ལོ་ངོ་སྟོང་གི་ལོ་རྒྱུས་ལྡན་པའི་མི་རིགས་གསོ་རིག་གི་མཆོག་ནོར།
སྤེལ་དུས 2024-11-22
ཡོང་ཁུངས། ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་བོད་སྐད་རླུང་འཕྲིན།
རྩོམ་པ་པོ།
བོད་ཀྱི་གསོ་བ་རིག་པར་ལོ་ངོ་3800ལྷག་གི་ལོ་རྒྱུས་ལྡན་ཡོད་ཅིང་། བོད་ལྗོངས་བདུད་རྩི་བོད་སྨན་ཀུང་སི་ནི་བོད་སྨན་ཞིབ་འཇུག་དང་། ལས་སྣོན། ཐོན་སྐྱེད། ཕྱིར་ཚོང་བཅས་གཞི་གཅིག་ཏུ་འདུས་པའི་དེང་རབས་ཅན་གྱི་བོད་སྨན་ཁེ་ལས་ཞིག་ཡིན་པ་དང་། དེ་ནི་བོད་ཀྱི་གསོ་བ་རིག་པའི་འཕེལ་རྒྱས་ལོ་རྒྱུས་ཀྱི་འགྱུར་རྡོ་གསོན་པོ་ཞིག་ཡིན་ཞེས་བརྗོད་ཆོག་གི་ཡོད།
བོད་སྨན་ཀུང་སི་དེ་ནི་དང་ཐོག་སྤྱི་ལོ་1696ལོར་ཕྱག་བཏབ་པའི་ལྕགས་པོ་རི་རིག་བྱེད་འགྲོ་ཕན་གླིང་ནས་རིམ་བཞིན་འཕེལ་རྒྱས་བྱུང་བ་ཞིག་ཡིན་ཞིང་། ད་བར་ལོ་ངོ་ 300ལྷག་ཙམ་གྱི་ལོ་རྒྱུས་ལྡན་ཡོད་པ་རེད། བོད་ལ་ཞི་བས་བཅིངས་འགྲོལ་བཏང་རྗེས་ཏང་དང་སྲིད་གཞུང་གི་ཤུགས་ཆེའི་རྒྱབ་སྐྱོར་འོག་སྤྱི་ལོ་1961ལོར་བོད་སྨན་ཀུང་སི་འདི་ཉིད་རྒྱ་བསྐྱེད་གསར་བཞེངས་བྱས་ཤིང་། སྐབས་དེར་བོད་རང་སྐྱོང་ལྗོངས་ལྷ་ས་སྨན་རྩིས་ཁང་སྨན་སྦྱོར་སྡེ་ཁག་ཞེས་པ་དབུ་བརྙེས་པ་དང་། དེ་ནས་སྤྱི་ལོ་2002ལོའི་ཟླ་བ་6པར་བོད་རང་སྐྱོང་ལྗོངས་བོད་སྨན་བཟོ་གྲྭ་ཞེས་པར་མིང་བསྒྱུར་བྱས། སྤྱི་ལོ་2012ལོར་བོད་རང་སྐྱོང་ལྗོངས་བོད་སྨན་བཟོ་གྲྭའི་སྒྲིག་གཞི་བསྒྱུར་བཅོས་ཀྱི་སྲིད་ཇུས་འོག་བོད་ལྗོངས་བདུད་རྩི་བོད་སྨན་མ་རྐང་ཚད་ཡོད་ཀུང་སི་ཞེས་པར་དངོས་སུ་མིང་བསྒྱུར་བྱས་ཡོད།
བདུད་རྩི་བོད་སྨན་ཀུང་སིས་སྔ་ཕྱི་བར་གསུམ་དུ་རྒྱལ་ཁབ་ཀྱི་སྨན་རྫས་ཐོན་སྐྱེད་ལས་སྣོན་གྱི་འབྲེལ་ཡོད་ཚད་གཞི་བརྩི་སྲུང་ནན་པོ་ཞུས་ཏེ་སྨན་གྱི་སྦྱོར་སྡེ་ཚད་དང་ལྡན་པ་དང་། སྨན་རྒྱུ་ཁུངས་བཙན་པ། ནད་ཐོག་སྨན་བཅོས་ཀྱི་མཐའ་མའི་དམིགས་ཡུལ་དང་མཐུན་པ་བཅས་ཀྱི་ཐོག་ནས་བོད་སྨན་ཐོན་སྐྱེད་ཀྱི་བྱ་གཞག་ནང་ཧུར་ཐག་ཞུགས་པས་བདུད་རྩི་བོད་སྨན་གྱི་སྙན་གྲགས་ཕྱོགས་བཞིར་ཁྱབ་ཡོད།
མིག་སྔར་ཀུང་སི་དེས་ལོ་ལྟར་ཐག་རིང་ལུང་ཁུག་དང་། རྒན་གསོ་ཁང་། དྭ་ཕྲུག་ཁང་སོགས་ལ་ནད་ཐོག་སྨན་བཅོས་ཀྱི་འབྲེལ་ཡོད་ཤེས་བྱ་དྲིལ་བསྒྲགས་དང་། གཟུགས་པོའི་བརྟག་དཔྱད། རིན་མེད་སྨན་སྤྲོད་པ་སོགས་ཀྱི་བྱེད་སྒོ་རབ་དང་རིམ་པ་སྤེལ་ནས་རྒྱ་ཆེའི་མང་ཚོགས་ལ་དངོས་དངོས་རྗེན་རྗེན་གྱི་ཕན་པ་སྐྲུན་བཞིན་ཡོད།
ལོ་མང་ནང་། བདུད་རྩི་བོད་སྨན་གྱིས་ལོ་རྒྱུས་རིང་བའི་སྲོལ་རྒྱུན་དང་། ཆེད་ལས་ཀྱི་ལག་རྩལ། རྩེར་སོན་བཏོད་པའི་སྙིང་སྟོབས་བཅས་རྒྱུན་འཛིན་དར་སྤེལ་བཏང་བས་ལོ་བརྒྱའི་ཚོང་རྟགས་དེ་ཡང་རིམ་བཞིན་མང་ཚོགས་ཀྱི་སེམས་ལ་ཟུག་ནས་ཚང་མས་ཁས་ལེན་དང་གདེང་འཇོག་ཡག་པོ་བྱེད་ཀྱི་ཡོད། སྤྱི་ལོ་2023ལོར་ཀུང་སི་དེར་བོད་ཀྱི་གྲགས་ཅན་ཚོང་རྟགས་རྙིང་པའི་མཚན་སྙན་ཐོབ་པ་དང་། སྤྱི་ལོ་2024ལོར་ཀྲུང་ཧྭའི་ཚོང་རྟགས་རྙིང་པའི་མཚན་སྙན་ཐོབ་ཡོད།
