ཁྲུང་ཆིང་གྲོང་ཁྱེར་ཝན་ཀྲོའུ་ཁུལ་འབྲི་ཆུའི་ཟམ་ཆེན་གཉིས་པའི་སྟེང་བགྲོད་པའི་སྤྱི་སྤྱོད་རླངས་འཁོར་ཞིག་འབྲི་ཆུའི་ནང་དུ་ལྷུང་བ། མཚོ་སྔོན་གོར་མོ་གྲོང་ཁྱེར་འབྲི་ཆུའི་ཆུ་འགོ་གྲོང་ཚོར་ཕར་རོགས་ཚུར་གཅེས་ཀྱིས་བདེ་སྐྱིད་ལྡན་པའི་འཚོ་བ་སྐྱེལ་བ། དཔལ་དགེའི་ཆུ་བསྐྱིལ་མཚེའུའི་འཕྲིན་གསར། འབྲི་ཆུའི་འགག་འཁྱིལ་མཚེའུ་གཞི་རྩའི་ཆ་ནས་རྒྱུན་རྣམ་སླར་གསོ་བྱུང་བ་དང་རོགས་སྐྱོབ་གོ་རིམ་ལྡན་པའི་ངང་བྱེད་བཞིན་ཡོད་པ། གནས་མཆོག་ལྷ་སར་མཐུན་སྒྲིལ་མེ་ཏོག་རབ་ཏུ་བཞད་། ཆོས་དབྱིངས་སྐྱིད་ཀྱིས་ཡང་རྒྱལ་སྤྱིའི་འགྲན་སྡུར་ལས་ཨང་དང་པོ་བླངས། ཀྲུང་གོའི་མི་རིགས་སྐད་ཡིག་ཡིག་སྒྱུར་ཅུས་ཀྱིས་བོད་ཡིག་རིག་ནུས་ཡིག་སྒྱུར་མཉེན་ཆས་ཁྱབ་སྤེལ་ཚོགས་འདུ་སྤོས་ལྡན་གྲོང་དུ་འཚོགས་པ། ཚོགས་ཆེན་བཅུ་དགུ་པའི་དགོངས་དོན་མཛུབ་ཁྲིད་དུ་བྱས་ཏེ། ཆོས་ལུགས་དང་སྤྱི་ཚོགས་རིང་ལུགས་ཀྱི་སྤྱི་ཚོགས་གཉིས་འཚམ་མཐུན་ཡོང་པ་བྱ་དགོས། ནུབ་བྱང་དགེ་འོས་སློབ་ཆེན་གྱིས་དགེ་འོས་སློབ་མ་བགྲང་ལས་འདས་པ་བསྐྱངས་པ། གཞིས་རྩེ་གྲོང་ཁྱེར་གྱི་གཞུང་ལམ་ཐོག་རླངས་འཁོར་ཤར་གཏོང་ཐུབ་ཚད་སྤྱི་ལེ་ཁྲི་1.7ཟིན་པ།
ཀྲུང་གོའི་བོད་ལྗོངས་དྲ་བ། > མདུན་ཤོག > པར་རིས་གསར་འགྱུར།

བུད་མེད་ཁེ་ལས་པ་ཞིག་གི་བློ་སྤོབས།

སྤེལ་དུས 2019-01-11 ཡོང་ཁུངས། ཀྲུང་གོའི་བོད་ལྗོངས་དྲ་བ། རྩོམ་པ་པོ། ལྷ་མོ་ཚེ་རིང་།

རིན་ཆེན་སྤུངས་མཛོད་རིག་གནས་ཚད་ཡོད་ཀུང་སིའི་སྒོ་ཆེན།
          མི་སུ་དང་གང་ཞིག་ཡིན་རུང་འཕེལ་རྒྱས་ཀྱི་ལམ་ཁ་རུ་སྙེག་པར། ཕྱོགས་གཅིག་ནས་རང་ཉིད་ཀྱི་འབད་བརྩོན་དང་འཇོན་ཐང་ལ་བརྟེན་དགོས་ཤིང་། ཕྱོགས་གཞན་ཞིག་ནས་འཆམ་མཐུན་གྱི་སྤྱི་ཚོགས་ཁོར་ཡུག་དང་རྒྱལ་ཁབ་ཀྱི་སྲིད་ཇུས་བཟང་པོའི་མཐུན་རྐྱེན་སོགས་ལའང་མ་བརྟེན་ཐབས་མེད་ཡིན་པ་ནི་བསྙོན་དུ་མེད། དེ་བཞིན་དུ་མཚོ་ལྷོ་བོད་རིགས་རང་སྐྱོང་ཁུལ་ཞིན་ཧེ་རྫོང་རིན་ཆེན་སྤུངས་མཛོད་རིག་གནས་ཚད་ཡོད་ཀུང་སིའི་འགོ་གཙོ་སྟེ། བུད་མེད་ཁེ་ལས་པ་འབུམ་མཚོ་ཡག་ཀྱང་རང་ཉིད་ཀྱི་འབད་བརྩོན་དང་སྲིད་ཇུས་བཟང་པོའི་རྒྱབ་སྐྱོར་སོགས་ལ་བརྟེན་ནས་ཕྱུག་འགྱུར་གྱི་ལམ་དུ་བསྐྱོད།
          འབུམ་མཚོ་ཡག་ནི་ཞིན་ཧེ་རྫོང་གི་འབྲོག་ཁྱིམ་དཀྱུས་མ་ཞིག་ནས་འཚར་ལོངས་བྱུང་ཞིང་། 2008ལོར་མཚོ་སྔོན་དགེ་ཐོན་སློབ་ཆེན་མི་རིགས་དགེ་འོས་སློང་གླིང་ནས་བོད་སྐད་ཡིག་རྩོམ་རིག་ཆེད་ལས་སྦྱངས་ཏེ་སློབ་མཐར་ཕྱིན། མོས་མཚམས་སྦྱོར་བྱས་པ་ལྟར་ན། སློབ་མཐར་ཕྱིན་རྗེས་མོས་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་ནས་ལོ་གཅིག་ཙམ་གྱི་རིང་ལ་དགེ་རྒན་གྱི་བྱ་བ་གཉེར་ཞིང་། དེའི་རྗེས་སུ་ཞིན་ཧེ་རྫོང་ཆོས་ལུགས་ཅུས་སུ་ལས་གནས་སྤར་ཏེ་ལས་ཁུངས་དེ་ནས་ལོ་གཉིས་ལ་གཞུང་གི་བྱ་བ་བསྒྲུབས་མྱོང་བར་བཤད། སློབ་མཐར་ཕྱིན་མ་ཐག་པའི་སློབ་མ་མང་པོ་ཞིག་ལ་མཚོན་ན། གཞུང་གི་བྱ་བ་ཞིག་ལག་ཏུ་ཐོབ་པ་ནི་གསེར་གྱི་ཕོར་བ་ཞིག་རག་པ་དང་འདྲ་བས། དེར་མི་དགའ་མཁན་དང་མི་དུངས་མཁན་ཧ་ལམ་མེད་ངེས་ལ། མུ་མཐུད་དུ་བྱ་བ་བསྒྲུབས་ཏེ་དེའི་རྒྱུན་མི་སྐྱོང་མཁན་ཡང་ཤིན་ཏུ་ཉུང་ངེས། ཡིན་ཡང་། འབུམ་མཚོ་ཡག་ནི་གཞུང་གི་ལས་གནས་བརྟན་པོར་ཡིད་ཚིམ་ནས་མ་བསྡད་པར། རང་ཉིད་ཀྱི་དགའ་ཕྱོགས་དང་ཕུགས་བསམ་གྱི་ཆེད་དུ་གཞུང་གི་བྱ་བ་བསྐྱུར་ཏེ། 2012ལོ་ནས་བཟུང་རིན་ཆེན་སྤུངས་མཛོད་རིག་གནས་ཚད་ཡོད་ཀུང་སི་གཉེར་འགོ་བརྩམས། 

བུད་མེད་ཁེ་ལས་པ་འབུམ་མཚོ་ཡག་གིས་གསར་འགོད་པའི་བཅར་འདྲི་དང་ལེན་བྱེད་བཞིན་པ།
          འབུམ་མཚོ་ཡག་གིས་གཉེར་བཞིན་པའི་རིན་ཆེན་སྤུངས་མཛོད་ཚད་ཡོད་ཀུང་སི་ནི་སྣ་འདུས་རང་བཞིན་གྱི་ཀུང་སི་ཞིག་ཡིན་ཏེ། དེར་མགྲོན་ཁང་དང་དཔེ་ཀློག་བྱེད་ས། གསོ་སྦྱོང་བྱེད་གནས་བཅས་ཡོད་པར་མ་ཟད། ད་དུང་རང་མི་རིགས་ཀྱི་ཁྱད་ཆོས་ལྡན་པའི་བསང་རྩི་དང་དར་ལྕོག གཞན་རྡོ་བརྐོས་སོགས་ཀྱང་ཐོན་སྐྱེད་བྱེད་བཞིན་ཡོད་ལ། རྡོ་བརྐོས་ཀྱི་རིགས་ལ་མ་ཎི་རྡོ་བརྐོས་དང་རྗེས་དྲན་དངོས་རྫས། ཀ་རྡོ་སོགས་ཡོད། དེ་དག་ལས་ཆོས་ལུགས་དང་འབྲེལ་བའི་ཐོན་རྫས་རྣམས་བོད་ཁུལ་གྱི་དགོན་པ་སོ་སོར་འཚོང་བཞིན་ཡོད་པ་དང་། བཟོ་རྩལ་ཐོན་རྫས་རྣམས་ནང་ལོགས་ས་ཆར་ཕྱིར་འཚོང་བྱེད་བཞིན་ཡོད། གཞན་ཀུང་སིའི་ཁོངས་གཏོགས་སུ་ཡུལ་སྐོར་ལས་དོན་ཁང་ཞིག་ཀྱང་འདུག ཀུང་སིའི་སྤྱིའི་རྒྱ་ཁྱོན་ལ་སྨི་གྲུ་བཞི་མ་4300དང་ཁང་པའི་རྒྱ་ཁྱོན་ལ་སྨི་གྲུ་བཞི་མ་2400ཡོད། ད་ལྟ་ཀུང་སིར་ལག་རྩལ་མི་སྣ་དང་ཞབས་ཞུ་བ་སོགས་བསྡོམས་པས་ལས་བཟོ་པ་72ཡོད་པ་ལས་བཟོ་པ་ཕལ་མོ་ཆེ་ནི་དབང་པོ་སྐྱོན་ཅན་ཡིན། འབུམ་མཚོ་ཡག་གིས་ཀུང་སི་རུ་ཁོ་ཚོ་དང་འཚམ་པའི་ལས་གནས་འདོན་སྤྲོད་བྱེད་བཞིན་ཡོད་ལ། མི་རེས་ཟླ་རེར་ཟླ་ཕོགས་སྒོར་ཉིས་སྟོང་ཡས་མས་ལེན་ཐུབ་པས། ཁོ་ཚོའི་ལས་ཞུགས་གནད་དོན་ཐད་གང་ལ་དེ་འཚམ་གྱི་ཕན་ནུས་འདོན་བཞིན་ཡོད། ཀུང་སིའི་ཁོངས་གཏོགས་སུ་དབང་པོ་སྐྱོན་ཅན་གྱི་ལས་ཞུགས་རྟེན་གཞི་ཞིག་ཀྱང་བཙུགས་ཡོད་ལ། ཀུང་སིས་དུས་ངེས་མེད་དུ་དགེ་རྒན་དང་ཆེད་མཁས་པ་གདན་འདྲེན་ཞུས་ཏེ་དབང་པོ་སྐྱོན་ཅན་དང་བྱིས་པ་སོགས་ལ་རིན་མེད་སྒོས་གསོ་སྦྱོང་ཡང་སྤེལ་བཞིན་ཡོད། ད་ལྟ་ཀུང་སིའི་ལོ་རེའི་ཡོང་སྒོ་རྐྱང་བ་ནི་སྒོར་ཁྲི་320ལ་སླེབས།
          འབུམ་མཚོ་ཡག་གིས་ཀུང་སི་གཉེར་འགོ་རྩོམ་དུས་སུ་ཧ་ལམ་ལོ་24ཙམ་ཡིན་ཞིང་། ལོ་ན་ཆུང་བའི་གཞོན་ནུ་མ་ཞིག་ལ་ཀུང་སི་ཆེན་པོ་ཞིག་གཉེར་བའི་བློ་སྤོབས་མངའ་བ་ནི་དངོས་གནས་བློ་ཡུལ་ལས་འགོངས་པ་ཞིག་རེད། གསར་འགོད་པས་མོར་བྱ་གཞག་གསར་སྐྲུན་གྱི་ལས་ལ་ཞུགས་ཏེ་ཀུང་སི་གཉེར་བའི་འདུན་པ་ཐོག་མར་ཇི་ལྟར་སྐྱེས་ཚུལ་སྐོར་ནས་དྲིས་པ་ན། ཁོ་མོས་བཤད་རྒྱུར། “ངེད་ཚང་གི་ཨ་ཁུས་སྔོན་ཆད་ཚོང་རྒྱག་བཞིན་ཡོད་པས། སློབ་ཆེན་དུ་ཡོད་པའི་སྐབས་སུ་ངས་ཨ་ཁུ་ལ་རོགས་བྱས་ཏེ་རྩིས་གཉེར་གྱི་བྱ་བ་བསྒྲུབས་མྱོང་ལ། ད་དུང་ཁོར་དངོས་པོ་ཕྱིར་འཚོང་རོགས་ཀྱང་བྱས་པ་ཡིན། ང་མཐར་ཕྱིན་རྗེས་སུའང་ལམ་ལས་པ་དང་འབྲོག་དམངས་གཏན་སྡོད་ཀྱི་ཁང་པ་སྐྲུན་པའི་ནང་དུ་མ་རྐང་བཞག དེ་ལས་ཚོང་གི་ཕྱོགས་ལ་སྤྲོ་བ་སྐྱེས་བྱུང”ཟེར། ཚོང་ལས་ཀྱི་ཉམས་མྱོང་ནི་མོར་མཚོན་ན་ཀུང་སི་གཉེར་བའི་སྔོན་འགྲོའི་མཐུན་རྐྱེན་དུ་གྱུར་ཡོད།

ཀུང་སིའི་མགྲོན་ཁང་། 
          འདི་ལྟ་བུའི་ཀུང་སི་ཆེན་པོ་ཞིག་གཉེར་བར་དང་ཐོག་མོ་རང་ཡང་དཀའ་ལས་གང་མང་ཞིག་ལ་འཕྲད་མྱོང་སྟེ། ཀུང་སི་གཉེར་འགོ་རྩོམ་དུས་མ་དངུལ་ཐད་དཀའ་ཁག་བྱུང་བས་དངུལ་ཁང་ལ་སྒོར་ཁྲི་1400བསྐྱིས་ཤིང་། གཞུང་གི་བྱ་བ་བསྐྱུར་བས་མཐའ་འཁོར་གྱི་མི་རྣམས་ཀྱིས་རྒྱབ་སྐྱོར་ཀྱང་མི་བྱེད་པར་བཤད། དེར་བརྟེན། སྐབས་དེ་དུས་མོས་ལུས་སེམས་གཉིས་ཀྱི་ཐད་ནས་དཀའ་ངལ་གང་མང་ཞིག་མྱངས་ཡོད་པ་ཤ་སྟག་རེད། ཡིན་ཡང་། ལས་ཡག་པ་ཞིག་ལ་སྐབས་དེར་རྒྱལ་ཁབ་ཀྱི་སྲིད་ཇུས་བཟང་བས། ཞིན་ཧེ་རྫོང་ནོར་སྲིད་ཅུས་དང་འཕེལ་རྒྱས་བཅོས་བསྒྱུར་ཨུ་ཡོན་ལྷན་ཁང་གཉིས་ཀྱིས་མོར་ལོ་རེར་སྒོར་ཁྲི་300དང་200ཡས་མས་ཀྱིས་རོགས་སྐྱོར་བྱས་པས། དེས་ཚད་ངེས་ཅན་ཞིག་གི་སྟེང་ནས་མོར་མ་དངུལ་དཀོན་པར་ནུས་པ་ཆེན་པོ་ཐོབ། ད་ལྟ་ཡང་ལོ་རེར་སྒོར་ཁྲི་100ཡིས་རོགས་སྐྱོར་བྱེད་བཞིན་ཡོད་ལ། ཞིན་ཧེ་རྫོང་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་ཀྱང་མོར་ལོ་རེར་སྒོར་ཁྲི3ཡིས་རྒྱབ་སྐྱོར་བྱེད་བཞིན་ཡོད།
          མ་འོངས་པའི་འཆར་གཞི་དང་འདུན་པའི་ཐད་ནས། མོས་མ་འོངས་པ་ན་ས་ཆ་གཞན་དུ་ཡན་ལག་ཀུང་སི་འཛུགས་འདོད་ཡོད་ལ། ཀུང་སིས་ཐོན་སྐྱེད་བྱས་པའི་དངོས་རྫས་རྣམས་ཞང་ཀང་དང་ཨའོ་མོན་སོགས་དང་ཡང་ན་ཕྱིའི་རྒྱལ་ཁབ་ཏུའང་འཚོང་འདོད་ཅེས་ཟེར། མ་འོངས་པའི་འཆར་གཞི་གླེང་སྐབས། བལྟས་ཚོད་ཀྱིས་མོར་རེ་བ་དང་ཡིད་ཆེས་ཀྱིས་ཁེངས་ཡོད་པས། མོ་ནི་མིག་རྒྱང་རིང་བའི་མཛངས་མ་ཞིག་ཡིན་པ་ཚོར་ཐུབ་བོ།།
ཀུང་སིའི་ལས་བཟོ་པས་མགྲོན་པོར་སྣེ་ལེན་བྱེད་བཞིན་པ།