ཟླ་3ཚེས་9ཉིན། ལྷ་ས་གྲོང་ཁྱེར་སྤྱི་བདེ་ཅུས་ཉེས་དོན་ཉེན་རྟོག་ཉིང་ལག་རུ་ཁག་ལ་གྲོང་མི་ཞིག་གིས་གློག་སྒུལ་སྦག་སྦག་རྐུས་འདུག་ཞེས་སྙན་གསེང་ཞུས་པ་དང་། ཡང་ཉིན་གཉིས་པར། མི་དམངས་ཉེན་རྟོག་པར་སླར་ཡང་གློག་སྒུལ་སྦག་སྦག་བརྐུ་ཤོར་བའི་སྙན་གསེང་ཞིག་འབྱོར། གནས་ཚུལ་དེར་གཞིགས་ནས། ཉེས་དོན་ཉེན་རྟོག་ཉིང་ལག་རུ་ཁག་གིས་འཕྲལ་དུ་ཉེན་རྟོག་པ་བཀོད་སྒྲིག་བྱས་ཏེ། ཁྲེང་ཀོན་ཆུས་སྤྱི་བདེ་ཅུས་དོག་སྡེ་མངགས་གཏོང་ཁང་སོགས་འབྲེལ་ཡོད་སྡེ་ཚན་དང་གཞོགས་འདེགས་བྱས་ནས་ནུས་ཤུགས་ཡོད་རྒུས་བརྟག་དཔྱད་བྱས་པ་རེད།
བརྟག་དཔྱད་དང་འདྲི་རྩད་བྱས་པ་བརྒྱུད། གྱོད་སྒྲུབ་མི་དམངས་ཉེན་རྟོག་པས་ཉེས་གསོག་དོགས་ཅན་པ་གཉིས་པོའི་བྱད་གཟུགས་ཁོང་དུ་ཆུད་པ་དང་། ཟླ་3ཚེས་12ཉིན་གྱི་ཆུ་ཚོད་22ཙམ་ལ་དོགས་ཡོད་མི་སྣ་དང་འདྲ་པོ་ཡོད་པ་མ་ཟད། ཉེས་གསོག་གི་དོགས་པ་ཆེན་པོ་ཡོད་པའི་མི་གཉིས་བཟུང་བ་རེད།
ཉེས་དོན་ཉེན་རྟོག་ཉིང་ལག་རུ་ཁག་རུ་ཆེན་བཞི་པའི་མི་དམངས་ཉེན་རྟོག་པས་འདྲི་རྩད་དང་བརྟག་དཔྱད་བྱས་པ་བརྒྱུད། 2020ལོའི་ཟླ་2པ་ནས་བཟུང་། དོགས་ཡོད་ཉེས་ཅན་ཀྲང་ཆེ་གེ་མོ་དང་ཀྲོའུ་ཆེ་གེ་མོས་མཚན་མོ་མི་མེད་པའི་སྐབས་དང་བསྟུན་ནས། སྔ་རྗེས་སུ་ལྷ་ས་གྲོང་ཁྱེར་གྱི་ཁུལ་ཆུང་ཁག་དང་ལམ་འགྲམ་དུ་ལྟ་སྲུང་བྱེད་མཁན་མེད་པའི་གློག་སྒུལ་སྦག་སྦག་8བརྐུས་པ་ཤེས་རྟོགས་བྱུང་བ་རེད།
དོགས་ཡོད་ཉེས་ཅན་ཀྲང་ཆེ་གེ་མོ་དང་ཀྲོའུ་ཆེ་གེ་མོས། ཟླ་2པ་ནས་བཟུང་། རིམས་ནད་ཀྱི་རྐྱེན་པས་སྲང་ལམ་དུ་མི་ཉུང་བ་དང་། ཚོང་ཁང་མང་ཆེ་བ་སྒོ་བརྒྱབ་པ་ཤེས་པས། དེ་ནི་བརྐུ་རྒྱག་པའི་གོ་སྐབས་ཡག་ཤོས་རེད་སྙམ་ནས། སྲང་ལམ་དུ་གློག་སྒུལ་སྦག་སྦག་བརྐུ་བར་ཐེངས་མང་ཕྱིན་པས། མཐར་ཁོ་གཉིས་མི་དམངས་ཉེན་རྟོག་པས་བཟུང་བ་རེད།
རྩོམ་སྒྲིག་པ། བདེ་སྒྲོལ།