དབྱར་ཟླ་བདུན་པའི་བྱང་ཐང་དུ། སྤང་སྔོན་མོ་གདན་ལ་བཏིང་། དགུང་ཨ་སྔོན་ཐོད་དུ་བཟུང་། ཡངས་ཤིང་རྒྱ་ཆེ་བའི་རྩྭ་ཐང་སྟེང་ན་གྱི་ལིང་གི་བང་རྩལ་འགྲན་པའི་དུས་ཆེན་གཉེར་བ་དེ་ནི། རྩྭ་ཐང་གི་མི་དམངས་ཀྱིས་རང་བྱུང་ཁམས་ལ་མཚོན་པའི་གུས་ལུགས་དང་མཛེས་སྡུག་ལྡན་པའི་འཚོ་བར་བཅངས་པའི་རེ་སྨོན་རེད།
མཇུག་འགྲིལ་མ་ཐག་པའི་ནག་ཆུ་གྲོང་ཁྱེར་ཤན་རྩྭ་རྫོང་སྨད་པ་ཞང་གི“གྲོང་གསེབ་དར་རྒྱས། ནག་ཆུས་མདུན་སྐྱོད”ཅེས་པའི་གྲུབ་འབྲས་འགྲེམས་སྟོན་དང་དམུ་ཁྱུ་མཚོའི་རྟ་རྒྱུག་བྱེད་སྒོར་གསར་འགོད་པས་རྟ་ཐོག་གི་བྱང་ཐང་དང་མཛེས་པའི་བོད་ལྗོངས་ཀྱི་ཉམས་བཟང་ཁྱེད་ཀྱི་སྤྱན་སྔར་འབུལ་ལོ།
དཔའ་རྩལ་གྱི་མཛེས་པ། ཉིན་བཞི་ཡི་རིང་། བར་ཐག་རིང་ཐུང་མི་འདྲ་བའི་རྟ་རྒྱུག་དང་རྟ་རྩལ་འགྲན་བསྡུར་སོགས་རེས་མོས་ཀྱིས་བྱས་པ་དང་། བང་རྩལ་བཟང་བའི་གྱི་ལིང་རྟ་མཆོག་དང་ཉམས་དོད་པའི་རྟ་པས་རྩྭ་ཐང་གི་དཔའ་རྩལ་ཅི་དགར་ངོམས།
རྟ་རྒྱུག་ཙམ་མ་ཟད། ཐག་པ་འཐེན་པ་དང་རྡོ་འགྱོགས་པ་སོགས་ཤེད་ཤུགས་དང་རྩལ་འགྲན་གྱི་འགྲན་བསྡུར་ལས་རྩྭ་ཐང་མི་དམངས་ཀྱི་དཔའ་རྩལ་དེ་བས་མངོན།
མི་ཆོས་ཀྱི་མཛེས་པ། རྟ་རྒྱུག་འགྲན་བསྡུར་ནི་རྩྭ་ཐང་གི་དུས་ཆེན་གཟབ་རྒྱས་ཤིག་རེད། ཉེ་རྒྱང་གང་སར་གནས་པའི་མང་ཚོགས་ཀྱིས་ལུས་ལ་བཀྲག་མདངས་ཆེ་བའི་མི་རིགས་ཀྱི་གཟབ་མཆོར་སྤྲས་ཏེ་ཤོམ་སྟོན་ལ་ཞུགས་པའམ་རང་དགར་ཁྲོམ་ལ་བསྐོར་ཏེ་གང་སར་ལྟ་བས་མི་ངོམ།
རྟ་རྒྱུག་དུས་ཆེན་ནི་དམངས་སྲོལ་རིག་གནས་ཀྱི་འགྲེམས་སྟེགས་ཆེན་པོ་ཞིག་རེད། མི་རིགས་ཀྱི་ཁྱད་ཆོས་ལྡན་པའི་འགོ་ཚུགས་མཛད་སྒོའི་གླུ་གར་དང་སྤྲོ་སེམས་རབ་ཏུ་འཁོལ་བའི་མེ་ཕུང་སྒོར་གཞས་སོགས་ལས་ཕུལ་བྱུང་གི་སྲོལ་རྒྱུན་རིག་གནས་གང་ལེགས་ངོམས་ཏེ་རྩྭ་ཐང་དུ་དགའ་བས་མྱོས།
བྱེད་སྒོ་སྤེལ་རིང་། སྨད་པ་ཞང་གི་སྐབས་གསུམ་པའི“གྲོང་གསེབ་དར་རྒྱས། ནག་ཆུས་མདུན་སྐྱོད”བྱེད་སྒོ་ཁག་གི་བྱ་དགའ་ཐོབ་མཁན་རྣམས་ལ་གཟི་བརྗིད་ལག་ཁྱེར་དང་གཟེངས་རྟགས་རག་པ་མ་ཟད། མང་ཚོགས་ཀྱི་ལས་སྒྲུབ་ལས་གཏོད་ཀྱི་ཧུར་སེམས་ཀྱང་འཕེལ་ཡོད།
རྟ་རྒྱུག་དུས་ཆེན་ནི་དགའ་འཛོམས་ཀྱི་དུས་ཆེན་ཞིག་རེད། ལོ་གཅིག་དཀའ་བ་སྤྱད་པའི་འབྲོག་པ་མང་ཚོགས་རྣམས་རང་རང་སོ་སོའི་མཚེར་སར་མཉམ་དུ་འཛོམས་ནས་གྲུབ་འབྲས་གསར་པ་གླེང་། འབྲོག་པའི་སྒྲོག་འགྲེལ་པའང་སྦྲ་གུར་ནང་འཛུལ་ནས་ཚང་མ་དང་མཉམ་དུ་བདེ་སྐྱིད་ལྡན་པའི་བྱ་བ་གླེང་བ་དང་འཚོ་བ་གསར་པར་བསྟོད་གླུ་ལེན་ཞིང་། ཚང་མས་ཏང་གི་བཀའ་ལ་ཉན་པ་དང་། ཏང་གི་བཀའ་དྲིན་ཚོར་བ། ཏང་གི་རྗེས་སུ་འབྲང་བའི་གདེང་ཚོད་དང་ཆོད་སེམས་སྔར་བས་བརྟན་དུ་སོང་།
དམངས་སྲོལ་གྱི་མཛེས་པ། རྟ་རྒྱུག་འགྲན་ལ་བག་ཆགས་པའི་དམངས་སྲོལ་ཡང་འགྲན། སྨད་པ་ཞང་གི་རྟ་རྒྱུག་དུས་ཆེན་གཉེར་ཚུལ་ཐོས་འཕྲལ། བྱིས་པའི་རྩེད་ཆས་འཚོང་བར་ཡོང་བའི་ཡུན་ནན་གྱི་ཚོང་པ་ཞིག་ལམ་ནོར་ཐེབས་ནས་རླངས་འཁོར་འདམ་དུ་ཚུད། ལ་དུག་བརྒྱབ་པའི་ཁར་གྲོད་པ་ལྟོགས་པའི་ཚོང་པ་དེས་ཐབས་ཤེས་གང་ཡོད་བཏང་ཡང་རླངས་འཁོར་འདམ་ལས་འདོན་ཐབས་བྲལ་བ་མ་ཟད་རླངས་འཁོར་མགོ་རྟིང་ལོག་པའི་ཉེན་ཁ་ཡང་ཡོད། ཉེ་འགྲམ་གྱི་གྲོང་མིས་མཐོང་རྗེས་ཚང་མ་རོགས་རམ་བྱེད་དུ་ཡོང་བ་མ་ཟད། རོགས་སྐྱོབ་སྙན་སེང་ཡང་ཞུས་པས། མཐར་མངགས་གཏོང་ཁང་གི་མི་དམངས་ཉེན་རྟོག་པ་དང་། གྲོང་སྡོད་ལས་དོན་རུ་མི། གྲོང་ཚོའི་ལས་བྱེད་པ་དང་གྲོང་མི་བཅས་ཀྱི་རོགས་རམ་འོག་རླངས་འཁོར་འདམ་ལས་འདོན་ཐུབ་པ་རེད།
རྩོམ་སྒྲིག་པ། སྣང་རྡོར།
