ཟླ3པའི་ཚེས1ཉིན་ཉེས་ཁྲིམས་བཟོ་བཅོས་འཆར་ཟིན་གསར་ཤོས་ལ་ནུས་པ་ཐོན་པ་དང“བར་སྣང་ནས་དངོས་པོ་གཡུག་པ”དེ་དངོས་སུ་ཉེས་ཆད་ནང་བཅུག་པ་རེད། ཉིན་དེར་ཅང་སུའུ་ཁྲང་ཀྲོའུ་ལི་དབྱང་གྲོང་ཁྱེར་མི་དམངས་ཁྲིམས་ཁང་གིས་བར་སྣང་ནས་དངོས་པོ་གཡུག་པའི་གྱོད་གཞི་ཞིག་འདྲི་གཅོད་བྱས་པ་དང་། ཞུ་སྦྱོར་ཕྱི་མ་བ་ཞུས་ཆེ་གེ་མོས་བར་སྣང་ནས་དངོས་པོ་གཡུག་པའི་ཉེས་པ་བསགས་པར་དུས་བཀག་བཙོན་འཇུག་ཟླ6བྱས་པ་དང་འབྲེལ་དངུལ་གྱི་ཆད་པ་སྒོར2000གཅོད་རྒྱུའི་ཁྲིམས་ཐག་བཅད་པ་རེད། འདི་ནི་རྒྱལ་ཡོངས་ཀྱི་བར་སྣང་ནས་དངོས་པོ་གཡུག་པའི་ནག་ཉེས་ཀྱི་གྱོད་གཞི་ཐོག་མ་ཡིན།
མི་གཞན་དང་རྩོད་པ་བྱུང་བའི་རྐྱེན་གྱིས།
ཞུས་ཆེ་གེ་མོས་སྔ་རྗེས་སུ་ཚལ་གྲི་གཉིས་ཐོག་ཁང་ནས་གཡུགས་པ་རེད།
2020ལོའི་ཉིན་ཞིག་ལ། ཞུས་ཆེ་གེ་མོ(ཁྱིམ་གསུམ་ཐོག་ཏུ་ཡོད)དང་ཝང་ཆེ་གེ་མོ་གཉིས་མ་མཐུན་པས་རྩོད་པ་བྱུང་བ་ཡིན་ལ། ཞུས་ཆེ་གེ་མོར་རེ་ཞིག་ཁོང་ཁྲོ་ཆེན་པོ་ལངས་ནས་ཐབ་ཚང་ནས་ཚལ་གྲི་ཞིག་ཁྱེར་ཡོང་བ་དང་། ཝང་ཆེ་གེ་མོས་དེ་མཐོང་མ་ཐག་མདུན་དུ་བསྐྱོད་དེ་གྲི་འཕྲོག་ཀྱང་འབྲས་བུ་མ་ཐོན་པར་ཞུས་ཆེ་གེ་མོས་ཚལ་གྲི་ཐོག་ཁང་ནས་གཡུགས་པ་རེད། ཐོག་ཁང་འོག་གི་སྡོད་དམངས་ཀྱིས་གནས་ཚུལ་དེ་ཤེས་རྗེས་ཐོག་ཁང་དུ་ཕྱིན་ནས་འདྲི་རྩད་བྱས་པ་དང་ཞུས་ཆེ་གེ་མོས་འདྲི་རྩད་བྱེད་པའི་སྐད་ཆ་ཐོས་རྗེས་སླར་ཡང་ཐབ་ཚང་དུ་ཚལ་གྲི་གཉིས་པ་ལེན་པར་བསྐྱོད་པ་དང་། ཝང་ཆེ་གེ་མོས་སླར་ཡང་མདུན་དུ་བསྐྱོད་དེ་གྲི་འཕྲོག་ཀྱང་འབྲས་བུ་མ་ཐོན་པར་ཞུས་ཆེ་གེ་མོས་ཡང་ཚལ་གྲི་གཉིས་པ་དེ་ཐོག་ཁང་ནས་གཡུགས་པ་དང་ཐོག་ཁང་འོག་གི་སྡོད་དམངས་ཀྱིས་གནས་ཚུལ་དེ་མཐོང་རྗེས་ཉེན་བརྡ་བཏང་བ་རེད།
ཁྲིམས་ཁང་གིས་ཞུས་ཆེ་གེ་མོས་བར་སྣང་ནས་དངོས་པོ་གཡུག་པའི་ཉེས་པ་བསགས་པར།
ཟླ་བ6གི་དུས་བཀག་བཙོན་འཇུག་བྱ་རྒྱུའི་ཁྲིམས་ཐག་བཅད་པ་རེད།
ལི་དབྱང་ཁྲིམས་ཁང་གིས་འདྲི་གཅོད་བྱས་པ་བརྒྱུད་ཞུ་སྦྱོར་ཕྱི་མ་བ་ཞུས་ཆེ་གེ་མོས་བར་སྣང་ནས་དངོས་པོ་གཡུགས་པའི་བྱ་སྤྱོད་དེས་མི་ལུས་ལ་གནོད་འཚེ་བཏང་མེད་པའམ་ཡང་ན་རྒྱུ་ནོར་ལ་གྱོང་གུན་ཚབས་ཆེན་བཟོས་མེད་ཀྱང་། ཐོག་ཁང་ནས་དངོས་པོ་གཡུག་པའི་བྱ་སྤྱོད་ཀྱིས་བར་སྣང་ནས་དངོས་པོ་གཡུག་པའི་བྱས་ཉེས་བསགས་ཡོད་པས།《ཉེས་ཁྲིམས》ལྟར་ཞུ་སྦྱོར་ཕྱི་མ་བ་ཞུས་ཆེ་གེ་མོས་བར་སྣང་ནས་དངོས་པོ་གཡུགས་པར་དུས་བཀག་བཙོན་འཇུག་ཟླ6བྱས་པ་དང་འབྲེལ་སྒོར2000གི་ཉེས་ཆད་བཅད།
ཁྲིམས་དཔོན་གྱིས《ཉེས་ཁྲིམས》ཀྱི་དོན་ཚན་291གི་ནང་གསེས་དོན་ཚན་དང་པོའི་ནང་གཏན་འབེབས་བྱས་དོན། འཛུགས་སྐྲུན་དངོས་པོའམ་ཡང་ན་བར་སྣང་ནས་དངོས་པོ་གཡུག་པའི་ནག་ཉེས་ཚབས་ཆེ་བའི་རིགས་ལ་དུས་བཀག་བཙོན་འཇུག་ལོ་གཅིག་མན་དང་། བཙན་ཉར་ལས་སྐུལ་ལམ་ཡང་ན་རྩིས་སྤྲོད་དོ་དམ་བྱེད་པ། དེ་མིན་ཆད་པ་གཅོད་པའམ་ཡང་ན་དངུལ་ཆད་གཅིག་པུར་གཅོད་པ་ཡིན་ཞེས་མཚམས་སྦྱོར་གནང་བ་རེད།
“བར་སྣང་ནས་དངོས་པོ་གཡུག་པ་དང་དངོས་པོ་ལྷུང་བའི་བྱ་སྤྱོད་དེས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་གནོད་འཚེ་ཚབས་ཆེན་བཟོ་བ་ཡིན་ལ། སྤྱི་ཚོགས་ཀྱི་འགལ་ཟླ་དང་རྩོད་གཞི་ཐོན་སླ་བས་ལི་དབྱང་ཁྲིམས་ཁང་གིས་ཁྲིམས་ལྟར་བར་སྣང་ནས་དངོས་པོ་གཡུག་པའི་གྱོད་གཞི་ལ་ཞིབ་གཅོད་འོས་འཚམ་བྱས་ཤིང་། ཉེས་དོན་ཁྲིམས་འཛིན་ཁྱབ་ཁོངས་ཀྱིས་བར་སྣང་ནས་དངོས་པོ་གཡུག་པའི་བཅོས་སྒྲིག་ཐད་དགེ་མཚན་ལྡན་པའི་ལན་བསྐྱོན་པ་གསར་པོར་མཚོན་ཡོད། དོགས་ཟོན་ནུས་ལྡན་དང་བར་སྣང་ནས་དངོས་པོ་གཡུག་པའི་བྱ་སྤྱོད་ཐོན་རྒྱུ་བཀག་འགོག་ནུས་ལྡན་དང་། སྤྱི་ཚོགས་ཀྱི་རིན་ཐང་ཡང་དག་ལ་ཁྲིད་སྟོན་བྱེད་པ། སྤྱི་ཚོགས་ཀྱི་དར་སྲོལ་བཟང་པོ་ཆགས་པ་བཅས་ཀྱི་ཐད་ནུས་པ་གལ་ཆེན་ལྡན་ཡོད”ཟེར། ཁྲིམས་དཔོན་གྱིས་བཅའ་ཁྲིམས་ཀྱི་གཏན་འབེབས་ཕུད་ད་དུང་མི་ཚང་མས་རང་རྟོགས་ངང་བརྩི་སྲུང་བྱས་ནས་ང་ཚོའི“མགོ་ཐོག་གི་བདེ་འཇགས”ལ་ཐུན་མོང་ཐོག་སྲུང་སྐྱོང་བྱེད་དགོས་པར་དྲན་སྐུལ་བྱས་པ་རེད།
རྩོམ་སྒྲིག་པ། བདེ་སྒྲོལ།