ཉི་མ་བཀག་ན་ཁྲིམས་འགལ་ཡིན།
སྤེལ་དུས 2020-01-02
ཡོང་ཁུངས། སེམས་ཀྱི་ཞིང་ཁམས།
རྩོམ་པ་པོ།
དགུན་དུས་ཟིན་པས་ཉིན་རེ་ལས་མི་རྣམས་ལ་ཉི་འོད་དང་དཀར་ཆའི་དགོས་མཁོ་ཇེ་ཆེར་འགྲོ་བཞིན་ཡོད། དེའི་དབང་གིས་གྲོང་པ་ཁྱིམ་མཚེས་བར་རྩོད་གླེང་དང་ཐ་ན་ཁ་མཆུ་ཡང་ཡོང་གི་ཡོད། འོ་ན་ང་ཚོས་རང་ཉིད་ལ་དབང་བའི་ཉི་འོད་དང་དཀར་ཆ་ཅི་ལྟར་བརྩོན་ལེན་བྱ་དགོས་ཞེ་ན།
ཉི་འོད་དང་དཀར་ཆའི་དབང་ཆ་ཞེས་པ་ནི་ཁང་པའི་བདག་པོའམ། ཡང་ན་ཁང་པ་བེད་སྤྱོད་བྱེད་མཁན་ལ་ཕྱི་རོལ་ནས་ཉི་འོད་དང་དཀར་ཆ་འཕྲོ་རྒྱུའི་དབང་ཆ་ལོངས་སུ་སྤྱོད་པར་ཟེར། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གྲོང་ཁྱེར་ནང་གི་ཚད་ལྡན་སྡོད་ཁུལ་འཆར་འགོད་གཏན་འབེབས་ནང་། གྲོང་ཁྱེར་ཆེན་མོའི་ནང་གི་སྡོད་གནས་ཁུལ་དུ་ཉི་མ་ཕོག་ཚད་དེ་གྲང་ངར་ཆེ་སྐབས་ཉི་མ་རེར་ཆུ་ཚོད་གཉིས་ལས་མི་ཉུང་བ་དང་། དགུན་ཉི་ལྡོག་སྐབས་ཉི་མ་རེར་ཆུ་ཚོད་གཅིག་ལས་མི་ཉུང་བ། རྒན་འཁོགས་སྡོད་གནས་ཁུལ་འཛུགས་སྐྲུན་བྱེད་སྐབས་དགུན་ཉི་ལྡོག་སྐབས་ཉི་མ་རེར་ཆུ་ཚོད་༢ལས་མི་ཉུང་བ་དགོས་པ་དང་། སྔར་ཡོད་ཀྱི་འཆར་འགོད་སྟེང་རྗེས་སུ་ཨར་སྐྲུན་འཕར་མ་གང་ཞིག་བརྒྱབ་ཀྱང་གྲོང་པ་ཁྱིམ་མཚེས་ཀྱི་སྔར་ཡོད་ཀྱི་ཉི་འོད་འཕྲོ་ཚད་ལ་སྐྱོན་མི་ཕོག་པར་བྱ་དགོས། སྡོད་ཁུལ་རྙིང་པ་བསྒྱུར་བཀོད་བྱས་ཏེ་སྡོད་ཁང་གསར་པ་རྒྱག་སྐབས་ཉི་མ་ཕོག་ཚད་དེ་སྔར་ལས་ཅུང་ཉུང་ཙམ་བྱས་ཆོག་མོད། གྲང་ངར་ཆེ་སྐབས་ཉི་མ་རེར་ཆུ་ཚོད་གཅིག་ལས་མི་ཉུང་བའི་འགན་ལེན་ཐུབ་པར་བྱ་དགོས། མིག་སྔར་ཚད་གཞི་དེ་ཉི་འོད་དང་དཀར་ཆའི་དབང་ཆར་བཙན་གནོད་བྱས་ཡོད་མེད་ཀྱི་ཁྲིམས་ལུགས་ཀྱི་གཞི་འཛིན་ས་ཡིན། དེ་ཡང་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དངོས་པོའི་བདག་དབང་ཁྲིམས་ལུགས་ཀྱི་དོན་ཚན་༨༩ནང་། ཨར་སྐྲུན་བྱེད་སྐབས། རྒྱལ་ཁབ་ཀྱི་ཨར་སྐྲུན་ཚད་གཞིའི་འབྲེལ་ཡོད་གཏན་འབེབ་ལས་འགལ་ནས། གྲོང་པ་ཁྱིམ་མཚེས་ཀྱི་ཁང་པའི་ཁ་རླུང་འཁོར་རྒྱུག་དང་། དཀར་ཆ་དང་ཉི་འོད་བཀག་པ་སོགས་བྱས་མི་ཆོག ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་ཁྲིམས་སྤྱི་བགྲོས་རྩ་སྲོལ་གྱི་དོན་ཚན་༨༣ནང་། གཏན་འཇགས་ས་ཁང་གི་གྲོང་པ་ཁྱིམ་མཚེས་བར་ཐོན་སྐྱེད་བྱེད་བདེ་བ་དང་། འཚོ་བ་སྐྱེལ་བདེ་བ། མཐུན་སྒྲིལ་རོགས་རམ། འདྲ་མཉམ་ལུགས་མཐུན་གྱི་སྙིང་སྟོབས་ལྟར་ཡང་དག་པའི་སྒོ་ནས་ཆུ་འདྲེན་ཆུ་དོར་དང་། ཁ་རླུང་འཁོར་རྒྱུག འགྲོ་ལམ། ཉི་འོད་སོགས་ཀྱི་ཐད་གྲོང་པ་ཁྱིམ་མཚེས་འབྲེལ་བ་ཡག་པོ་བྱ་དགོས། གལ་སྲིད་གྲོང་པ་ཁྱིམ་མཚེས་ལ་གྱོང་གུན་ཕོག་ཡོད་ན། བཙན་གནོད་བྱེད་མཚམས་བཞག་ནས་འགལ་རྐྱེན་སེལ་བ་དང་། གྱོང་གུན་ཁ་གསབ་བྱ་དགོས་ཞེས་འཁོད་ཡོད།
རྩོམ་སྒྲིག་པ། བདེ་སྒྲོལ།