སློབ་གྲྭ་ཆེ་མོ་བ་ལས་ཞུགས་སྐབས་རྟག་ཏུ“གདམ་ག་གཅིག་གིས་ཚེ་གང་ཐག་ཆོད་པའི”བསམ་བློ་གཏོང་རྒྱུ་མེད།
སྤེལ་དུས 2018-10-15
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ།
རྩོམ་པ་པོ། མིག་དམར།
གྲོགས་པོ་གསར་རྙིང་མཉམ་དུ་འཛོམ་སྐབས་ག་དུས་ཡིན་རུང་རང་གི་ཕྲུ་གུ་ལས་ཞུགས་ཐུབ་པའི་སྐོར་གླེང་གི་ཡོད། ཕྲུ་གུ་ཚོར་མཚོན་ན། ལས་ཞུགས་ནི་བརྩོན་འགྲུས་ཀྱི་སྐྱ་བར་བརྟེན་ནས་ལོ་བཅུ་ལྷག་ཙམ་སློབ་སྦྱོང་བྱས་རྗེས་འཕྲད་པའི“རྒྱུགས་ཆེན”གལ་ཆེན་ཞིག་རེད། ཁྱིམ་བདག་ལ་མཚོན་ན། སེམས་ཁྲལ་ཆེན་པོ་ཞིག་དང་ཟས་བརྗེད་གཉིད་བཅག་གི་དོན་ཆེན་ཞིག་དེ་བས་ཀྱང་རེད།
རང་ལྗོངས་ཀྱི་སློབ་གྲྭ་ཆེ་མོ་བའི་ལས་ཞུགས་ཀྱི་གདམ་ག་དང་པོ་ནི་གཞུང་ཞབས་པ་རེད། འདི་ནི་མི་མང་ཆེ་བའི་གདམ་ག་རེད། གང་ལགས་ཤེ་ན། གཞུང་ཞབས་པར་ཡིག་རྒྱུགས་ལོན་རྗེས། “གསེར་ཕོར”རག་པ་མཚོན་པ་དང་། ལས་ཀ་བརྟན་པོ་རག་པ་དང“ཚེ་གང་ལས་ཞུགས་ཐུབ་པ”མཚོན་པའི་ངོས་འཛིན་བྱེད་ཀྱི་ཡོད།
སློབ་གྲྭ་ཆེ་མོ་བས་ལས་ཞུགས་བྱེད་པར“གདམ་ག་གཅིག་གིས་ཚེ་གང་ཐག་ཆོད་པའི”བསམ་བློ་སྔ་ཙམ་ནས་འདོར་དགོས་པ་དང་། ལས་ཞུགས་ཐུབ་པ་ནི་རྟག་ཏུ་བརྟན་པོ་ཡིན་པའི་བསམ་བློ་འཆང་མཁན་ནི་དོན་དངོས་དང་མ་མཐུན་པ་ཞིག་རེད། དོན་དུ་སྤྱི་ཚོགས་ཀྱི་ལས་རིགས་ཁག་མི་འདྲ་རུང་། བརྟན་པོ་ནི་བལྟོས་བཅས་རེད། ཕ་མ་ཞིག་གི་ངོས་ནས་བརྗོད་ན། ཕྲུ་གུས་དཀའ་ལས་རྒྱག་མི་དགོས་པར་ཡོང་འབབ་བརྟན་པོའི་ལས་ཀ་ཞིག་རག་རྒྱུའི་བསམ་བློ་དོར་ཏེ། ཕྲུ་གུར་རང་ཉིད་ཀྱིས་གདམ་ག་དང་རང་བརྟེན་ལས་གཏོད་བྱེད་དགོས་པའི་སྐུལ་ལྕག་མང་ཙམ་བྱ་རྒྱུའི་རེ་བ་ཡོད་དགོས།
ང་ཚོས་དགའ་ཚོར་ཆེན་པོའི་ངང་མཐོང་དགོས་པ་ཞིག་ལ། མཐོ་སློབ་ཁག་གིས་སློབ་གྲྭ་ཆེ་མོ་བའི་ལས་ཞུགས་ལ་མཛུབ་ཁྲིད་བྱེད་ཤུགས་ཆེ་རུ་བཏང་བ་དང་། དེ་བཞིན་རྒྱལ་ཁབ་དང་རང་སྐྱོང་ལྗོངས་ཀྱི་རིམ་ཁག་སྲིད་གཞུང་དང་སྡེ་ཚན་གྱིས་མཐོ་སློབ་སློབ་ཐོན་སློབ་མར་གཞི་རིམ་དུ་ལས་ཞུགས་བྱེད་པའི་གཟིགས་སྐྱོང་སྲིད་ཇུས་སྔ་རྗེས་སུ་བཏོན་པས། སློབ་གྲྭ་ཆེ་མོ་བ་མང་པོ་ཞིག་གི་འདུ་ཤེས་ལ་འགྱུར་ལྡོག་འགྲོ་འགོ་ཚུགས་ནས་གཞི་རིམ་དང་ཞིང་འབྲོག་ཁུལ་དུ་ལས་ཞུགས་བྱེད་འདོད་ཡོད་པ་དང་། རང་བརྟེན་གསར་གཏོད་བྱེད་འདོད་བྱེད་ཀྱི་ཡོད།
ལྷག་པར་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས“དམངས་ཀྱིས་བྱ་གཞག་སྐྲུན། ཀུན་གྱིས་གསར་གཏོད་བྱེད”པའི་ལས་དོན་ཤུགས་ཆེན་སྤེལ་ནས་སྐུལ་འདེད་བཏང་བས། ལྗོངས་ཡོངས་སུ“དམངས་ཀྱིས་བྱ་གཞག་སྐྲུན། ཀུན་གྱིས་གསར་གཏོད་བྱེད”པའི་རྣམ་པ་བཟང་པོ་རགས་ཙམ་ཆགས་ཡོད། རང་ལྗོངས་ཀྱིས་སློབ་གྲྭ་ཆེ་མོ་བས་རང་བརྟེན་ལས་གཏོད་བྱེད་པར་ཁྲལ་འབབ་དང་དངུལ་བུན་སོགས་ཀྱི་ཕྱོགས་མང་པོའི་ཐད་ནས་གཟིགས་སྐྱོང་སྲིད་ཇུས་བཏོན་ཡོད་པས། རང་བརྟེན་ལས་གཏོད་ལ་སྐུལ་ལྕག་དང་རང་བརྟེན་ལས་གཏོད་ལས་ཞུགས་ཀྱི་ཁ་ཕྱོགས་གསར་པ་ཞིག་ཏུ་གྱུར་ཡོད།
