེ་འཇགས་དང་མི་དམངས་མང་ཚོགས་ཀྱི་བདེ་རྩར་ཐུག་པའི་ཁེ་ཕན་སྲུང་སྐྱོང་ཏན་ཏིག་བཅས་བྱེད་དགོས།

　　ཝང་ཅུན་ཀྲེང་གིས་ནན་བཤད་བྱས་དོན། ཏང་གིས་དྲ་སྦྲེལ་ལ་དོ་དམ་བྱེད་པའི་རྩ་དོན་ལ་གཡོ་འགུལ་མི་གཏོང་བ་མཐའ་འཁྱོངས་ཀྱིས་ཆབ་སྲིད་ཀྱི་ཁ་ཕྱོགས་བརྟན་དུ་གཏོང་བ་དང་། ལས་ཀའི་ནུས་པ་ཆེ་རུ་གཏོང་བ། ཤེས་ལྡན་པ་འཛུགས་སྐྱོང་ལ་ཤུགས་སྣོན་རྒྱག་པ། ལས་ཀའི་མཉམ་ཤུགས་ཆགས་པ་བཅས་བྱེད་དགོས། རིམ་ཁག་འགོ་ཁྲིད་ལས་བྱེད་པས་ཆ་འཕྲིན་ཅན་འཕེལ་རྒྱས་གཏོང་བའི་བླང་བྱར་རང་འགུལ་ངང་འཚམ་པར་བྱས་ཏེ་དྲ་སྦྲེལ་གྱི་ཆོས་ཉིད་སྟངས་འཛིན་བྱེད་ནུས་དང་། དྲ་རྒྱའི་གླེང་ཕྱོགས་ཀྱི་ཁྲིད་སྟོན་བྱེད་ནུས། ཆ་འཕྲིན་ཅན་གྱི་གོང་འཕེལ་ལ་ཁ་ལོ་སྒྱུར་ནུས། དྲ་རྒྱའི་བདེ་འཇགས་འགན་སྲུང་བྱེད་ནུས་བཅས་ཟམ་མི་ཆད་པར་ཆེ་རུ་བཏང་ནས། ཏང་ཀྲུང་དབྱང་གི་ཐབས་ཇུས་བཀོད་སྒྲིག་དང་བོད་རང་སྐྱོང་ལྗོངས་ཏང་ཨུད་ཀྱི་ལས་ཀའི་བླང་བྱ་དོན་འཁྱོལ་ཐུབ་རྒྱུར་སྐུལ་འདེད་བཏང་སྟེ། བོད་ལྗོངས་ཀྱི་དྲ་འཕྲིན་བྱ་གཞག་གོང་འཕེལ་འགྲོ་བའི་རྣམ་པ་གསར་པ་ཟམ་མི་ཆད་པར་གཏོད་དགོས།