ཀྲུང་གོའི་བོད་ལྗོངས་དྲ་བ། > མདུན་ཤོག > པར་རིས་གསར་འགྱུར།

ཞི་ཅིན་ཕིང་གིས་“འཛམ་གླིང་ཡོངས་ཀྱི་དབུ་བཞུགས་ལག་བསྟར་དཔོན་ཨུ་ཡོན་ལྷན་ཁང་”གི་དམིགས་བསལ་སྒྲོག་སྒོར་དབུ་ཚོགས་ལ་ཞུགས་མཁན་ཕྱི་ཕྱོགས་སྐུ་ཚབ་དང་མཇལ་འཕྲད་གནང་བ་མ་ཟད་བཞུགས་མོལ་གནང་བ།

སྤེལ་དུས 2018-06-22 ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས། རྩོམ་པ་པོ། སངས་སྐྱབས་ཀྱིས་བསྒྲིགས།
          ཀྲུང་དབྱང་རླུང་འཕྲིན་ལས་ཁུངས་ནས་སྤེལ་བའི་གནས་ཚུལ། སྤྱི་ཚེས་༢༡ཉིན་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཏིའོ་ཡུས་ཐའེ་རྒྱལ་མགྲོན་ཁང་དུ་ཀྲུང་གོར་“འཛམ་གླིང་ཡོངས་ཀྱི་དབུ་བཞུགས་ལག་བསྟར་དཔོན་ཨུ་ཡོན་ལྷན་ཁང་”གི་དམིགས་བསལ་སྒྲོག་སྒོར་དབུ་ཚོགས་ལ་ཞུགས་མཁན་ཕྱི་ཕྱོགས་སྐུ་ཚབ་དང་མཇལ་འཕྲད་གནང་བ་མ་ཟད་ཁོང་རྣམ་པ་དང་བཞུགས་མོལ་གནང་ཡོད་པ་རེད།
          ཞི་ཅིན་ཕིང་གིས། ཀྲུང་གོས་འཛམ་གླིང་ལ་སྒོ་མོ་ཕྱེས་ཡོད་པ་དང་། བསྒྱུར་བཅོས་སྒོ་དབྱེ་བྱས་ནས་ལོ་ངོ་བཞི་བཅུ་སོང་ཡོད། ལོ་ངོ་བཞི་བཅུའི་ནང་། ཀྲུང་གོར་འགྱུར་བ་ཆེན་པོ་བྱུང་ཡོད་ཅིང་། ཀྲུང་གོའི་དཔལ་འབྱོར་རྒྱུན་མཐུད་མགྱོགས་མྱུར་འཕར་སྣོན་ཕྱིན་པ་དང་། མི་གྲངས་དུང་ཕྱུར་བདུན་ཙམ་མཉམ་འབྲེལ་རྒྱལ་ཚོགས་ཀྱི་ཚད་གཞིར་སླེབས་པའི་དབུལ་སྒྲོལ་བྱུང་ཡོད། ལམ་བུ་གསར་པར་རྒྱང་མིག་ལྟ་སྐབས། ང་ཚོས་བསྒྱུར་བཅོས་ལ་དེ་བས་ཡོད་ཆེས་ཀྱིས་ཁེངས་པ་དང་། ཕྱི་ཕྱོགས་སྒོ་དབྱེ་བྱ་རྒྱུ་ནི་ཀྲུང་གོའི་གོང་འཕེལ་གྱི་འགག་རྩའི་བྱ་ཐབས་ཤིག་ཡིན་པར་དེ་བས་ཡིད་ཆེས་ཆེ་རུ་ཕྱིན་ཡོད་ཅེས་བསྟན་གནང་བ་དང་།
          ཞི་ཅིན་ཕིང་གིས། སྤྱི་ལོ་༢༠༡༧ལོ་ནས་བཟུང་། འཛམ་གླིང་དཔལ་འབྱོར་ལ་བརྟན་ཐོག་ཡར་འཕེལ་གྱི་རྣམ་པ་ཐོན་ཡོད་མོད། འོན་ཀྱང་འཛམ་གླིང་དཔལ་འབྱོར་འཕར་ཤུགས་སྔར་བཞིན་ཉམས་ཞན་ཡིན་པ་དང་། ཉོ་ཚོང་སྲུང་སྐྱོབ་རིང་ལུགས་དང་། ཁེར་རྐྱང་རིང་ལུགས། དམངས་འདོད་རིང་ལུགས་སོགས་ཀྱི་བསམ་བློའི་རླབས་རྒྱུན་ཟམ་མི་ཆད་པར་ཐོན་པ་དང་། འཛམ་གླིང་ཞི་བདེ་དང་གོང་འཕེལ་གྱི་མདུན་དུ་སྔར་བས་ཛ་དྲག་པའི་འགྲན་རྩོད་འཕྲད་བཞིན་ཡོད། རྒྱལ་སྤྱིའི་སྤྱི་ཚོགས་ནི་གྲོང་སྡེ་གཅིག་ལྟ་བུའི་སའི་གོ་ལ་ཞིག་ཡིན་པས། གཅིག་རྒྱལ་གཅིག་ཕམ་གྱི་འཐབ་འགྲན་བྱེད་མི་ཉན་ཞེས་ནན་སྟོན་གནང་ཡོད་པ་དང་།
          ཁོང་གིས་དུས་བབ་གསར་པའི་འོག་ང་ཚོས་མཉམ་རྒྱལ་ཡོང་བའི་འབྱུང་འགྱུར་ལ་ལྟ་དགོས་པ་དང་། ལག་གདང་སྦྲེལ་ནས་མདུན་སྐྱོད་བྱེད་དགོས། འཛམ་གླིང་གི་ལས་དབང་དེ་རྒྱལ་ཁབ་ཁག་གིས་ཐུན་མོང་ཐོག་འཛིན་དགོས་པ་དང་། རྒྱལ་སྤྱིའི་སྒྲིག་ལམ་རྒྱལ་ཁབ་ཁག་གིས་ཐུན་མོང་ཐོག་བཟོ་དགོས། འཛམ་གླིང་གི་བྱ་དོན་རྒྱལ་ཁབ་ཁག་ནས་ཐུན་མོང་ཐོག་བཅོས་སྐྱོང་བྱེད་དགོས། གོང་འཕེལ་གྲུབ་འབྲས་རྒྱལ་ཁབ་ཁག་གིས་ཐུན་མོང་ཐོག་ལོངས་སྤྱོད་བྱེད་དགོས། ཀྲུང་གོས་འཛམ་གླིང་རྒྱལ་ཁབ་ཁག་དང་ལྷན་དུ་ལག་གདང་སྦྲེལ་ནས་མིའི་རིགས་ཀྱི་ལས་དབང་ཐུན་མོང་མ་ལག་འཛུགས་སྐྱོང་བྱེད་འདོད་ཡོད་ཅེས་གསུངས་ཡོད་པ་རེད།
          ཞི་ཅིན་ཕིང་གིས། “རྒྱུད་གཅིག་ལམ་གཅིག་”གི་གྲོས་འགོ་བཏོན་ནས་ལོ་ལྔ་སོང་རིང་། ཕྱོགས་ཁག་གི་མངོན་མེད་སྟོབས་ཤུགས་སྔོག་འདོན་གང་ལེགས་བྱས་ནས། ལམ་རྒྱུད་རྒྱལ་ཁབ་ཁག་གི་མི་དམངས་ལ་བདེ་སྐྱིད་སྐྲུན་ཡོད། “རྒྱུད་གཅིག་ལམ་གཅིག་”ནི་སྒོ་དབྱེ་ཁོང་ཡངས་ཤིག་ཡིན་པ་ལས། ཕྱི་བཀག་ནང་སྡོམ་ཞིག་མིན། ལམ་རྒྱུད་རྒྱལ་ཁབ་ཁག་གི་གླུ་གཞས་མཉམ་ལེན་ཡིན་པ་ལས། ཀྲུང་གོ་གཅིག་པུའི་རོལ་ཆ་རྐྱང་དཀྲོལ་མིན། ང་ཚོས་རྒྱལ་ཁོངས་ལས་བརྒལ་བའི་ཀུང་སིས་ཀྲུང་གོའི་ཁེ་ལས་དང་མཉམ་ལས་བྱས་ནས། གཉིས་ཕན་མཉམ་རྒྱལ་དང་། སྔར་བས་དངོས་གཉེར་གྲུབ་འབྲས་ཐོབ་པ་བྱེད་རྒྱུའི་སྐུལ་མ་གཏོང་གི་ཡོད་ཅེས་བསྟན་གནང་ཡོད་པ་རེད།
          གསར་གཏོད་དང་རིག་ནུས་བཟོ་སྐྲུན་ཐད། ཞི་ཅིན་ཕིང་གིས། གསར་གཏོད་གོང་འཕེལ་གྱི་འདུ་ཤེས་ཉིན་རེ་བཞིན་མི་སེམས་ལ་གཏིང་ཟབ་ཟུག་པ་དང་། གསར་གཏོད་ཀྱིས་གོང་འཕེལ་ལ་སྒུལ་ཤུགས་སྦྱིན་པའི་འཐབ་ཇུས་ལ་ཟམ་མི་ཆད་པར་སྐུལ་འདེད་ཐེབས་པ་དང་བསྟུན་ནས། ཀྲུང་གོའི་ཚན་རྩལ་གསར་གཏོད་ཀྱི་གོམས་སྟབས་ཀྱང་དེ་བས་བརྟན་དུ་འགྲོ་བཞིན་ཡོད། ང་ཚོས་ཐོག་མཐའ་བར་གསུམ་དུ་མི་དམངས་ཀྱིས་མཛེས་སྡུག་ལྡན་པའི་འཚོ་བའི་འདུན་པ་དེ་ཚན་རྩལ་གསར་གཏོད་ཀྱི་འགོ་འཛུགས་ས་དང་མཇུག་བསྡུ་སར་རྩིས་དགོས་ཞེས་ནན་སྟོན་གནང་ཡོད་པ་རེད།
          སྦག་མེད་གོང་འཕེལ་ཐད། ཞི་ཅིན་ཕིང་གིས། ང་ཚོས་འཛུགས་སྐྲུན་བྱེད་དགོས་པའི་དེང་རབས་ཅན་ནི་མི་དང་རང་བྱུང་ཞི་མཐུན་མཉམ་གནས་ཀྱི་དེང་རབས་ཅན་ཡིན། ང་ཚོས་ལམ་ལུགས་དང་ཁྲིམས་སྐྱོང་ནན་ཤོས་ཀྱི་ཐོག་ནས་འབྱུང་ཁམས་ཁོར་ཡུག་ལ་སྲུང་སྐྱོབ་བྱ་རྒྱུ་དང་། བྱེད་ཐབས་སྣ་ཚོགས་བརྒྱུད། འདུ་ཤེས་ནས་བྱ་སྤྱོད་བར་ས་གོ་ལའི་ཁྱིམ་གཞིས་ལ་སྲུང་སྐྱོབ་བྱས་ཏེ། ནམ་མཁའ་དེ་བས་སྔོ་བ་དང་། ཆུ་མོ་དེ་བས་དྭངས་བ་ཡོང་བ་དང་། རྗེས་རབས་པ་ཚོར་རྒྱུན་མཐུད་གོང་འཕེལ་གྱི་འཚོ་གནས་ཁོར་ཡུག་ཅིག་འཇོག་དགོས་ཞེས་ནན་སྟོན་གནང་ཡོད་པ་རེད།
          གོ་ལ་ཧྲིལ་པོའི་བཅོས་སྐྱོང་ཐད། ཞི་ཅིན་ཕིང་གིས། ང་ཚོས་མཉམ་གྲོས་མཉམ་འཛུགས་མཉམ་སྤྱོད་བཅས་ཀྱི་གོ་ལ་ཧྲིལ་པོའི་བཅོས་སྐྱོང་ལྟ་བ་རྒྱུན་འཛིན་བྱས་ཏེ། མུ་མཐུད་འགན་འཁུར་བའི་རྒྱལ་ཁབ་ཆེན་མོའི་ནུས་པ་འདོན་སྤེལ་བྱ་རྒྱུ་དང་། གོ་ལ་ཧྲིལ་པོའི་བཅོས་སྐྱོང་མ་ལག་བསྒྱུར་བཅོས་དང་འཛུགས་སྐྲུན་ཁྲོད་ཧུར་ཐག་ཞུགས་ནས། གོ་ལ་ཧྲིལ་པོའི་བཅོས་སྐྱོང་ལ་བསྒྱུར་བཅོས་དང་ལེགས་སུ་གཏོང་རྒྱུའི་ཐད་ཀྲུང་གོའི་སྟོབས་ཤུགས་ལེགས་སྐྱེས་འབུལ་རྒྱུ་ཡིན་ཞེས་ནན་སྟོན་གནང་ཡོད་པ་དང་།
          ཞི་ཅིན་ཕིང་གིས་རྒྱལ་སྤྱིའི་སྤྱི་ཚོགས་ནས་ལག་གདང་སྦྲེལ་ཏེ། མཉམ་གྲོས་དང་མཉམ་བསྐྲུན་མཉམ་སྤྱོད་བཅས་བྱ་རྒྱུ་དང་། བསྒྱུར་བཅོས་སྒོ་དབྱེ་དང་། གསར་གཏོད་གོང་འཕེལ་གྱི་ལམ་བུའི་ཐོག་བསྐྱོད་པ། བཀག་སྡོམ་དང་འཕེལ་མེད། སྲུང་སྐྱོབ་རིང་ལུགས། ཕྱོགས་རྐྱང་པའི་རིང་ལུགས་བཅས་ལ་སྔ་ཤུལ་རང་ལོག་མི་བྱེད་པ། མིའི་རིགས་ནི་ཁེ་ཕན་དང་འགན་འཁྲི། ལས་དབང་བཅས་ཀྱི་ཐུན་མོང་མ་ལག་ཅིག་ཡིན་པས། ང་ཚོས་ངེས་པར་དུ་ཕྱར་བ་གྲུ་འདེགས་དང་ལག་གདང་སྦྲེལ་ཏེ་མདུན་སྐྱོད་བྱ་རྒྱུའི་རེ་འབོད་གནང་ཡོད་པ་རེད།
          ཞི་ཅིན་ཕིང་གིས། ཀྲུང་གོའི་སྒོ་དབྱེའི་སྒོ་མོ་རྒྱག་མི་སྲིད་པར་དེ་ལས་ལྡོག་སྟེ་སྒོ་ཡང་པོར་འབྱེད་སྲིད། ཀྲུང་གོས་མུ་མཐུད་ཤུགས་ཚད་ཆེན་པོའི་ཐོག་ནས་ཁྲོམ་རའི་ཚད་གཞི་ལྷུག་ཏུ་གཏོང་རྒྱུ་དང་། མུ་མཐུད་དེ་བས་ཡིད་དབང་འགུག་ཤུགས་ཆེ་བའི་མ་འཇོག་ཁོར་ཡུག་གཏོད་རྒྱུ། ཤེས་བྱའི་ཐོན་དབང་སྲུང་སྐྱོབ་ལ་ཤུགས་སྣོན་དང་། རང་འགུལ་ངང་ནང་འདྲེན་རྒྱ་སྐྱེད་གཏོང་བ་བཅས་བྱས་ཏེ། རྒྱལ་ཁབ་ཕྱི་ནང་གི་ཁེ་ལས་མཁས་པས་མ་འཇོག་ལས་སྐྲུན་བྱ་རྒྱུར་དེ་བས་གོ་ཡངས་ཤིང་གོ་རིམ་ལྡན་པའི་ཁོར་ཡུག་ཅིག་བསྐྲུན་རྒྱུ་ཡིན་ཞེས་ནན་སྟོན་གནང་ཡོད་པ་རེད།
          ཚོགས་ཞུགས་ཁེ་ལས་མཁས་པའི་འཐུས་མིས་ཀྲུང་གོའི་བསྒྱུར་བཅོས་སྒོ་དབྱེར་ཐོབ་པའི་རླབས་ཆེའི་གྲུབ་འབྲས་ལ་ཚད་མཐོའི་གདེང་འཇོག་གནང་བ་དང་། ཀྲུང་གོས་འཛམ་གླིང་གི་དཔལ་འབྱོར་འཕར་སྣོན་ལ་སྐུལ་འདེད་གཏོང་བའི་ཐད་ཕུལ་བའི་ལེགས་སྐྱེས་གལ་ཆེན་ལ་བསྔགས་བརྗོད་གནང་ཡོད་པ་རེད། ཁོ་ཚོས། རྒྱལ་ཁོངས་བརྒལ་བའི་ཀུང་སིར་ཀྲུང་གོའི་ཡུན་རིང་གོང་འཕེལ་གྱི་ཁྲོད་ནས་ཕན་པ་ཐོབ་ཡོད། འཛམ་གླིང་གིས་ཀྲུང་གོའི་རིག་གནས་དང་། ཀྲུང་གོ་གུང་ཁྲན་ཏང་གི་སྲིད་འཛིན་ཐད་ཀྱི་ངོས་འཛིན་དང་བསམ་ཤེས་བྱེད་ཤུགས་ཟབ་ཏུ་གཏོང་དགོས། དཔལ་འབྱོར་འཛམ་གླིང་ཧྲིལ་པོ་ཅན་ནི་ལྡོག་ཐབས་མེད་པའི་ལོ་རྒྱུས་ཀྱི་འཕེལ་ཕྱོགས་ཡིན། ཀྲུང་གོས་འཛམ་གླིང་ཧྲིལ་པོ་ཅན་ལ་རྒྱབ་སྐྱོར་མཐའ་གཅིག་ཏུ་བྱ་རྒྱུ་མ་ཟད་ཉོ་ཚོང་སྲུང་སྐྱོབ་རིང་ལུགས་ལ་ངོ་རྒོལ་བྱེད་པའི་ཐད་བསྔགས་བརྗོད་ཞུ་འོས་པ་ཞིག་ཡོད། ཀྲུང་གོས་གནམ་གཤིས་འགྱུར་བའི་ཕ་རི་སིའི་གྲོས་ཆོད་སོགས་ལ་སྐུལ་འདེད་གཏོང་བའི་ཐད་ལེགས་སྐྱེས་ཕུལ་ཡོད་པས། དེས་མིའི་རིགས་ཀྱི་ལས་དབང་ཐུན་མོང་མ་ལག་འཛུགས་སྐྱོང་བྱེད་པའི་ཐད་ཀྱི་འགོ་ཁྲིད་ནུས་པ་མངོན་ཡོད། ཀྲུང་གོའི་ཕྱོགས་ཀྱི་རྒྱུད་གཅིག་ལམ་གཅིག་གི་གྲོས་འགོ་ནི་དུས་རབས་ཀྱི་བླང་བྱ་དང་འཚམ་གྱི་ཡོད། རྒྱལ་ཁོངས་བརྒལ་བའི་ཀུང་སིས་རྒྱུད་གཅིག་ལམ་གཅིག་མཉམ་སྐྲུན་བྱ་རྒྱུའི་ནང་ཐེ་ཞུགས་ཧུར་ཐག་བྱས་ཏེ། ཁེ་ལས་དེ་བས་གོང་འཕེལ་ཡོང་བ་དང་། མུ་མཐུད་ཀྲུང་གོའི་དཔལ་འབྱོར་དང་མཉམ་དུ་འཚར་ལོངས་ཡོང་བ་བྱེད་འདོད་ཡོད་ཅེས་གསུངས་ཡོད་པ་རེད།