ཁ་ས་མཚན་དགུང་དུ་ལྷ་ས་ནས་མི་7བཟུང་འདུག
སྤེལ་དུས 2020-01-15
ཡོང་ཁུངས། བོད་ལྗོངས་ཉིན་ཚགས།
རྩོམ་པ་པོ།
ཚེས་14ཉིན་གྱི་ཆུ་ཚོད་བཅུ་གཉིས་ཏག་ཏག་ལ། ལྷ་ས་གྲོང་ཁྱེར་གྱི་འབྲེལ་ཡོད་ཁྲིམས་འཛིན་ཚན་པའི་ཁྲིམས་འཛིན་ལས་དོན་མི་སྣ་དང་སྤྱི་བདེ་མི་དམངས་ཉེན་རྟོག་པས་གླིང་དབྱེ་བ་དང་ཚོགས་ཆུང་བགོས་ནས་གྲོང་ཁུལ་གྱི་རོལ་རྩེད་ཁང་ཁག་ཏུ།“ཆགས་སྲེད་རྒྱན་འགྱེད་དུག་འཐེན”གྱི་ཆེད་དོན་བཅོས་སྒྲིག་བྱ་སྤྱོད་གཅིག་སྡུད་སྤེལ་བ་དང་། ཆེད་དོན་བཅོས་སྒྲིག་གཙང་བཤེར་བྱ་སྤྱོད་དེ་གཟའ་འཁོར་གཅིག་རྒྱུན་མཐུད་སྤེལ་རྒྱུ་ཡིན་པ་རེད།
གོང་ཚེས་ཉིན་གྱི་ཆུ་ཚོད་བཅུ་གཉིས་ནས་བཟུང་ལྷ་ས་གྲོང་ཁྱེར་ནག་སེལ་གཤེད་འཇོམ་གཞུང་ལས་ཁང་དང་། དྲིལ་བསྒྲགས། རིག་གནས། མེ་ཟོན། ཁྲོམ་ར་ལྟ་འདོམས་སོགས་སྡེ་ཚན་གྱིས་མཉམ་འབྲེལ་བྱ་སྤྱོད་ལ་གཞོགས་འདེགས་དམ་ཟབ་བྱས་པ་དང་། ལྷ་ས་གྲོང་ཁྱེར་རིམ་ཁག་སྤྱི་བདེ་ལས་ཁུངས་ཀྱིས་གླིང་གི་བཀོད་འདོམས་པུའུ་དང་གྲོང་ཁུལ་སྤྱི་བདེ་ཅུས་ཀྱི་སྣེ་ཁྲིད་དེ་བདེ་འཇགས་དང་། ཉེས་དོན་མྱུལ་ཞིབ། དུག་འགོག ཁྲིམས་ལུགས། ལྟ་ཞིབ་སོགས་ཉེན་རྟོག་ཚན་པས་མཉམ་དུ་མཐུན་སྦྱོར་གཞོགས་འདེགས་བྱས་ཏེ་ལྷ་ས་གྲོང་ཁྱེར་ཡོངས་ཀྱི་རོལ་རྩེད་ཁང་དུ“ཆགས་སྲེད་རྒྱན་འགྱེད་དུག་འཐེན”གྱི་ཆེད་དོན་བཅོས་སྒྲིག་གཙང་བཤེར་བྱ་སྤྱོད་གཅིག་སྡུད་སྤེལ་བ་རེད། བྱ་སྤྱོད་ཀྱི་གཙོ་གནད་ནི་དུས་འགོར་མཐིལ་རྟོགས་ཁོང་དུ་ཆུད་པའི་གནད་དོན་གྱི་ཁུངས་སྣེ་དང་བདེ་འཇགས་ཀྱི་ཟང་ཟིང་གནད་དོན་དང་། དེ་བཞིན་གནས་གཏན་འཁེལ་གྱི་ས་ཁོངས་དང་ལམ་དུམ་དུ་འཆལ་སྤྱོད་བྱེད་སྤྱོད་རེ་ཟུང་སྤེལ་བར་དམིགས་ཏེ་རྡུང་རྡེག་བཏང་བ་དང་བཅོས་སྒྲིག་བྱས་པ་རེད།
གསར་འགོད་པར་ལྷ་ས་གྲོང་ཁྱེར་སྤྱི་བདེ་ཅུས་ནས་ཤེས་རྟོགས་བྱུང་བར། ད་ཐེངས་ཀྱི་བྱ་སྤྱོད་ལ་ཁྲིམས་འཛིན་མི་སྣ་དང་སྤྱི་བདེ་མི་དམངས་ཉེན་རྟོག་པ་ཁྱོན་750ལྷག་ཙམ་བཏང་ཡོད་པ་དང་། རོལ་རྩེད་ཁང་50དང་། གཟུགས་པོ་འཁྲུ་ཁང་3 ཇ་ཁང་2 བོགས་གཏོང་ཁང་པ་151 མགྲོན་ཁང་དང་ཨར་ཁང་21བཅས་ལ་གཙང་བཤེར་དང་། རིགས་ཁག་གི་མི་སྣ་1702ལ་གྲལ་བཤེར། མི་166ལ་གཅིན་པ་བརྟག་དཔྱད་བཅས་བྱས་པ་རེད། འཆལ་པོ་སྐོང་མཁན་7བཟུང་བ་དང་། དངུལ་ལེན་ཞབས་ཞུ་མ་34ལ་ཁྲིམས་བཞིན་ཐག་གཅོད་བྱས་ཡོད་པ་རེད།
ཤེས་རྟོགས་བྱུང་བར་གཞིགས་ན། གོམས་སྟབས་རྗེས་མར་ལྷ་ས་གྲོང་ཁྱེར་གྱིས་ཀྲུང་དབྱང་གི་ནག་སེལ་གཤེད་འཇོམ་ལྟ་སྐུལ་མཛུབ་ཁྲིད་ཚོགས་ཆུང་གི་ཚུར་ལན་བསམ་འཆར་གྱི་དགོངས་དོན་དང་རང་སྐྱོང་ལྗོངས་དང་གྲོང་ཁྱེར་ཏང་ཨུད་སྲིད་གཞུང་གི་སྤྱི་ཡོངས་ཀྱི་ལས་ཀའི་བཀོད་སྒྲིག་བླང་བྱ་སྔར་བས་ལག་བསྟར་དོན་འཁྱོལ་ནན་ཏན་བྱ་རྒྱུ་རེད་ལ། མུ་མཐུད་མི་དམངས་མང་ཚོགས་ལ་ཞབས་འདེགས་ཞུ་བ་ལྟེ་བའི་འདུ་ཤེས་ལ་བརྩིས་ནས་རིགས་ཁག་གི་ཟང་ཟིང་གི་གནད་དོན་དང་ཆགས་སྲེད་རྒྱན་འགྱེད་དུག་འཐེན་བཅས་དང་འབྲེལ་བའི་ཁྲིམས་འགལ་ཉེས་གསོག་གནད་དོན་ལ་བཅོས་སྒྲིག་བྱེད་རྒྱུ་དང་། ནག་སེལ་གཤེད་འཇོམ་གྱི་ཆེད་དོན་འཐབ་རྩོད་དེ་བས་གཏིང་ཟབ་དང་། ཚགས་ཚུད། ཏན་ཏིག་བཅས་ཀྱི་ཕྱོགས་སུ་སྤེལ་བར་སྐུལ་མ་གཏོང་རྒྱུ་ཡིན་པ་རེད།
རྩོམ་སྒྲིག་པ། བདེ་སྒྲོལ།