2019ལོའི་ཀྲུང་གོའི་གྲངས་ཉུང་མི་རིགས་ཀྱི་མཛའ་གཞས་འགྲེམ་སྟོན་བྱ་འགུལ་མཚོ་ལྷོ་གསེར་ཆེན་རྫོང་ནས་སྤེལ་མགོ་བརྩམས།
སྤེལ་དུས 2019-08-21
ཡོང་ཁུངས། ཀྲུང་གོའི་བོད་ལྗོངས་དྲ་བ།
རྩོམ་པ་པོ། དོན་ཚེ།
ཀྲུང་གོའི་བོད་ལྗོངས་དྲ་བའི་འཕྲིན། སྤྱི་ཟླ8པའི་ཚེས20ཉིན་གྱི་སྔ་དྲོར། གསེར་ཆེན་རྫོང་མི་རིགས་མཐུན་སྒྲིལ་གྱི་བསྟོད་གླུ་ངག་ལ་གྱེར་ནས་རླབས་ཆེན་མེས་རྒྱལ་གྱི་བཀའ་དྲིན་ཡིད་ལ་བཅངས་པའི2019ལོའི་ཀྲུང་གོའི་གྲངས་ཉུང་མི་རིགས་ཀྱི་མཛའ་གཞས(བོད་སྐད་སྲོལ་རྒྱུན་ལེན་སྟངས)འགྲེམ་སྟོན་བྱ་འགུལ་དེ་མཚོ་ལྷོ་བོད་རིགས་རང་སྐྱོང་ཁུལ་གསེར་ཆེན་རྫོང་གི་ཁུལ་ལུས་རྩལ་རྭ་བ་ནས་སྤེལ་མགོ་ཚུགས། གསེར་ཆེན་རྫོང་ནི་བོད་ཀྱི་མཛའ་གཞས་ཀྱི་ཕ་ས་ཞེས་པའི་མཚན་སྙན་ཐོབ། ཐེངས་འདིའི་བྱ་འགུལ་སྤེལ་བར་བརྒྱུད། བོད་ཁུལ་གྱི་ས་གནས་སོ་སོའི་མི་རིགས་ཀྱི་དམངས་ཁྲོད་རོལ་མོའི་འབྲེལ་འདྲིས་དང་འཕེལ་རྒྱས་ལ་སྐུལ་འདེད་དང་། མི་རིགས་ཀྱི་དམངས་ཁྲོད་རིག་གནས་སྲུང་སྐྱོབ་དང་རྒྱུན་འཛིན་ལ་སྐུལ་འདེད། ཀྲུང་ཧྭ་མི་རིགས་ཀྱི་ཕུལ་བྱུང་རིག་གནས་དར་སྤེལ་གཏོང་བ། ས་གནས་ཀྱི་རིག་གནས་མཚོན་རྟགས་བསྐྲུན་པར་དགེ་མཚན་ཆེན་པོ་ལྡན། ཐེངས་འདིའི་མཛད་སྒོར། བོད་ཀྱི་གླུ་བ་གླུ་མ་གང་མང་གདན་འདྲེན་ཞུས་ཡོད་དེ། གླུ་མ་ཚེ་རིང་གཡང་འཛོམས་དང་ཚེ་རིང་འཛོམས་སྐྱིད། གླུ་བ་བཀྲ་ཤིས་ཉི་མ། དབྱངས་ཅན་ལྷ་མཛེས། བསམ་གྲུབ་ཚེ་རིང་། རིག་འཛིན་སྒྲོལ་མ། རྡོ་བ་ཚེ་སྐྱིད། གནམ་བླ་ཐར་དང་རིན་ཆེན་དོན་གྲུབ་སོགས་ཀྱིས་གླུ་གཞས་སྣ་ཚོགས་ཕུལ་ཏེ་གཟིགས་མོ་བ་རྣམས་ཀྱི་ཡིད་ཀྱི་དང་བ་དབང་མེད་དུ་བཀུག
བྱེད་སྒོ་འདི་སྤེལ་བའི་དམིགས་ཡུལ་ནི། སྲོལ་རྒྱུན་རིག་གནས་དར་སྤེལ་དང་། མི་རིགས་ཀྱི་སྒྱུ་རྩལ་རྣམ་པ་ངོམ་པ། རིགས་སོ་སོ་ཕན་ཚུན་འབྲེལ་འདྲིས་དང་ཕན་ཚུན་སློབ་སྦྱོང་། ཕན་ཚུན་བརྩི་འཇོག མཉམ་དུ་འཕེལ་རྒྱས་བཅས་བྱས་ཏེ། ཀྲུང་ཧྭ་མི་རིགས་གཅིག་འདུས་འདུ་ཤེས་སྲ་བརྟན་དང་། མི་རིགས་སོ་སོ་ལྷན་དུ་མཐུན་སྒྲིལ་མདུན་སྐྱོད་དང་ལྷན་དུ་འཕེལ་རྒྱས་སུ་འགྲོ་བར་ནུས་ཤུགས་དང་བྱས་རྗེས་འཇོག་པ་དེ་ཡིན།
ཐེངས་འདིའི་བྱ་འགུལ་སྟེང་རྒྱལ་ཡོངས་ཀྱི་ལྗོངས་ཞིང་ལྔའི་གླུ་བ་གླུ་མ་དག་གདན་འདྲེན་བྱས་ཡོད་ལ། ཡུལ་སྐད་ཆེན་པོ་གསུམ་ཚན་ཁག་རེ་རེར་བགར་ནས་འགྲན་སྡུར་བྱས་པ་རེད།
འགྲན་སྡུར་གྱི་གོ་རིམ་ཆ་ཚང་མཚོ་ལྷོ་ཁུལ་ཚགས་པར་ཁང་དང་གངས་ལྗོངས་མེ་ལོང་དྲ་བ། གངས་ལྗོངས་མེ་ལོངAPPབརྒྱུད་ནས་ཐད་གཏོང་བྱ་རྒྱུ་ཡིན་པ་དང་གསར་འགྱུར་སྨྱན་སྦྱོར་མང་པོས་ཡུལ་དངོས་ཀྱི་གནས་ཚུལ་སྐབས་ཐོག་ཏུ་ཐད་གཏོང་བྱས་ལ་མང་ཚོགས་ཚོས་དགའ་བསུ་བླ་མེད་ཐོབ་ཡོད།
