བཟའ་ཚང་ཐོར་བའི་ཕ་མ་ལ། བྱིས་པར་མཇལ་བའི་དབང་ཆ་ཡོད།
སྤེལ་དུས 2017-08-30
ཡོང་ཁུངས། ཀྲུང་གོའི་བོད་ཀྱི་དྲ་བ།
རྩོམ་པ་པོ། ནོར་བུས་བསྒྲིགས།
ཁྱོ་ཤུག་ཐོར་ནས་མ་བུ་ཁ་བྲལ་དུ་སོང་ཡང་། བྱིས་པ་ཐད་ཀར་གསོ་སྐྱོང་མི་བྱེད་པའི་ཁྱོ་ཤུག་གང་རུང་ལ་རང་གི་བྱིས་པར་ཐུག་འཕྲད་བྱེད་པའི་དབང་ཆ་ཡོད། ལྷ་མོ་དང་དཀོན་མཆོག་གཉིས་བཟའ་ཚང་ཐོར་སྟེ་གྲོས་ཆམས་ཡི་གེ་བྲིས་ནས་བུ་མོ་སྒྲོལ་མ་ཕ་ཡིས་གཉོར་སྐྱོང་བྱེད་རྒྱུ་བྱས། ཁྱོ་ཤུག་ཁ་བྲལ་རྗེས། དཀོན་མཆོག་གིས་བུ་མོ་ཨ་མྱེས་ཀྱི་ཁྱིམ་ལ་བསྐྱེལ་ཏེ་གཞན་ཡུལ་དུ་ཞོར་ལས་ལ་སོང་། ལྷ་མོས་བཟའ་ཚང་ཁ་བྲལ་བ་ནས་བཟུང་རང་གི་བུ་མོ་ཤིན་ཏུ་དྲན་པས་རྟག་ཏུ་དངོས་པོ་སྣ་ཚོགས་ཉོས་ཏེ་བུ་མོར་ལྟ་རུ་སོང་བ་མ་ཟད། གུང་སེང་སྐབས་སུ་བུ་མོ་རང་ཁྱིམ་དུ་ཁྲིད་ཡོང་འདོད་མོད། དཀོན་མཆོག་གི་ཕ་མ་གཉིས་གཏན་ནས་འཐད་པ་མ་བྱུང་། དེ་ནས་མོ་ལ་ཐབས་གཞན་མེད་པས་ཁྲིམས་ཁང་ལ་གཏུག་བཤེར་བྱས། ཁྲིམས་ཁང་གིས་ཞིབ་བཤེར་བྱས་རྗེས། ཕ་མ་བུ་ཕྲུག་ལ་ཐུག་འཕྲད་བྱེད་པའི་དབང་ཆ་ཡོད་ཟེར་བ་ནི། ཕ་མ་གཉིས་བཟའ་ཚང་ཐོར་རྗེས། བུ་ཕྲུག་ལ་ཁ་བྲལ་བའི་ཕ་མ་སུ་ཡིན་ཀྱང་དུས་ཚོད་དང་ས་གནས་གང་རུང་ནས་རང་གི་བྱིས་པར་འཇལ་བའི་དབང་ཆ་ཡོད། 《གཉེན་སྒྲིག་བཅའ་ཁྲིམས》ཀྱི་དོན་ཚན་༣༨པའི་གཏན་ཁེལ་ལྟར་ན། བཟའ་ཚང་ཐོར་རྗེས། ཐད་ཀར་དུ་བུ་ཕྲུག་གསོ་སྐྱོང་མི་བྱེད་པའི་ཕའམ་མ་གང་རུང་བུ་ཕྲུག་ལ་ཐུག་འཕྲད་བྱེད་པའི་དབང་ཆ་ཡོད་ལ། ཅིག་ཤོས་ལ་མཐུན་རྐྱེན་སྒྲུབ་པའི་འོས་འགན་ཡོད། ལྷ་མོ་ས་ཆ་གཞན་དུ་ཡོད་པས་མོ་རང་དང་ལྷན་དུ་བུ་མོ་རང་ཡུལ་ལ་ཁྲིད་ནས་འཚོ་བ་རོལ་ཏེ་མ་བུའི་བརྩེ་འདང་ཇེ་ཟབ་ཏུ་གཏོང་འདོད་པ་དེ་ལུགས་དང་མཐུན་ལ་ཁྲིམས་ལའང་མཐུན་པ་རེད། དེར་བརྟེན་ཁྲིམས་ཁང་གིས་མཐར་ལྷ་མོས་ལོ་རེའི་༼ལྔ་གཅིག༽དང་གུང་སེང་གི་སྐབས་སུ་བུ་མོ་རང་ཁྱིམ་ལ་ཁྲིད་ནས་མཉམ་དུ་འཚོ་བ་རོལ་ཆོག་པ་དང་། སློབ་སྦྱོང་དང་འཚོ་བར་གནོད་པ་ཐེབས་མི་ཆོག་པའི་ཐག་བཅད།།